Category: ଦେଶ-ବିଦେଶ

ରେସଲରଙ୍କ ମାମଲାର ଶୁଣାଣି ବନ୍ଦ କଲେ ସର୍ବୋଚ୍ଚ ନ୍ୟାୟାଳୟ

କୁସ୍ତି ମହାସଂଘର ସଭାପତି ବ୍ରିଜ ଭୂଷଣ ଶରଣ ସିଂହଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗରେ ଦିଲ୍ଲୀର ଯନ୍ତରମନ୍ତରରେ ଆନ୍ଦୋଳନ କରୁଥିବା ରେସଲରଙ୍କ ଆବେଦନ ଶୁଣାଣି ବନ୍ଦ କରିଛନ୍ତି ସୁପ୍ରିମକୋର୍ଟ। କୋର୍ଟଙ୍କ ହସ୍ତକ୍ଷେପ ପରେ ବ୍ରିଜ ଭୂଷଣଙ୍କ ବିରୋଧରେ ପୋଲିସ ଏଫଆଇଆର ରୁଜୁ କରିବା ସହ ମହିଳା ରେସଲରଙ୍କ ସୁରକ୍ଷା ପାଇଁ ପଦକ୍ଷେପ ନେବା ପରେ କୋର୍ଟ ଶୁଣାଣି ବନ୍ଦ କରିଛନ୍ତି।

ପୋଲିସ କାର୍ଯ୍ୟାନୁଷ୍ଠାନ ପରେ ସର୍ବୋଚ୍ଚ ନ୍ୟାୟାଳୟ ୭ ମହିଳା କୁସ୍ତି ଯୋଦ୍ଧାଙ୍କ ମଧ୍ୟରୁ ୩ ଜଣଙ୍କ ଆବେଦନର ଶୁଣାଣିକୁ ବନ୍ଦ କରିଛନ୍ତି। ସିଜେଇ ଡିୱାଇ ଚନ୍ଦ୍ରଚୂଡ଼ ଅଧ୍ୟକ୍ଷତାରେ ଜଷ୍ଟିସ ପିଏସ୍‌ ନରସୀମା ଓ ଜଷ୍ଟିସ ଜେବି ପାରଡିୱାଲାଙ୍କୁ ନେଇ ଗଠିତ ଖଣ୍ଡପୀଠଙ୍କ ସମ୍ମୁଖରେ ଆଜି ରେସଲରଙ୍କ ଓକିଲ ମାମଲାର ତଦନ୍ତ କୌଣସି ହାଇକୋର୍ଟ ବିଚାରପତିଙ୍କ ତତ୍ତ୍ୱାବଧାନରେ କରିବାକୁ ଅପିଲ କରିଥିଲେ। ଏହାର ଜବାବରେ ଖଣ୍ଡପୀଠ କହିଥିଲେ ରେସଲରଙ୍କ ଏଫଆଇଆର ଗ୍ରହଣ କରିବାକୁ ପୋଲିସକୁ ନିର୍ଦ୍ଦେଶ ଦେବା ସହ ଅଭିଯୋଗକାରୀଙ୍କୁ ସୁରକ୍ଷା ଯୋଗାଇ ଦେବାକୁ ଅପିଲ ହୋଇଥିଲା, ଯାହା ବର୍ତ୍ତମାନ ପୂରଣ ହୋଇଛି। ଆଉ ଯେଉଁ ଅଭିଯୋଗ ରହିଛି ତାକୁ ହାଇକୋର୍ଟ କିମ୍ବା ମାଜିଷ୍ଟ୍ରେଟଙ୍କ ପାଖରେ ଆବେଦନ କରିପାରିବେ।

ସୂଚନାଯୋଗ୍ୟ, କୁସ୍ତି ମହାସଂଘର ଅଧ୍ୟକ୍ଷ ବ୍ରିଜ ଭୂଷଣ ସିଂହଙ୍କ ବିରୋଧରେ ଏକାଧିକ ରେସଲର ଯୌନ ନିର୍ଯାତନା କରିଥିବା ବେଳେ ପୋଲିସ ଓ ସରକାରର ନିରବତା ବିରୋଧରେ ମହିଳା ରେସଲର ଆନ୍ଦୋଳନକୁ ଓହ୍ଲାଇଥିଲେ। ସୁପ୍ରିମକୋର୍ଟଙ୍କ ହସ୍ତକ୍ଷେପ ପରେ ଦିଲ୍ଲୀ ପୁଲିସ ବ୍ରିଜ ଭୂଷଣଙ୍କ ବିରୋଧରେ ଦୁଇଟି ମାମଲା କରିଛି। ହେଲେ ଏଫଆଇଆର ପରେ ମଧ୍ୟ ବ୍ରିଜ ଭୂଷଣ ପଦଙ୍କୁ ପୋଲିସ ଗିରଫ କରି ନାହିଁ।
ସର୍ବ ପୁରାତନ ମଦର ଆଜି ବି ରହିଛି ଚାହିଦା

ପୁରୁଣାର ରହିଛି ନିଆରା ମଜା। ତେଣୁ ବହୁ ପୁରୁଣା ବା ଆଣ୍ଟିକ ପିସର ଦାମ ଶୁଣିଲେ ମୁଣ୍ଡ ଘୁରେଇ ଦେବ। ଆଉ ସେହି ସବୁ ପୁରୁଣା ଜିନିଷ ଭିତରେ ବର୍ତ୍ତମାନ ଚର୍ଚ୍ଚାରେ ରହିଛି ବିଶ୍ବର ସର୍ବ ପୁରାତନ ମଦ। କୁହାଯାଉଛି, ମଦର ବୟସ ୧୬୫୦ ବର୍ଷରୁ ଅଧିକ ହେବ। ସବୁଠାରୁ ଆଶ୍ଚର୍ଯ୍ୟ ଓ ଚକିତ କରୁଥିବା କଥାଟି ହେଉଛି କି, ଏହା ଆଜି ବି ତାର ସ୍ୱାଦ, ମାଦକତା ବଜାୟ ରଖିଛି। ବୋତଲର ଅବସ୍ଥା ଦେଖିଲେ ମନରେ ହୁଏତ ଘୃଣା ଭରିଯିବ, ହେଲେ ଭିତର ଜିନିଷ ଏବେ ମଧ୍ୟ ତାର ପୂର୍ବ ମାନ ଜାହିର କରୁଛି।

B28JE6 Detail of a mosaic in the House of Theseus, Pafos Mosaics, Nea Pafos, Cyprus

ବିଶ୍ବାସ କରାଯାଉଛି, ଏହି ମଦ ପ୍ରାୟ ୩୨୫ରୁ ୩୫୯ ଖ୍ରୀଷ୍ଟାବ୍ଦ ମଧ୍ୟରେ ପ୍ରସ୍ତୁତ ହୋଇଥିଲା। ବୋତଲର ଚାରିକଡରେ ଅଳିଆ, ଅପରିଷ୍କାର ଛାୟୀ ଯାଇଛି, ହେଲେ ଭିତରର ମଦ ଏବେ ମଧ୍ୟ ପାନୋପଯୋଗୀ ରହିଥିବା ବିଶେଷଜ୍ଞ କୁହନ୍ତି। ଏହି ବିରଳ ମାଦକର ୧୬ ବୋତଲ ଭିତରୁ ଗୋଟିଏ, ଯାହାକୁ ୧୮୬୭ରେ ଜର୍ମାନର ରୋମାନସ୍ଥିତ ଏକ ସମାଧି ଖୋଦେଇ ବେଳେ ଉଦ୍ଧାର କରାଯାଇଥିଲା। ବାହାରର ବାୟୁକୁ ରୋକିବା ପାଇଁ ଅଲିଭ ଅଏଲର ବ୍ୟବହାର କରାଯାଇଥିଲା। ବର୍ତ୍ତମାନ ବୋତଲରେ ଥିବା ଅବଶିଷ୍ଟାଂଶରୁ ଏହା ସ୍ପଷ୍ଟ କି ଏହା ମାଦକ ବିହୀନ ତରଳ ପଦାର୍ଥ ଓ ଏକ କଠିନ ଝୁଣା ଜାତୀୟ ଉପାଦାନରେ ପ୍ରସ୍ତୁତ ହୋଇଛି।

ଏହି ପୁରୁଣା ମଦ ବୋତଲକୁ ଫଲ୍ଜା ଐତିହାସିକ ସଂଗ୍ରହାଳୟରେ ଶହେରୁ ଅଧିକ ବର୍ଷ ହେବ ପ୍ରଦର୍ଶନୀ ପାଇଁ ରଖାଯାଇଛି। ତେବେ ଭିତରେ ଥିବା ମଦର ସତେଜତାକୁ ଦେଖି ଏହାକୁ ପାନ କରିବାକୁ ଅନେକ ବିଶେଷଜ୍ଞ ଚିନ୍ତା କରୁଛନ୍ତି। ୧୬୫୦ ବର୍ଷ ପୁରୁଣା ଏହି ମଦକୁ ନେଇ ୱାଇନ ପ୍ରଫେସର ମୋନିକା ଖ୍ରୀଷ୍ଟମାନ କୁହନ୍ତି କି, ସୂକ୍ଷ୍ମ ଜୈବିକତା ଦୃଷ୍ଟିରୁ ଏହି ମଦ ନଷ୍ଟ ହୋଇନାହିଁ, କିନ୍ତୁ ଏହାର ରୂପରେଖକୁ ଦେଖିଲେ ଏହା ବ୍ୟକ୍ତିଙ୍କୁ ମଦର ଆନନ୍ଦ ଦେବ ନାହିଁ। ଖ୍ରୀଷ୍ଟମାନ ଆହିରି ମଧ୍ୟ କହିଛନ୍ତି କି ଏହାର ସ୍ୱାଦ ଉତ୍କଟ ହୋଇଥିବ ତଥା ବୋତଲ ଖୋଲିବା ମଧ୍ୟ ବିପଦଜନକ ହୋଇପାରେ।
‘ଗୋ ଫାଷ୍ଟ’ ସଂସ୍ଥାକୁ ଡିଜିସିଏର କଡା ତାଗିଦ, ଟିକେଟ୍ ବୁକ୍ କରିଥିବା ଯାତ୍ରୀଙ୍କ ଟଙ୍କା ଶୀଘ୍ର ଫେରାଅ

ବିମାନ ଚଳାଚଳ ସେକ୍ଟର ରେଗୁଲେଟର(Aviation Sector Regulator) ଡିଜିସିଏ ( Directorate General of Civil Aviation ) ‘ଗୋ ଫାଷ୍ଟ’ ବିମାନ ଉଡାଣ ବାତିଲ ହେବା ପରେ ଯାତ୍ରୀମାନଙ୍କ ଟଙ୍କା ଶୀଘ୍ର ଫେରସ୍ତ କରିବାକୁ କମ୍ପାନୀକୁ ନିର୍ଦ୍ଦେଶ ଦେଇଛନ୍ତି । ଡିଜିସିଏ କହିଛି ଯେ ଏହା ସୋ କାରଣ କାରଣ ନୋଟିସରେ ଗୋଫିରଷ୍ଟର ଉତ୍ତରକୁ ଅଧ୍ୟୟନ କରିଛି ଏବଂ ବିସ୍ତୃତ ନିୟମ ଅନୁଯାୟୀ ଯାତ୍ରୀଙ୍କ ଫେରସ୍ତ ପ୍ରକ୍ରିୟା ପ୍ରକ୍ରିୟା କରିବାକୁ ନିର୍ଦ୍ଦେଶ ଦେଇଛି।

ଡିଜିସିଏ ଦ୍ବାରା ଜାରି ବିଜ୍ଞପ୍ତିର ଉତ୍ତରରେ ‘ଗୋ ଫାଷ୍ଟ’ କହିଛନ୍ତି ଯେ, ସେମାନେ ଇନ୍ସଲଭେନ୍ସି ବ୍ୟାଙ୍କରୋପ୍ଟି କୋଡର ଧାରା ୧୦ ଅନୁଯାୟୀ, NCLT ପାଖେ ଏକ ଆବେଦନ କରାଯାଇଛି । ଏୟାରଲାଇନ୍ସ ମେ ୩ ତାରିଖରୁ ତିନି ଦିନ ପାଇଁ ବିମାନ ଉଡ଼ାଣ ବାତିଲ କରିଛି । ପରେ NCLTର ଆଦେଶରେ ଯେଉଁ ନିଷ୍ପତ୍ତି ନିଆଯିବ ତାହା ଉପରେ ପରବର୍ତ୍ତୀ ପଦକ୍ଷେପ ଏୟାରଲାଇନ୍ସ ନେବ । ଟିକେଟ୍ ବୁକ୍ କରିଥିବା ଯାତ୍ରୀଙ୍କ ଟଙ୍କା ଫେରସ୍ତ କରାଯିବ କିମ୍ବା ଯାତ୍ରା ତିରିଖକୁ ପରିବର୍ତ୍ତନ କରାଯିବ ତାହା ଉପରେ ନିଷ୍ପତ୍ତି ନିଆଯିବ ।

‘ଗୋ ଫାଷ୍ଟ’ର ଏହି ଯବାବ ଆସିବା ପରେ ଡିଜିସିଏ ବର୍ତ୍ତମାନର ରେଗ୍ୟୁଲେଟାରୀ ନିୟମ ଅନୁଯାୟୀ, ଯାତ୍ରୀଙ୍କୁ ନିର୍ଦ୍ଧାରିତ ସମୟ ସୀମା ଭିତରେ ଟଙ୍କା ଫେରସ୍ତ ପାଇଁ ପ୍ରକ୍ରିୟା ଆରମ୍ଭ କରିବାକୁ କହିଛି । ଡିଜିସିଏ କହିଛି ଯେ, ‘ଗୋ ଫାଷ୍ଟ’ର ପୂର୍ବରୁ କୌଣସି ସୂଚନା ନଦେଇ ବିମାନ ଉଡ଼ାଣ ବାତିଲ କରିବାର ନିଷ୍ପତ୍ତି ଯୋଗୁଁ ଯାତ୍ରୀଙ୍କୁ ହେଉଥିବା ଅସୁବିଧାକୁ କମ୍ କରିବାକୁ ଚେଷ୍ଟା କରୁଛୁ ।
କୁସ୍ତିଯୋଦ୍ଧାଙ୍କୁ ସମର୍ଥ କରିବା ପାଇଁ ଜନ୍ତରମନ୍ତରରେ ଭିଡ ଜମାଇ ପାରନ୍ତି ଅସଂଖ୍ଯ ଲୋକ, ତେଣୁ ଦିଲ୍ଲୀ ପୋଲିସକୁ ସକର୍ତ ରହିବାକୁ ସୂଚନା

ରାଜଧାନୀ ଦିଲ୍ଲୀର ସମସ୍ତ ଜିଲ୍ଲାରେ ପୋଲିସକୁ ଆଲର୍ଟ କରାଯାଇଛି । ସମସ୍ତ ଜିଲ୍ଲାର ଡିସିପି ମାନଙ୍କୁ ସୀମାବର୍ତ୍ତୀ ଅଞ୍ଚଳରେ ବିଶେଷ ନଜର ରଖିବା ସହ ପିକେଟିଂ କରି ଦିଲ୍ଲୀକୁ ସଂଯୋଗ କରୁଥିବା ସମସ୍ତ ରୁଟକୁ ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି । ଜନ୍ତର ମନ୍ତରରେ ଚାଲିଥିବା କୁସ୍ତିଯୋଦ୍ଧାଙ୍କ ଆନ୍ଦୋଳନକୁ ସମର୍ଥନ କରିବାକୁ ବହୁ ସଂଖ୍ୟାରେ ଲୋକ ସେଠାରେ ପହଞ୍ଚିବାର ଇନପୁଟ ଦିଲ୍ଲୀ ପୋଲିସକୁ ମିଳିବା ପରେ ଏହା ସତର୍କତା ଜାରି କରାଯାଇଛି ।

ଗତକାଲି ମଧ୍ୟରାତ୍ରିରେ କୁସ୍ତି ଯୋଦ୍ଧାଙ୍କ ସହିତ ପ୍ରବଳ ଯୁକ୍ତିତର୍କ ଏବଂ ଗାଳିଗୁଳଜ ହେବା ପରେ ପୋଲିସକୁ ସତର୍କ ରହିବାକି କୁହାଯାଇଛି । ଜନ୍ତର ମନ୍ତର ଠାରେ ଆଜକୁ ୧୨ ଦିନ ଧରି ଖେଳାଳୀ ମାନେ ଧାରଣାରେ ବସିଛନ୍ତି । ବିଜେପି ସାଂସଦ ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ ଯୌନ ଶୋଷଣ ଭଳି ସଙ୍ଗୀନ ଅଭିଯୋଗ ଆଣି ବିରୋଧ କରୁଥିବା କୁସ୍ତିଯୋଦ୍ଧାଙ୍କ ସମର୍ଥନରେ ଘଟଣା କ୍ରମ ଦ୍ରୁତ ଗତିରେ ବଦଳୁଛି । ମଙ୍ଗଳବାର ଅପରାହ୍ନରେ କୁସ୍ତି ଯୋଦ୍ଧାଙ୍କୁ ଭେଟିବାକୁ ଆସିଥିବା ପିଟି ଉଷାଙ୍କୁ ଆନ୍ଦୋଳନକାରୀ ମାନେ ଖରାପ ବ୍ୟବହାର ଦେଖାଇଥିବାରୁ ଏପରି ସ୍ଥିତି ଆରମ୍ଭ ହୋଇଥିବା କୁହାଯାଉଛି । ଏହାପରେ ଦିଲ୍ଲୀ ପୋଲିସ ଜନ୍ତର ମନ୍ତରରେ ଧାରା ୧୪୪ ଲାଗୁ କରିଥିଲା । ଜନ୍ତର ମନ୍ତର ଏବଂ ଏହାର ଆଖପାଖ ଅଞ୍ଚଳରେ ଧାରା ୧୪୪ ଲାଗୁ ହେବା ପରେ ଦିଲ୍ଲୀ ପୋଲିସ ଓ ରେସଲରଙ୍କ ସହ ଯୁକ୍ତିତର୍କ ହୋଇଥିଲା । ଏହି ମାମଲାର ଅଭିଯୋଗ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ନିକଟରେ ପହଞ୍ଚିଯାଇଛି ।

ଏହାପରେ ପ୍ରମୁଖ କୁସ୍ତିଯୋଦ୍ଧା ବଜରଙ୍ଗ ପୁନିଆ ଲୋକଙ୍କ ଦୃଷ୍ଟି ଆକର୍ଷିଣ କରି କହିଥିଲେ ଯେ, ଆଜି କୁସ୍ତି ଯୋଦ୍ଧାଙ୍କୁ ଦେଶର କୋଣଅନୁକୋଣରୁ ଲୋକଙ୍କ ଆବଶ୍ୟକତା ପଡୁଛି । ଆପଣ ଯେଉଁଠାରେ ଥାଆନ୍ତୁ ନା କହିଁକି ଏଠାକୁ ଆସି ଆମକୁ ସମର୍ଥନ କରନ୍ତୁ । କୁସ୍ତିଯୋଦ୍ଧାଙ୍କୁ ସମର୍ଥନ କରିବା ପରିବର୍ତ୍ତେ ଦିଲ୍ଲୀ ପୋଲିସ ଯୌନ ଶୋଷଣ ଅଭିଯୋଗର ଶିକାର ହୋଇଥିବା ବିଜେପି ସାଂସଦ ବ୍ରିଜ ଭୂଷଣ ଶରଣ ସିଂଙ୍କୁ ସମର୍ଥନ କରୁଛି । ଏପର୍ଯ୍ୟନ୍ତ କୈଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ । ପୁନିଆଙ୍କ ଆବେଦନ ପରେ ଘଟଣାକ୍ରମ ଦ୍ରୁତ ଗତିରେ ବଦଳିବା ଆରମ୍ଭ କରିଛି । ତେଣୁ ଆଜି ବହୁ ସଂଖ୍ୟାରେ ଲୋକ ଜନ୍ତର ମନ୍ତରରେ ଆସି ପହଞ୍ଚିବାର ସମ୍ଭାବନା ରହିଛି ।
ଅଶାନ୍ତ ମଣିପୁର, ଜଳୁଛି ନିଆଁ

ଆଦିବାସୀ- ଅଣଆଦିବାସୀ ଲଢେଇରେ ଅଶାନ୍ତ ହୋଇ ଉଠିଛି ମଣିପୁର। ଗତକାଲିର ମୁହାଁମୁହିଁ ପରିସ୍ଥିତି ପରେ ରାଜ୍ୟସରକାର ସେଠାରେ ୮ ଜିଲ୍ଲାରେ କର୍ଫ୍ୟୁ ଜାରି କରିବା ସହ ରାଜ୍ୟରେ ଇଣ୍ଟରନେଟ ବନ୍ଦ କରିଦେଇଛି। ଏସବୁ ସତ୍ତ୍ୱେ ଗୁରୁବାର ପୁଣି ହିଂସା ଦେଖିବାକୁ ମିଳିଛି। ଚୁରାଚାନ୍ଦପୁରରୁ ଆରମ୍ଭ ହୋଇଥିବା ହିଂସା ରାଜ୍ୟର ବିଭିନ୍ନ ସ୍ଥାନରେ ଉଗ୍ର ହୋଇଛି। ରାଜ୍ୟର ମୈତେଇ ସମୁଦାୟ ଅନୁସୂଚିତ ଜନଜାତି ବର୍ଗରେ ସାମିଲ ହେବା ଦାବି ପରେ ଏପରି ସ୍ଥିତି ସୃଷ୍ଟି ହୋଇଛି।

ରାଜ୍ୟରେ ଥିବା ମୈତେଇ ସମୁଦାୟ ଅନୁସୂଚିତ ଜନଜାତି ଶ୍ରେଣୀରେ ସାମିଲ ହେବାକୁ ଦାବି କରିଥିଲେ, ଯାହାକୁ ରାଜ୍ୟର ଆଦିବାସୀ ଏକତା ମୋର୍ଚ୍ଚା ବିରୋଧ କରିଥିଲା। ଏନେଇ ମୋର୍ଚ୍ଚା ପକ୍ଷରୁ ବୁଧବାର ଏକ ଶୋଭାଯାତ୍ରା ବାହାରିଥିଲା। ଶୋଭଯାତ୍ରା ବେଳେ ଉଭୟ ଆଦିବାସୀ ଓ ଅଣଆଦିବାସୀ ଭିତରେ ମୁହାଁମୁହିଁ ପରିସ୍ଥିତି ସୃଷ୍ଟି ହେବା ସହ ଏହା ଉଗ୍ର ରୂପ ନେଇଥିଲା। ଫଳରେ ଗତ ରାତିରୁ ୮ ଜିଲ୍ଲାରେ କର୍ଫ୍ୟୁ ଲାଗୁ କରାଯାଇଥିବା ବେଳେ ମୋବାଇଲ ଇଣ୍ଟରନେଟ ସେବାକୁ ୫ ଦିନ ଲାଗି ବନ୍ଦ କରି ଦିଆଯାଇଛି।

କିନ୍ତୁ ହିଂସା ଥମିବା ବଦଳରେ ଆହୁରି ଉଗ୍ର ହୋଇଛି। ଗୁରୁବାର ମଧ୍ୟାହ୍ନରେ ରାଜ୍ୟର ଉତ୍ତର ପୂର୍ବାଞ୍ଚଳକୁ ବ୍ୟାପିଛି ହିଂସା। କୁକି ସମ୍ପ୍ରଦାୟଙ୍କ ଘରରେ ନିଆଁ ଲଗାଇଦେବା ସହ ବିଭିନ୍ନ ସ୍ଥାନରେ ହିଂସାକାରୀ ଗାଡି ମୋଟରରେ ନିଆଁ ଲଗାଇଦେବା ସହ ବ୍ୟାପକ କ୍ଷୟକ୍ଷତି କରିଥିବା ସୂଚନା ରହିଛି। ପରିସ୍ଥିତିକୁ ନିୟନ୍ତ୍ରଣରେ ରଖିବା ପାଇଁ ସେନା ଓ ପାରାମିଲିଟାରୀ ବାହିନୀ ସ୍ଥିତିକୁ ନିୟନ୍ତ୍ରଣରେ ରଖିବାକୁ ମୁତୟନ ହୋଇଛନ୍ତି।

ସୂଚନାଯୋଗ୍ୟ, ରାଜ୍ୟର 90% ପାହାଡ ପର୍ବତ ଘେରା ଅଞ୍ଚଳରେ ଆଦିମ ନାଗା ଓ କୁକୁ-ଚିନ-ମିଜୋ ବା ଜୋ ଜନଜାତିଙ୍କ ବସତି ରହିଛି। ତେବେ ଉପତ୍ୟକା ଉପରେ ମୈତେଇ ସମ୍ପ୍ରଦାୟ ନିଜର ଆଧିପତ୍ୟ ବିସ୍ତାର କରିବା ସହ ବର୍ତ୍ତମାନ ନିଜକୁ ଜନଜାତି ଶ୍ରେଣୀଭୂକ୍ତ କରିବାକୁ ଦାବି କରୁଛନ୍ତି। ଯାହାକୁ ଆଦିମ ଜନଜାତି ବିରୋଧ କରୁଛନ୍ତି।

ହିଂସା ପରେ ବକ୍ସିଂ ଚାମ୍ପିୟନ ମାରି କମ୍‌ ଟ୍ୱିଟ କରି ମୋ’ ରାଜ୍ୟ ମଣିପୁର ଜଳୁଛି। ତେଣୁ ତୁରନ୍ତ ସାହାଯ୍ୟ ଭିକ୍ଷା କରିଛନ୍ତି କେନ୍ଦ୍ର ସରକାରଙ୍କୁ । ଏଥିସହ ମାରି କମ ହିଂସାର ଫଟୋ ଟ୍ୱିଟ କରି, ତାକୁ ପ୍ରଧାନମନ୍ତ୍ରୀ, ସ୍ୱରାଷ୍ଟ୍ର ମନ୍ତ୍ରୀ ଓ ପ୍ରତିରକ୍ଷା ମନ୍ତ୍ରୀଙ୍କୁ ଟ୍ୟାଗ କରିଛନ୍ତି । ସେପଟେ ରାଜ୍ୟବାସୀଙ୍କ ହିତକୁ ଉର୍ଦ୍ଧ୍ୱରେ ରଖାଯିବ ବୋଲି ଟ୍ୱିଟ କରିଛନ୍ତି ମଣିପୁର ମୁଖ୍ୟମନ୍ତ୍ରୀ ଏନ ବିରେନ ସିଂ ।
କୁସ୍ତି ଯୋଦ୍ଧାଙ୍କୁ ବିଳମ୍ବିତ ରାତିରେ ପୋଲିସ ମଦ ପିଇ ଗାଳିଗୁଲଜ କରିଥିବା ଅଭିଯୋଗ, ପଦକ ଫେରାଇବାକୁ ପ୍ରସ୍ତୁତ କହିଲେ ଖେଳାଳୀ

ଦିଲ୍ଲୀର ଜନ୍ତର ମନ୍ତରରେ ଧାରଣାରେ ବସିଥିବା ରେସଲର ମାନେ ଆଜି ସକାଳେ ଏକ ସାମ୍ବାଦିକ ସମ୍ମିଳନୀ କରିଛନ୍ତି । କୁସ୍ତିଯୋଦ୍ଧା ମାନେ କହିଛନ୍ତି ଯେ, ସେମାନଙ୍କ ସଂଗ୍ରାମ ସରକାର କିମ୍ବା ବିରୋଧୀଙ୍କ ପାଇଁ ନୁହେଁ, ସେମାନଙ୍କ ସଂଗ୍ରାମ ବ୍ରିଜ ଭୂଷଣ ଶରଣ ସିଂଙ୍କ ପାଇଁ । ଏହି ସାମ୍ବାଦିକ ସମ୍ମିଳନୀରେ ଦିଲ୍ଲୀ ମହିଳା ଆୟୋଗର ଅଧ୍ୟକ୍ଷା ସ୍ବାତୀ ମାଲିୱାଲ ମଧ୍ୟ କୁସ୍ତି ଯୋଦ୍ଧା ମାନଙ୍କ ସହ ଉପସ୍ଥିତ ଥିଲେ ।

ସାମ୍ବାଦିକ ସମ୍ମିଳନୀରେ ବଜରଙ୍ଗ ପୁନିଆ କହିଛନ୍ତି, ଯଦି ଖେଳାଳିଙ୍କ କଥା ଶୁଣାଯାଇପାରିବ ନାହିଁ ଏବଂ ସେମାନେ ନ୍ୟାୟ ପାଇପାରିବେ ନାହିଁ, ତେବେ ସରକାର ସେମାନଙ୍କ ପଦକ ଏବଂ ପୁରସ୍କାର ଫେରାଇ ନେବା ଉଚିତ୍ । ପୁନିଆ କହିଛନ୍ତି ଯେ, ଆମେ ଆମର ପଦକ ସରକାରଙ୍କୁ ଫେରାଇ ଦେବୁ । ଏମିତି ପଦକ ଆମର କ’ଣ ଆବଶ୍ୟକ ?

ପୁନିଆ କହିଛନ୍ତି ଯେ, ଏହି ଆନ୍ଦୋଳନକୁ ରାଜନୀତି ସହିତ ନିଶ୍ଚିତ ଭାବେ ଯୋଡ଼ିବା ପାଇଁ ଉଦ୍ୟମ କରାଯାଉଛି । ଆମର ଆନ୍ଦୋଳନ ନ୍ୟାୟ ପାଇଁ ଏବଂ ଏହା ସମସ୍ତଙ୍କ ସମର୍ଥନ ହାସଲ କରିଛି । ପୁନିଆ କହିଛନ୍ତି ଯେ, ଗତକାଲି ପିଟି ଉଷା ମଧ୍ୟ ଆମ ପାଖକୁ ଆସିଥିଲେ। ପୁନିଆ କହିଛନ୍ତି ଯେ, ପୋଲିସ ବ୍ରିଜ ଭୂଷଣଙ୍କ ନିର୍ଦ୍ଦେଶରେ କାମ କରୁଛି । ଯେବେଠାରୁ ଏଫ୍ଆଇଆର୍ ହୋଇଛି, ଆମକୁ ଦୁର୍ବ୍ୟବହାର କରାଯାଉଛି । ଏହାକୁ ରାଜନୀତି ଏବଂ ଜାତି ସହିତ ଯୋଡି ଆମକୁ ଦୁର୍ବଳ କରିବାକୁ ଚେଷ୍ଟା କରାଯାଉଛି ।

ବିନେଶ ଫୋଗାଟ କହିଛନ୍ତି, ଗତକାଲି ରାତିରେ ମୋତେ ଗାଳି ଦିଆଯାଇଥିବା ବେଳେ ପୋଲିସର ଆଚରଣ ଆକ୍ରମଣାତ୍ମକ ଥିଲା । ଆମେ ଶୋଇବା ବିଛଣା ଅର୍ଡର କରିଥିଲୁ ଆଉ ରାତିରେ ସମସ୍ତ ଅଭିଯୋଗ ପୋଲିସକୁ କରିଛୁ । ପୋଲିସ ମଦ୍ୟପାନ କରିଚାଲିଥିଲା ଆଉ ସେମାନେ ନିଷାରେ ଥିଲେ । ବିନେଶ ପଦକ ଫେରାଇବାକୁ ପ୍ରସ୍ତୁତ ବୋଲି କହିବା ସହ ନିଜ ଜୀବନ ମଧ୍ୟ ଦେବେ ବୋଲି କହିଛନ୍ତି ।

ଭିନେଶ ଫୋଗେଟ୍ କହିଛନ୍ତି, ଏତେ ଅପମାନିତ କରାଯାଉଛି, ଆଉ କିଛି ବାକି ନାହିଁ । ମାନ ସମ୍ମାନର ଲଢେଇ ପାଇଁ ଆସିଥିଲୁ ହେଲେ ଏଠାରେ ପାଦ ତଳେ ଦଳି ଦିଆଯାଉଛି । ଏଠାରେ ଆମକୁ ମା-ଭଉଣୀର ଗାଳି ଆମକୁ ଦିଆଯାଉଛି ବୋଲି ଫୋଗାଟ କହିଛନ୍ତି ।
ଭାରତୀୟ ସେନାର ହେଲିକପ୍ଟର କ୍ରାସ୍, ସେଥିରେ ଥିବା ୩ ସେନା ଅଧିକାରୀଙ୍କ ଖବର ମିଳିପାରି ନାହିଁ

ଜମ୍ମୁ-କାଶ୍ମୀର କିସ୍ତଓ୍ବାଡା ଜିଲ୍ଲାରେ ଭାରତୀୟ ସେନର ଏକ ହେଲିକପ୍ଟର ଦୁର୍ଘଟଣାର ଶିକାର ହୋଇଛି । କୁହାଯାଉଛି ଯେ, ଏହି ହେଲିକପ୍ଟରରେ ଭାରତୀୟ ସେନାର ତିନି ଜଣ ଅଧିକାରୀ ରହିଥିଲେ । ଉଦ୍ଧାର କାର୍ଯ୍ୟ ପାଇଁ ବିଭିନ୍ନ ଟିମକୁ ଘଟଣା ସ୍ଥଳକୁ ପଠାଇ ଦିଆଯାଇଛି । ବର୍ତ୍ତମାନ ସୁଦ୍ଧା ସେପରି କିଛି ସବିଶେଷ ତଥ୍ୟ ଆସିନାହିଁ ।

କୁହାଯାଉଛି, ଯେଉଁଠାରେ ହେଲିକପ୍ଟର କ୍ରାସ ହୋଇଛି ସେହି ସ୍ଥାନଟି କିସ୍ତଓ୍ବାଡାର ଅତି ଦୁର୍ଗମ ଅଞ୍ଚଳ । ସେଠାରେ ବିଗତ ଦୁଇ ଦିନ ଧରି ହାଲକା ହାଲକା ବର୍ଷା ଲାଗିରହିଥିଲା । ସେନାର ୩ ଜଣ ଅଧିକାରୀ ଏହି ଏଏଲଏଚ୍ ଧୃବ୍ ହେଲିକପ୍ଟରରେ ଯାଉଥିଲେ । ସେମାନଙ୍କ ଅବସ୍ଥା ଏବେ କଣ ରହିଛି ତାକୁ ନେଇ ଅପରେସନ ଆରମ୍ଭ ହୋଇଛି । ରେସ୍କ୍ୟୁ ଟିମ ଘଟଣା ସ୍ଥଳରେ ପହଞ୍ଚଥିବା ବେଳେ ହେଲିକପ୍ଟରରେ ଥିବା ସେନାର ସେହି ୩ ଅଧିକାରୀଙ୍କ ସହିତ କୌଣସି ସମ୍ପର୍କ ହୋଇପାରି ନାହିଁ ।
ଟ୍ରକ୍-ବୋଲେରୋ ଧକ୍କାରେ ଗଲା ୧୦ ଜୀବନ, ଜଣେ ଶିଶୁ ଗୁରୁତର

ଛତିଶଗଡ଼ରେ ବାଲୋଦ ଜିଲ୍ଲା ଜଗତାରା ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ଟ୍ରକ୍‌ ଓ ବୋଲେରୋ ମଧ୍ୟରେ ମୁହାଁମୁହିଁ ଧକ୍କା ହେବାରୁ ଘଟଣାସ୍ଥଳରେ ୧୦ ଜଣଙ୍କ ମୃତ୍ୟୁ ଘଟିଛି । ମୃତକମାନେ ଗୋଟିଏ ପରିବାରର ୧୦ ଜଣ ଥିବା ସୂଚନା ମିଳିଛି । ମୃତକଙ୍କ ମଧ୍ୟରେ ୫ ମହିଳା ଥିବାବେଳେ ୨ ଜଣ ଶିଶୁ ଓ ୩ ପୁରୁଷ ଲୋକ ଅଛନ୍ତି । ତେବେ ଏହି ଭୟଙ୍କର ଦୁର୍ଘଟଣାରୁ କେବଳ ଜଣେ ଶିଶୁ ବର୍ତ୍ତିଯାଇଛି । ଶିଶୁଟି ଦୁର୍ଘଟଣାରେ ଗୁରୁତର ହୋଇଛି । ଚିକିତ୍ସା ପାଇଁ ତାକୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ମୃତକମାନେ ଧମତରୀ ଜିଲ୍ଲା ସୋରମ ଭଟ୍ଟଗାଁର ବୋଲି ଜଣାଯାଇଛି ।

ଭଟ୍ଟଗାଁର ଗୋଟିଏ ପରିବାରର ୧୧ ଜଣ ଏକ ବୋଲେରୋରେ କାଙ୍କେର ଜିଲ୍ଲାର ମରକାଟୋଲାକୁ ଏକ ବିବାହ ଭୋଜିରେ ଯୋଗ ଦେବାକୁ ଯାଇଥିଲେ। ସେଠାରୁ ରାତି ପ୍ରାୟ ୯ଟା ବେଳେ ଫେରୁଥିଲେ । ବୋଲେରୋଟି ଜଗତାରା ନିକଟରେ ଜାତୀୟ ରାଜପଥରେ ଯାଉଥିବା ବେଳେ ଦୁର୍ଘଟଣାଗ୍ରସ୍ତ ହୋଇଥିଲା । ସେହି ସମୟରେ ବିପରୀତ ଦିଗରୁ ଆସୁଥିବା ଏକ ଟ୍ରକ୍‌ ହଠାତ୍‌ ବୋଲେରୋକୁ ପିଟିଥିଲା । ଟ୍ରକ୍ ଧକ୍କାରେ ବୋଲେରୋଟି ଚାପି ହୋଇ ଯାଇଥିଲା । ଗାଡ଼ି ଭିତରେ ସମସ୍ତେ ଫସି ରହିଥିଲେ ।

ପୋଲିସ୍‌ ଘଟଣାସ୍ଥଳରେ ପହଞ୍ଚି ବୋଲେରୋ ଭିତରୁ ସମସ୍ତଙ୍କୁ ବାହାର କରିଥିଲା । ସ୍ଥାନୀୟ ଲୋକ ମଧ୍ୟ ଉଦ୍ଧାର କାର୍ଯ୍ୟରେ ସାହାଯ୍ୟ କରିଥିଲେ । ଘଟଣାସ୍ଥଳରେ ୧୦ ଜଣ ପ୍ରାଣ ହରାଇଥିଲେ । କେବଳ ଜଣେ ଶିଶୁ ଏହି ଦୁର୍ଘଟଣାରୁ ବର୍ତ୍ତି ଯାଇଛି । ତାର ଅବସ୍ଥା ସଙ୍କଟାପନ୍ନ ଥିବାବେଳେ ତାକୁ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣାର ତଦନ୍ତ ଜାରି ରଖିଛି ପୋଲିସ । ଦୁର୍ଘଟଣାକୁ ନେଇ ଗଭୀର ଦୁଃଖ ପ୍ରକାଶ କରିଛନ୍ତି ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲ । ଶିଶୁର ଦ୍ରୁତ ଆରୋଗ୍ୟ କାମନା କରିଛନ୍ତି ମୁଖ୍ୟମନ୍ତ୍ରୀ ।
‘ଆଉ ସଭାପତି ହେବାର ପ୍ରଶ୍ନ ଉଠୁନି’

ଇସ୍ତଫା ନିଷ୍ପତ୍ତିରେ ଅଟଳ ଏନସିପି ସଭାପତି ଶରଦ ପାୱାର । ଦଳୀୟ କର୍ମୀଙ୍କ ସବୁ ଅନୁରୋଧକୁ ପ୍ରତ୍ୟାକ୍ଷାନ କରି ଆଉ ଦଳର ସଭାପତି ପଦରେ ରହିବେ ନାହିଁ ବୋଲି ସ୍ପଷ୍ଟ କରିବା ସହ ଦଳର ନୂଆ ସଭାପତି ଚୟନ ପାଇଁ ଏକ କମିଟି ଗଠନ ସମ୍ପର୍କରେ କରିଛନ୍ତି ଘୋଷଣା। କମିଟି ଆସନ୍ତା କାଲି କିଏ ହେବେ ଦଳର ପରବର୍ତ୍ତୀ ସଭାପତି ତାକୁ ନେଇ ଘୋଷଣା କରିବ। ତେବେ ଏହି ଦୌଡରେ ପୁତୁରା ଅଜିତ ପାୱାର ଓ ସୁପ୍ରିୟା ସୁଲେଙ୍କ ନାମକୁ ନେଇ ଚର୍ଚ୍ଚା ହେଉଥିବା ବେଳେ ଦଳୀୟ କର୍ମକର୍ତ୍ତା ସୁପ୍ରିୟାଙ୍କୁ ସଭାପତି କରିବାକୁ ଦାବି କରୁଛନ୍ତି।

ନିଜ ଇସ୍ତଫା ସମ୍ପର୍କରେ ଶରଦ ପାୱାର କହିଛନ୍ତି କି, ମୁଁ ଇସ୍ତଫା ସମ୍ପର୍କରେ କାହା ସହ ଆଲୋଚନା କରିନଥିବା ଅଭିଯୋଗ ମିଛ। ଗତକାଲି କିଛି ଦଳୀୟ କର୍ମୀଙ୍କ ସହ ଆଲୋଚନା ବେଳେ ଏପରି କହିଛନ୍ତି ପୂର୍ବତନ ଦଳ ସଭାପତି । ସେପଟେ ଦଳର ନୂଆ ମୁଖ୍ୟମନ୍ତ୍ରୀ ବାଛିବାକୁ ୧୮ ଜଣ ବରିଷ୍ଠ ନେତାଙ୍କୁ ନେଇ ଗଠିତ ହୋଇଛି । ଏଥିସହ, ତାଙ୍କ ଇସ୍ତଫା ପ୍ରତ୍ୟାହାର ଦାବିରୁ କ୍ଷାନ୍ତ ହେବାକୁ ଅନୁରୋଧ କରିଛନ୍ତି ଶରଦ ପାୱାର । ତେବେ ପାୱାର କହିଛନ୍ତି, ସଭାପତି ପଦରେ ନ ରହିଲେ ମଧ୍ୟ ସେ ଦଳିତ, ଆଦିବାସୀ, ମହିଳା ଓ ଶିଶୁଙ୍କ ଅଧିକାର ପାଇଁ ଲଢ଼େଇ ଜାରି ରଖିବେ।

ସୂଚନାଯୋଗ୍ୟ, ମଙ୍ଗଳବାର ହଠାତ୍‌ ଶରଦ ପାୱାର ସଭାପତି ଛାଡ଼ିବା ନେଇ ଘୋଷଣା କରିଥିଲେ। ଏହା ପରେ ଦଳରେ ଖେଳିଯାଇଥିଲା ଚାଞ୍ଚଲ୍ୟ। ପାୱାରଙ୍କୁ ତାଙ୍କ ସମର୍ଥକମାନେ ନିଷ୍ପତିରୁ ଓହରିବା ପାଇଁ ଅନୁରୋଧ କରିଥିଲେ।
ଜୀବନକୁ ବାଜି ଲଗାଇ ଖବର ସଂଗ୍ରହ ସହ ପରିବେଷଣ କରିଥାନ୍ତି ‘ସାମ୍ବାଦିକ’

ନିଜ ଜୀବନକୁ ବାଜି ଲଗେଇ ଅହରହ ୨୪ ଘଣ୍ଟା କାମ କରିଥାନ୍ତି ସାମ୍ବାଦିକ । ସେମାନଙ୍କ ଜୀବନ ପ୍ରତି ବିପଦ ଥାଏ ତଥାପି ସେମାନେ ପଛଘୁଞ୍ଚା ଦେଇନଥାନ୍ତି । ଖରା,ବର୍ଷା, ଶୀତକୁ ଖାତିର ନକରି ଖବର ପରିବେଷଣ କରିଥାନ୍ତି । ଲୋକଙ୍କ ସମସ୍ୟା ପ୍ରଶାସନ ନିକଟରେ ଉପସ୍ଥାପନ କରିଥାନ୍ତି । ଅଧିକାଂଶ ସମୟରେ ସମସ୍ୟାର ସମାଧାନ ଦିଗରେ ସେମାନଙ୍କ ଗୁରୁତ୍ୱପୂର୍ଣ୍ଣ ଭୂମିକା ଥାଏ । ଲୋକଙ୍କ ସ୍ନେହ, ଶ୍ରଦ୍ଧା, ଭଲ ପାଇବା ପାଇଥାନ୍ତି । ଏହା ସେମାନଙ୍କ ପାଇଁ ସବୁଠୁ ବଡ଼ ପୁରସ୍କାର । ସେଥିପାଇଁ ସାମ୍ବାଦିକମାନଙ୍କୁ ସବୁବେଳେ ପୂର୍ଣ୍ଣ ସ୍ୱାଧୀନତା ଦେବା ଜରୁରୀ । ଏଭଳି ଲକ୍ଷ୍ୟ ନେଇ ପ୍ରତିବର୍ଷ ୩ ମେ’ରେ ପାଳିତ ହେଉଛି ‘ବିଶ୍ୱ ପ୍ରେସ୍‌ ସ୍ୱାଧୀନତା ଦିବସ’ ।

ସାମ୍ବାଦିକତାକୁ ଗଣତନ୍ତ୍ରର ଚତୁର୍ଥ ସ୍ତମ୍ଭ କୁହାଯାଉଥିବା ବେଳେ ଏହା ଏକ ବିପଦପୂର୍ଣ୍ଣ କାମ । ଅନେକ ସମୟରେ ସାମ୍ବାଦିକମାନେ ଆକ୍ରମଣର ଶିକାର ହୁଅନ୍ତି । ସାମ୍ବାଦିକମାନେ ସତ୍ୟକୁ ସାମ୍ନା କରନ୍ତି, ଦାୟିତ୍ୱକୁ ଠିକ୍ ଭାବେ ପୂରଣ କରିବାକୁ ନିଜ ଜୀବନକୁ ବିପଦରେ ପକାଇବାକୁ କେବେ ବି ପଛଘୁଞ୍ଚା ଦିଅନ୍ତି ନାହିଁ । ଏଭଳି ସ୍ଥିତିରେ ନିଜ ଜୀବନକୁ ବାଜି ଲଗାଇ କାମ କରିଥାନ୍ତି ସାମ୍ବାଦିକ । ତେବେ ସେମାନଙ୍କ ସ୍ୱରକୁ ଯେପରି କୌଣସି ପ୍ରଭାବ ନପଡ଼େ ସେଥିପ୍ରତି ସରକାର ଧ୍ୟାନ ଦେବା ଉଚିତ । ପୂର୍ଣ୍ଣ ସ୍ୱାଧୀନତା ମିଳିଲେ ହିଁ ସେମାନେ ନିଜ ନିଜ କାମକୁ ସୂଚାରୁ ରୂପେ ସମ୍ପାଦାନ କରିପାରିବେ ।

ୟୁନେସ୍କୋ ସାଧାରଣ ସମ୍ମିଳନୀର ସୁପାରିସ ପରେ 1993ରେ ବିଶ୍ୱ ପ୍ରେସ ସ୍ୱାଧୀନତା ଦିବସ ପ୍ରଥମ ଥର ପାଇଁ ପାଳନ କରାଯାଇଥିଲା । ୱିଣ୍ଡହୋକ୍ ଘୋଷଣାନାମାକୁ ସ୍ମରଣ କରିବା ପାଇଁ ମେ’ ୩ ତାରିଖକୁ ବିଶ୍ୱ ପ୍ରେସ୍ ସ୍ୱାଧୀନତା ଦିବସ ପାଳନ କରିବା ପାଇଁ ନିଷ୍ପତ୍ତି ହୋଇଥିଲା । ବିଶ୍ୱ ପ୍ରେସ୍ ସ୍ୱାଧୀନତା ଦିବସ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏହା ଗଣମାଧ୍ୟମର ଗୁରୁତ୍ୱପୂର୍ଣ୍ଣ ଭୂମିକା ବିଷୟରେ ଲୋକଙ୍କୁ ମନେ ପକାଏ ।

ପ୍ରତିବର୍ଷ ପରି ଚଳିତବର୍ଷ ମଧ୍ୟ ବିଶ୍ୱ ପ୍ରେସ୍‌ ସ୍ୱାଧୀନତା ଦିବସର ଥିମ୍ ରହିଛି । ଚଳିତଥର ‘ବିଶ୍ୱ ପ୍ରେସ୍‌ ସ୍ୱାଧୀନତା ଦିବସ’ର ୩୦ତମ ବାର୍ଷିକୀ ଉତ୍ସବ ପାଳିତ ହୋଇଯାଇଛି । ୟୁନେସ୍କୋ ଦ୍ୱାରା ନିର୍ମିତ ବିଶ୍ୱ ପ୍ରେସ ସ୍ୱାଧୀନତା ଦିବସ 2023ର ବିଷୟବସ୍ତୁ ‘ଅଧିକାରର ଭବିଷ୍ୟତ ଗଠନ:ଅଭିବ୍ୟକ୍ତିର ସ୍ୱାଧୀନତା ଅନ୍ୟ ସମସ୍ତ ମାନବିକ ଅଧିକାରର ତାଳକ ଭଳି’। ଗଣମାଧ୍ୟମର ସ୍ୱାଧୀନତା,ନିରପେକ୍ଷତା ଏବଂ ଅଭିବ୍ୟକ୍ତି ଉପରେ ଗୁରୁତ୍ୱ ଦେଇଥାଏ ।

ସେପଟେ, World press freedom day ଅବସରରେ ବିଧାୟକ ସୁରେଶ ରାଉତରାୟ କେକ୍ କାଟିଛନ୍ତି । ସାମ୍ବାଦିକମାନଙ୍କୁ କେକ୍ ଖୁଆଇଛନ୍ତି ଏହି ଲୋକପ୍ରିୟ କଂଗ୍ରେସ ବିଧାୟକ । ସାମ୍ବାଦିକମାନଙ୍କ ପାଇଁ ପୁଣି ଥରେ ଓଡ଼ିଶା ଲୋକସେବା ଭବନ ଖୋଲି ସେମାନଙ୍କୁ ପୂର୍ଣ୍ଣ ସ୍ଵାଧୀନତା ଦେବାକୁ କହିଛନ୍ତି ସୁର ରାଉତରାୟ ।