Month: May 2023

ଅଧ୍ୟକ୍ଷ ପଦ ଛାଡିବାକୁ ଘୋଷଣା କଲେ ଶରଦ ପାଓ୍ବାର, ତେବେ ଏନସିପିର ଆଗାମୀ ଅଧ୍ୟକ୍ଷ କିଏ ?

ଏନସିପି ମୁଖ୍ୟ ଶରଦ ପାଓ୍ବାର ଏକ ବଡ ଘୋଷଣା କରିଛନ୍ତି । 82 ବର୍ଷୀୟ ମହାରାଷ୍ଟ୍ର ବାସିନ୍ଦା ଶରଦ ପାଓ୍ବାର ଏନସିପି ଅଧ୍ୟକ୍ଷ ପଦ ଛାଡିବା ପାଇଁ ଘୋଷଣା କରିଛନ୍ତି । ସେ ଏମତି ସମୟରେ ଏହି ଘୋଷଣା କରିଛନ୍ତି ଯେତେବେଳେ ଅଜିତ ପାଓ୍ବାରଙ୍କୁ ନେଇ ଦଳ ଭିତରେ ଫାଟ ସୃଷ୍ଟି ହୋଇଥିବାର ଖବର ସାମ୍ନାକୁ ଆସୁଛି । ଶରଦ ପାଓ୍ବାରଙ୍କ ପୁତୁରା ଅଜିତ ପାଓ୍ବାର ଏନସିପିର କେତେଜଣ ବିଧାୟକଙ୍କୁ ନେଇ ବିଜେପିରେ ସହିତ ମିଶିଯିବେ ବୋଲି ଚର୍ଚ୍ଚା ଚାଲିଥିଲା ।

ଶରଦ ପାଓ୍ବାର କହିଛନ୍ତି, ଅନେକ ବର୍ଷ ଧରି ରାଜନୀତିରେ ଦଳର ପ୍ରତିନିଧିତ୍ବ କରିବାର ସୁଯୋଗ ମିଳିଲା । ଆଉ ଏହି ବୟସରେ ପଦ ପାଖରେ ରଖିବାକୁ ଠିକ ଭାବୁନାହିଁ । ମତେ ଲାଗୁଛି ଯେ, ଆଉ କାହାକୁ ଆଗକୁ ଆସିବା ଦରକାର । ଦଳର ନେତାଙ୍କୁ ସ୍ଥିର କରିବାକୁ ପଡିବ ଯେ, ଆଗାମି ଅଧ୍ୟକ୍ଷ କିଏ ହେବେ । ଶରଦ ପାଓ୍ବାରଙ୍କୁ ଶେଷଥର ପାଇଁ 2022 ମସିହାରେ ଦଲର ଅଧ୍ୟକ୍ଷ ଭାବେ ବଛାଯାଇଥିଲା ।

ଶରଦ ପାଓ୍ବାର କହିଛନ୍ତି, 1999 ମସିହାରେ ଏନସିପି ଗଠନ ପରଠାରୁ ମତେ ଅଧ୍ୟକ୍ଷ ଭବେ ରହିବାର ସୁଯୋଗ ମିଳିଛ । ଆଜିକୁ 24 ବର୍ଷ ହୋଇଗଲା ଦଳର ଅନେକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇ ଦଳର ମଙ୍ଗ ଧରି ରଖିଥିଲି । ସେ କହିଛନ୍ତି, 1960 ମସିହା ମେ 1 ତାରିଖରୁ ଆରମ୍ଭ ହୋଇଥିବା ସାର୍ବଜନୀନ ଜୀବନ ଯାତ୍ରା ଗତ 63 ବର୍ଷ ଧରି ଜାରି ରହିଛି । ଏହି ସମୟ ଭିତରେ ମୁଁ ମହାରାଷ୍ଟ୍ର ଆଉ ଦେଶର ଭିନ୍ନ ଭିନ୍ନ ଭୂମିକାରେ ସେବା କରିଛି । ସେ କହିଛନ୍ତି, ମୋର ରାଜ୍ୟସଭା କାର୍ଯ୍ୟକାଳ ଆଉ 3 ବର୍ଷ ପାଇଁ ରହିଛି । ଏହା ଭିତରେ ମୁଁ କୌଣସି ପଦରେ ରହିବାକୁ ଚାହୁଁନାହିଁ । କାରଣ ଦେଶର ପ୍ରସଙ୍ଗ ସହିତ ଧ୍ୟାନ କେନ୍ଦ୍ରିତ କରିବାକୁ ଚାହେଁ ।

ଶରଦ ପାଓ୍ବାର ପଦ ଛାଡିବା ପାଇଁ ଘୋଷଣା କରିବା ସମୟରେ ଲୋକମାନେ ଭାବବିହ୍ବଳ ହୋଇପଡିଥିଲେ । କାର୍ଯ୍ୟକ୍ରମରେ ସାମିଲ ଥିବା ଲୋକମାନେ ତାଙ୍କୁ ପଦ ନଛାଡିବାକୁ କହିବା ସହିତ କାନ୍ଦି ପକାଇଥିଲେ । ସେଠାରେ ଉପସ୍ଥିତ କାର୍ଯ୍ୟକର୍ତ୍ତା ମାନେ ତାଙ୍କ ନିଷ୍ପତ୍ତି ବଦଳାଇବା ପାଇଁ ଅନୁରୋଧ କରିଥିଲେ ।

ବିଗତ 6 ଦଶକ ଧରି ମହାରାଷ୍ଟର ଲୋକମାନେ ଯେଉଁ ଭଲପାଇବା ଦେଇଛନ୍ତି ତାକୁ ଭୁଲିପାରିବିନି ବୋଲି ଶରଦ ପାଓ୍ବାର କହିଛନ୍ତି । ଦଳ ଖୁବଶୀଘ୍ର ଏକ କମିଟି ଗଠନ କରି ପାର୍ଟିର ଅଧ୍ୟକ୍ଷ ନିର୍ବାଚିତ କରିବା ପାଇଁ ଶରଦ ପାଓ୍ବାର ଆହ୍ବାନ କରିଛନ୍ତି ।
ମଲାୱି ମତ୍ସ୍ୟଜୀବୀଙ୍କ ଅଜବ ବେପାର…

ଦକ୍ଷିଣ ଆଫ୍ରିକାର ମଲାୱି ମତ୍ସ୍ୟ ବ୍ୟବସାୟ ପାଇଁ ଜଣାଶୁଣା। ଦେଶର ଅଧିକାଂଶ ଲୋକ ଏହି କାର୍ଯ୍ୟରେ ସମ୍ପୃକ୍ତ। କିଛି ସମୁଦ୍ରରୁ ମାଛ ଧରୁଥିବା ବେଳେ କିଛି ମାଛ ବିକି ଗୁଜୁରାଣ ମେଣ୍ଟାଇଥାନ୍ତି। ଏହି ବ୍ୟବସାୟରୁ ଦେଶର ମୋଟ ଜିଡିପିର ୪ ପ୍ରତିଶତ ଆସିଥାଏ। କିନ୍ତୁ ସେଠାରେ ମାଛ ବିକି ପରିବାର ଚଳାଉଥିବା ମହିଳାଙ୍କୁ ଦେବାକୁ ହୋଇଥାଏ ବହୁ ମୂଲ୍ୟ। ନିଜ ଶରୀର ଦେଇ ସେମାନେ ମାଛ ବିକିଥାନ୍ତି। ହଁ, ମାଛ ଧରାଳୀଙ୍କ ଠାରୁ ମାଛ କିଣିବାକୁ ସେମାନଙ୍କୁ ସେକ୍ସ କରିବାକୁ ହୋଇଥାଏ। ଏମିତି ଖୁଲାସା କରିଛନ୍ତି ମାଛ ପାଇଁ ବହୁବାର ଦେହ ବ୍ୟବସାୟ କରିଥିବା ସେଠାର ଜଣେ ମାଛ ବିକାଳୀ ।

୪୪ ବର୍ଷର କାଥରିନ ଜଣେ ବିଧବା ଓ ତିନି ସନ୍ତାନଙ୍କ ଜନନୀ। ସେ କହିଛନ୍ତି, ୨୦୧୮ର କଥା। ଲଗାତର ତିନି ଦିନ ଯାଏଁ ମୁଁ ମଲାୱି ହ୍ରଦ କୂଳକୁ ଯାଉଥିଲି ମାଛ ପାଇଁ। କିନ୍ତୁ ପ୍ରତିଥର ମୋତେ ନିରାଶ ହୋଇ ଫେରିବାକୁ ହେଉଥିଲା। ମାଛ କିଣି ପାରୁ ନ ଥିଲି। କାରଣ ମୁଁ ମାଛ ବଦଳରେ ଦେହ ଦାନ କରିବାକୁ ମନା କରି ଦେଉଥିଲି। ହେଲେ ଚତୁର୍ଥ ଦିନରେ ଆଉ ପାରିଲିନି ଓ ରାଜି ହୋଇଯାଇଥିଲି। କାରଣ ପିଲାଙ୍କ ବଞ୍ଚିବା କଷ୍ଟକର ହୋଇପଡିଲା। ମତେ ଦୁଇ ପଇସା ରୋଜଗାର କରିବାର ଥିଲା। ଆଉ ଅର୍ଥ ରୋଜଗାର ପାଇଁ ମାଛ ବିକିବା ଏକମାତ୍ର ଜରିଆ ଥିଲା। ଏହା ପରେ ବହୁ ବର୍ଷ ଧରି ଅନେକଙ୍କ ଶଯ୍ୟା ସଙ୍ଗିନୀ ମୁଁ ହୋଇଛି ବୋଲି କହିଛନ୍ତି କାଥରିନ।

ଉତ୍ତର ମଲାୱିସ୍ଥିତ ମଜୁଜୁ ବିଶ୍ୱବିଦ୍ୟାଳୟରେ ମତ୍ସ୍ୟ ପାଳନ ଓ ଜଳୀୟ ବିଜ୍ଞାନର ଜଣେ ପ୍ରଫେସର ମାଛ ବଦଳରେ ସେକ୍ସ ସମ୍ବନ୍ଧରେ କହିଛନ୍ତି କି, ମଲାୱି ହ୍ରଦ କୂଳରେ ଥିବା ଜିଲ୍ଳାଗୁଡିକରେ ରହୁଥିବା ଲୋକଙ୍କ ଆୟର ପ୍ରମୁଖ ଉତ୍ସ ହେଉଛି ମାଛ ଧରିବା ଓ ବିକିବା। ତେବେ ଯେଉଁଠି ମାଛ କିଣୁଥିବା ବ୍ୟକ୍ତି ମହିଳା ସେଠାରେ ଏପରି ଚଳଣି ଦେଖିବାକୁ ମିଳେ। ଆଉ ନଭେମ୍ବର ଓ ଡିସେମ୍ବରରେ ସେକ୍ସ ବଦଳରେ ମାଛର ପ୍ରଚଳନ ବୃଦ୍ଧି ପାଇଥାଏ। କାରଣ ଏହି ସମୟରେ ମାଛ ଉତ୍ପାଦନ କମିବା ସହ ଲୋକଙ୍କ ଚାହିଦା ରହିଥାଏ।

ତେବେ ସବୁ ମାଛ ଧରାଳି ଏପରି କରି ଥାନ୍ତି ସେହି ଅଭିଯୋଗକୁ ସେଠାକାର ଜଣେ ମତ୍ସ୍ୟଜୀବୀ ଖଣ୍ଡନ କରିଛନ୍ତି। ସେ କହିଛନ୍ତି ସେ କେବେ ଏପରି କାରବାର କରି ନାହାନ୍ତି। ତେବେ ଅଧିକାଂଶ ମାଛଧରାଳି ଏପରି କରିଥିବା ସେ ସ୍ୱୀକାର କରିଛନ୍ତି। କାରଣ ମାଛ ବିକୁଥିବା ମହିଳାମାନେ ସାଧାରଣତଃ ଗରିବ ଶ୍ରେଣୀର। ସେମାନଙ୍କ ପାଖରେ ମାଛ କିଣିବାକୁ ପଇସା ନ ଥାଏ। ତେଣୁ ମାଛ ଧରାଳି ସେମାନଙ୍କୁ ଅନେକ ସମୟରେ ଏପରି ଅଫର ଦେଇଥାନ୍ତି। ଅନେକ ସମୟରେ ମହିଳାମାନେ ମଧ୍ୟ ସେମାନଙ୍କ ସହ ଶୋଇବାକୁ ଦିଅନ୍ତି ନିମନ୍ତ୍ରଣ।

ବର୍ତ୍ତମାନ ଏହି ସ୍ଥିତିରେ ଆସିଲାଣି ପରିବର୍ତ୍ତନ। ସରକାରୀ ସହାୟତା ଦ୍ୱାରା ମହିଳାମାନେ ଆଉ ଏପରି ଅପମାନ ଓ ଲଜ୍ଜାଜନକ କାମ କରୁନାହାନ୍ତି।
ଜିଲ୍ଲାପାଳଙ୍କ ଦ୍ୱିତୀୟ ବିବାହ, ଧୁମ୍ ମଚାଇଲେ ବର ଓ କନ୍ୟା

ଗୌହାଟିରେ ଚର୍ଚ୍ଚିତ ବିବାହ ସମ୍ପନ୍ନ ହୋଇଛି । ଓଡ଼ିଶାର ସମ୍ବଲପୁର ଏବଂ ବଲାଙ୍ଗିର ଜିଲ୍ଲାପାଳ ଶେଷରେ ପରସ୍ପରକୁ ଜୀବନ ସାଥୀ ଭାବେ ଗ୍ରହଣ କରିଛନ୍ତି । ମେ’୧ ତାରିଖରେ ଗୌହାଟିରେ ଏକ ଭବ୍ୟ ଆୟୋଜନରେ, ସମସ୍ତଙ୍କ ଉପସ୍ଥିତିରେ ସରିଛି ମ୍ୟାରେଜ୍ । ସବୁଠାରୁ ବଡ଼ କଥା ସମ୍ବଲପୁର ଜିଲ୍ଲାପାଳ ଅନନ୍ୟା ଦାସ ଏବଂ ବଲାଙ୍ଗିର ଜିଲ୍ଲାପାଳ ଚଞ୍ଚଲ ରାଣା ବିବାହ ପୂର୍ବରୁ ଧୁମ୍ ନାଚିଥିଲେ ଯାହା ସମସ୍ତଙ୍କୁ ବେଶ୍ ପସନ୍ଦ ହୋଇଛି ।

ଗତ ଫେବ୍ରୁଆରୀରେ ଉଭୟଙ୍କ ନିର୍ବନ୍ଧ ସରିଥିବା ବେଳେ ଏବେ ବିବାହ ସମ୍ପନ୍ନ ହୋଇଛି । ଗତକାଲି ରାତି ପ୍ରାୟ ୮ଟାରେ ଚଞ୍ଚଳ ରଣା ବରଯାତ୍ରୀ ଧରି କନ୍ୟା ଘରକୁ ବାହାରିଥିଲେ । ବରଯାତ୍ରୀରେ ନିଜେ ଚଞ୍ଚଳ ରଣା ନାଚିଥିଲେ । ବରଯାତ୍ରୀ କନ୍ୟା ଘରେ ପହଞ୍ଚିବା ପରେ ସ୍ୱାଗତ କରିଥିଲେ କନ୍ୟା ପକ୍ଷ । ମିଠା ଖୁଆଇ ଚଞ୍ଚଲଙ୍କୁ କନ୍ୟା ପକ୍ଷ ପାଛୋଟି ନେଇଥିଲେ । ସମ୍ବଲପୁର ଜିଲ୍ଲାପାଳ ଅନନ୍ୟା ଦାସ ମଧ୍ୟ ଦୁଲହନ ବେଶରେ ସଜେଇ ହୋଇଥିଲେ । ବାହାଘରକୁ ନେଇ ଅନନ୍ୟା ବେଶ୍ ଖୁସି ଥିବାବେଳେ ନବ ଦମ୍ପତିଙ୍କୁ ଶୁଭେଚ୍ଛାର ସୁଅ ଛୁଟିଛି ।

ଉଭୟ IASଙ୍କ ଏହା ଦ୍ୱିତୀୟ ବିବାହ ଥିଲା । ଏଥିରେ ଜିଲ୍ଲାପାଳଙ୍କ ପରିବାରବର୍ଗ ଓ କିଛି ପ୍ରଶାସନିକ ଅଧିକାରୀ ସାମିଲ ହୋଇଥିଲେ । ଆସାମ ଝିଅ ଅନନ୍ୟା ଦାସ ବର୍ତ୍ତମାନର କୋରାପୁଟ ଜିଲ୍ଲାପାଳ ଅବଦୁଲ ଏମ୍.ଅଖତରଙ୍କୁ ବିବାହ କରିଥିଲେ ହେଲେ ଦୁହିଁଙ୍କର ବିବାହ ବିଚ୍ଛେଦ ହୋଇଥିଲା । ୨୦୧୮ ବ୍ୟାଚ ଆଇଏଏସ ଅଫିସର ହେଉଛନ୍ତି ଅନନ୍ୟା । ପୂର୍ବରୁ ସେ କଟକ ମ୍ୟୁନିସିପାଲିଟିର କମିଶନର ଥିଲେ । ସେପଟେ, ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣା ଅନୁଗୁଳ ବାସିନ୍ଦା । ପୂର୍ବରୁ ସେ ରାୟଗଡ଼ା ଜିଲ୍ଲାପାଳ ସ୍ୱଧା ଦେବ ସିଂହଙ୍କୁ ବିବାହ କରିଥିଲେ। ମତଭେଦ କାରଣରୁ ଉଭୟଙ୍କର ନିକଟରେ ଛାଡପତ୍ର ହୋଇଥିଲା। ୨୦୧୩ ବ୍ୟାଚ୍ ଆଇଏଏସ୍ ଅଫିସର ହେଉଛନ୍ତି ଚଞ୍ଚଳ ରାଣା । ବଲାଙ୍ଗିର ଜିଲ୍ଲାପାଳ ଥିବା ଚଞ୍ଚଳ ରଣାଙ୍କ ଘର ଅନୁଗୁଳ ଜିଲ୍ଲାରେ । ଶ୍ୱେତ ବିପ୍ଳବ ପାଇଁ ଜାତୀୟ ଗଣମାଧ୍ୟମରେ ବେଶ୍ ଚର୍ଚ୍ଚାକୁ ଆସିଥିଲେ । ବଲାଙ୍ଗିର ଜିଲ୍ଲାପାଳ ଚଞ୍ଚଳ ରଣା ପୂର୍ବରୁ ବର୍ତ୍ତମାନର ରାୟଗଡ଼ା ଜିଲ୍ଲାପାଳ ସ୍ଵଧାଦେବ ସିଂହଙ୍କୁ ବିବାହ କରିଥିଲେ । ତେବେ ବ୍ୟକ୍ତିଗତ କାରଣରୁ ଉଭୟଙ୍କ ବିବାହ ବିଚ୍ଛେଦ ଘଟିଥିଲା ।
କମ ଯନ୍ତ୍ରଣାଦାୟୀ ମୃତ୍ୟୁ ଉପାୟ ବାହାର କରିବାକୁ କମିଟିର ଆବଶ୍ୟକତା ରହିଛି:କେନ୍ଦ୍ର

ଯନ୍ତ୍ରଣାବିହୀନ ବା କମ ଯନ୍ତ୍ରଣାଦାୟକ ମୃତ୍ୟୁକୁ ନେଇ ଆଜି ସୁପ୍ରିମ କୋର୍ଟରେ କେନ୍ଦ୍ର ସରକାର ପକ୍ଷରୁ ବିଶେଷଜ୍ଞ କମିଟି ଗଠନ ପାଇଁ ପ୍ରସ୍ତାବ ଦିଆଯାଇଛି। କେନ୍ଦ୍ର କହିଛି କି, ମୃତ୍ୟୁଦଣ୍ଡ କ୍ଷେତ୍ରରେ କମ ଯନ୍ତ୍ରଣାଦାୟକ ଉପାୟ ଖୋଜିବାକୁ ଏକ୍ସପର୍ଟ କମିଟି ଗଠନ ଉପରେ ବିଚାର କରାଯାଉଛି। ମାମଲାରେ ପରବର୍ତ୍ତୀ ଶୁଣାଣି ଜୁଲାଇ ମାସରେ ହେବ। କେନ୍ଦ୍ର ପକ୍ଷରୁ ଆଟର୍ନି ଜେନେରାଲ ଭେଙ୍କଟରମନୀ କୋର୍ଟଙ୍କୁ ଏହି ସୂଚନା ଦେଇଛନ୍ତି।ଏଜି କହିଛନ୍ତି, ସାମ୍ପ୍ରତିକ ଆଇନ ପଦ୍ଧତିରେ ଫାଶୀ ଦଣ୍ଡରେ ଦଣ୍ଡିତ କଏଦୀଙ୍କୁ ଫାଶୀଠାରୁ କମ ଯନ୍ତ୍ରଣାଦୟକ ଦଣ୍ଡ କିଛି ଅଛିକି, ତା ଉପରେ କମିଟି କାର୍ଯ୍ୟ କରିବ।

ମାମଲାର ପୂର୍ବ ଶୁଣାଣି କାଳରେ ସୁପ୍ରିମ କୋର୍ଟ କେନ୍ଦ୍ରକୁ ଫାଶୀଠାରୁ କମ ଯନ୍ତ୍ରଣାଦାୟକ ଉପାୟ ଖୋଜି ବାହାର କରିବାକୁ ଏକ କମିଟିର ଆବଶ୍ୟକତା ଥିବା କହିଥିଲେ। ଏଥିସହ, ଅନ୍ୟ ଦେଶରେ ଦିଆଯାଉଥିବା ବିଭିନ୍ନ ପ୍ରଣାଳୀକୁ ଅନୁଧ୍ୟାନ କରିବା ଉପରେ ଗୁରୁତ୍ବଆରୋପ କରିଥିଲେ। ପୂର୍ବ ଶୁଣାଣିରେ କୋର୍ଟ ପଚାରିଥିଲେ କି ଫାଶୀ ଦେଲେ କେତେ କଷ୍ଟ ହୁଏ ତାର ତଥ୍ୟ ଦିଆଯାଉ। ଆଧୁନିକ ବିଜ୍ଞାନ ଓ ବୈଷୟିକ ଜ୍ଞାନ କୌଶଳର ଫାଶି ଉପରେ କଣ ଦୃଷ୍ଟିଭଙ୍ଗି ରହିଛି? ଦେଶ ତଥା ବିଦେଶରେ ମୃତ୍ୟୁଦଣ୍ଡର ନେଇ କଣ ସବୁ ବିକଳ୍ପ ଅଛି? ଏସବୁର ଡାଟା ମାଗିଥିଲେ କୋର୍ଟ।

ସିଜେଇ ଚନ୍ଦ୍ରଚୂଡ କହିଥିଲେ କି, ଏହା ଏକ ବିଚାରର ବିଷୟ। ତେଣୁ ଏହା ଉପରେ କିଛି ବୈଜ୍ଞାନିକ ତଥ୍ୟ ପ୍ରମାଣର ଆବଶ୍ୟକତା ରହିଛି। ମୃତ୍ୟୁକୁ ନେଇ ଦେଶ ଓ ବିଦେଶରେ ଥିବା ବିଭିନ୍ନ ଉପାୟରେ ହେଉଥିବା ଯନ୍ତ୍ରଣା ଉପରେ ଅଧ୍ୟୟନ କରିବାକୁ ହେବ। ତେଣୁ କମିଟିରେ କେଉଁମାନେ ସାମିଲ ହେବେ ତାକୁ ନେଇ କେନ୍ଦ୍ରର ପରାମର୍ଶ ଲୋଡିଥିଲେ କୋର୍ଟ।
ଆସିଲା କଂଗ୍ରେସ ନିର୍ବାଚନୀ ଇସ୍ତାହାର, ସ୍ନାତକଙ୍କୁ ମିଳିବ ମାସିକ ୩୦୦୦ ଟଙ୍କା

ନିର୍ବାଚନ ତାତିରେ କର୍ଣ୍ଣାଟକ ଉଠୁଛି ପଡୁଛି । ଏହରି ମଧ୍ୟରେ କଂଗ୍ରେସ ତାର ଘୋଷଣାପତ୍ର ଜାରି କରିଛି । ଆଜି କଂଗ୍ରେସ ଜାରି କରିଥିବା ନିର୍ବାଚନୀ ଇସ୍ତାହାରରେ ଲୋକଙ୍କୁ ୨ ଶହ ୟୁନିଟ୍ ମାଗଣା ବିଜୁଳି ସହ ପ୍ରତ୍ୟେକ ପରିବାରର ମହିଳା ମୁଖ୍ୟଙ୍କୁ ମାସିକ ୨ ହଜାର ଟଙ୍କା ଲେଖାଏଁ ଦେବାକୁ ପ୍ରତିଶ୍ରୁତି ଦେଇଛି ।

କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ୍ ଖଡଗେ, କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ସିଦ୍ଧରୈମୟା ଓ ପ୍ରଦେଶ ଅଧ୍ୟକ୍ଷ ଡି.କେ ଶିବକୁମାରଙ୍କ ଉପସ୍ଥିତିରେ କଂଗ୍ରେସ ଏହି ଘୋଷଣା ପତ୍ର ଜାରି କରିଛି । ଏଥିରେ ବେରୋଜଗାର ସ୍ନାତକଙ୍କୁ ମଧ୍ୟ ଧ୍ୟାନରେ ରଖାଯାଇଛି । ସ୍ନାତକ ଡିଗ୍ରୀଧାରୀ ବେକାର ଯୁବକଙ୍କୁ ଦୁଇ ବର୍ଷ ପାଇଁ ମାସିକ ୩ ହଜାର ଲେଖାଏଁ ଭତ୍ତା ଦିଆଯିବ । ସେହିପରି ବେରୋଜଗାର ଡିପ୍ଲୋମାଧାରୀଙ୍କୁ ମାସିକ ଦେଢ ହଜାର ଲେଖାଏଁ ଭତ୍ତା ଦିଆଯିବ ବୋଲି କଂଗ୍ରେସ ପ୍ରତିଶୃତି ଦେଇଛି । ଏଥିସହିତ
କେଏସଆରଟିସି ଏବଂ ବିଏମଟିସିରେ ସବୁ ମହିଳାଙ୍କୁ ମାଗଣା ଯାତ୍ରାର ପ୍ରତିଶ୍ରୁତି ଦେଇଛି କଂଗ୍ରେସ ।

ସେହିପରି କଂଗ୍ରେସ ନିର୍ବାଚନୀ ଇସ୍ତାହାରରେ ଜାତୀୟ ସଂରକ୍ଷଣକୁ ମଧ୍ୟ ଧ୍ୟାନରେ ରଖାଯାଇଛି । ଅନୁସୂଚିତ ଜାତି ପାଇଁ ସଂରକ୍ଷଣ ୧୫ ପ୍ରତିଶତରୁ ୧୭ ପ୍ରତିଶତକୁ ବୃଦ୍ଧି କରାଯାଇଥିବା ବେଳେ ଅନୁସୂଚିତ ଜନଜାତି ପାଇଁ ଥିବା ସଂରକ୍ଷଣକୁ ୩ରୁ ୭ ପ୍ରତିଶତକୁ ଏବଂ ସଂଖ୍ୟାଲଘୁଙ୍କ ପାଇଁ ଥିବା ସଂରକ୍ଷଣକୁ ୪ ପ୍ରତିଶତ କରିବାକୁ କଂଗ୍ରେସ ନିଜର ଘୋଷଣାପତ୍ରରେ ପ୍ରତିଶ୍ରୁତି ଦେଇଛି । ଆଇନ୍ ଏବଂ ସମ୍ବିଧାନକୁ ସର୍ବୋପରି ଦର୍ଶାଇ କଂଗ୍ରେସ ଘଷଣା ପତ୍ରରେ ଦର୍ଶାଇଛି ଯେ, ସମୁଦାୟ ଭିତରେ ଘୃଣା ବଡାଇବା ପାଇଁ ସମ୍ବିଧାନ ଓ ଆଇନର ଉଲ୍ଲଙ୍ଘନ କରିବାକୁ ଦିଆଯିବନି ।
ରାଜ୍ୟର ସର୍ବ ପୁରାତନ ଶିକ୍ଷାନୁଷ୍ଠାନର ଦୁରାବସ୍ଥା

ରାଜ୍ୟ ସରକାର ଶିକ୍ଷା ଓ ଶିକ୍ଷା ବ୍ୟବସ୍ଥାକୁ ନେଇ ଡିଣ୍ଡିମ ପିଟୁଥିବା ବେଳେ କିନ୍ତୁ ରାଜ୍ୟର ସର୍ବପୁରାତନ ବିଶ୍ୱବିଦ୍ୟାଳୟ ହରାଇଛି ପୂର୍ବ ଗୌରବ। ନାସନାଲ ଆସେସମେଣ୍ଟ ଆଣ୍ଡ ଆକ୍ରେଡିଟେସନ କାଉନସିଲ (ନାକ୍)ଗ୍ରେଡେସନରେ ଉତ୍କଳ ବିଶ୍ୱବିଦ୍ୟାଳୟ ଏକ ପାଦ ତଳକୁ ଖସିଯାଇଛି। ଉଚ୍ଚଶିକ୍ଷା କ୍ଷେତ୍ରରେ ଦେଶରେ ବିଦ୍ୟାଳୟ, ବିଶ୍ୱବିଦ୍ୟାଳୟ ଓ ମାନ୍ୟତାପ୍ରାପ୍ତ ଶିକ୍ଷାନୁଷ୍ଠାନର ମାନ ନିର୍ଦ୍ଧାରଣ କରିଥାଏ ଏହି ଅନୁଷ୍ଠାନ। ୨୦୧୬ରେ ଉତ୍କଳ ବିଶ୍ୱବିଦ୍ୟାଳୟ A+ ମାନ୍ୟତା ପାଇଥିଲା।

ପୂର୍ବରୁ ନାକ୍ ମୂଲ୍ୟାୟନରେ ଉତ୍କଳ ବିଶ୍ବବିଦ୍ୟାଳୟ A+ ମାନ୍ୟତା ହାସଲ କରିଥିଲା। କିନ୍ତୁ ଚଳିତ ମୂଲ୍ୟାଙ୍କନରେ ପାଦେ ତଳକୁ ଖସି ୩.୧୬ ପଏଣ୍ଟ ସହ A ମାନ୍ୟତା ହାସଲ କରିଛି। ଗତ ମାସରେ ନାକର ମୂଲ୍ୟାୟନ ଟିମ୍ ବିଶ୍ୱବିଦ୍ୟାଳୟ ଆସି ଅନୁଧ୍ୟାନ କରି କାଉନ୍‌ସିଲକୁ ରିପୋର୍ଟ ଦେଇଥିଲେ।

ନାକ୍ ରିପୋର୍ଟ ଆସିବା ପରେ ରାଜ୍ୟ ଗୌରବର ପ୍ରତୀକ ଏହି ସବୁଠାରୁ ପୁରୁଣା ବିଶ୍ୱବିଦ୍ୟାଳୟର ଅବନତିକୁ ନେଇ ବୁଦ୍ଧିଜୀବୀ ମହଲରେ ଉଦବେଗ ପ୍ରକାଶ ପାଇଛି। ଅନୁଷ୍ଠାନର ଦୁର୍ବଳ ଭିତ୍ତିଭୂମିକୁ କାରଣ ବୋଲି ଚର୍ଚ୍ଚା ହେଉଛି। ତେବେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଏନେଇ ପ୍ରତିକ୍ରିୟା ଦେଇନାହାନ୍ତି।
ଆଜି ଗୁଜୁରାଟ ହାଇକୋର୍ଟରେ ହେବ କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ମାମଲାର ଶୁଣାଣୀ

କଂଗ୍ରେସ ନେତା ରାହୁଲ ଗାନ୍ଧୀଙ୍କ ମାମଲାରେ ଆଜି ହେବ ଶୁଣାଣି । ମୋଦୀ ସୋରନେମ ମାମଲାରେ ଆସିଥିବା ନିମ୍ନ କୋର୍ଟର ରାୟକୁ ନେଇ ସେସନସ କୋର୍ଟ ଯାଇଥିଲେ ରାହୁଲ ଗାନ୍ଧୀ । ହେଲେ ଗତ ସେସନସ କୋର୍ଟ ଏପ୍ରିଲ 20 ତାରିଖରେ ପୂର୍ବ ରାୟକୁ କାଏମ ରଖିବା ପରେ ଗୁଜରାଟ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ ରାହୁଲ । ରାହୁଲ ଗାନ୍ଧୀଙ୍କ ପାଇଁ କେଶ ଲଢୁଛନ୍ତି ବରିଷ୍ଠ ଆଇନଜୀବୀ ଅଭିଷେକ ମନୁ ସିଙ୍ଘଭି । ପ୍ରଥମେ ଏହି ମାମଲାର ଶୁଣାଣୀ ପାଇଁ ଜଷ୍ଟିସ ଗୀତା ଗୋପୀ ଅଗ୍ରାହ୍ୟ କରିଦେଇଥିଲେ । ଏହାପରେ ବିଚାର ଭାର ଜଷ୍ଟିସ ହେମନ୍ତ ପ୍ରଚ୍ଛକଙ୍କୁ ଦିଆଯାଇଛି ।

ଆପଣଙ୍କୁ ଏଠାରେ କହିରଖୁଛୁ, 2019ରେ କର୍ଣ୍ଣାଟକର କୋଲରରେ ନିର୍ବାଚନ ରାଲି ବେଳେ କଂଗ୍ରେସ ସାଂସଦ ରାହୁଲ ଗାନ୍ଧୀ, ମୋଦି ସାଙ୍ଗିଆକୁ ନେଇ ଏକ ବୟାନ ଦେଇଥିଲେ । ଯହାକୁ ନେଇ ସୁଟରତର ନିମ୍ନ ଅଦାଲତରେ ରାହୁଲଙ୍କ ବିରୁଦ୍ଧରେ ଏକ ମାନହାନୀ କେଶ କରାଯାଇଥିଲା । ଆଉ ସେହି ମାମଲାରେ ମାର୍ଚ୍ଚ ମାସ 23 ତାରିଖରେ ରାହୁଲଙ୍କୁ ଦୋଷୀ ସାବ୍ୟସ୍ତ କରିବା ସହ 2 ବର୍ଷ ଜେଲଦଣ୍ଡାଦେଶ ଶୁଣାଇଥିଲେ ସିଜେଏମ କୋର୍ଟ । ଏହାପରେ ରାଜନୈତିକ ଝଡ ସୃଷ୍ଟି ହୋଇଥିଲା । କେବଳ ଯେ ରାହୁଲ ଗାନ୍ଧୀଙ୍କୁ ଜେଲ ହୋଇଥିଲା ତାହା ନୁହେଁ, ଦଣ୍ଡ ଶୁଣାଣୀର ମାତ୍ର ଗୋଟିଏ ଦିନ ପରେ ଅର୍ଥାତ ମାର୍ଚ୍ଚ 24ରେ ସାଂସଦ ପଦ ହରାଇଥିଲେ ରାହୁଲ ଗାନ୍ଧୀ । ଏହାପରେ ତାଙ୍କୁ ସରକାରୀ ବଙ୍ଗଳା ମଧ୍ୟ ଖାଲି କରିବାକୁ କୁହାଯାଇଥିଲା ।
IPL ମୈଦାନରେ ପୁଣି ମୁହାଁମୁହିଁ, ଦୁଇ ଜଣଙ୍କ କଟିଲା ମ୍ୟାଚ୍ ଫି’

ଫଟାଫଟ୍ କ୍ରିକେଟ୍ ଆଇପିଏଲ୍ ଯେତିକି ଲୋକପ୍ରିୟତା ହାସଲ କରୁଛି ତା ପଛରେ ବିବାଦ ବି ବଢ଼ିବାରେ ଲାଗିଛି । IPL ଇତିହାସରେ ଏମିତି ଅନେକ ଘଟଣା ଅଛି ଯେଉଁଥିରେ ଖେଳାଳି, ଅମ୍ପାୟାର, ଦର୍ଶକ, ମ୍ୟାନେଜମେଣ୍ଟ, ମାଲିକ ସମସ୍ତେ ବିବାଦ ଘେରକୁ ଆସିଛନ୍ତି । ଏବେ ପୁଣି ଥରେ ସେହି ବିବାଦ ନେଇ ପ୍ରଶ୍ନ ଉଠିଛି । ଏବେ କିନ୍ତୁ ଖେଳାଳି-ଖେଳାଳି ବିବାଦ ନୁହେଁ, ମୁହାଁମୁହିଁ ହୋଇଛନ୍ତି ଜଣେ ବିଶ୍ୱର ସର୍ବଶ୍ରେଷ୍ଠ ଖେଳାଳି ତ ଆଉ ଜଣେ ପୂର୍ବତନ କ୍ରିକେଟର ତଥା ବର୍ତ୍ତମାନର ମେଣ୍ଟର ।

ସୋମବାର ଲକ୍ଷ୍ନୌର ଏକନା କ୍ରିକେଟ ଷ୍ଟାଡିୟମରେ ଲକ୍ଷ୍ନୌ–ବାଙ୍ଗାଲୋର ମଧ୍ୟ ଆଇପିଏଲ୍ ମ୍ୟାଚ୍ ଅନୁଷ୍ଠିତ ହୋଇଥିଲା । ୧୨୭ ରନ୍ ଚେଜ୍ କରିନପାରି ୧୮ ରନରେ ହାରିଥିଲା ଲକ୍ଷ୍ନୌ । ହେଲେ ଏହା କିନ୍ତୁ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ଆରସିବି ଠାରୁ ଲକ୍ଷ୍ନୌ ହାରିବା ପରେ ବିରାଟଙ୍କ ସହ ମୁହାଁମୁହିଁ ହୋଇଥିଲେ ଲକ୍ଷ୍ନୌ ମେଣ୍ଟର । ପଡ଼ିଆ ଭିତରେ ଉତ୍ତେଜନାମୂଳକ କଥାବାର୍ତ୍ତା ହୋଇଥିଲା । ମ୍ୟାଚ୍ ପରେ ରେଜଲ୍ଟ ଆସିଲା ହେଲେ ବାକ୍ ଯୁଦ୍ଧ ଆରମ୍ଭ ହେଲା । ପଡି଼ଆରେ ଅମିତ ମିଶ୍ର, ଫାପ୍ ଡୁ ପ୍ଲେସିସ୍ ଓ ଲକ୍ଷ୍ନୌ କୋଚ୍ ବିଜୟ ଦାହିୟାଙ୍କ ପରି ଖେଳାଳିଙ୍କ ଉପସ୍ଥିତିରେ ପୁଣି ଥରେ ମୁହାଁମୁହିଁ ହୋଇଥିଲେ କୋହଲି ଏବଂ ଲକ୍ଷ୍ନୌ ମେଣ୍ଟର ଗମ୍ଭୀର । ଦୁଇ ଜଣଙ୍କ ମଧ୍ୟରେ ବେଶ୍ କିଛି ସମୟ କଥା କଟାକଟି ହୋଇଥିଲା ।

ଆଇପିଏଲ୍ କୋଡ୍ ଅଫ୍ କଣ୍ଡକ୍ଟ ଅନୁସାରେ ଦୁଇ ଜଣଙ୍କୁ ଜରିମାନା କରାଯାଇଛି । ଲକ୍ଷ୍ନୌ ମେଣ୍ଟର ଗୌତମ ଗମ୍ଭୀର ଓ ଆରସିବି ଖେଳାଳି ବିରାଟ କୋହଲିଙ୍କ ଶତ ପ୍ରତିଶତ ମ୍ୟାଚ୍ ଫି’ କଟାଯାଇଛି । ସେହିପରି, ଏହି ଘଟଣାରେ ‌ଲକ୍ଷ୍ନୌ ବୋଲର ନବୀନ୍-ଉଲ୍-ହକଙ୍କ ୫୦ ପ୍ରତିଶତ ମ୍ୟାଚ୍ ଫି’ କଟାଯାଇଛି । ୨୦୧୩ରେ ଆଇପିଏଲ୍ ମ୍ୟାଚ୍ ବେଳେ ଗମ୍ଭୀର ଏବଂ କୋହଲିଙ୍କ ମଧ୍ୟରେ ଜୋରଦାର ବାକ୍-ଯୁଦ୍ଧ ହୋଇଥିଲା । ସେତେବେଳେ ଗୌତମ ଗମ୍ଭୀର କୋଲକାତା ନାଇଟ୍ ରାଇଡର୍ସର ଅଧିନାୟକ ଥିବାବେଳେ ଆରସିବି ଦାୟିତ୍ୱରେ ଥିଲେ କୋହଲି ।
ସରକାରୀ ଜମି ଆବଣ୍ଟନରେ ହାଇକୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ

ରାଜ୍ୟରେ ଗୃହ ଓ ନଗର ଉନ୍ନୟ ବିଭାଗ ଅଧୀନରେ ଥିବା ବିଭିନ୍ନ କର୍ତ୍ତୃପକ୍ଷଙ୍କ ଠାରୁ ଏକାଧିକ ପ୍ଲଟ ନେବା ଉପରେ ହାଇକୋର୍ଟ ରୋକ । ସରକାରୀ ଜମି ଆବଣ୍ଟନରେ ଜଣେ ବ୍ୟକ୍ତି ରାଜ୍ୟର କୌଣସି ଉନ୍ନୟନ କର୍ତ୍ତୃପକ୍ଷଙ୍କଠାରୁ ଗୋଟିଏ ପ୍ଲଟ ନେଇପାରିବେ ବୋଲି ହାଇକୋର୍ଟ କହିଛନ୍ତି। ତେଣୁ ଏଥିସମ୍ବନ୍ଧିତ ନିୟମାବଳୀ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ।

ମାମଲାର ବିଚାର କରି ହାଇକୋର୍ଟ କହିଛନ୍ତି କି, ଜଣେ ବ୍ୟକ୍ତି ଏକାଧିକ ପ୍ଲଟ ନେବାରୁ ଅନେକ ଜମି ପାଇବାରୁ ବଞ୍ଚିତ ହେଉଛନ୍ତି। ଜଣଙ୍କ ପାଖରେ ଏକାଧିକ ପ୍ଲଟ ତ ଅନ୍ୟ ଜଣେ ଖଣ୍ଡେ ବି ପ୍ଲଟ ପାଉନାହାନ୍ତି। ତେଣୁ ଏହା ଉପରେ ଗୃହ ଓ ନଗର ଉନ୍ନୟନ ବିଭାଗ ଅଧୀନରେ ଥିବା ବିଭିନ୍ନ ଉନ୍ନୟନ କର୍ତ୍ତୃପକ୍ଷ ସେମାନଙ୍କ ନିୟମ ପ୍ରସ୍ତୁତ କଲା ବେଳେ ବିଶେଷ ଧ୍ୟାନ ଦେବାର ଆବଶ୍ୟକତା ରହିଛି। କୌଣସି ଉନ୍ନୟନ କର୍ତ୍ତୃପକ୍ଷଙ୍କ ଠାରୁ ଜଣେ ବ୍ୟକ୍ତି ଗୋଟିଏ ପ୍ଲଟ ପାଇବା ପରେ ଦ୍ୱିତୀୟ ଥର ଆବେଦନ କରିପାରିବେ ନାହିଁ ବୋଲି କୋର୍ଟ କହିଛନ୍ତି।
ମହାରାଷ୍ଟ୍ର: କୋଲହାପୁରରେ ୮୯ ବର୍ଷ ବୟସରେ ମହାତ୍ମା ଗାନ୍ଧିଙ୍କ ନାତି ଅରୁଣ ଗାନ୍ଧିଙ୍କ ଦେହାନ୍ତ