Author: suchanatv24x7

ଡରାଉଛି କୋରୋନା…ରାଜ୍ୟ ସମେତ ଦେଶକୁ ପୁଣି କୋରୋନା ଟେନସନ୍

COVID-19

ରାଜ୍ୟ ସମେତ ସାରା ଦେଶକୁ ଏବେ କୋରୋନା ଚିନ୍ତା । ଗତ ୨୪ ଘଣ୍ଟାରେ ଦେଶରେ ୫,୩୩୫ଟି କୋରୋନା ପଜିଟିଭ୍ ଚିହ୍ନଟ ହୋଇଛନ୍ତି । ସେହିପରି କୋରୋନା ସଂକ୍ରମଣରେ ୬ ଜଣଙ୍କ ମୃତ୍ୟୁ ହୋଇଛି । ଏବେ ଦେଶରେ ସକ୍ରିୟ ମାମଲା ସଂଖ୍ୟା ୨୫,୫୮୭କୁ ବୃଦ୍ଧି ପାଇଛି । ଦେଶରେ ମୃତ୍ୟୁ ସଂଖ୍ୟା ୫ ଲକ୍ଷ ୩୦ ହଜାର ୯୧୬କୁ ବୃଦ୍ଧି ପାଇଛି ।

ମହାରାଷ୍ଟ୍ରରେ କୋରୋନା ସଂକ୍ରମଣ ସଂଖ୍ୟା ବଢ଼ିବାରେ ଲାଗିଛି । ଦେଶରେ ସଂକ୍ରମଣର ୩୮% ପାଇଁ ଭାଇରସ ଦାୟୀ ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି । INSACOG ବୈଠକରେ ସ୍ୱାସ୍ଥ୍ୟ ମନ୍ତ୍ରଣାଳୟର ବରିଷ୍ଠ ଅଧିକାରୀ ଏବଂ NITI ଆୟୋଗଙ୍କ ନିକଟରେ ରିପୋର୍ଟ ଦାଖଲ ହୋଇଛି । ଏବେ ଓମିକ୍ରନ୍ ଏବଂ ଏହାର ପ୍ରକାରଗୁଡ଼ିକ ଦେଶରେ ଆରମ୍ଭ ହୋଇଥିବାରୁ ଦକ୍ଷିଣ, ଉତ୍ତର ଏବଂ ପଶ୍ଚିମାଂଶରେ ସଂକ୍ରମଣ ହାରରେ ବ୍ୟାପକ ବୃଦ୍ଧି ଘଟିଛି । ଦେଶର ଅନେକ ଜିଲ୍ଲାରେ ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଇଥିବା INSACOG ପକ୍ଷରୁ କୁହାଯାଇଛି । ଡାକ୍ତରଖାନାରେ ରୋଗୀଙ୍କ ସଂଖ୍ୟା ବୃଦ୍ଧି ହୋଇନଥିବା ବେଳେ ଅଧିକାଂଶ ସ୍ଥାନରେ ଲୋକଙ୍କ ନିକଟରେ ସାମାନ୍ୟ ଲକ୍ଷଣ ଦେଖାଯାଉଛି । ସମସ୍ତଙ୍କୁ ହୋମ୍ ଆଇସୋଲେସନ ରହିବାକୁ ପରାମର୍ଶ ଦିଆଯାଉଛି ।

ସେପଟେ ରାଜ୍ୟରେ ୨୪ ଘଣ୍ଟାରେ ୯୨ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ରାଜ୍ୟରେ ସକ୍ରିୟ ଆକ୍ରାନ୍ତ ସଂଖ୍ୟା ୩୫୯କୁ ବୃଦ୍ଧି ପାଇଛି । ଗତ ୨୪ ଘଣ୍ଟାରେ ୨୫ ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି ।
ପ୍ରେମିକର ଉନ୍ମତ୍ତକାଣ୍ଡ,ଉପହାର ଆଳରେ ଭିଆଇଲା ବିସ୍ଫୋରଣ

BLAST

ଛତିଶଗଡ଼ରେ ପାଟଣାଗଡ଼ ପାର୍ସଲ ବୋମା ବିସ୍ଫୋରଣର ପୁନରାବୃତ୍ତି। ପ୍ରେମରେ ବିଫଳ ପ୍ରେମିକର ଉନ୍ମତ୍ତକାଣ୍ଡ। ପ୍ରେମକୁ ପାଇ ନ ପାରିବାରୁ ଉପହାର ଆଳରେ ବୋମା ବିସ୍ଫୋରଣ କରାଇ ପ୍ରେମିକା ମଥାରୁ ଲିଭାଇଦେଲା ସିନ୍ଦୁର। ବୋମା ବିସ୍ଫୋରଣରେ ପ୍ରେମିକାର ସ୍ୱାମୀ ଓ ଦିଅରଙ୍କ ମୃତ୍ୟୁ ହୋଇଥିବା ବେଳେ 7 ଜଣ ଆହତ ହୋଇଛନ୍ତି। ଏହି ଘଟଣା ଛତିଶଗଡ଼ କବିରଧାମ ଜିଲ୍ଲା ରେଙ୍ଗାର ଗ୍ରାମରେ ଖେଳାଇଦେଇଛି ଶୋକ। ପୋଲିସ ଅଭିଯୁକ୍ତ ଯୁବକକୁ ଗରଫ କରି ତଦନ୍ତ ଚଳାଇଛି ।

ସୂଚନା ଅନୁଯାୟୀ,33 ବର୍ଷୀୟ ମରକାମଙ୍କର ସମ୍ପୃକ୍ତ ଯୁବତୀଙ୍କ ସହ ସମ୍ପର୍କ ଗଢ଼ି ଉଠିଥିଲା। ହେଲେ ମରକାମ ପୂର୍ବରୁ ବିବାହିତ ଥିବା ସହ ତାଙ୍କର 2ଟି ସନ୍ତାନ ଅଛନ୍ତି। ତଥାପି ମରକାମ ଯୁବତୀଙ୍କୁ ବିବାହ କରିବାକୁ ଚାହିଁଥିଲେ, ଯାହାକୁ ଯୁବତୀଙ୍କ ପରିବାର ମନା କରି ଦେଇଥିଲେ। ଏଥିସହ ଯୁବତୀଙ୍କ ବିବାହ ହେମେନ୍ଦ୍ର ନାମକ ଯୁବକଙ୍କ ସହ କରାଇଥିଲେ। ଏଥିରେ ଉତକ୍ଷିପ୍ତ ହୋଇ ପ୍ରତିଶୋଧ ପରାୟଣ ହୋଇଉଠିଥିଲା ମରକାମ। ଯୁବତୀଙ୍କୁ ଉପହାର ଦେବା ବାହାନାରେ ଏକ ହୋମ ଥିଏଟର ଭିତରେ 2 କେଜି ଓଜନର ବିସ୍ଫୋରକ ସାମଗ୍ରୀ ଖଞ୍ଜିଥିଲା। ମାର୍ଚ୍ଚ 31ରେ ପ୍ରେମିକାର ବିବାହ ଉତ୍ସବରେ ଉପହାର ଦେଇ ଆସିଥିଲା। ହେଲେ ଉପହାର ଉପରେ ନିଜ ନାମ ଲେଖିନଥିଲା।

HOME THEATRE

ବିବାହର 3 ଦିନ ପରେ ଉପହାର ଖୋଲୁଥିଲେ ହେମେନ୍ଦ୍ର ଓ ତାଙ୍କ ପରିବାର ଲୋକେ। ମରକାମଙ୍କ ଉପହାର ଖୋଲିବା ମାତ୍ରେ ଏହା ବିରାଟ ଶବ୍ଦ କରି ଫାଟିଥିଲା। ଏଥିରେ ହେମେନ୍ଦ୍ର ଓ ତାଙ୍କ ଭାଇଙ୍କର ମୃତ୍ୟୁ ହେବା ସହ 7 ଜଣ ଆହତ ହୋଇଛନ୍ତି। ଆହତଙ୍କ ମଧ୍ୟରେ ଜଣେ ଶିଶୁ ମଧ୍ୟ ଅଛି। ଏହି ଘଟଣାରେ ପୋଲିସ ମରକାମକୁ ମଧ୍ୟପ୍ରଦେଶରୁ ମଙ୍ଗଳବାର ଗିରଫ କରିଛି।

ସୂଚନାଯୋଗ୍ୟ, 2018 ମସିହାରେ ସମାନ ଢଙ୍ଗରେ ପାଟଣାଗଡ଼ରେ ବିସ୍ଫୋରଣ ହୋଇଥିଲା। କ୍ରାଇମବ୍ରାଞ୍ଚ ତଦନ୍ତ କରି ମୁଖ୍ୟ ଅଭିଯୁକ୍ତ ଅଧ୍ୟାପକ ପୁଞ୍ଜିଲାଲଙ୍କ ପାଖରେ ପହଞ୍ଚିପାରିଥିଲା।
ଶିଳ୍ପପତିଙ୍କୁ ନବୀନଙ୍କ ଆହ୍ୱାନ…ଓଡ଼ିଶାରେ ନିବେଶ କରିବାକୁ ନିମନ୍ତ୍ରଣ

ODISHA BUSINESS MEET

ଟୋକିଓ ଓକୁରାରେ ଆୟୋଜିତ’ଓଡ଼ିଶା ବିଜିନେସ୍ ମିଟ୍’କୁ ସମ୍ବୋଧିତ କରିଛନ୍ତି ମୁଖ୍ୟମନ୍ତ୍ରୀ । ଏଥିରେ ଜାପାନ ସମେତ ୨ ଶହରୁ ଅଧିକ ଶିଳ୍ପପତି ଓ ନିବେଶକ ଯୋଗ ଦେଇଥିଲେ । ସେମାନଙ୍କ ସହ ଆଲୋଚନା କରିଛନ୍ତି ମୁଖ୍ୟମନ୍ତ୍ରୀ । ପୁଞ୍ଜି ନିବେଶ ପାଇଁ ରାଜ୍ୟରେ ଉତ୍ତମ ପରିବେଶ ଥିବା କଥା ବୁଝାଇଛନ୍ତି । ଏଥିସହ ପୁଞ୍ଜି ନିବେଶ କରିବାକୁ ପୁଞ୍ଜିପତିଙ୍କୁ ନିମନ୍ତ୍ରଣ କରିଛନ୍ତି ନବୀନ । ଏବେ ରାଜ୍ୟରେ ସର୍ବବୃହତ ଅତ୍ୟାଧୁନିକ ଷ୍ଟିଲ ପ୍ଲାଣ୍ଟ ପ୍ରତିଷ୍ଠା ହେବା ନେଇ ସମ୍ଭାବନା ସୃଷ୍ଟି ହୋଇଛି । ୩୦ ନିୟୁତ ଟନର ମେଗା ଗ୍ରୀନ୍ ଫିଲ୍ଡ ଗଢ଼ିବ ଜାପାନର ନିପନ ଷ୍ଟିଲ୍ କମ୍ପାନୀ । ପ୍ରସ୍ତାବିତ ପ୍ରକଳ୍ପରେ ପ୍ରାୟ ୧ ଲକ୍ଷ କୋଟି ଟଙ୍କା ନିବେଶ ହେବ ବୋଲି ଟାର୍ଗେଟ୍ ରହିଛି ।

ସେପଟେ, ଜାପାନରେ ପ୍ରବାସୀ ଓଡି଼ଆଙ୍କୁ ଭେଟି ସେମାନଙ୍କ ସହ ଆଲୋଚନା କରିଛନ୍ତି । ଓଡ଼ିଆ ସୋସାଇଟି ପକ୍ଷରୁ ମୁଖ୍ୟମନ୍ତ୍ରୀଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା । ମୁଖ୍ୟମନ୍ତ୍ରୀଙ୍କ ସମେତ ମୁଖ୍ୟ ଶାସନ ସଚିବ ପ୍ରଦୀପ ଜେନା, ଶିଳ୍ପ ବିଭାଗ ପ୍ରମୁଖ ସଚିବ, ଶିଳ୍ପ ମନ୍ତ୍ରୀ,5T ସଚିବ ଭି.କେ ପାଣ୍ଡିଆନ୍, କ୍ରୀଡା ଓ ଯୁବ ବ୍ୟାପାର ସଚିବ, ଇପିକଲର ପରିଚାଳନା ନିର୍ଦ୍ଦେଶକ ପ୍ରମୁଖ ଜାପାନ କାର୍ଯ୍ୟକ୍ରମରେ ସାମିଲ ହୋଇଥିଲେ । ଆସନ୍ତାକାଲି ଅର୍ଥାତ ଗୁରୁବାର ନିପନ ଷ୍ଟିଲ କର୍ପୋରେସନର କିମିସୁ ଷ୍ଟିଲ ୱାର୍କସ୍ ସେଣ୍ଟର ପରିଦର୍ଶନ କରିବେ ରାଜ୍ୟର ଉଚ୍ଚସ୍ତରୀୟ ପ୍ରତିନିଧି ଦଳ ।
ମିଡିଆୱାନ ଉପରୁ ହଟିଲା କେନ୍ଦ୍ର କଟକଣା…ଗଣମାଧ୍ୟମ ସ୍ୱାଧୀନ ହେବା ଆବଶ୍ୟକ: ସିଜେଆଇ

CJI

ମାଲାୟଲମ ନ୍ୟୁଜ୍ ଚାନେଲ ମିଡିଆୱାନକୁ ସର୍ବୋଚ୍ଚ ଅଦାଲତରୁ ଆଶ୍ୱସ୍ତି । ଚାନେଲ ବନ୍ଦ କରିବାକୁ କେନ୍ଦ୍ରର ନିର୍ଦ୍ଦେଶକୁ ରଦ୍ଦ କଲେ ସର୍ବୋଚ୍ଚ ନ୍ୟାୟାଳୟ। ଚାନେଲକୁ ସିକ୍ୟୁରିଟି କ୍ଲିୟରାନ୍ସ ନଦେବାକୁ ନେଇ ମଧ୍ୟ ଅସନ୍ତୋଷ ବ୍ୟକ୍ତ କରିଛନ୍ତି କୋର୍ଟ। ଚାନେଲ ବିରୋଧରେ ଥିଲା ଜାତୀୟ ସୁରକ୍ଷା ପ୍ରତି ବିପଦର ଅଭିଯୋଗ। ଗୁଇନ୍ଦା ତଥ୍ୟ ଆଧାରରେ ଚାନେଲକୁ ସିକ୍ୟୁରିଟି କ୍ଲିୟରାନ୍ସ ଦେଇ ନ ଥିଲା କେନ୍ଦ୍ର।

ଭାରତର ପ୍ରଧାନ ବିଚାରପତି ଜଷ୍ଟିସ ଡି.ୱାଇ.ଚନ୍ଦ୍ରଚୂଡ଼ଙ୍କ ନେତୃତ୍ୱାଧୀନ ଖଣ୍ଡପୀଠ କହିଥିଲେ କି,ଆତଙ୍କବାଦୀଙ୍କ ସହ ସମ୍ପର୍କ ଥିବାପରି କୌଣସି କଥା ନ ଥିଲା । ପବନ ପରି ତଥ୍ୟ ଆଧାରରେ ରାଷ୍ଟ୍ରୀୟ ସୁରକ୍ଷାର ଦାବି ଅନୁଚିତ । ରାଷ୍ଟ୍ରୀୟ ସୁରକ୍ଷା ବିରୋଧରେ ବା ବ୍ୟବସ୍ଥା ବିରୋଧୀ କୌଣସି ଜିନିଷ ନାହିଁ,ଯାହା ବିପଦ ସୃଷ୍ଟି କରିବ।
କୋର୍ଟ ଆହୁରି କହିଛନ୍ତି କି,ଜନତାର ଅଧିକାର ଚ୍ଛିନ୍ନ କରିବାକୁ ରାଷ୍ଟ୍ରୀୟ ସୁରକ୍ଷାର ପ୍ରସଙ୍ଗ ଉଠାଯାଇ ନପାରେ । ଏହି ମାମଲାରେ ଗୃହମନ୍ତ୍ରଣାଳୟ କାହିଁକି ପ୍ରଶ୍ନ କରି ନ ଥିଲା ବୋଲି ପ୍ରଶ୍ନ କରିଛନ୍ତି କୋର୍ଟ । ଏଥିସହ ଗଣତାନ୍ତ୍ରିକ ରାଜ୍ୟର ସୁପରିଚାଳନା ପାଇଁ ଗଣମାଧ୍ୟମ ସ୍ୱାଧୀନ ହେବା ଆବଶ୍ୟକ ବୋଲି କୋର୍ଟ କହିଛନ୍ତି । ସରକାରଙ୍କ ସମାଲୋଚନା କରିବା ଆଧାରରେ କୌଣସି ଚାନେଲର ଲାଇସେନ୍ସ ରଦ୍ଦ କରାଯାଇପାରିବ ନାହିଁ ବୋଲି ମଧ୍ୟ କୋର୍ଟ କହିଛନ୍ତି ।
BJPର OBC କାର୍ଡ…’ଗାଁ ଗାଁ ଚାଲ;ଘର ଘର ଚାଲ’ଅଭିଯାନ

ରାଜ୍ୟ ସମେତ ସାରା ଦେଶରେ ପଛୁଆ ବା ଓବିସି ବର୍ଗଙ୍କ ସଂଖ୍ୟା ଅଧିକ । ସେମାନଙ୍କୁ ଯେତେବେଳେ ଅଧିକାର ଦିଆଗଲା ସେତେବେଳେ ମୋଦିଙ୍କୁ ଅପମାନିତ କଲେ ରାହୁଲ ଗାନ୍ଧି । ତାଙ୍କ ମନ୍ତବ୍ୟ ଓବିସି ବର୍ଗ ପ୍ରତି ହୀନ ମାନସିକତାର ପ୍ରମାଣ ଦେଲା । କଂଗ୍ରେସ କେବେ ବି ପଛୁଆ ବର୍ଗଙ୍କ ଉନ୍ନତି ଚିନ୍ତା କରିନାହିଁ ବୋଲି ଓବିସି ମୋର୍ଚ୍ଚା ରାଜ୍ୟ ସଭାପତି ସୁରଥ ବିଶ୍ୱାଳ ପ୍ରେସମିଟରେ କହିଛନ୍ତି ।

ସେହିଭଳି ରାଜ୍ୟରେ ଦୀର୍ଘ ୨୩ ବର୍ଷ ହେଲା ବିଜେଡି ଶାସନ କରୁଛି । ପଛୁଆ ବର୍ଗଙ୍କ ପ୍ରତି ଶାସକ ଦଳର ଆଦୌ ଦରଦ ନାହିଁ । ରାଜ୍ୟ ସରକାର ତାଙ୍କୁ ବିକାଶ ଧାରାରୁ ବଞ୍ଚିତ ରଖୁଥିବା ଅଭିଯୋଗ କରିଛି ଓବିସି ମୋର୍ଚ୍ଚା । ବିଭିନ୍ନ ବାହାନା କରି କଥାକୁ ବୁଲେଇବାଲେଇ ୫୪ ଭାଗ ଓବିସି ବର୍ଗଙ୍କୁ ତାଙ୍କ ସାମ୍ବିଧାନିକ ଅଧିକାରରୁ ବଂଚିତ କରାଯାଇଛି । ଗତ ବିଧାନସଭାରେ ଓବିସି ମାନଙ୍କ ପାଇଁ ଏକ ସଂଶୋଧିତ ବିଲ୍ ଆଗତ କରିବା ପାଇଁ କାର୍ଯ୍ୟସୂଚୀରେ ସ୍ଥାନିତ କରାଗଲା ମାତ୍ର ଶେଷ ମୁହୂର୍ତ୍ତରେ ପ୍ରତ୍ୟାହାର କରି ନିଆଗଲା ।

ରାଜ୍ୟର ୫୪ ଭାଗ ପଛୁଆ ବର୍ଗଙ୍କ ମଧ୍ୟରେ ଜନଜାଗରଣ ସୃଷ୍ଟି କରିବା, ସାମ୍ବିଧାନିକ ଅଧିକାର ବିଷୟରେ ସେମାନଙ୍କୁ ମନେ ପକାଇଦେବା ପାଇଁ ସ୍ୱର ଉଠାଇବା ଜରୁରୀ । ଏହି ଦୃଷ୍ଟିରୁ ବିଜେପି ଓବିସି ମୋର୍ଚ୍ଚା ବର୍ତ୍ତମାନ ‘ଗାଁ ଗାଁ ଚାଲ;ଘର ଘର ଚାଲ’ଅଭିଯାନ ଆରମ୍ଭ କରୁଛି । ଏପ୍ରିଲ ୬ ତାରିଖ ବିଜେପି ପ୍ରତିଷ୍ଠା ଦିବସରୁ ୧୪ ତାରିଖ ଆମ୍ବେଦକର ଜୟନ୍ତୀ ପର୍ଯ୍ୟନ୍ତ ୯ ଦିନ ଧରି ଓବିସି ମୋର୍ଚ୍ଚା ତରଫରୁ “ଗାଁ ଗାଁ ଚାଲ; ଘର ଘର ଚାଲ” ଅଭିଯାନ ଚାଲିବ ବୋଲି ଶ୍ରୀ ବିଶ୍ୱାଳ କହିଛନ୍ତି ।
ଟାଲକମ୍ ପାଉଡରରୁ କ୍ୟାନ୍ସର !…’ଜନସନ୍ ଆଣ୍ଡ ଜନସନ୍’ ଗଣିବ ତଣ୍ଡ

ଆମେରିକାର ଅନ୍ୟତମ ବୃହତ୍ତମ ଫାର୍ମାସ୍ୟୁଟିକାଲ କମ୍ପାନୀ ଜନସନ ଆଣ୍ଡ ଜନସନ (Johnson & Johnson) ନିଜ ଉପରେ ଥିବା 9 ବର୍ଷ ପୁରୁଣା ମାମଲାର ସମାଧାନ ପାଇଁ 890 କୋଟି ଆମେରିକୀୟ ଡଲାର ବା ଆନୁମାନିକ 730,086 କୋଟି ଟଙ୍କା ଦେବାକୁ ରାଜି । ଜନସନ ଆଣ୍ଡ ଜନସନ ଟେଲକମ ପାଉଡରରେ କ୍ୟାନସର ସୃଷ୍ଟିକାରୀ ଉପାଦାନ ନେଇ ଅଭିଯୋଗ ପରେ ମାମଲା କୋର୍ଟକୁ ଯାଇଥିଲା ।

ନ୍ୟୁ ଜର୍ସି ଭିତ୍ତିକ କମ୍ପାନୀ ପକ୍ଷରୁ କୁହାଯାଇଛି କି,ଏହି ପ୍ରସ୍ତାବିତ ସମାଧାନ ତଥାପି ଏକ ଦେବାଳିଆ କୋର୍ଟର ଅନୁମୋଦନ ଆବଶ୍ୟକ କରୁଛି। ଏଥିସହ କସମେଟିକ ଟାଲକ୍ ବିରୋଧରେ ଥିବା ସମସ୍ତ ଅଭିଯୋଗର ସମାଧାନ, ଦକ୍ଷତା ଓ ପ୍ରବାବଶାଳୀ ଢଙ୍ଗରେ କରିବା ଦିଗରେ କାର୍ଯ୍ୟ କରିବ ।

କମ୍ପାନୀ ପକ୍ଷରୁ ଆହୁରି କୁହାଯାଇଛି କି,ଏହି ସମାଧାନ କୋର୍ଟ ତଥା ଅଧିକାଂଶ ଅଭିଯୋଗକାରୀଙ୍କ ପକ୍ଷରୁ ଅନୁମୋଦିତ ହେଲେ 890 କୋଟି ଡଲାରର ସମାଧାନ ଯୁକ୍ତରାଷ୍ଟ୍ରର ସର୍ବ ବୃହତ୍ତ ଆପୋଷ ବୁଝାମଣା ଆଧାରରେ ହୋଇଥିବା ସମାଧାନ ଭିତରୁ ଅନ୍ୟତମ ହେବ । ପୂର୍ବରୁ ଏପ୍ରକାର ବୁଝାମଣା କେବଳ ତମାଖୁ ଓ ଅଫିମ ଉତ୍ପାଦନକାରୀ ସଂସ୍ଥା ଦ୍ୱାରା ହୋଇଛି ।

ସୂଚନା ଯୋଗ୍ୟ,ଜନସନ ଆଣ୍ଡ ଜନସନ ବିରୋଧରେ ଏକ ହଜାରରୁ ଅଧିକ ମାମଲା ବିଚାରାଧୀନ ଅଛି । ଜନସନ ଆଣ୍ଡ ଜନସନ ଟେଲକମ ପାଉଡରରେ ଓଭାରିୟାନ କର୍କଟ ସୃଷ୍ଟିକାରୀ ଆଜବେଷ୍ଟସ ରହିଥିବା ଅଭିଯୋଗ ହୋଇଥିଲେ ମଧ୍ୟ ଏହାକୁ କମ୍ପାନୀ ଖଣ୍ଡନ କରି ଆସୁଥିଲା । ହେଲେ କମ୍ପାନୀ ପକ୍ଷରୁ 2020 ମେ ମାସରୁ ଆମେରିକା ଓ କାନାଡାରେ ପିଲାଙ୍କ ପାଇଁ ଉଦ୍ଦିଷ୍ଟ ପାଉଡର ବିକ୍ରି ବନ୍ଦ କରାଯାଇଥିଲା ।

କମ୍ପାନୀର ଆଇନ ମୁଖ୍ୟ ଏରିକ ହାସ ଏକ ବିବୃତ୍ତିରେ କହିଛନ୍ତି କି,କମ୍ପାନୀ ବିଶ୍ୱାସ କରେ କି, ଏହିସବୁ ଅଭିଯୋଗ ଭ୍ରମାତ୍ମକ ଓ ବୈଜ୍ଞାନିକ ଆଧାର ବିହୀନ । ଜନସନ ଆଣ୍ଡ ଜନସନ ପକ୍ଷରୁ କୁହାଯାଇଛି କି,କମ୍ପାନୀର ସହଯୋଗୀ ଏଲଟିଏଲ ମ୍ୟାନେଜମେଣ୍ଟ ଏଲଏଲସି ଆସନ୍ତା 25 ବର୍ଷରେ ହଜାର ହଜାର ଦାବିଦାରଙ୍କୁ 890 କୋଟି ଡଲାର ଦେବାକୁ ରାଜି । ଦେବାଳିଆ ସ୍ଥିତିରୁ ସୁରକ୍ଷା ପାଇଁ ତଥା ଅଭିଯୋଗର ସାମ୍ନା କରିବାକୁ ଏଲଟିଏଲ ମ୍ୟାନେଜମେଣ୍ଟ ଏଲଏଲସି ଗଠନ କରାଯାଇଥିଲା ।

ଏଲଟିଏଲ ମ୍ୟାନେଜମେଣ୍ଟ ଏଲଏଲସି ଦ୍ୱାରା ପୂର୍ବରୁ ଦିଆଯାଇଥିବା ଏକ ପ୍ରସ୍ତାବକୁ କୋର୍ଟ ଖାରଜ କରିଦେଇଥିଲେ । ବର୍ତ୍ତମାନ କୋର୍ଟ ଏଲଟିଏଲ ପ୍ରସ୍ତାବକୁ ଅନୁମୋଦନ ଦେଇଛନ୍ତି । ପୂର୍ବ ପ୍ରସ୍ତାବ ଅନୁଯାୟୀ କମ୍ପାନୀ 2 ବିଲିୟନ ଡଲାର ଦେବାକୁ ପ୍ରସ୍ତାବ ଦେଇଥିଲେ ।
ଓଡ଼ିଶାରେ ବିଶାଳ ଇସ୍ପାତ କାରଖାନା !…ନବୀନଙ୍କୁ ଆଶା ଦେଖାଇଲା ‘ନିପନ୍’

CM DISCUSSED WITH ‘NIPPON’ CHAIRMAN

ଜାପାନ ଗସ୍ତରେ ଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ନିପନ (Nippon)ଷ୍ଟିଲ କର୍ପୋରେସନ ଅଧ୍ୟକ୍ଷ ଇଜି ହାସିମୋଟୋଙ୍କ ସହ ସାକ୍ଷାତ କରିଛନ୍ତି । ରାଜ୍ୟରେ ୩୦ ନିୟୁତ ଟନ୍ ଇସ୍ପାତ କାରଖାନା ସ୍ଥାପନ (set up)କରିବାକୁ କମ୍ପାନୀ ଯୋଜନା ରଖିଥିବା ନେଇ ଆଲୋଚନା ହୋଇଛି ।

ରାଜ୍ୟରେ ନିପନ୍ ଷ୍ଟିଲ୍ କମ୍ପାନୀ ପକ୍ଷରୁ ମେଗା ପ୍ଲାଣ୍ଟ ପ୍ରତିଷ୍ଠା ହେଲେ କେନ୍ଦ୍ରାପଡ଼ା, ଜଗତସିଂହପୁର, ଭଦ୍ରକ, ଯାଜପୁର ଏବଂ କେନ୍ଦୁଝରରେ ହଜାର ହଜାର ନିଯୁକ୍ତି (jobs)ସୃଷ୍ଟି ହେବ । ସ୍ଥାନୀୟ ଲୋକ ସମେତ ରାଜ୍ୟବାସୀଙ୍କ ଆର୍ଥିକ ସ୍ଥିତି (financial condition)ସୁଦୃଢ଼ ହେବ । ଏଥିସହ ରାଜ୍ୟ ବିକାଶ ଦିଗକୁ ବଢ଼ିବ । ଏଭଳି ମେଗା ପ୍ଲାଣ୍ଟ ପାଇଁ ସମସ୍ତ ପ୍ରକାର ସୁବିଧା (facilities)ଯୋଗାଇଦେବେ ବୋଲି ନିପନ ଷ୍ଟିଲ୍ ଅଧ୍ୟକ୍ଷ ଇଜି ହାସିମୋଟୋଙ୍କୁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି । ଏଥିସହ ହାସିମୋଟୋ ଏବଂ ତାଙ୍କ ଟିମକୁ ଓଡ଼ିଶା ଭ୍ରମଣରେ ଆସିବାକୁ ନିମନ୍ତ୍ରଣ କରିଛନ୍ତି ନବୀନ ।

ଗୁରୁବାର ନିପନ ଷ୍ଟିଲ କର୍ପୋରେସନର କିମିସୁ ୱାର୍କସ ଓ ଆରଆଣ୍ଡଡି କେନ୍ଦ୍ର ପରିଦର୍ଶନ କରିବେ ମୁଖ୍ୟମନ୍ତ୍ରୀ । ଉଭୟ ପକ୍ଷ ମଧ୍ୟରେ କ୍ୟୋଟା ସହରରେ ଏକ ରାଉଣ୍ଡ ଟେବୁଲ ଆଲୋଚନା ହେବାର କାର୍ଯ୍ୟକ୍ରମ ରହିଛି ।
ଆମେରିକାରେ ‘ବିପ୍ଳବ’ର ପଦଧ୍ୱନି !

COURTSEY : IMAGE FROM REUTERS

ଶେଷରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ(Donald Trump)ଙ୍କୁ ଜାମିନ ମିଳିଛି । ତାଙ୍କୁ ୧.୨୨ ମିଲିୟନ୍ ଡଲାର ଦେବାକୁ ନି୍ର୍ଦ୍ଦେଶ ଦେଇଛନ୍ତି କୋର୍ଟ । ଗତକାଲି ଅର୍ଥାତ୍ ମଙ୍ଗଳବାର ଗିରଫ(Arrest) କରାଯାଇଥିବା ବେଳେ ଏବେ କିନ୍ତୁ ବେଲ୍ (bail)ଦେଇଛନ୍ତି କୋର୍ଟ ।

ଏକ ଅପରାଧିକ ମାମଲା(criminal case)ରେ ମ୍ୟାନହଟନ କୋର୍ଟରେ ପହଞ୍ଚିବା ପରେ ଟ୍ରମ୍ପଙ୍କୁ ଗିରଫ କରାଯାଇଥିଲା । ୨୦୧୬ ମସିହାରେ ଆମେରିକା ରାଷ୍ଟ୍ରପତି ନିର୍ବାଚନ ହୋଇଥିଲା । ଏହା ପୂର୍ବରୁ ଏକ ପର୍ଣ୍ଣଷ୍ଟାର ଷ୍ଟର୍ମୀ ଡାନିଏଲ୍ସଙ୍କ ପାଟି ଚୁପ୍ କରିବା ପାଇଁ ସେ ନିଜ ଓକିଲ ମାଧ୍ୟମରେ ଅର୍ଥ ଦେଇଥିଲେ । ଆର୍ଥିକ ରେକର୍ଡକୁ ମିଥ୍ୟା କରିବା ସହିତ ଟ୍ରମ୍ପ ବିଭିନ୍ନ ଅଭିଯୋଗର ସାମ୍ନା କରିଥିଲେ । କୋର୍ଟରେ ହାଜର ପରେ ସମସ୍ତ ଅଭିଯୋଗକୁ ଅସ୍ୱୀକାର(denied) କରି ନିଜକୁ ନିର୍ଦ୍ଦୋଷ (innocent)ବୋଲି ଘୋଷଣା କରିଥିଲେ ଟ୍ରମ୍ପ । ଏହି ମାମଲାର ପରବର୍ତ୍ତୀ ଶୁଣାଣି ଡିସେମ୍ବର ୪ରେ ହେବ ।

ଡୋନାଲ୍ଡ ଟ୍ରମ୍ପ ଆମେରିକା ଇତିହାସ ପାଇଁ ବଦନାମର (infamy)ଚିତ୍ର ଆଙ୍କିଛନ୍ତି । ଜଣେ ଏଭଳି ବ୍ୟକ୍ତି ଗିରଫ ହେବା ନିହାତି ବିରଳ (extremely rare)ଘଟଣା । ଆମେରିକାର ପ୍ରଥମ ତଥା ପୂର୍ବତନ ରାଷ୍ଟ୍ରପତି ଭାବେ ସେ ଗିରଫ ହୋଇଛନ୍ତି । ପରେ ଅବଶ୍ୟ ତାଙ୍କୁ ଜାମିନ ମିଳିଛି । ଏହା କଣ ବିପ୍ଳବ(revolution)ର ସଙ୍କେତ ଦେଉନି ତ ? ଟ୍ରମ୍ପଙ୍କ ସମର୍ଥକମାନେ କଣ ଏହାକୁ ସହଜରେ ଗ୍ରହଣ କରିବେ କି ? ନ୍ୟୁୟର୍କ କୋର୍ଟ ବାହାରେ ବହୁ ସମର୍ଥକଙ୍କ ଭିଡ଼ ଜମିଥିଲା । କୋର୍ଟ ଭିତରେ ଓ ବାହାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି ହୋଇଇଥିଲା । ତେବେ ଆସନ୍ତା ଦିନରେ ଏହା କଣ ଆମେରିକା ପାଇଁ ବୁମେରାଂ ହେବ । ଏହିଠାରୁ ହିଁ କଣ ଆମେରିକାରେ ବିପ୍ଳବ ଆରମ୍ଭ ହେବ, ଏ ନେଇ ଅନେକ ପ୍ରଶ୍ନ ଆସୁଛି ।
IPL ମହାସମର…ଆଜି ରାଜସ୍ଥାନ-ପଞ୍ଜାବ ମୁକାବିଲା

IPLରେ ଆଜି ଗୋଟିଏ ମ୍ୟାଚ୍ ଖେଳାଯିବ । ରାଜସ୍ଥାନ ରୟାଲ୍ସ(Rajasthan Royals) ଏବଂ ପଞ୍ଜାବ କିଙ୍ଗସ(Punjab Kings) ମଧ୍ୟରେ ଏହି ମୁକାବିଲା ହେବ । ଗୌହାଟିରେ ସନ୍ଧ୍ୟା ୭.୩୦ରେ ମ୍ୟାଚ୍ ଖେଳାଯିବ ।

ରାଜସ୍ଥାନ ରୟାଲ୍ସ ତାର ପ୍ରଥମ ମ୍ୟାଚରେ ସନରାଇଜର୍ସ ହାଇଦ୍ରାବାଦକୁ ପରାସ୍ତ କରିଛି । ବିଜୟରୁ ଅଭିଯାନ ଆରମ୍ଭ କରିଥିବା ବେଳେ ଆଜି ପଞ୍ଜାବକୁ ହରାଇବା ପାଇଁ ଦଳ ପ୍ରୟାସ କରିବ । ଅଧିନାୟକ ସଞ୍ଜୁ ସାମସନ, ବିସ୍ଫୋରକ ବଟଲର, ହେଟମ୍ୟାର, ଅଶ୍ୱିନ, ଚହଲ, ବୋଲ୍ଟଙ୍କ ପରି ଖେଳାଳିଙ୍କୁ ନେଇ ପଡି଼ଆକୁ ଓହ୍ଲାଇବେ ଅଧିନାୟକ ।

ସେପଟେ, ପଞ୍ଜାବ ମଧ୍ୟ ପ୍ରଥମ ମ୍ୟାଚରେ ଦମଦାର ପ୍ରଦର୍ଶନ କରି କୋଲକାତାକୁ ହରାଇଛି । ଅଧିନାୟକ ଧାୱନ, ଭାନୁକା ରାଜପକ୍ଷେ,ସିକନ୍ଦର ରାଜା,ସାମ କରନଙ୍କ ପରି ପ୍ଲେୟାର ଏବେ ପୁରା ଫର୍ମରେ(inform) ଅଛନ୍ତି । ତେଣୁ ଦଳ ରାଜସ୍ଥାନ ବିପକ୍ଷରେ ଲଢ଼ି ବିଜୟୀ(win) ହେବାକୁ ପ୍ରୟାସ କରିବ । ଗତକାଲି ଏକ ମ୍ୟାଚରେ ଦିଲ୍ଲୀକୁ ପରାସ୍ତ କରିଥିଲା ଗୁଜରାଟ ଟାଇଟନ୍ସ ।
ଛୁରୀ ଭୁଷିଲେ…ପଥର ଛେଚି ଜୀବନ ନେଲେ !

BRUTAL MURDER !

ଜଣେ ମହିଳାଙ୍କୁ ନିର୍ମମ ହତ୍ୟା (Brutal murder)। ଅଫିସରୁ କାମ ସାରି ଘରକୁ ଫେରୁଥିଲେ । ମହିଳା ଜଣଙ୍କ ଏକ ଫାଇନାନ୍ସ କମ୍ପାନୀରେ କାର୍ଯ୍ୟ କରୁଥିଲେ । ଘରକୁ ଫେରିବା ସମୟରେ ତାଙ୍କୁ ନିର୍ମମ ଭାବେ ହତ୍ୟା କରାଯାଇଛି । ଦେବଗଡ଼ ସହର ପ୍ରଧାନପାଟ ରାସ୍ତାର ଏସକେଏସ ଫାଇନାନ୍ସ ଅଫିସ ସମ୍ମୁଖରେ ଏଭଳି ଘଟଣା ଏବେ ଚର୍ଚ୍ଚାର ବିଷୟ ହୋଇଛି ।

ମୃତ ମହିଳା ସମ୍ବଲପୁର କୁଚିଣ୍ଡା ଅଞ୍ଚଳର ରିତା ସାହୁ । ସୂଚନା ଅନୁଯ।ୟୀ ଗତକାଲି ରାତି ପ୍ରାୟ ୧୨ଟା ବେଳେ ରିତା, ଫାଇନାନ୍ସ ଅଫିସରୁ କାମ ସାରି ସ୍କୁଟିରେ ଭଡ଼ା ଘରକୁ ବାହାରୁଥିଲେ । ଏହି ସମୟରେ ୨ ଜଣ ଦୁର୍ବୃତ୍ତ(miscreants) ରୀତାଙ୍କୁ ଛୁରୀରେ ଆକ୍ରମଣ କରିଥିଲେ । ସେ ସ୍କୁଟିରୁ ତଳେ ପଡ଼ିଯିବାରୁ ତାଙ୍କ ମୁଣ୍ଡ ଉପରେ ପଥର କଚାଡ଼ି ଘଟଣାସ୍ଥଳରୁ ଚମ୍ପଟ ମାରିଥିଲେ ଦୁର୍ବୃତ୍ତ । ସେଠାରେ ମହିଳାଙ୍କ ମତ୍ୟୁ ହୋଇଥିଲା । ଖବର ପାଇ ଦେବଗଡ଼ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଶବ ଜବତ (seized)କରି ଘଟଣାର ତଦନ୍ତ ଜାରି ରଖିଛି । ଆଜି ସକାଳେ ଏସପି ପ୍ରମୋଦ ରଥ ଘଟଣାସ୍ଥଳ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଥିଲେ । ହତ୍ୟାର କାରଣ ଅସ୍ପଷ୍ଟ (unclear)ଥିବାବେଳେ ପୋଲିସ ତଦନ୍ତକୁ ତ୍ୱରାନ୍ୱିତ (accelerated)କରିଛି ।