Category: ରାଜ୍ୟ ଖବର

ରାଜ୍ୟରେ ଗ୍ରୀଷ୍ମ ପ୍ରବାହ ଲାଗି ରହିଛି । ରାଜ୍ୟରେ ଆହୁରି କିଛି ଦିନ ଯାଏ ତାତି ଅସହ୍ୟ ହେବ । ଏଭଳି ଅନୁମାନ କରି ଭାରତୀୟ ପାଣିପାଗ ବିଭାଗର ସୂଚନା ପରେ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ରାଜ୍ୟରେ ତାପାମାତ୍ରା ବଢୁଥିବା ବେଳେ ଅଧିକାଂଶ ସହରରେ ପାରଦ ପ୍ରାୟ ୪୦ ଡିଗ୍ରୀ ଉପରେ ରହିଛି ।

ରାଜ୍ୟବାସୀଙ୍କୁ ତାତିରୁ ଆଶ୍ୱସ୍ତି ମିଳିବ କେବେ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ରାଜ୍ୟର ୬ ଜିଲ୍ଲା ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର,ସୋନପୁର ଓ ବୌଦ୍ଧରେ ହିଟ୍‌ୱେଭ୍‌ ଜାରି ରହିବ । ଏସବୁ ଜିଲ୍ଲା‌ରେ ୟେଲୋ ୱାର୍ଣ୍ଣିଂ ଜାରି କରାଯାଇଛି । ଖରା ସମୟରେ ସତର୍କ ରହିବାକୁ ଓ ସୁରକ୍ଷିତ ସ୍ଥାନରେ ରହିବାକୁ ପାଣିପାଗ ବିଭାଗ ପରାମର୍ଶ ଦେଇଛି । ଆହୁରି କିଛି ଦିନ ରାଜ୍ୟର ତାପମାତ୍ରାରେ ବିଶେଷ କିଛି ପରିବର୍ତ୍ତନ ହେବନି । ତାତି ଓ ଗୁଳୁଗୁଳି ପୂର୍ବପରି ଜାରି ରହିବ । ୩ ଦିନ ପରେ ରାଜ୍ୟର ତାପମାତ୍ରା ଅଳ୍ପ ମାତ୍ରାରେ ଖସିପାରେ ।

ସେପଟେ, ଅସହ୍ୟ ତାତିକୁ ନଜରରେ ରଖି ସରକାର ଆଜି ଓ କାଲି ଦୁଇଦିନ ପାଇଁ ସ୍କୁଲ ଓ ଅଙ୍ଗନୱାଡି କେନ୍ଦ୍ର ବନ୍ଦ ରଖିଛନ୍ତି । ଏହି ୨ ଦିନ ସମସ୍ତ ସରକାରୀ ସ୍କୁଲ ବନ୍ଦ ରଖିବା ପାଇଁ ନିର୍ଦ୍ଦେଶ ରହିଛି । ପ୍ରଥମରୁ ଦ୍ୱାଦଶ ଶ୍ରେଣୀ ଯାଏ ସମସ୍ତ ସରକାରୀ ଓ ଘରୋଇ ସ୍କୁଲ ବନ୍ଦ ରହିବ । ଅଙ୍ଗନୱାଡ଼ି କେନ୍ଦ୍ର ମଧ୍ୟ ବନ୍ଦ ରହିବ । ପୂର୍ବରୁ ଏପ୍ରିଲ ୧୨ରୁ ୧୬ ତାରିଖ ଯାଏଁ ଛୁଟି ଘୋଷଣା ହୋଇଥିବା ବେଳେ ୧୭ ତାରିଖରେ ସ୍କୁଲ ଖୋଲିଥିଲା । ସେପଟେ, ୨୧ ତାରିଖରୁ ବର୍ଷା ଆଶଙ୍କା ମଧ୍ୟ ରହିଛି ।