Tag: #suchana news

ରଣାଙ୍ଗନରେ ଅରବିନ୍ଦ, ଆରମ୍ଭ କଲେ ଡୋର ଟୁ ଡୋର କ୍ୟାମ୍ପେନ୍

ନିର୍ବାଚନୀ ଯାତ୍ରା ଆରମ୍ଭ କଲେ ପାଟକୁରା ବିଜେଡି ବିଧାୟକ ପାର୍ଥି ଅରବିନ୍ଦ ମହାପାତ୍ର । ଏଥିସହ ସେ ଆରମ୍ଭ କରିଛନ୍ତି ଜନସମ୍ପର୍କ ଯାତ୍ରା । ପାର୍ଥି ଭାବେ ତାଙ୍କ ନାମ ଘୋଷଣା ପରେ ସେ ପାଟକୁରା ପଦ୍ମପୁର ବଟ ମହାପୁରୁଷଙ୍କ ପାଖରୁ ଆଶୀର୍ବାଦ ନେଇ ନିର୍ବାଚନ କ୍ୟାମ୍ପେନ ଆରମ୍ବ କରିଛନ୍ତି । ବରିଷ୍ଠ ନେତା ବିଜୟ ମହାପାତ୍ରଙ୍କ ପୁଅ ଅରବିନ୍ଦ, ବାପାଙ୍କ ପଥ ଅନୁସରଣ କରିଛନ୍ତି ।

୧୯୮୦ ମସିହା ଉପ-ନିର୍ବାଚନ ବେଳେ ମଧ୍ୟ ବିଜୁ ପଟ୍ଟନାୟକ ବିଜୟଙ୍କୁ ପାଟକୁରାରୁ ପାର୍ଥି କରିଥିବା ବେଳେ ସେ ଏହି ବଟ ମହାପୁରୁଷଙ୍କ ପାଖରୁ ଆଶ୍ରିବାଦ ନେଇ ନିର୍ବାଚନୀ ଯାତ୍ରା ଆରମ୍ବ କରିଥିଲେ । ଅରବିନ୍ଦ ମହାପାତ୍ର ମଧ୍ୟ ନିଜ ସମର୍ଥକ ଓ ଗରଦପୁର ବ୍ଲକ ଅଧକ୍ଷ ଅଭୟ ମହାରାଜଙ୍କ ସହ ପାଟକୁରା ଗରଦପୁର ବ୍ଲକର ପଦ୍ମପୁର ବଟ ମହାପୁରୁଷଙ୍କ ପୀଠରେ ପୂଜାର୍ଚ୍ଚନା କରି ନିର୍ବାଚନ ପ୍ରଚାର ଆରମ୍ଭ କରିଛନ୍ତି । ଅରବିନ୍ଦ ସର୍ବଦା ସ୍ଥାନୀୟ ଜନସାଧାରଣଙ୍କ ସହିତ ରହିବେ ବୋଲି କହିଛନ୍ତି ।

ପୂଜାର୍ଚ୍ଚନା ପରେ ପଦ୍ମପୁର, ବେରାଡ଼ି, ପାଟକୁରା, ପାଖଡ଼, ଗରଦପୁର ପଞ୍ଚାୟତର ଅନେକ କର୍ମୀଙ୍କୁ ନେଇ ଏକ କର୍ମୀ ସମ୍ମିଳନୀ କରିଥିଲେ ଅରବିନ୍ଦ । ତେବେ ଅରବିନ୍ଦ ବିଜୁ ଜନତା ଦଳରେ ସାମିଲ ହେବା ପରେ ମାନ୍ୟବର ମୁଖ୍ୟମନ୍ତ୍ରୀ ଯୁବ ଚେହେରା ଭାବେ ଅରବିନ୍ଦଙ୍କୁ ବିଧାୟକ ପାର୍ଥି ଟିକେଟ ଦେବା ସହ ତାଙ୍କ ଉପରେ ଭରସା କରିଛନ୍ତି ।

ଅରବିନ୍ଦ ମଧ୍ୟ ପାଟକୁରାରେ ସମସ୍ତ ନେତୃତ୍ୱଙ୍କୁ ଏକତ୍ରିତ କରି ନିଜ ରାଜନୈତିକ ଯାତ୍ରା ଆରମ୍ଭ କରିଛନ୍ତି । ଏଥିସହ ପାଖଡ଼ ପଞ୍ଚାୟତରେ ସମସ୍ତ ୱାର୍ଡରେ ବିଜେଡି କର୍ମୀଙ୍କୁ ନେଇ ବିଶାଳ କର୍ମୀ ସମ୍ମିଳନୀ ଆୟୋଜିତ ହୋଇଥିଲା ଓ ବିଜେଡି ପାର୍ଥି ଅରବିନ୍ଦ ମହାପାତ୍ରଙ୍କୁ ବିପୁଳ ସମର୍ଥନ ଦେବାକୁ ନିଷ୍ପତ୍ତି କରାଯାଇଥିଲା ।
ବିଭିନ୍ନ ଚର୍ଚ୍ଚରେ ପାଳିତ ହୋଇଯାଇଛି ଇଷ୍ଟର ସନଡେ

ରାୟଗଡା ଜିଲ୍ଲା କାଶୀପୁର ବ୍ଲକ ଅନ୍ତର୍ଗତ କମ୍ପର ଗ୍ରାମରେ ପ୍ରଭୁ ଯୀଶୁଙ୍କର (ଇଷ୍ଟର)ବା ପୁନରୁଥାନ ଦିବସ ଧୁମ ଧାମ ରେ ପାଳନ ହୋଇଯାଇଛି । ସମସ୍ତେ ମିଶି ଯେଇଏଲସି ଚର୍ଚ୍ଚ ରେ ପ୍ରଭୁ ଯୀଶୁଙ୍କର ପୁନରୁତଥାନର ଦିବସ କୁ ସ୍ମରଣ କରିବା ପାଇଁ ସମାଧି ସ୍ଥଳରେ କ୍ଯାଣ୍ଡେଲ ପ୍ରଜ୍ୱଳନ କରି ପ୍ରାର୍ଥନା କରିଥିଲେ ପରେ ଚର୍ଚ୍ଚ ରେ ଶତାଧିକ ଖ୍ରୀଷ୍ଟିଆନ ଭାଇ ଭଉଣୀ ମାନେ ଉପାସନା କରି, ବାଇବେଲ ପାଠ କରି ଏବଂ ନାଚ ଗୀତରେ ପ୍ରଭୁଙ୍କ ପ୍ରଶଂସା କରିଥିଲେ | ଏହି ପର୍ବ ବିଷୟରେ ଚର୍ଚ୍ଚ ରେ ପେରିସ ପାଷ୍ଟର ରେଭ୍ନେଣ୍ଟ ପ୍ରମିୟ ଖୋସଲା ପ୍ରଭୁ ଯୀଶୁ କିପରି ଭାବରେ ଜଗତର ପାପ ନିମନ୍ତେ ନିଜକୁ କୃଶ ରେ ବଳି ଦେଲେ ଏବଂ ମୃତ୍ୟୁକୁ ପରାଜୟ କରି ପୁନର୍ବାର ଉଥିତ ହେଲେ ସେ ବିଷୟରେ ଆଲୋଚନା କରିଥିଲେ ।
ବସୁଧା ଯୋଜନାରୁ ବଞ୍ଚିତ ପଡିଆସାହିବାସୀ

ଗାଁ ମୁଣ୍ଡରେ ନିର୍ମାଣ ହୋଇଛି ବସୁଧା ଯୋଜନାରେ ସୁଉଚ୍ଚ ପାଣି ଟାଙ୍କି। ମାତ୍ର ସାହିକୁ ସଂଯୋଗ ହୋଇନାହିଁ ପାଣି ପାଇପ୍।ଫଳରେ ସରକାରଙ୍କ ବିଶୁଦ୍ଧ ପାଇପ୍ ଜଳ ଯୋଗାଣରୁ ବଞ୍ଚିତ ହୋଇଛନ୍ତି ୩୦ ରୁ ଅଧିକ ଆଦିବାସୀ ପରିବାର । ଭୋଟ ବର୍ଜନ କରିବାକୁ ଦେଇଛନ୍ତି ଚରମ ଚେତାବନୀ। କେନ୍ଦୁଝର ଜିଲ୍ଲା ଚମ୍ପୁଆ ବ୍ଲକ ଅନ୍ତର୍ଗତ ସୁନାପଶି ପଞ୍ଚାୟତର ଗିରିଧାରିପୁର ପଡିଆ ସାହିର ଏହି ଦୁର୍ଦ୍ଦଶାର କାହାଣୀ।

ରାଜ୍ୟ ସରକାର ଆଦିବାସୀ ଅଧ୍ୟୁଷିତ କେନ୍ଦୁଝର ଜିଲ୍ଲାର ସମସ୍ତ ଅଞ୍ଚଳକୁ ପାଇପ୍ ଯୋଗେ ପାନୀୟ ଜଳ ଯୋଗାଇ ଦେବା ଲକ୍ଷ୍ୟରେ ଚମ୍ପୁଆ ବ୍ଲକ ଅନ୍ତର୍ଗତ କୋଦଗାଡିଆ ପଞ୍ଚାୟତର ମିରିଗିସିଙ୍ଗାରେ ବସୁଧା ଯୋଜନାରେ ଏକ ବୃହତ ମେଗା ଜଳ ଯୋଗାଣ ପ୍ରକଳ୍ପ ନିର୍ମାଣ କରିଛନ୍ତି। ଏଠାରୁ ବ୍ଲକର ଅଧିକାଂଶ ଗ୍ରାମକୁ ଜଳ ଯୋଗାଣ ମଧ୍ୟ ଆରମ୍ଭ ହୋଇଯାଇଛି। ଏ ନେଇ ପ୍ରତି ଗାଁର କାନ୍ଥ ବାଡରେ ସୂଚନା ଫଳକ ଲଗାଯାଇ ସରକାରଙ୍କ ଆଦିବାସୀଙ୍କ ପ୍ରତି ସମ୍ବେଦନଶୀଳତାକୁ ଦର୍ଶା ଯାଉଛି। ହେଲେ ଏହି ମେଗା ପ୍ରକଳ୍ପଠାରୁ ମାତ୍ର ୩ କିଲୋମିଟର ଦୂର ଗିରିଧାରୀ ପୁର ପଡିଆସାହିକୁ ପହଞ୍ଚିପାରିନି ଯୋଜନା। ପଡିଆ ସାହିରେ ପ୍ରାୟ ୩୦ ପରିବାର ବସବାସ କରୁଛନ୍ତି। ହେଲେ ଟ୍ୟାପ ଯୋଗେ ଜଳ ଯୋଗାଣରୁ ବଞ୍ଚିତ ସାହିବାସୀ।

ତେଣୁ ଏତେ ପରିବାର ମାତ୍ର ଗୋଟିଏ ଟ୍ୟୁୱେଲ ଉପରେ ନିର୍ଭର କରିବାକୁ ବାଧ୍ୟ ହେଉଛନ୍ତି। ପାଣି ପାଇଁ ଲୋକେ ଘଣ୍ଟା ଘଣ୍ଟା ଲାଇନରେ ରହି ପାଣି ନେଉଛନ୍ତି। ସେପଟେ ଆଗକୁ ଖରାଦିନ ଆସୁଛି। ଜଳସ୍ତର କମିବ। ତେଣୁ ଏହି ସାହିକୁ ବସୁଧାର ଜଳ ଯୋଗାଇବାକୁ ଗ୍ରାମବାସୀ ବାରମ୍ବାର ଉପରିସ୍ଥ ଅଧିକାରୀଙ୍କୁ ଅବଗତ କରିବା ସତ୍ତ୍ବେ କେହି ଏମାନଙ୍କ ଜଳକଷ୍ଟ ପ୍ରତି ଦୃଷ୍ଟି ଦେଉନାହାନ୍ତି। ଯାହାକୁ ନେଇ ସାହିବାସୀ ଅସନ୍ତୁଷ୍ଟ। ଆଗକୁ ନିର୍ବାଚନ ଥିବାରୁ ଠିକଣା ସମୟରେ ଜବାବ ଦେବାକୁ ନିଷ୍ପତ୍ତି ନେଇଛନ୍ତି ଏଠାକାର ଲୋକେ।

ପାଣି ପାଇଁ ଲୋକେ ବହୁ ହନ୍ତସନ୍ତ ହେଉଥିବା ବେଳେ ପ୍ରଶାସନର ନିରବତାରେ ସନ୍ତୁଳି ହେଉଛନ୍ତି ପଡିଆସାହି ବାସୀ। ନିର୍ବାଚନ ପୂର୍ବରୁ ଗାଁକୁ ଟ୍ୟାପ ଯୋଗେ ପାଣି ଯୋଗାଣକୁ ସେମାନଙ୍କ ଅପେକ୍ଷା। ସମସ୍ୟା ପୂରଣ ନହେଲେ ମତଦାନରୁ ଦୂରେଇ ରହିବାକୁ ଦେଇଛନ୍ତି ଚେତାବନୀ। ଏପରି ସମୟରେ ଦେଖିବାକୁ ରହିଲା ଏମାନଙ୍କ ଦାବି ପ୍ରତି ପ୍ରଶାସନ ଦୃଷ୍ଟି ଦେଉଛି ନା ମିଛ ପ୍ରତିଶ୍ରୁତି ଦେଇ ଏହି ନିରୀହ ଆଦିବାସୀଙ୍କୁ ପ୍ରଲୋଭିତ କରାଯାଉଛି
ଖୋର୍ଦ୍ଧାରେ ଅପରାଜିତାଙ୍କ ବିରୋଧରେ ବଢୁଛି ଅସନ୍ତୋଷ

ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କୁ ନେଇ ଖୋର୍ଦ୍ଧା ବିଜେପିରେ କମ୍ପନ। ଅପରାଜିତା ହଟାଓ ଅଭିଯାନ ଆରମ୍ଭ କଲେଣି ବିଜେପି କର୍ମୀ। ଅପରାଜିତାଙ୍କ ଗୋଟିଏ ବିବାଦୀୟ ବୟାନ ପାଇଁ ଦଳକୁ ବହୁମୂଲ୍ୟ ଦେବାକୁ ହେବ ବୋଲି ଖୋର୍ଦ୍ଧାର ସାମ୍ପ୍ରତିକ ସ୍ଥିତିକୁ ଦେଖି ସ୍ପଷ୍ଟ ବାରିହୋଇଯାଉଛି। ସ୍ଥିତି ଏମିତି ହୋଇଛି କି ଜିଲ୍ଲାର ଶହ ଶହ ବିଜେପି କର୍ମୀ ରାଜ୍ୟ କାର୍ଯ୍ୟାଳୟରେ ପହଞ୍ଚି ହଙ୍ଗାମା କରିଛନ୍ତି। ଯାହାକୁ ଦେଖି ଲାଗୁଛି, ଅପରାଜିତା ଅତି ଉତ୍ସାହିତ ହୋଇ ପ୍ରଶାନ୍ତ ଜଗଦେବ ବା ଗଣେଷ ଜଗଦେବଙ୍କୁ ଖୋର୍ଦ୍ଧାର ଉଚିତ ପ୍ରାର୍ଥୀ କହିବା ତାଙ୍କୁ ତଥା ତାଙ୍କ ଦଳ ପାଇଁ ଘାତକ ହେବାକୁ ଯାଉଛି। ଏଠାରେ ପୂର୍ବରୁ ଦଳ ତରଫରୁ ପ୍ରାର୍ଥୀ ହୋଇଥିବା କାଳୁଚରଣ ଖଣ୍ଡାୟତରାୟଙ୍କ ସମର୍ଥକ ଅପରାଜିତାଙ୍କ ବାଟରେ କଣ୍ଟା ହୋଇଠିଆ ହୋଇଛନ୍ତି, ଯାହା ଆଗାମୀ ସଂସଦୀୟ ନିର୍ବାଚନରେ ଅପରାଜିତାଙ୍କୁ ବିରୋଧର ସାମ୍ନା କରିବାକୁ ପଡିପାରେ ବୋଲି କୁହାଯାଉଛି।

ତେବେ ଏହି ବିବାଦ କିଛି ଦିନ ତଳେ ଖୋର୍ଦ୍ଧାରେ ଅନୁଷ୍ଠିତ ଏକ ମେଳଣ କାର୍ଯ୍ୟକ୍ରମରୁ ଆରମ୍ଭ ହୋଇଥିଲା। କାର୍ଯ୍ୟକ୍ରମରେ ସାଂସଦ ଅପରାଜିତା ଷଡ଼ଙ୍ଗୀ ଯୋଗଦେଇ ଦଳରେ ନୂତନ ଭାବେ ଯୋଗ ଦେଇଥିବା ଚିଲିକା ବିଧାୟକ ପ୍ରଶାନ୍ତ ଜଗଦେବଙ୍କୁ ଖୋର୍ଦ୍ଧା ବିଧାନସଭା ଆସନ ପାଇଁ ଉଚିତ ବ୍ୟକ୍ତି ବୋଲି କହିଥିଲେ। ଯାହାକୁ ନେଇ ତାତିଛନ୍ତି କୋଳୁ ଖଣ୍ଡାୟତ ରାୟଙ୍କ ସମର୍ଥକ। କାଳୁ ଖଣ୍ଡାୟତ ରାୟ ବିଗତ ନିର୍ବାଚନରେ ଖୋର୍ଦ୍ଧାରୁ ବିଜେପି ଟିକେଟରେ ପ୍ରାର୍ଥୀ ହୋଇ ବିଜେଡିଠାରୁ ପରାସ୍ତ ହୋଇଥିଲେ।ଏହା ସତ୍ତ୍ବେ ସେ ଖୋର୍ଦ୍ଧା ବିଜେପି ସଂଗଠନକୁ ଯୋଡି ରଖିବାରେ କାର୍ଯ୍ୟ କରିବା ସହ ୨୦୨୪ ନିର୍ବାଚନରେ ଟିକେଟ ପାଇବାକୁ ନେଇ ଆଶାବାଦୀ। ହେଲେ ଅପରାଜିତାଙ୍କ ବୟାନ ତାଙ୍କ ସବୁ ସ୍ବପ୍ନକୁ ଧୋଇଦେବା ପରେ ସେ କ୍ଷୁବ୍ଧ। ନିଜ ସଂଗଠନକୁ ନେଇ ରାଜ୍ୟ ବିଜେପି ଅଫିସରେ ସାଂସଦଙ୍କ ବିରୋଧରେ ପ୍ରଦର୍ଶନ କରିଥିଲେ ନିଜ ଶକ୍ତି।

ଅପରାଜିତାଙ୍କ ବିରୋଧରେ ଏହି ମେଳିକୁ ଦେଖିବା ପରେ ଲାଗୁଛି ଅପରାଜିତାଙ୍କ ପାଇଁ ବିଜୟ ହୋଇଯିବ ସ୍ବପ୍ନ। କାରଣ କାଳୁଚରଣ ଓ ତାଙ୍କ ସର୍ଥକ ଖୋଲାଖୋଲି ଅପରାଜିତାଙ୍କୁ ବିତାଡିତ କରିବାକୁ କହିସାରିଛନ୍ତି। ସେପଟେ ବିଜେଡିରୁ ଆସିଥିବା ଚିଲିକା ବିଧାୟକ ପ୍ରଶାନ୍ତଙ୍କୁ ତାଙ୍କ ପୂର୍ବ କାରନାମା ପାଇଁ ବିଜେପିର ଅନେକ ଗ୍ରହଣ କରିପାରୁନାହାନ୍ତି । ଏବେ ସାଂସଦଙ୍କ ଜଗଦେବ ପ୍ରୀତି ବିଜେଡିକୁ ଫାଇଦା ଦେବା ସହ ତାଙ୍କ ପରାଜୟର କାରଣ ଯେ ନ ହେବ ଏହି ଆଶଙ୍କାକୁ ଏଡାଇ ଦିଆଯାଇ ନ ପାରେ।
ଇଟା ଭାଟିରେ କାମକରିବାକୁ ଯାଇ ଦାଦନ ଶ୍ରମିକର ମୃତ୍ଯୁ

ପେଟ ପାଟଣା ପାଇଁ ନିଜ ରାଜ୍ୟରେ କାମ ନମିଳିବାରୁ ସୁଦୁର ଆନ୍ଧ୍ରପ୍ରଦେଶ କୁ ଇଟା ଭାଟିରେ କାମ କରିବା ପାଇଁ ଯାଇ ଦାଦନ ଶ୍ରମିକଙ୍କ ମୃତ୍ଯୁ ଘଟିଛି। ଏମିତି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ରାୟଗଡ଼ା ଜିଲ୍ଲା କାଶିପୁର ବ୍ଲକ ଶଙ୍କରଡ଼ା ପଞ୍ଚାୟତ ବାହାରକୁଟୁମି ଗ୍ରାମରେ।ଗ୍ରାମର ଲଦି ମାଝୀ ୩ମାସ ହେଲା ଗ୍ରାମର ୧୪ ଜଣ ପୁରୁଷ -ମହିଳା ଙ୍କ ସହ ମିଶି ଆନ୍ଦ୍ରପ୍ରଦେଶର ଜିଲା କପର ଗ୍ରାମର ଇଟାଭାଟି ରେ କାମ କରିବା ପାଇ ଯାଇଥିଲେ।କାମ କରି ଗତକାଲି ୩ଘଣ୍ଟା ସମୟରେ ରହୁଥିବା କ୍ୟାମ୍ପରେ ଆସି ଦେହ ଭଲ ଲାଗୁନି ବୋଲି କହି ଅଚେତ ହୋଇଯାଇଥଇଲେ।

ତାଙ୍କୁ ସଙ୍ଗେସଙ୍ଗେ ଗୁଣ୍ଟୁରୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ନେବା ବେଳକୁ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି।କିଛି ଦିନ ଆଗରୁ ଦେହ ଭଲ ଲାଗୁନି ମୁଁ ପାଇବାକୁ ଥିବା ଟଙ୍କା ମୋତେ ଦେଇଦିଅନ୍ତୁ ମୁଁ ଗାଁକୁ ଚାଲିଯିବ ବୋଲି ଇଟା ଭାଟି ମାଲିକଙ୍କୁ କହିଥିଲେ ହେଲେ ମାଲିକ ତାଙ୍କୁ ଟଙ୍କା ଦେଇନଥିଲେ କି ଛାଡି ନଥିଲେ ବୋଲି ସାଙ୍ଗରେ ଥିବା ସାଥି ଶ୍ରମିକ ମାନେ କହିଛନ୍ତି।ଗାଁ କୁ ମୃତଦେହ ଫେରାଇ ଆଣିବାକୁ ପାଖରେ ପଇଷା ନଥିବାରୁ ପୋରିବାର ଲୋକ ଚିନ୍ତାରେ ପଡିଛନ୍ତି ।କେବେ ମିଳିବ ନିଜ ଅଞ୍ଚଳରେ ନିଯୁକ୍ତି ତାହା ହିଁ ସାଧାରଣରେ ପ୍ରଶ୍ନ
ଦିନ ଦ୍ବିପ୍ରହରେ ବିଚ ରାସ୍ତାରେ ସୁନା ଅଳଙ୍କାର ଲୁଟିନେଲେ ଦୁର୍ବୃତ୍ତ

କେନ୍ଦୁଝର ଜିଲ୍ଲା ୨୦ ନମ୍ବର ଜାତୀୟ ରାଜପଥରେ ଦିନ ଦ୍ବିପ୍ରହରରେ ଦମ୍ପତିଙ୍କୁ ଲୁଟିନେଲେ ଦୁର୍ବୃତ୍ତ। ବନ୍ଧୁକ ଦେଖାଇ ସେମାନଙ୍କ ସୁନା ଗହଣା ଲୁଟିନେଇଥିବା ଅଭିଯୋଗ। ଆଜି ମଧ୍ୟାହ୍ନରେ ଘସିପୁରା ଥାନା ଅଧୀନ ଢ଼ିଙ୍କିକୋଟର ନିଗମ ପ୍ରସାଦ ସାହୁ ଓ ତାଙ୍କ ସ୍ତ୍ରୀ ଲଛମା ରାଣୀ ସାହୁ ଏକ ସ୍କୁଟିରେ ଟୋଲଙ୍କପଡା ଯାଉଥିଲେ। ବୀରଗୋବିନ୍ଦପୁର ଛକ ନିକଟରେ ତିନି ଜଣ ଦୁର୍ବୃତ୍ତ ଏକ ପଲସର ବାଇକରେ ଆସି ସେମାନଙ୍କ ସ୍କୁଟିକୁ ଧକ୍କା ଦେଇଥିଲେ। କାହିଁକି ଧକ୍କା ଦେଲ ବୋଲି ନିଗମ ପଚାରିବାରୁ ଦୁର୍ବୃତ୍ତମାନେ ବନ୍ଧୁକ ବାହାର କରି ତିନି ରାଉଣ୍ଡ ଗୁଳି ଫୁଟାଇଥିଲେ। ଏହା ଦେଖି ଦମ୍ପତି ଭୟଭୀତ ହୋଇପଡିଥିଲେ। ଦୁର୍ବୃତ୍ତମାନେ ବନ୍ଧକ ଦେଖାଇ ସେମାନେ ପିନ୍ଧିଥିବା ସବୁ ସୁନା ଗହଣା ଲୁଟି ସେଠାରୁ ଫେରାର ହୋଇଯାଇଥିଲେ ବୋଲି ଅଭିଯୋଗ ହୋଇଛି। ଖରାବେଳଟାରେ ଏପରି ଲୁଟକୁ ନେଇ ନିଗମଙ୍କ ଭଉଣୀ ତଥା ସ୍ଥାନୀୟ ବିଜେପି ନେତ୍ରୀ ମମତା ସିଂ ଉଦବେଗ ପ୍ରକାଶ କରିଛନ୍ତି ।

ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଗୁଳି ମାଡ ଓ ଲୁଟ ଘଟଣା ପ୍ରଚାର ହେବା ପରେ ଘଟଣାସ୍ଥଳରେ ବହୁ ସଂଖ୍ୟାରେ ଲୋକ ସେଠାରେ ପହଞ୍ଚିଥିଲେ। ଗୁଳି ମାଡରେ ସ୍କୁଟିରେ ଥିବା ପେଟି ଫାଟିଯାଇଥିବା ବେଳେ ଗୁଳିରୁ ବାହାରିଥିବା ଏକ ଷ୍ଟିଲ ପ୍ଲେଟ ମିଳିଛି ।
କାମାକ୍ଷାନଗରରେ ବିଜେଡି ସାଂସଦ ପ୍ରାର୍ଥୀ ଯୁବନେତା ଅବିନାଶଙ୍କୁ ଉଚ୍ଛ୍ବସିତ ସମ୍ବର୍ଦ୍ଧନା

ଗତକାଲି ଢେଙ୍କାନାଳ ଜିଲ୍ଲା ପାଇଁ ବିଜେଡି ସାଂସଦ ପ୍ରାର୍ଥୀ ଘୋଷଣା ପରେ ଯୁବ ନେତା ଅବିନାଶ ସାମଲଙ୍କୁ ବିଭିନ୍ନ ମହଲରୁ ଛୁଟୁଛି ଶୁଭେଚ୍ଛାର ସୁଅ । ଏହି ଅବସରରେ ଆଜି ତାଙ୍କୁ କାମାକ୍ଷାନର ବିଜେଡି କାର୍ଯ୍ୟାଳୟରେ ବରିଷ୍ଠ ବିଜେଡି ନେତା ପ୍ରଫୁଲ୍ଲ ମଲିକ୍, ସ୍ଥାନୀୟ ବ୍ଲକ ଚେୟାରମ୍ୟାନ, ସରପଞ୍ଚ ସଙ୍ଘ ଏବଂ ଶତାଧିକ କର୍ମୀ ଫୁଲ ତୋଡା ଦେଇ ଅଭିନନ୍ଦନ ଜଣାଇଥିଲେ । ତେବେ, ଆୟୋଜିତ ସମ୍ବର୍ଦ୍ଧନା ସଭାରେ ମନ୍ତ୍ରୀ ପ୍ରଫୁଲ୍ଲ ମଲ୍ଲିକଙ୍କ କାମାକ୍ଷାନଗର ପ୍ରତି ଥିବା ଅବଦାନକୁ ଭୁରୀ ଭୁରୀ ପ୍ରସଂଶା କରିଥିଲେ ଅବିନାଶ। ଏଥିସହ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭିଜନକୁ ଢେଙ୍କାନାଳରେ ଉନ୍ନତି ପାଇଁ କିପରି ଉପଯୋଗ କରିବେ ତାହା ଉପରେ ଗୁରୁତ୍ବାରୋପ କରିଥିଲେ ।

ଏଠାରେ ଉଲ୍ଲେଖ ଯୋଗ୍ୟ, ଢେଙ୍କାନାଳର ବିଜେଡି ସାଂସଦ ପ୍ରାର୍ଥୀ ଡାକ୍ତର ଅବିନାଶ ସାମଲ ଏବଂ ତାଙ୍କ ଦାଦା ତଥା ବର୍ତ୍ତମାନର ଢେଙ୍କାନାଳ ବିଧାୟକ ସୁଧିର ସାମଲଙ୍କ ନେତୃତ୍ବରେ ହଜାର ହଜାର ବିଜେପି କର୍ମୀ ଏବଂ ନେତା ଶଙ୍ଖ ଭବନରେ ବିଜେଡିରେ ଯୋଗ ଦେଇଥିଲେ । ତେବେ ଡାକ୍ତର ସମାଲ ଜଣେ ଜଣାଶୁଣା ଉଦ୍ୟୋଗପତି ହୋଇଥିବା ବେଳେ ଢେଙ୍କାନାଳବାସୀଙ୍କ ସୁଖ ଦୁଖରେ ଠିଆ ହୋଇ ଆସୁଛନ୍ତି । ଏଥିସହିତ, ତାଙ୍କୁ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ କାର୍ଯ୍ୟଦକ୍ଷତା ଅନୁପ୍ରାଣିତ କରିଥିବାରୁ ସେ ବିଜେଡିରେ ସାମିଲ ହୋଇଥିବା କହିଥିଲେ । ଅନ୍ୟପଟେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଅବିନାଶଙ୍କ ପରି ଜଣେ ଦକ୍ଷ ଯୁବନେତାଙ୍କ ଉପରେ ଭରସା କରି ତାଙ୍କୁ ସାଂସଦ ଟିକେଟ ଦେବା ନିଶ୍ଚତ ଭାବେ ଢେଙ୍କାନାଳର ଜନସାଧାରଣଙ୍କ ପାଇଁ ଶୁଭ ସଂକେତ ବୋଲି ସ୍ଥାନୀୟ ବୁଦ୍ଧିଜୀବୀ କହିଛନ୍ତି ।
ଶିବସେନାରେ ଯୋଗ ଦେଲେ ଗୋବିନ୍ଦା,ଉତ୍ତର-ପଶ୍ଚିମ ମୁମ୍ବାଇରୁ ମିଳିପାରେ ଟିକେଟ

ବଲିଉଡ ଅଭିନେତା ଗୋବିନ୍ଦା ମହାରାଷ୍ଟ୍ରର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ଭେଟି ଶିବସେନାରେ ଯୋଗ ଦେଲେ। ସେ ଲୋକସଭା ନିର୍ବାଚନ ପାଇଁ ଟିକେଟ ପାଇପାରନ୍ତି। ଗୋବିନ୍ଦା ମୁମ୍ବାଇ ଉତ୍ତର ପଶ୍ଚିମ ଆସନରୁ ଟିକେଟ ପାଇପାରନ୍ତି । କଂଗ୍ରେସ ଟିକେଟରେ ଗୋବିନ୍ଦା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିସାରିଛନ୍ତି। ତାଙ୍କୁ ପାର୍ଟିରେ ସ୍ୱାଗତ କରି ମୁଖ୍ୟମନ୍ତ୍ରୀ ଏକନାଥ ସିନ୍ଦେ କହିଛନ୍ତି ଯେ ସେ ମୁମ୍ବାଇ ମାଟିର ବାସିନ୍ଦା ଏବଂ ସମସ୍ତେ ତାଙ୍କୁ ପସନ୍ଦ କରନ୍ତି।

ମୁଖ୍ୟମନ୍ତ୍ରୀ ଏକନାଥ ସିନ୍ଦେ କହିଛନ୍ତି ଯେ ଆଜି ମୁଁ ଗୋବିନ୍ଦାଙ୍କୁ ସ୍ୱାଗତ କରୁଛି, ଯିଏ ତୃଣମୂଳ ସ୍ତରରେ ସଂଯୁକ୍ତ ଏବଂ ସମସ୍ତଙ୍କ ପସନ୍ଦ ଗୋବିନ୍ଦାଙ୍କୁ, ପ୍ରକୃତ ଶିବସେନାକୁ ମୁ ସ୍ୱାଗତ କରୁଛି; ଉତ୍ତରରେ ଗୋବିନ୍ଦା କହିଛନ୍ତି, “ଜୟ ମହାରାଷ୍ଟ୍ର … ମୁଁ ମୁଖ୍ୟମନ୍ତ୍ରୀ ସିନ୍ଦେଙ୍କୁ ଧନ୍ୟବାଦ ଦେଉଛି। ୨୦୦୪ ରୁ ୦୯ ରାଜନୀତିରେଥିଲି । ରାହନୀତିରୁ ଦୂରେଇଯିବା ପରେ ମୋତେ ଲାଗୁନଥିଲା ଯେ ମୁଁ ଫେରି ଆସିବି | କିନ୍ତୁ ୨୦୧୦-୨୦୨୪ ଏହି ୧୪ ବର୍ଷ ବନବାସ ପରେ ପୁଣି ଥରେ ମୁଁ ସିନ୍ଦେଜୀଙ୍କ ରାମରାଜ୍ୟକୁ ଫେରି ଆସିଛି। “

ସୂଚନା ଅନୁଯାୟୀ ଯେ ମହାରାଷ୍ଟ୍ରର ଏନଡିଏ ଆସନ ପାଇଁ ଫାଇନାଲ ସିଟ୍ ବଣ୍ଟନ ଏପର୍ଯ୍ୟନ୍ତ ଭଗବଣ୍ଟା ହୋଇପାରିନାହିଁ। ତେବେ ବିଜେପି ଏବଂ ଅଜିତ ପାୱାର ପ୍ରାର୍ଥୀ ଘୋଷଣା କରିସାରିଛନ୍ତି। ସିମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ପାର୍ଟି ଏପର୍ଯ୍ୟନ୍ତ କାହାକୁ ଟିକେଟ୍ ଦେଇନାହିଁ। ତେବେ ଗୋବିନ୍ଦା ଟିକେଟ ପାଇବା ନିଶ୍ଚିତ।
ଶଙ୍ଖ ଛାଡି ଫୁଲ ଧରିଲେ ଏଇ ସାଂସଦମାନେ…

ବିଜେପିରେ ଯୋଗ ଦେଲେ ଭର୍ତ୍ତୃହରି ମହତାବ ଓ ସିଦ୍ଧାନ୍ତ ମହାପାତ୍ର । ଦିଲ୍ଲୀରେ ବିଜେପିର ମୁଖ୍ୟ କାର୍ଯ୍ୟାଳୟରେ ବିଧିବଦ୍ଧ ଭାବେ ଦଳରେ ସାମିଲ ହୋଇଛନ୍ତି ଭର୍ତ୍ତୃହରି ଓ ସିଦ୍ଧାନ୍ତ । ଭର୍ତ୍ତୃହରି ଗତ ୨୨ ତାରିଖରେ ବିଜେଡିରୁ ଇସ୍ତଫା ଦେଇଥିଲେ । ସେହିଭଳି ପୂର୍ବତନ ସାଂସଦ ସିଦ୍ଧାନ୍ତ ମହାପାତ୍ର ମଧ୍ୟ ବିଜେପି ଦଳରେ ସାମିଲ ହୋଇଛନ୍ତି। ଭର୍ତ୍ତୃହରି ଓ ସିଦ୍ଧାନ୍ତଙ୍କ ବ୍ୟତୀତ ପଦ୍ମଶ୍ରୀ ଦମୟନ୍ତୀ ବେଶ୍ରା ମଧ୍ୟ ବିଜେପିରେ ସାମିଲ ହୋଇଛନ୍ତି ।

ଭର୍ତ୍ତୃହରି ବିଜେଡି ଛାଡିବା ପରେ ବିଜେପିରେ ସାମିଲ ହେବେ ବୋଲି ଚର୍ଚ୍ଚା ହେଉଥିଲା । ଆଜି ଏହି ଚର୍ଚ୍ଚାରେ ପୂର୍ଣ୍ଣଚ୍ଛେଦ ଟାଣିଛନ୍ତି ଭର୍ତ୍ତୃହରି । ଦିଲ୍ଲୀରେ ରାଜ୍ୟ ବିଜେପି ସଭାପତି ମନମୋହନ ସାମଲ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେପି ଉପ-ସଭାପତି ବୈଜୟନ୍ତ ପଣ୍ଡାଙ୍କ ଉପସ୍ଥିତିରେ ବିଜେପିରେ ସାମିଲ ହୋଇଛନ୍ତି । ସେହିଭଳି ସିଦ୍ଧାନ୍ତ ମହାପାତ୍ର ବିଜେପିରେ ସାମିଲ ହେବେ ବୋଲି ଗତ ୨ ଦିନ ହେବ ଚର୍ଚ୍ଚା ହେଉଥିଲା । ସିଦ୍ଧାନ୍ତ ୨୦୦୯ ଓ ୨୦୧୪ରେ ବିଜେଡି ଟିକେଟରୁ ନିର୍ବାଚନ ଲଢି ବିଜୟୀ ହୋଇଥିଲେ । ତେବେ ୨୦୧୯ରେ ସିଦ୍ଧାନ୍ତଙ୍କୁ ଦଳ ଟିକେଟ ଦେଇନଥିଲା । ଏହାପରେ ସିଦ୍ଧାନ୍ତଙ୍କୁ ଦଳୀୟ କାର୍ଯ୍ୟକ୍ରମରେ ଦେଖିବାକୁ ମିଳିନଥିଲା । କିନ୍ତୁ କିଛି ମାସ ପୂର୍ବରୁ ସିଦ୍ଧାନ୍ତ ପୁଣିଥରେ ନିର୍ବାଚନ ମୈଦାନକୁ ଓହ୍ଲାଇବା ନେଇ ଚର୍ଚ୍ଚା ହେଉଥିବା ବେଳେ ଆଜି ଦିଲ୍ଲୀରେ ବିଜେପିରେ ବିଧିବଦ୍ଧ ଭାବେ ସାମିଲ ହୋଇଛନ୍ତି ସିଦ୍ଧାନ୍ତ । ଭର୍ତ୍ତୃହରିଙ୍କୁ ଦଳ କଟକ ଲୋକସଭାରୁ ପ୍ରାର୍ଥୀ କରିପାରେ। ସେହିଭଳି ସିଦ୍ଧାନ୍ତଙ୍କୁ ଦଳ ବ୍ରହ୍ମପୁର ବିଧାନସଭା ଆସନରୁ ପ୍ରାର୍ଥୀ କରିପାରେ ବୋଲି ଚର୍ଚ୍ଚା ହେଉଛି।
ପାନୀୟ ଜଳ ପାଇଁ ଡହଳବିକଳ, ପହଞ୍ଚି ପାରି ନାହିଁ ଡ୍ରିଙ୍କ ଫ୍ରମ ଟ୍ୟାପ ଯୋଜନା

ଆମ ରାଜ୍ୟର ପାନୀୟ ଜଳ ଯୋଜନାର ଏ ହେଉଛି ବିକଳ ଚିତ୍ର। ଏମାନଙ୍କ ନିକଟରେ ପହଞ୍ଚିପାରିନି ସରକାରଙ୍କ ଡ୍ରିଙ୍କ ଫ୍ରମ ଟ୍ୟାପ ଯୋଜନା। ରାଜ୍ୟର ପ୍ରତି ଗାଁର ପ୍ରତିଟି ପରିବାରକୁ ଟ୍ୟାପ ଯୋଗେ ଜଳ ଯୋଗାଇ ଦିଆଯାଉଥିବା ଡିଣ୍ଡିମ ପିଟୁଛନ୍ତି ରାଜ୍ୟ ସରକାର। ଏଥିପାଇଁ ସରକାର ହଜାର ହଜାକ କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ମୟୂରଭଞ୍ଜ ଜିଲ୍ଲା ବାବନଘାଟି ଉପଖଣ୍ଡ ବିଜାତଳା ବ୍ଲକ ଅନ୍ତର୍ଗତ ଖଡିଆଶୋଳ ଗ୍ରାମବାସୀଙ୍କ ପାଇଁ ଏହି ଜଳ ଯୋଜନା ସାତ ସପନ। ବିଜାତଳା ବ୍ଲକର ଖଡିଆଶୋଳ ଗ୍ରାମରେ ୫ ଟି ନଳକୂଅ ଅଛି ୪୫୦ରୁ ଅଧିକ ଲୋକଙ୍କ ପାଇଁ। ହେଲେ କୌଣସି ନଳକୂଅରୁ ପାଣି ବାହାରୁ ନାହିଁ।

ଏନେଇ ବାରମ୍ବାର ସରପଞ୍ଚ, ବିଡିଓଙ୍କୁ ଅଭିଯୋଗ କରାଯାଇଥିଲେ ମଧ୍ୟ କେହି ଗ୍ରାମବାସୀଙ୍କ ପ୍ରତି ଧ୍ୟାନ ଦେଉନାହାନ୍ତି। ସେପଟେ ପାଣି ମୁନ୍ଦେ ପାଇଁ ମହିଳା ମାନେ ରାତି ପାହିଲେ ଗରା, ବାଲ୍ଟି, ହାଣ୍ଡି, ଡେକ୍ଚି ଧରି ଗାଁ ନିକଟବର୍ତ୍ତୀ ନଦୀ, ଚୁଆକୁ ଯାଉଛନ୍ତି। ସେଠାରୁ ପାଣି ସଂଗ୍ରହ କରି ତାକୁ ବ୍ୟବହାର କରିବାକୁ ବାଧ୍ୟହେଉଛନ୍ତି। ଅନ୍ୟପଟେ ଖରା ଆରମ୍ଭରୁ ସ୍ଥିତି ଏମିତି ହୋଇଥିବା ବେଳେ ଆଗକୁ ଖରା ଟାଣ ହେଲେ ଏହି ସବୁ ଜଳ ଉତ୍ସ ମଧ୍ୟ ଶୁଖିଯିବ। ତେଣୁ ଆଜି ଗ୍ରାମବାସୀ ରାଇରଙ୍ଗପୁର ଉପ ଜିଲ୍ଲାପାଳଙ୍କ ଦ୍ବାରସ୍ଥ ହୋଇଛନ୍ତି। ସେମାନଙ୍କ ଜଳ ସମସ୍ୟା ତୁରନ୍ତ ଦୂର କରା ନ ଗଲେ ଭୋଟ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି ଗ୍ରାମବାସୀ।

ଉପ ଜିଲ୍ଲାପାଳଙ୍କ ଅଫିସରେ ଗ୍ରାମବାସୀ ପାନୀୟ ଜଳ ନେଇ ନିଜ ଦାବିପତ୍ର ଉପସ୍ଥାପନ କରିବା ପରେ ଖୁବ ଶୀଘ୍ର ସେମାନଙ୍କ ଆବେଦନ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କାର୍ଯ୍ଯାଳୟ ତରଫରୁ କୁହାଯାଇଛି। ତେବେ ଦେଖିବାକୁ ବାକି ରହିଲା, କେବେ ପୂରଣ ହେଉଛି ଲୋକଙ୍କ ପାଣି ପରି ମୌଳିକ ଆବଶ୍ୟକତା।