Blog

ହେଭିୱେଟ୍ ଲଢେଇରେ ବରୀ ନିର୍ବାଚନ ମଣ୍ଡଳୀ

ତିନି ଦିନ ପରେ ଯାଜପୁରରେ ପଡିବ ଭୋଟ। ଏଥିପାଇଁ ଯାଜପୁରର ବିଭିନ୍ନ ନିର୍ବାଚନ ମଣ୍ଡଳୀରେ ପ୍ରଚାର ଜୋରଦାର ଚାଲିଛି। ବରୀ ଆସନ ପାଇଁ ମଧ୍ୟ ହେଉଛି ପ୍ରଚାର। ଚଳିତ ଥର ବରୀରେ ହେବାକୁ ଯାଉଛି ଦମଦାର ଲଢେଇ। ମୈଦାନକୁ ବିଜେଡି ବିଶ୍ବରଞ୍ଜନ ମଲ୍ଲିକଙ୍କୁ ଛାଡିଥିବା ବେଳେ ବିଜେପିରୁ ଉମେଶ ଜେନା ଓ କଂଗ୍ରେସରୁ ଦେବାଶିଷ ନାୟକ ନିର୍ବାଚନୀ ରଣାଙ୍ଗନରେ ନିଜ ଦମ ଦେଖାଇ ଚାଲିଛନ୍ତି। ସମସ୍ତଙ୍କର ରହିଛି ତୃଣମୂଳସ୍ତରରେ ସଂଗଠନ। ଏପରି ସ୍ଥିତିରେ ଲୋକଙ୍କ ମତ କାହା ସପକ୍ଷରେ ଯାଉଛି ତାହା ଆସନ୍ତୁ ଜାଣିବା ବରି ନିର୍ବାଚନ ମଣ୍ଡଳୀ ଅନ୍ତର୍ଗତ ରାଜେନ୍ଦ୍ରପୁର୍ ଗ୍ରାମର ଭୋଟରଠାରୁ ଜନତାଙ୍କ ଦେଲେ ସେମାନଙ୍କ ମତ। ହେଲେ ଏହି ମତ ବାସ୍ତବରେ କେତେଦୂର ଭୋଟରେ ପରିଣତ ହେଉଛି? କାହା ସପକ୍ଷରେ ଯିବ ଜନମତ? କିଏ ଜନତାଙ୍କ ଆସ୍ଥା ଭାଜନ ହେବେ ଓ ବିଜୟ ମୁକୁଟ ପିନ୍ଧିବେ? ତାହା ଦେଖିବାକୁ ଜୁନ ୪ ତାରିଖ ପର୍ଯ୍ୟନ୍ତ ଅପେକ୍ଷା କରିବାକୁ ପଡିବ।
ବିଜେପି ମହିଳାଙ୍କୁ କେବଳ ପ୍ରଚାରରେ ସାମିଲ କରେ: ହରପ୍ରିୟା

ବିଜେଡିରେ ମିଶିଲେ ଭଦ୍ରକ ଜିଲ୍ଲାର ମହିଳା ସଶକ୍ତିକରଣର ପ୍ରତୀକ ତଥା ବିଜେପି ନେତ୍ରୀ ହରପ୍ରିୟା ସାହୁ. ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ପକ୍ଷରୁ ତାଙ୍କୁ ବିଜେଡିକୁ ସ୍ୱାଗତ କରିଛନ୍ତି ସାଂସଦ ସସ୍ମିତ ପାତ୍ର. ହରପ୍ରିୟା ସାହୁଙ୍କ ପରି ଉଚ୍ଚଶିକ୍ଷିତା. ଦକ୍ଷ ନେତ୍ରୀ ବିଜେଡିରେ ସାମିଲ ହେବା ଭଦ୍ରକ ଜିଲ୍ଲାରେ ବିଜେଡିକୁ ସଶକ୍ତ କରିବ. ବିଜେଡିରେ ସାମିଲ ହେବା ପରେ ହରପ୍ରିୟା ମଧ୍ୟ ଖୁସି ବ୍ୟକ୍ତ କରିବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ପାଣ୍ଡିଆନ, ପ୍ରଣବ ଦାସଙ୍କୁ ଧନ୍ୟବାଦ ଦେଇଛନ୍ତି। ବିଜେପିରେ କିପରି ମହିଳାଙ୍କୁ ଅସମ୍ମାନ କରାଯାଏ ତାହା ବଖାଣିଛନ୍ତି।

ଭଦ୍ରକରେ ହରପ୍ରିୟାଙ୍କ ସଂଗଠନ ବେଶ ସୁଦୃଢ ରହିଛି। ତାଙ୍କ ଦ୍ବାରା ଅନେକ ମହିଳା ମଧ୍ୟ ଆତ୍ମନିର୍ଭର ହୋଇପାରିଛନ୍ତି। ତେବେ ବିଜେପି ମହିଳାଙ୍କୁ ଉପଯୁକ୍ତ ସମ୍ମାନ ନ ଦେବାରୁ ଆଜି ସେ ବିଜେଡିରେ ସାମିଲ ହୋଇଥିବା ବେଳେ ଆଗାମୀ ଦିନରେ ବିଜେଡି ପାଇଁ ଭଦ୍ରକରେ କାମ କରିବେ ବୋଲି ବିଜେଡି ଶିବିର ଆଶା କରୁଚି
ଜୁନ୍‌ ୨ରେ ତିହାର ଯିବେ ଅରବିନ୍ଦ କେଜ୍ରିୱାଲ ?

ଅବକାରୀ ଦୁର୍ନୀତି ମାମଲାରେ ଫସିଥିବା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ସ୍ୱାସ୍ଥ୍ୟଗତ କାରଣ ଜଣାଇ ତାଙ୍କର ଅନ୍ତରୀଣ ଜାମିନ୍ ଅବଧିକୁ ସପ୍ତାହେ ବଢାଇବା ପାଇଁ ସୁପ୍ରିମକୋର୍ଟରେ ଆବେଦନ କରିଛନ୍ତି ।

ଏଠାରେ ଉଲ୍ଲେଖ ଯୋଗ୍ୟ, ଦିଲ୍ଲୀ ମଦନୀତି ଦୁର୍ନୀତିରେ ମାମଲାରେ ମାର୍ଚ୍ଚ ୨୧ରେ ପ୍ରବର୍ତ୍ତନ ନିର୍ଦ୍ଦେଶାଳୟ ଦ୍ୱାରା ଗିରଫ ହେବା ପରେ ତିହାର ଜେଲ୍ ଯାଇଥିଲେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ । କେଜ୍ରିୱାଲଙ୍କ ଅବେଦନ ଗ୍ରହଣ କରିବା ପରେ ମାମଲାର ଶୁଣାଣି କରି ତାଙ୍କୁ ଜୁନ୍‌ ୧ ପର୍ଯ୍ୟନ୍ତ ସର୍ତ୍ତମୂଳକ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିଥିଲେ ମାନ୍ୟବର ସୁପ୍ରିମକୋର୍ଟ । ଏହାସହ, ମେ’ ୧୦ ରୁ ଜୁନ୍‌ ୧ ପର୍ଯ୍ୟନ୍ତ ଲୋକସଭା ନିର୍ବାଚନ ପାଇଁ ପ୍ରଚାର କରିବାକୁ କେଜ୍ରିୱାଲଙ୍କୁ ଅନୁମତି ମଧ୍ୟ ପ୍ରଦାନ କରିଥିଲେ । ତେବେ, ଜୁନ୍‌ ୨ରେ ସୁପ୍ରିମକୋର୍ଟରେ ଆତ୍ମସମର୍ପଣ କରିବା ପୂର୍ବରୁ ନିଜର ଜାମିନ୍ ଅବଧି ଆଉ ୭ ଦିନ ବଢାଇବା ପାଇଁ ଆବେଦନ କରିଛନ୍ତି କେଜ୍ରିୱାଲ ।

କେଜ୍‌ରିଓ୍ବାଲ ତାଙ୍କ ପିଟିଶନରେ କହିଛନ୍ତି, ଗିରଫ ପରେ ସେ ୭ କିଲୋଗ୍ରାମ ଓଜନ ହରାଇଛନ୍ତି ଏବଂ ତାଙ୍କର କିଟୋନ ସ୍ତର ବୃଦ୍ଧି ପାଇଛି । ସେ ମହୁମେହ ରୋଗରେ ପୀଡିତ ହୋଇଥିବାରୁ ଏହି ଲକ୍ଷଣ ତାଙ୍କ ସ୍ୱାସ୍ଥ୍ୟ ପାଇଁ ଗମ୍ଭୀର ହୋଇପାରେ। ମ୍ୟାକ୍ସର ଡାକ୍ତରମାନେ ତାଙ୍କର ସ୍ୱାସ୍ଥ୍ୟ ପରୀକ୍ଷା କରିଛନ୍ତି ଏବଂ ଆଉ କେତେଗୁଡିଏ ପରୀକ୍ଷା କରିବାର ଆବଶ୍ୟକତା ଥିବାରୁ କେଜ୍‌ରିଓ୍ବାଲ ୭ ଦିନ ଜାମିନ ବଢ଼ାଇବାକୁ ଦାବି କରିଛନ୍ତି।

ଦିଲ୍ଲୀ ମଦନୀତି ଦୁର୍ନୀତି ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ଆପ୍ ସାଂସଦ ସଞ୍ଜୟ ସିଂହଙ୍କୁ ଜାମିନ ମିଳିଥିବା ବେଳେ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଏବେ ବି ଜେଲରେ ଅଛନ୍ତି।

ସୂଚନା ଅନୁଯାୟୀ, ୨୦୨୧ ରେ ଦିଲ୍ଲୀ ସରକାର ଏକ ନୂଆ ଅବକାରୀ ନୀତି ପ୍ରଣୟନ କରିଥିଲେ । ନୀତି ପ୍ରଣୟନ ଓ କାର୍ଯ୍ୟକାରିତାରେ ଅନିୟମିତତା ଅଭିଯୋଗର ସିବିଆଇ ତଦନ୍ତ ପାଇଁ ଏଲ-ଜି ଭିକେ ସକ୍ସେନା ୨୦୨୨ ରେ ସୁପାରିସ କରିବା ପରେ ଉଭୟ ସିବିଆଇ ଓ ଇଡି ଅନିୟମିତତା ନେଇ ମାମଲା ରୁଜୁ କରିଥିଲେ।

ALSO WATCH:
ଆଜି ଆମ ନେତାମାନେ ଅଣ୍ଟା ସିଧା କରି ଛିଡା ହେଇପାରୁ ନାହାନ୍ତି: ଶିବ ପ୍ରଧାନ

ଓଡ଼ିଶା ରାଜନୀତି ଓ ସାମ୍ପ୍ରତିକ ପରିସ୍ଥିତି ଉପରେ IT ଇଞ୍ଜିନିଅର ଶିବ ପ୍ରଧାନଙ୍କ ମତାମତ

ମୁଁ ଜଣେ ରାଜନେତା କିମ୍ବା କୌଣସି Public Figure ନୁହେଁ, ମୁଁ ଜଣେ ସାଧାରଣ ଜନତା, ବିଦେଶରେ IT ରେ ଚାକିର କରେ | ଜଣେ ସାଧାରଣ ଜନତାର ବାର୍ତ୍ତା ବାହକ ଭାବରେ ଆସିଥିବାରୁ ଆପଣମାନଙ୍କୁ ଅଶେଷ ଧନ୍ୟବାଦ ।

ପରବର୍ତ୍ତୀ କଥା ହଉଛି, କାହିଁକି ମୋ ଭଳି ଜଣେ ସାଧାରଣ ଜନତାକୁ ହଠାତ ଆପଣ ମାନଙ୍କଦ୍ୱାରା ଏପରି ବାର୍ତ୍ତା ଦେବାର ଦରକାର ପଡିଲା ? ବହୁତ ଦିନରୁ ଅନେକ ବେଦନା ଛାତିରେ ଦବିଯାଇଥିଲା, ବିଗତ କିଛି ଦିନ ହେଲା ବିଦେଶରୁ ମୁଁ ମୋର ବେଦନାକୁ ବ୍ୟଙ୍ଗ କବିତା ମାଧ୍ୟମରେ ବିଭିନ୍ନ ସାମାଜିକ ଗଣମାଧ୍ୟମରେ ଉପସ୍ଥାପନା କରି ଆସିଛି । ମୁଁ କୌଣସି ଲେଖକ କିମ୍ବା କବି ନୁହେଁ, ଯାହାବି ଲେଖିଛି ତାହା କେବଳ ମୋର ବେଦନାର ପରିପ୍ରକାଶ । କିନ୍ତୁ, ସାମାଜିକ ଗଣମାଧ୍ୟମରେ ମୋର ପହଞ୍ଚ ସୀମିତ ଲୋକଙ୍କ ପାଖରେ ଅଛି, ଭାବିଲି ଏବେ ପ୍ରକୃତ ସମୟ ମୋର ପହଞ୍ଚର ବାଳୟକୁ ଆପଣ ମାନଙ୍କ ମାଧ୍ୟମରେ ବଢ଼େଇ ମୋର ବେଦନାକୁ ସର୍ବସମୁଖରେ ରଖିବା ପାଇଁ ।

ପରବର୍ତ୍ତୀ କଥା ଏବେ କାହିଁକି? ବନ୍ଧୁଗଣ ମୁଁ ରାଜନେତା ନୁହେଁ, କିନ୍ତୁ ଦେଶ ବିଦେଶ ଯେଉଁଠି ଥିଲେବି, ରାଜ୍ୟର ରାଜନୌତିକ ଗତିବିଧି ଉପରେ ନଜର ରଖି, ମୁଁ ମୋର ଭିତରେ ରାଜନୌତିକ ସଚେତନତାକୁ ଉଜାଗର ରଖେ । ବିଗତ କିଛି ବର୍ଷର ରାଜନୌତିକ ପରିସ୍ଥିତି ମୋର ସମସ୍ତ ବେଦନାର କାରଣ । ତେଣୁ, ଜଣେ ସାଧାରଣ ଜନତା ପାଇଁ ଗଣତନ୍ତ୍ରର ଏହି ମହାପର୍ବ ହିଁ ପ୍ରକୃଷ୍ଠ ସମୟ ନିଜର ସ୍ୱରକୁ ଶାଣିତ କରି ପ୍ରଶ୍ନ କରିବା ପାଇଁ ।

ତେବେ ପ୍ରଶ୍ନ ଉଠୁଛି ମୁଁ କଣ ପାଇଁ ବ୍ୟଥିତ ଏବଂ କଣ ମୋର ବେଦନା ?

ବନ୍ଧୁଗଣ ଆମର ଜନପ୍ରତିନିଧି ମାନେ କେବଳ ଜଣେ ଜଣେ ବ୍ୟକ୍ତି ନୁଁହନ୍ତି, ୨ – ୩ ଲକ୍ଷ ଲୋକଙ୍କର ଜନ ପ୍ରତିନିଧି । ଜଣେ ଜନ ପ୍ରତିନିଧିକୁ ଅମେରୁଦଣ୍ଡୀ ପ୍ରାଣୀ ଭଳି କାହା ପାଖରେ ନତମସ୍ତକ ହେବା ଦେଖିବା ଅତ୍ୟନ୍ତ ଦୁଃକ୍ଷ ଦାୟକ ।

କାହାର ଦ୍ୱାରପାଳ ଏବଂ କ୍ରୀତଦାସ ସାଜି, ବରିଷ୍ଠ ନେତା ମାନଙ୍କୁ ମଞ୍ଚରୁ ଟାଣିବାର ଦୃଶ୍ୟ ହେଉ ବା ଟ୍ରାଫିକ ପୋଲିସ ସାଜି କାହାର ଗାଡିକୁ ବାଟ କଢେଇବାର ଦୃଶ୍ୟରେ ମୁଁ ମର୍ମାହତ । ଜଣେ ବୃଦ୍ଧ ଯେମିତି ନିଜର ପ୍ରାପ୍ତ ବୟସରେ ନିଜର ଅଣ୍ଟା ସିଧା କରି ଛିଡା ହେଇପାରେ ନାହିଁ, ଆଜି ଆମ ନେତା ମନଙ୍କର ସେହି ଅବସ୍ଥା ।

ଚାରିଶହ ବର୍ଷ ପୂର୍ବେ ଯେମିତି ବଣିଜ ପାଇଁ ଆସି ଫିରିଙ୍ଗି ଭାରତ ଶାସନ ଗଦିରେ ବସି ଆମକୁ ଗୁଲାମ ବନେଇଥିଲେ ଠିକ ସେମିତି ଜଣେ ଦକ୍ଷିଣୀ ଚାକିରୀ ପାଇଁ ଓଡିଶା ଆସି ଆମ ଶାସନ ବ୍ୟବସ୍ଥା ଉପରେ କବ୍ଜା କରି ଓଡ଼ିଆଙ୍କୁ ଗୁଲମ୍ ବାନେଇବାର ଷଡଯନ୍ତ୍ର କରୁଛନ୍ତି । ଲାଗୁଛି ଆମ ମୁଖିଆ ଏବଂ ଚାଟୁକାର ନେତା ମାନେ ଓଡିଶାକୁ ନିଜର ପୈତୃକ ସମ୍ପତି ଭାବି ଆମର ଭାଷା, ସଂସ୍କୃତି ଓ ସ୍ୱାଭିମାନକୁ ଜଣେ ଦକ୍ଷିଣୀ ସାହୁକାର ପାଖରେ ବନ୍ଧକ ରଖିଛନ୍ତି ।
ଜଣେ ଚାଷୀ ଘରର ପିଲା ଭାବେ ଆମ ଜାତିର କ୍ଷେତରେ, ସ୍ୱାଭିମାନର ଲଙ୍ଗଳ କଣ୍ଟିରେ ଜଣେ ଦକ୍ଷିଣୀ ସାହୁକାରର ହାତ ଦେଖି ଧାର୍ଯ୍ୟ ଧରିବା ମୋ ପାଇଁ ସମ୍ଭବ ନୁହେଁ । କଟା ଘା’ ରେ ଚୂନ ଦେବା ଭଳି, ଆମ ନେତା ମାନେ ବଳଦ ବାପୁଡ଼ା ପ୍ରାୟ କାନ୍ଧରେ ଜୁହାଲି ଦେବା ପ୍ରଥା ଅତ୍ୟନ୍ତ ଘୃଣ୍ୟ ।

ଇଂରେଜ ୭୬ ବର୍ଷ ତଳୁ ଗଲେଣି, ଆମର ସର୍ବସ୍ୱ ଲୁଟିଥିଲେ, ଆମଠାରୁ ଲୁଣ୍ଠିତ ଧନରେ ତାଙ୍କର ଆଗାମୀ ୧୦ ପିଢ଼ି ବି ଚଳିଯିବ । କିନ୍ତୁ ଯେତେ ବେଳେ ମୁଁ Yuval Noah Harari ଙ୍କ sapiens ବହି ପଢ଼ିଥିଲି, ମୁଁ ଅତ୍ୟନ୍ତ ଭାଙ୍ଗି ପଡ଼ିଥିଲି । ସତେ ଯେମିତି ପୂର୍ବରୁ ନା ଆମର କିଛି ଉପଲବ୍ଧି ଥିଲା ନା ଏବେ ଅଛି, ଯାହାବି ହେଇଚି ସବୁ ଆମର ପୂର୍ବ ମାଲିକ ଇଂରେଜ ମାନଙ୍କ ପାଇଁ । ଇତିହାସ ଏବଂ ସାଂସ୍କୃତିକ ଲେଖା ହେଉ ବା ଲଞ୍ଚ ଟେବୁଲର ଚର୍ଚ୍ଚା, ଗୋରା ସବୁବେଳେ ଆମକୁ ଗୁଳାମୀର hang over ଭିତରକୁ ଠେଲି ମାନସିକ ଭାବେ ଚାପର ବଶବର୍ତ୍ତୀ କରି ନିଜ ସପକ୍ଷରେ ସ୍କୋର କରିବାକୁ ପ୍ରୟାଶ କରନ୍ତି । ମୁଁ ବାଣପୁରର ଗୋଟେ ନିପଟ ମଫସଲ ଗାଁ ରୁ ଆସିଛି, କିନ୍ତୁ ମୋର ସ୍ୱଳ୍ପ ଜ୍ଞାନରେ ଲଞ୍ଚ ଟେବୁଲ ରେ ଗୋରା ଙ୍କ ବିରୁଧର ନିଜର ମଥାକୁ ସିଧାକରି ରଖିବାକୁ ଚେଷ୍ଟା କରିଛି | ଆଜି ଆମେ ପୁଣି ଗୋଟେ ଗୁଳାମୀର ଦ୍ୱାର ଦେଶରେ ଛିଡା ହେଇଛେ ।

ଯଦି ଗୁଲାମୀ ବ୍ୟକ୍ତିଗତ ହୁଏ ତେବେ ସେ ବ୍ୟକ୍ତି ମାରିବା ପରେ ସରିଥାଏ । କିନ୍ତୁ ଯଦି ଗୁଳାମୀର ଫାଶ ଜାତିରେ ଲାଗେ ତେବେ ପିଢ଼ି ପରେ ପିଢ଼ି ଗୁଲାମୀ ରେ ଘୋରି ହୁଅନ୍ତି । କଣ ଆମେ ଆମର ଆଗାମୀ ପିଢ଼ି ର ମଥାରେ ଆଉ ଗୋଟେ ଗୁଳାମୀର କାଳିମା ବୋଲିବା ପାଇଁ ପ୍ରସ୍ତୁତ ? ଜଣେ ଜନ ପ୍ରତିନିଧିଙ୍କର କାମ ରାଜ୍ୟ ପାଇଁ ନୀତି ନିର୍ଧାରଣ କରିବା । କିନ୍ତୁ ଜଣେ ନୀତି ନିର୍ଦ୍ଧାରକ କେମିତି ଜଣେ ଦକ୍ଷିଣୀ ସାହୁକାର ପାଇଁ ଟେଣ୍ଟ ବାନ୍ଧୁ ଛନ୍ତି, ସେ ଦକ୍ଷିଣୀ ସାହୁକାର ମଞ୍ଚ ଉପରେ ଏମାନଙ୍କୁ ସରକାରୀ ନୀତିର ବ୍ୟାଖ୍ୟା କରୁଛନ୍ତି ଏବଂ ଏମାନେ ମଞ୍ଚ ତଳେ ଦେକ୍ଷଣା ହାରିର ଆଣ୍ଠେଇକି ଚାଁହୁଛନ୍ତି । ଏଭଳି ଦୃଶ୍ୟ ବିରଳ ।

ମୁଁ ପ୍ରଥମେ ଯେବେ, Medical Sector କାମ କରୁଥିଲି, ମୁଁ Genetic Mutation ବିଷୟରେ ପଢ଼ିଥିଲି । ଭାବିଥିଲି Genetic Mutation କେବଳ biologically DNA Structure କୁ ପରିବର୍ତନ କରି ହୁଏ । କିନ୍ତୁ ଯେତେ ବେଳେ ଗୋଟେ documentary ଦେଖିଲି କେମିତି ଗୋଟେ ପ୍ରଜାତିର ଜନ୍ଦା, ଅନ୍ୟ ଗୋଟେ ପ୍ରଜାତିର ଜନ୍ଦାଙ୍କ ଅଣ୍ଡାକୁ ଆଣି ସେଥିରୁ ଛୁଆ ବାହାରିବା ପରେ ଗୁଲାମ କାମରେ trained କରାନ୍ତି । ତା’ ପରେ ଜାଣି ପାରିଲି Genetic Mutation Psychologically ଏବଂ Culturally ବି କରାଯାଇପାରେ । ଆମକୁ ଗୋଟେ Systematic ପଦ୍ଧତିରେ Psychological ଏବଂ Cultural Genetic Mutation କରାଯାଉଛି ।

ସେ ଦକ୍ଷିଣୀ ସାହୁକାର ଆମକୁ ଆମ ଓଡ଼ିଆ ସଂସ୍କୃତି ବିଷୟରେ ବର୍ଣନା କରିବା ଅତ୍ୟନ୍ତ ଲଜ୍ଜ୍ୟା ଜନକ । କିଛି ଲୋକ କହିପାରନ୍ତି, ସେ ଓଡ଼ିଆ ବା ଅଣ ଓଡ଼ିଆ ହୁଅନ୍ତୁ ଓଡ଼ିଆ ସଂସ୍କୃତି ବିଷୟ ରେ ଓଡ଼ିଆଙ୍କୁ ବର୍ଣନା କରିବାରେ କଣ ଅସୁବିଧା ? ଏବେ ମୁଁ flight ରେ ଆସିବା ବେଳେ ଗୋଟେ ବହି ପଢ଼ୁଥିଲି The Culture Map, ଲେଖକ କହିଲେ “କେହି ଅନ୍ୟ ଜଣେ ଆପଣଙ୍କୁ ଆପଣଙ୍କ ସଂସ୍କୃତି ବିଷୟରେ କହିବା, ଆପଣଙ୍କୁ ଆପଣଙ୍କ ମା ର ସୌନ୍ଦର୍ୟ ବର୍ଣନା କରିବା ସହ ସମାନ” | ଯଦି ମୁଁ ଦ୍ୱିତୀୟ ଟାକୁ ଗ୍ରହଣ କରୁନି ତେବେ ପ୍ରଥମ ଟାକୁ କେମିତି କରିବି ?

ଏ ଜାତିର ଲେଖକ, କବି, ବୁଦ୍ଧିଜୀବୀ ମାନେ ସଦାବେଳେ ଜାତି ସ୍ୱାଭିମାନ ପାଇଁ ସ୍ୱର ଉଠେଇଛନ୍ତି । ନେତାମାନେ ତ ପଦବୀ ପାଇଁ ଚୁପ, କିନ୍ତୁ ଏମାନଙ୍କ ଭିତରୁ ଆଧ୍ହିକାଂଶ କାହିଁକି ନିଜର ମୁହଁ ବନ୍ଦ କରିଛନ୍ତି । ବାଘ ପାଟିରେ ରଡୁଥିବା ମୁହଁ କାହିଁକି ଦିଫାଳ ହେଉନି ? କଣ ବାଘ ପାଟିରେ ଘା ହେଇଛି କି ? କିଏ ସେ ବାଘ ପାଟିରେ ଘା ସାଜିଛି ? ସେ ଘା ର ଉପଚାର ହେବା ଦରକାର କି ନୁହେଁ ?

ବେଳେବେଳେ ଯଦି କିଏ ସ୍ୱର ଉଠଉଛି, ତାକୁ ସ୍ୱଳ୍ପ ସାଙ୍କେତିକ ଉର୍ନତିକରଣ ର ଦ୍ୱାହି ଦିଆଯାଉଛି । ସେ ସାଙ୍କେତିକ ଉର୍ନତିକରଣକୁ ଧରାଯାଉ ପ୍ରଯୁଜ୍ୟ ଭାବିବା, କିନ୍ତୁ ସେଥି ପାଇଁ କଣ ଆମେ କାହାର ଗୁଲାମୀକୁ ସ୍ୱୀକାର କରିବା ?

ଯେମିତିକି ବର୍ତମାନ ଖରା ଦିନ ଚାଲିଛି, ଖରା ଦାଉରୁ ରକ୍ଷା ପାଇବା ପାଇଁ ସମସ୍ତଙ୍କୁ ଛାଇ ଦରକାର, ତା ବୋଲି କଣ ଆମେ ଛାଇ ପାଇଁ ଆମ ଦୁଆରେ ବିଛୁଆତି ପୋତିବା ? କିନ୍ତୁ ଦୁର୍ଭାଗ୍ୟ ବଳରେ ଆମ ଦୁଆରେ ବିଛୁଆତି ପୋତା ଯାଇସାରିଛି । ଏବେ ଆମକୁ ବିଛୁଆତି ପାଇଁ ସଠିକ ନିର୍ଣ୍ଣୟ ନେବାର ବେଳ, ବିଛୁଆତି ଦୁଆରେ ରହିବ ଦରକାର ନା ଉପୁଡିବା ଦରକାର ?

ମୋର ବିଜୁ ବାବୁଙ୍କ ବିଷୟରେ ଯେଉଁ ସ୍ୱଳ୍ପ ଜ୍ଞାନ ଅଛି ତା ଭିତରୁ ମତେ ଯେଉଁ ଗୁଣଟି ତାଙ୍କର ଅତି ଭଲ ଲାଗେ, ତାହା ହେଉଛି, ସେ ଯେଉଁଠି ନେତୃତ୍ୱ ନେବାର କ୍ଷମତା ଦେଖୁଥିଲେ, ତାକୁ ବାଡ଼େଇବାକୁ ଚେଷ୍ଟା କରୁଥିଲେ । କିଏ ଢେଲା ମାରୁଥିଲା, ଚପଲ ମାରୁଥିଲା, ଗଲି ଦେଉଥିଲା କିନ୍ତୁ ସେ ସେଇମାନଙ୍କ ଭିତରୁ ନେତା ଛିଡା କରୁଥିଲେ । ଅନ୍ତତଃ ସେ ଯିବା ବେଳେ ୮ – ୧୦ ଜଣ ଏମିତି ଓଡ଼ିଆ ନେତା ତିଆରି କରିଥିଲେ ଯେଉଁ ମାନେ ଓଡ଼ିଶାର ନେତୃତ୍ୱ ନେଇପାରିଥାନ୍ତ । ସେ ଅଲଗା ବିଷୟ ମତେ ଅତ୍ୟନ୍ତ ଦୁଃକ୍ଷରେ କହିବାକୁ ପଡୁଛି, ସେଇ ନେତା ମାନେ ଆଜିର ବିଛିଆତି ଲଗେଇବା ପାଇଁ ୨୪ ବର୍ଷ ତଳେ ମାଟି ଖୁସିଥିଲେ । କିନ୍ତୁ ବିଜୁବାବୁଙ୍କର ନେତା ତିଆରି କଳାକୁ ଭୂଲାଯାଇପାରିବନି । ଆଜି ଯେତେବେଳେ ନେତୃତ୍ୱ ଉପରେ ପ୍ରଶ୍ନ ଉଠେ କୁହାଯାଉଛି, କଣ କରିବା ଓଡ଼ିଶାରେ ତ ଆଉ କିଏ ନାଁହାନ୍ତି । ନିଜକୁ ଥରେ ପ୍ରଶ୍ନ କରନ୍ତୁ ଏଇ ୨୪ ବର୍ଷରେ ପକ୍ଷ ବିପକ୍ଷ ଉଭୟ ପାର୍ଶ୍ଵକୁ କିଏ ନେତୃତ୍ୱ ବିହୀନ କରିଛି ? କାହାର ନିଜସ୍ୱ ଜଜ୍ଞରେ କାହାର ଭାବମୂର୍ତ୍ତି ପାଇଁ, ଓଡ଼ିଶାର ସବୁ ନେତାଙ୍କର ବଳି ଚଢା ଯାଇଛି ? କାଳେ ବିଦ୍ରୋହର ସ୍ୱର ଉଠିବ ସେଥି ପାଇଁ କିଏ ଧର୍ମକୁ ଆଖିଠାର ମାରି ଓଡ଼ିଆଙ୍କୁ ଶାନ୍ତିର ପାଠ ପଢ଼ାଉଛି ? ଓଡ଼ିଆ ନେତାଙ୍କୁ କଂଶେଇ ଖୁଣ୍ଟିର ଛେଳି ଭଳି ସଜେଇ, ବେକ ସାରା ଛେଦମୁଣ୍ଡ ମାଳି ପିନ୍ଧି ଶାନ୍ତିର ପାଠ ପଢେଇବା କେତେଦୂର ଯଥାର୍ଥ ?

ମୁଁ କର୍ପୋରେଟେରେ ଚାକିରୀ କରେ, ବର୍ଷକରେ ଥରେ assessment ବେଳେ ପଚାରା ଯାଏ, How many resource you have developed this year, who can fill your shoes ? ୨୪ ବର୍ଷରେ କଣ ଆପଣ ମାନେ ମୁଖିଆଙ୍କୁ ପଚାରିବା କଥା ନୁହେଁ କି How many Odia leader he has developed in last 24 years, who can fill his shoes ? ଯଦି କରି ନାହାଁନ୍ତ, ତେବେ ଅପାରଗ ଜନତାଙ୍କ ନେତା କିଭଳି No. 1 ?

କରିବି ଥାନ୍ତେ କିପରି, ବିଜୁ ବାବୁଙ୍କ ଭଳି ଓଡ଼ିଆଙ୍କୁ ଯଦି ନିଜ ସମାସ୍କନ୍ଦ ଭାବୁଥାନ୍ତେ, ଭଲ ପାଉଥାନ୍ତେ ତାହେଲେ କରିବାକୁ ଚେଷ୍ଟା କରିଥାନ୍ତେ !!
ମୋର ମୁଖିଆଙ୍କୁ ଇଂରେଜୀରେ ଗୋଟିଏ ଚେତାବନୀ ।

Does not matter how tall you grow, you will fall one day. Unless you have people around you with equal stature to catch you in your fall, you will fall hard and that fall will be devastating.

ବେଦନାର ଚର୍ଚ୍ଚା ବହୁତ ହେଲା, ଏବେ କେବଳ ଜନ ସାଧାରଣ ଙ୍କୁ ମୋର ଦୁଇଟି ନିବେଦନ । ମୁଁ ଯେଉଁଠି ଥିଲେବି ଭୋଟ ଦେବାକୁ ଆସେ, ଏଥର ବି ଆସିଛି । ଆପଣ ଯେଉଁଠି ଥାନ୍ତୁନା କାହିଁକି ଆସନ୍ତୁ ଭୋଟ ଦିଅନ୍ତୁ । ଭୋଟ ଦେବା ଆମର ପ୍ରଥମ ଗଣତାନ୍ତ୍ରିକ ଦାଇତ୍ୱ । ସେ ଦାଇତ୍ୱ ସମ୍ପାଦନ କରନ୍ତୁ ।
ଭୋଟ ଦେବାବେଳେ ଚିନ୍ତା କରନ୍ତୁ ଆପଣଙ୍କ ନେତା; ଆପଣଙ୍କର ବାଘ ପାଟିର ଘା ର ଉପଚାର କରିପାରିବେତ ?
ନିଆଁରେ ଜଳିଗଲେ ୭ ନବଜାତ ଶିଶୁ

ଦିଲ୍ଲୀର ଏକ ଶିଶୁ ଡାକ୍ତରଖାନାରେ ଗତ ବିଳମ୍ବିତ ରାତିରେ ଭୀଷଣ ଅଗ୍ନିକାଣ୍ଡ ହୋଇଯାଇଛି । ଏଥିରେ ୭ ନବଜାତ ଜୀବନ୍ତ ଦଗ୍ଧ ହୋଇଯାଇଛନ୍ତି। ଅଗ୍ନିଶମ ବିଭାଗର ସୂଚନାନୁସାରେ, ଏହି ଦୁଃଖଦ ଦୁର୍ଘଟଣାରେ ୧୨ ଜଣ ଶିଶୁଙ୍କୁ ଉଦ୍ଧାର କରାଯାଇଥିଲା। ସେଥିମଧ୍ୟରୁ ୭ଜଣଙ୍କର ମୃତ୍ୟୁ ଘଟିଛି। ଏଥିସହିତ ୫ ଶିଶୁଙ୍କୁ ଗୁରୁତର ଅବସ୍ଥାରେ ଚିକିତ୍ସା କରାଯାଉଛି। ଗତକାଲି ରାତି ପ୍ରାୟ ୧୧ଟା ୩୨ରେ ପୂର୍ବ ଦିଲ୍ଲୀର ବିବେକ ବିହାରର ଏକ ବେବି କେୟାର ସେଣ୍ଟରରେ ନିଆଁ ଲାଗିଯାଇଥିଲା। କେହି କିଛି ବୁଝିବା ଆଗରୁ ନିଆଁ ହୁତ୍ ହୁତ୍ ହୋଇ ପୂରା କୋଠାରେ ବ୍ୟାପିଯାଇଥିଲା। ସୂତନା ପାଇ ୧୬ଟି ଅଗ୍ନିଶମଗାଡି ଘଟଣାସ୍ଥଳରେ ପହଞ୍ଚି ନିଆଁ ଲିଭା କାମରେ ଲାଗିଯିବା ସହ କୋଠା ଭିତରୁ ୧୨ ନବଜାତକଙ୍କୁ କୋଠା ଭିତରୁ ଉଦ୍ଧାର କରିଥିଲା। ସେମାନଙ୍କୁ ମଧ୍ୟରୁ ୭ଜଣଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିବା ବେଳେ ଅନ୍ୟ ୫ ଜଣଙ୍କ ଚିକିତ୍ସା ଜାରି ରହିଛି। ଦିଲ୍ଲୀ ପୋଲିସ ଏବଂ ଅଗ୍ନିଶମ ବିଭାଗ ଏହି ଘଟଣାର ତଦନ୍ତ କରୁଛନ୍ତି।

ସେହିଭଳି ଗତକାଲି ମଧ୍ୟ ଏକ ହୃଦୟ ବିଦାରକ ଘଟଣା ଘଟିଥିଲା। ରାଜକୋଟ ଗେମିଂ ଜୋନ୍ ଅଗ୍ନିକାଣ୍ଡରେ ମୃତ୍ୟୁ ସଂଖ୍ୟା ୩୦ ଟପିଥିବା ସୂଚନା। ଗତରାତିରେ ମୋଟ ୩୩ ଜଣଙ୍କର ଜୀବନ ଯାଇଥିବା ସୂଚନା ମିଳିଛି । ମୃତକଙ୍କ ମଧ୍ୟରେ ୧୨ ଜଣ ଶିଶୁ ଥିବା କୁହାଯାଉଛି। ଆହୁରି କିଛି ଜଣ ଆହତ ହୋଇଛନ୍ତି। ନିଆଁ ଆୟତ୍ତକୁ ଆସିଥିଲେ ବି ଅଗ୍ନିକାଣ୍ଡର କାରଣ ଏଯାଏଁ ଜଣାପଡିନି। ଗେମିଂ ଜୋନ୍ ମାଲିକଙ୍କ ବିରୋଧରେ ଏଫଆଇଆର ହୋଇଛି। ଗେମିଂ ଜୋନ୍ ମାଲିକ ଏବଂ ମ୍ୟାନେଜରଙ୍କୁ ପୋଲିସ ଅଟକ ରଖି ପଚରାଉଚରା କରୁଛି।
ଇଭିଏମ ଭାଙ୍ଗିବା ଘଟଣାରେ ଗିରଫ ହେଲେ ପ୍ରଶାନ୍ତ ଜଗଦ୍ଦେବ

ଦବଙ୍ଗ ନେତା ଗଣେଶ ଜଗଦ୍ଦେବ ଗିରଫ। ବୁଥରେ ଦବଙ୍ଗଗିରି ଗଣେଶଙ୍କୁ ପଡିଲା ମହଙ୍ଗା। ଗତ ମଧ୍ୟରାତ୍ରରେ ଗିରଫ କଲା ପୋଲିସ। ଜାମିନ ନାମଞ୍ଜୁର ହେବାରୁ ଗଲେ ଜେଲ। ତାଙ୍କ ବିରୋଧରେ ଲାଗିଛି ୧୬ଟି ସଂଗୀନ ଦଫା। ଗତକାଲି ଅପରାହ୍ନରେ ଚିଲିକା ବିଧାୟକ ତଥା ବର୍ତ୍ତମାନର ଖୋର୍ଦ୍ଧା ବିଜେପି ବିଧାୟକ ପ୍ରାର୍ଥୀ ପ୍ରଶାନ୍ତ ଜଗଦ୍ଦେବ ବା ଗଣେଶ ଜଗଦ୍ଦେବ ଖୋର୍ଦ୍ଧା ବୋଲଗଡ ବ୍ଲକ କାଉଁରିପାଟଣା ବୁଥରେ ପସି ହଙ୍ଗାମା କରିବା ସହ ଇଭିଏମ ଭାଙ୍ଗିଥିଲେ ଯାହାକୁ ନେଇ ପ୍ରିଜାଇଡିଂ ଅଧିକାରୀଙ୍କ ଅଭିଯୋଗ ଆଧାରରେ ପୋଲିସ ତାଙ୍କୁ ଗିରଫ କରିଛି।

ତାଙ୍କ ବିରୋଧରେ ୧୬ ଟି ଦଫା ଲଗାଯାଇ ତାଙ୍କୁ ପୋଲିସ ଗିରଫ କରିଥିଲା। ତେବେ କୋର୍ଟ ଜାମିନ ନାମଞ୍ଜୁର କରିବାରୁ ତାଙ୍କୁ ଜେଲକୁ ପଠାଇ ଦିଆଯାଇଛି। ତେବେ ଗତକାଲି ପ୍ରାୟ ସାଢେ ତିନିଟାରେ ବୁଥରେ ପସି ଜଗଦ୍ଦେବ ପ୍ରିଜାଇଡିଂ ଅଧିକାରୀଙ୍କ ସହ ଯୁକ୍ତିତର୍କ କରିବା ସହ ସେଠାରେ ଥିବା ଇଭିଏମ ଭାଙ୍ଗି ସେଠାରୁ ଖସି ପଳାଇଥିଲେ। ହେଲେ କିଛି ବାଟରେ ତାଙ୍କୁ କାବୁ କରିନେଇଥିଲା ପୋଲିସ। ପୋଲିସ ତାଙ୍କୁ ଉଠାଇ ନେଇ ଖୋର୍ଦ୍ଧା ରିଜର୍ଭ ପୋଲିସ କ୍ୟାମ୍ପରେ ଅଟକ ରଖିବାରୁ ଧାରଣାରେ ବସିଥିଲେ ଜଗଦ୍ଦେବ। ସେ କିଛି କରି ନାହାନ୍ତି କହିବା ସହ ପୋଲିସ ଓ ପିର୍ଜାଇଡିଂ ଅଧିକାରୀଙ୍କ ଆଡକୁ ଅଙ୍ଗୁଳି ନିର୍ଦ୍ଦେଶ କରି ସିସିଟିଭି ଯାଞ୍ଚ କରିବା ଦାବିରେ ଅଡିବସିଥିଲେ ଜଗଦ୍ଦେବ। ସେପଟେ ସମର୍ଥକମାନେ ଜଗଦ୍ଦେବଙ୍କୁ ମୁକୁଳେଇବା ପାଇଁ ବୋଲଗଡ ଭାଲିଆବାଡି ଗାଁରେ ଘେରାବନ୍ଦୀ କରି ରଖିଥିଲେ। ଏହି ଖବର ପାଇ ଉପଜିଲ୍ଲାପାଳ ସେଠାରେ ପହଞ୍ଚି ଲୋକଙ୍କୁ ବୁଝାସୁଝା କରିବାକୁ ଚେଷ୍ଟା କରିବା ବେଳେ ସମର୍ଥକମାନେ ହୋହଲ୍ଲା ପାଟିତୁଣ୍ଡ କରିଥିଲେ। ଏମିତି କି ତାଙ୍କୁ ଠେଲାପେଲା କରିବା ସହ ତାଙ୍କ ସହ ତାଙ୍କ ଉପସ୍ଥିତିରେ ଅସଭ୍ୟ ଭାଷାରେ ଗାଲିମନ୍ଦ କରିଥିଲେ। ତେବେ ବୁଥର ପ୍ରିଜାଇଡିଂ ଅଧିକାରୀ ଏନେଇ ଥାନାରେ ଗୋଟିଏ ଅଭିଯୋଗ କରିବାରୁ ଜଗଦ୍ଦେବଙ୍କୁ ରାତିରେ ଗିରଫ କରିଛି ପୋଲିସ।
ଗେମିଂ ଜୋନରେ ଭୀଷଣ ଅଗ୍ନିକାଣ୍ଡ, ଚାହୁଁ ଚାହୁଁ ଚାଲିଗଲା ୨୭ ଜୀବନ

ଶନିବାର ଅପରାହ୍ନରେ ଗୁଜୁରାଟର ରାଜକୋଟ ସହରର ଏକ ଗେମିଂ ଜୋନରେ ଭିଷଣ ଅଗ୍ନିକାଣ୍ଡ ଘଟିଯାଇଛି । ଯେଉଁଥିରେ ୨୭ ଜଣଙ୍କ ଜୀବନ ଚାଲିଯାଇଛି । ପ୍ରାଣ ହରାଇଥିବା ଲୋକଙ୍କ ମଧ୍ୟରେ ଅନେକ ଶିଶୁ ମଧ୍ୟ ସାମିଲ ଥିଲେ । ବର୍ତ୍ତମାନ ଘଟଣାର ତଦନ୍ତ ଏସଆଇଟିକୁ ହସ୍ତାନ୍ତର କରାଯାଇଛି ।

ଅପରାହ୍ନ 4.30 ସମୟରେ ରାଜକୋଟରେ ଏକ ଲୋକପ୍ରିୟ ଗେମିଂ ଜୋନରେ ଅଗ୍ନିକାଣ୍ଡ ଖବର ଆସିବା ପରେ ସାରା ସହରରେ ବିଷାଦର ଛାୟା ଖେଳିଯାଇଥିଲା । ଘଟଣା ଘଟିବାର ତୁରନ୍ତ ଅଗ୍ନିଶମ କର୍ମଚାରୀ ଏବଂ ପୋଲିସ ଘଟଣା ସ୍ଥଳରେ ପହଞ୍ଚି ଦୀର୍ଘ ସମୟ କସରତ ପରେ ନିଆଁକୁ ଆୟତ୍ତ କରିଥିଲେ । କିନ୍ତୁ, ସେତେବେଳକୁ ୨୭ ଜଣଙ୍କର ମୃତ୍ୟୁ ହୋଇସାରିଥିଲା ।

ତେବେ ସ୍ଥାନୀୟ ପୋଲିସ ଅଧିକାରୀଙ୍କ ସୂଚନା ଅନୁଯାୟୀ, ଶନିବାର ଏବଂ ଗ୍ରୀଷ୍ମ ଛୁଟିଦିନ ହେତୁ ବହୁ ସଂଖ୍ୟାରେ ପିଲା ସେମାନଙ୍କ ପିତାମାତାଙ୍କ ସହିତ ଗେମିଂର ମଜା ଉଠାଇବାକୁ ଆସିଥିଲେ । ହେଲେ ସେମାନେ କେ ଭାବିନଥିଲେ ଯେ ଏହା ସେମାନଙ୍କୁ ଜୀବନର ଶେଷ ଖୁସି ହେବ ବୋଲି । ପ୍ରଥମେ ନିଆଁ ଲାଗିଥିଲା ଏବଂ ପରେ ଜେନେରେଟରରେ ରଖାଯାଇଥିବା ଡିଜେଲ ଓ ଗୋ କାର ପାଇଁ ରଖାଯାଇଥିବା ପେଟ୍ରୋଲ୍ ଡବା କାରଣରୁ ନିଆଁ ଅଧିକ ବ୍ୟାପି ଯାଇଥିଲା । ଆଉ ଶେଷରେ ଟଳିପଡିଲା ୨୭ ଜୀବନ ।
‘କେନ୍ଦ୍ରାପଡାରେ ବିଜେପିର ସତ୍ତା ନାହିଁ ‘

ଦିନେ ଭାରତୀୟ ଜନତା ପାର୍ଟି ପାଇଁ ସଂଗଠନ ସଜାଡୁଥିଲେ, ସାଙ୍ଗଠନିକ କାର୍ଯ୍ୟକ୍ରମ କରି ଲୋକପ୍ରିୟତା ହାସଲ କରିଥିଲେ, କିନ୍ତୁ ଏବେ ବିଜେପିକୁ ଗୁଡ ବାୟ କରି ମିଶିଛନ୍ତି ବିଜେଡିରେ। ଦଳ ଦ୍ବାରା ଉପେକ୍ଷିତ ହେବା ପରେ ନିରାଶ ହୋଇ ଏପରି ପଦକ୍ଷେପ ନେବାକୁ ବାଧ୍ୟ ହୋଇଥିବା କହିଛନ୍ତି ବିଜେଡିରେ ଯୋଗଦେଇଥିବା କେନ୍ଦ୍ରାପଡାର ପୂର୍ବତନ ବରିଷ୍ଠ ନେତା ବିଜୟ ସେଠୀ। ବିଜୟ ଦୀର୍ଘ ବର୍ଷ ଧରି ବିଜେପିକୁ ସାଜାଡି ଆସୁଥିଲେ। ଚଳିତ ନିର୍ବାଚନରେ ସେ କେନ୍ଦ୍ରାପଡା ନିର୍ବାଚନ ମଣ୍ଡଳୀରୁ ଟିକେଟ ଆଶାୟୀ ଥିଲେ । କିନ୍ତୁ ଦଳ ତାଙ୍କୁ ଆଶା ଦେଇ ଗୀତାଞ୍ଜଳିଙ୍କୁ ଟିକେଟ ଦେଲା। ତେଣୁ ଭଗ୍ନ ହୃଦୟ ନେଇ ନିଜ ସମର୍ଥକଙ୍କ ସହ ବିଜେଡିକୁ ଆପଣେଇ ନେଇଛନ୍ତି ବିଜୟ। ଦଳ ଛାଡିବା ପରେ ବର୍ଷିଛନ୍ତି ବିଜେପି ଉପରେ। କେନ୍ଦ୍ରାପଡାର ଲୋକସଭା ଆସନରୁ ଆରମ୍ଭ କରି ସବୁ ବିଧାନସଭା ଆସନ ବିଜେଡି ଜିତିବ କହିବା ସହ ଏଠି ଲଢେଇ ବିଜେଡି ଓ କଂଗ୍ରେସ ମଧ୍ୟରେ ହେଉଛି। ବିଜେପିର ସତ୍ତା ନାହିଁ କହିଛନ୍ତି ବିଜୟ

ବିଜୟଙ୍କ ବିଜେଡିକୁ ଚାଲିଯିବା କାରଣରୁ ଉଭୟ ଲୋକସଭା ଓ ବିଧାନସଭା ନିର୍ବାଚନରେ ବିଜେପିକୁ ବହୁ ମୂଲ୍ୟ ଦେବାକୁ ହେବ। ସେ ବୈଜୟନ୍ତୀଙ୍କ ପରାଜୟ ପଛର କାରଣ ହେବେ ବୋଲି ଲୋକେ କହୁଛନ୍ତି।
ପାଣ୍ଡିଆନଙ୍କ ପ୍ରଚାର ପରେ ବିଜେଡି ପ୍ରାର୍ଥୀ ଓ କର୍ମକର୍ତ୍ତା ଉତ୍ସାହିତ

ଯାଜପୁରରେ ବିଜୁ ଜନତା ଦଳର ମାରାଥନ ପ୍ରଚାର। ପ୍ରଚାରର ମଙ୍ଗ ଧରିଲେ ଭି କେ ପାଣ୍ଡିଆନ। ଗୋଟିଏ ଦିନରେ ଯାଜପୁର ଲୋକସଭା କ୍ଷେତ୍ରର ୬ଟି ନିର୍ବାଚନ ମଣ୍ଡଳୀ ଗସ୍ତକରି ବିଜେଡି ପ୍ରାର୍ଥୀଙ୍କ ପାଇଁ ଭୋଟ ଭିକ୍ଷା କରିଛନ୍ତି ପାଣ୍ଡିଆନ। ଯାଜପୁର ନିର୍ବାଚନ ମଣ୍ଡଳୀର କୁସୁମା ପଡିଆରେ ଆୟୋଜିତ ଦଳୀୟ ସମାବେଶରେ ଯୋଗ ଦେଇ ବିଧାୟିକା ପ୍ରାର୍ଥୀ ସୁଜାତା ସାହୁ ଏବଂ ସାଂସଦ ପ୍ରାର୍ଥୀ ସର୍ମିଷ୍ଠା ସେଠୀଙ୍କୁ ଭୋଟ ଦେବାକୁ ନିବେଦନ କରିଥିଲେ। ଯାଜପୁର ବିଧାୟନସଭା ମଣ୍ଡଳୀ ଅଧୀନ ସଭାରେ ସମ୍ବଲପୁର ଲୋକସଭା ପ୍ରାର୍ଥୀ ପ୍ରଣବ ପ୍ରକାଶଙ୍କୁ ଦଳର ସେନାପତି କହିବା ସହ ପ୍ରାର୍ଥୀ ସୁଜାତା ସାହୁ ଓ ଶର୍ମିଷ୍ଠାଙ୍କୁ ଯୋଡି ଶଙ୍ଖରେ ଭୋଟ ଦେବାକୁ କରିଥିଲେ ନିବେଦନ। ସେହିଭଳି ବିଞ୍ଝାରପୁର ନିର୍ବାଚନ ମଣ୍ଡଳୀର ଯଜ୍ଞ ପଡିଆରେ ଆୟୋଜିତ ଦଳୀୟ ସମାବେଶରେ ବିଧାୟିକା ପ୍ରାର୍ଥିନୀ ପ୍ରମିଳା ମଲ୍ଲିକ ଏବଂ ସାଂସଦ ପ୍ରାର୍ଥୀ ସର୍ମିଷ୍ଠା ସେଠୀଙ୍କୁ ବିଜୟୀ କରିବାକୁ ନିବେଦନ କରିବା ସହ ବିରୋଧିଙ୍କ ଉପରେ ଗର୍ଜିଥିଲେ ପାଣ୍ଡିଆନ । ଚଳିତ ନିର୍ବାଚନରେ ନବୀନ ପଟ୍ଟନାୟକଙ୍କୁ ବିଜୟ କରି ଷଷ୍ଠ ଥର ପାଇଁ ମୁଖ୍ୟମନ୍ତ୍ରୀ କରିବା ସହ ଉଭୟ ଙ୍କୁ ଲକ୍ଷେ ଭୋଟରେ ବିଜୟୀ କରିବାକୁ ନିବେଦନ କରିଥିଲେ। ପରେ ବରୀ ନିର୍ବାଚନ ମଣ୍ଡଳୀ ଅଟିରା ପଞ୍ଚାୟତ ସଂସ୍ଥନ ମଠରେ ଆୟୋଜିତ ସମାବେଶରେ ଯୋଗ ଦେଇ ବରୀ ବିଧାୟକ ପ୍ରାର୍ଥୀ ବିଶ୍ଵ ରଞ୍ଜନ ମଲ୍ଲିକଙ୍କୁ ୫୦ହଜାର ଭୋଟ ବ୍ୟବଧାନରେ ଜିତାଇବାକୁ ଲୋକଙ୍କୁ ଆହ୍ବାନ ଦେଇଥିଲେ। ପାଣ୍ଡିଆନଙ୍କ ଉପସ୍ଥିତି ପରେ ପ୍ରାର୍ଥୀଙ୍କ ମଧ୍ୟରେ ଦେଖା ଦେଇଛି ଉତ୍ସାହ।

ଯାଜପୁରରେ ପାଣ୍ଡିଆନଙ୍କ ୭ଟି ମାରାଥନ ସଭାକୁ ନେଇ ଉତ୍ସାହିତ ହୋଇପଡିଛନ୍ତି ବିଜେଡି କର୍ମକର୍ତ୍ତା। ସବୁ ସଭାରେ ଦେଖିବାକୁ ମିଳିଥିଲା ବିରାଟ ଜନ ସମାବେଶ। ଭୋଟରଙ୍କ ସହ ପ୍ରଶ୍ନ ମାଧ୍ୟମରେ ସମ୍ପର୍କସ୍ଥାପନ କରି ସମସ୍ତଙ୍କୁ ଉତ୍ସାହିତ କରିଥିଲେ ପାଣ୍ଡିଆନ। ଏହି ଜନସମାବେଶକୁ ଦେଖି ପୁଣି ଯାଜପୁରର ସବୁ ଆସନ ଯେ ବିଜେଡି ହାତେଇବ ତାକୁ ନେଇ ଚର୍ଚ୍ଚା।
ରାଜନଗର: ବିଦ୍ୟୁତ୍ ଆଘାତରେ ଜଣେ ମୃତ, ଜଣେ ଗୁରୁତର

ଅହିରାଜପୁର ଚିଙ୍ଗୁଡ଼ି ଘେରିରେ ମୃତ୍ୟୁ

ରାଜନଗର ବ୍ଲକ ଅନ୍ତର୍ଗତ କେରୁଆପାଳ ପଞ୍ଚାୟତ ଅହିରାଜପୁର ଗ୍ରାମର ପଞ୍ଚାନନ ଜେନାଙ୍କ ବଡ଼ ପୁଅ ପିଣ୍ଟୁ ଜେନା (୪୨ ) ଗତକାଲି ସଂନ୍ଧ୍ୟା ୭:୩୦ ମିନିଟ ସମୟରେ ଚିଙ୍ଗୁଡ଼ି ଘେରିର ଏ.ଆର ରୋଟର ପାଇପ କାଟୁଥିବା ସମୟରେ ସର୍ଟ ସର୍କିଟରେ ହେତୁ ତାଙ୍କୁ ବିଦ୍ୟୁତ ଆଘାତ ଲାଗିଥିଲା ।

ଗୁରୁତର ପିଣ୍ଟୁ ଜେନାଙ୍କୁ ପ୍ରଥମେ ତାଳଚୁଆ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରାଯାଇଥିଲା । ସ୍ୱାସ୍ଥ୍ୟ ଅବସ୍ଥା ଅଧିକ ଗୁରୁତର ହେବାରୁ ତାଙ୍କୁ ରାଜନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତରିତ କରାଯଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ଏବଂ ଶବ ବ୍ୟବଚ୍ଛେଦ ପାଇଁ କାଗଜପତ୍ର ପ୍ରସ୍ତୁତ କରିଥିଲେ ।

ଯେଉଁ ଚିଙ୍ଗୁଡ଼ି ଘେରିରେ ବିଦ୍ୟୁତ ଆଘାତ ପାଇ ପିଣ୍ଟୁ ମୃତ୍ୟୁ ବରଣ କରିଛନ୍ତି, ସେହି ଚିଙ୍ଗୁଡ଼ି ଘେରିରେ ବିଦ୍ୟୁତ ବିଭାଗୀୟ କର୍ମୀମାନେ ହାତଗୁଞ୍ଜା ନେଇ ବିଦ୍ୟୁତ ଯୋଗାଣ କରିଥିବା ଚର୍ଚ୍ଚା ହେଉଛି । ବିଦ୍ୟୁତ ବିଭାଗର ଅଗୋଚରରେ, ତାଳଚୁଆର ଅନେକ ଚିଙ୍ଗୁଡ଼ିଘେରି ମାଲିକ ବିଭାଗୀୟ କର୍ମଚାରୀଙ୍କୁ ହାତଗୁଞ୍ଜା ଦେଇ ଚୋରାରେ ବିଦ୍ୟୁତ ବ୍ୟବହାର କରୁଥିବାରୁ ଏଭଳି ଛୋଟ-ବଡ଼ ଘଟଣା ଘଟୁଛି ।

ବ୍ରାହ୍ମଣସାହି ପଞ୍ଚାୟତ ଗାଁ ଦାଣ୍ଡରେ ଅଘଟଣ

ରାଜନଗର ବ୍ଲକ ବ୍ରାହ୍ମଣସାହି ପଞ୍ଚାୟତର ଦୈତାରୀ ଜେନା (୬୬) ନିଜ ଘର ଆଗରେ ବିଦ୍ୟୁତ ତାରକୁ ଲାଗି ରହିଥିବା ଗଛକୁ କାଟିବା ପାଇଁ କୁରୁଣ୍ଟି ବିଦ୍ୟୁତ ସେବା ଶାଖାକୁ କଲ କରି ଜଣେଇଥିଲେ । ସେଠାର କାର୍ଯ୍ୟରତ ଆନନ୍ଦ ସ୍ୱାଇଁ ନାମକ ଜଣେ ବିଦ୍ୟୁତ କର୍ମଚାରୀ ତାଙ୍କୁ ‘ବିଦ୍ୟୁତ କଟା ଯାଇଛି ତୁମେ ଗଛ କାଟି ପାର’ କହିଥିଲେ । ଦୈତାରୀ ଏକ ଧାରୁଆ ଅସ୍ତ୍ରରେ ଗଛକୁ କାଟୁଥିବା ସମୟରେ ସେହି ଗଛରେ ଲାଗିଥିବା ବିଦ୍ୟୁତ ତାରରେ ତାଙ୍କୁ ଆଘାତ ଲାଗିଥିଲା । ତାଙ୍କ ଛାତି, ଅଣ୍ଟା ଓ ବାମ ଜଙ୍ଘର ଚର୍ମ ବାହାରି ଯାଇଥିବାରୁ ତାଙ୍କୁ ତୁରନ୍ତ ରାଜନଗର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରାଯାଇଥିଲା ।

ଏହି ଘଟଣାପରେ, ଉତକ୍ଷିପ୍ତ ଗ୍ରାମବାସୀ କୁରୁଣ୍ଟି ବିଦ୍ୟୁତ ସେବା ଶାଖାର କାର୍ଯ୍ୟାଳୟ ଆଗରେ ଧାରଣା ପ୍ରଦର୍ଶନ କରିବା ପରେ ବିଦ୍ୟୁତ କର୍ମଚାରୀଙ୍କ ସହିତ ବୁଝାମଣା ହୋଇଥିଲା ଅବସ୍ଥା ଶାନ୍ତ ପଡିଥିଲା

— ମନୋଜ କୁମାର ସେଠୀ, ରାଜନଗର, କେନ୍ଦ୍ରାପଡା।