Month: May 2023

ପ୍ରଥମେ ପତ୍ନୀ ପରେ ଝିଅକୁ ହତ୍ୟା କରି ଆତ୍ମହତ୍ୟା କଲେ ମେଟ୍ରୋ କର୍ମଚାରୀ

ଦିଲ୍ଲୀର ଜ୍ୟୋତି କଲୋନୀରୁ ହୃଦୟ ଥରାଇବା ଭଳି ଘଟଣା ସାମ୍ନାକୁ ଆସିଛି । ଦିଲ୍ଲୀ ମେଟ୍ରୋର ଜଣେ କର୍ମଚାରୀ ଏହି ଭୟଙ୍କର ଘଟଣା ଘଟାଇଛନ୍ତି । ସେ ପ୍ରଥମେ ନିଜ ପତ୍ନୀ ଏବଂ ଝିଅକୁ ହତ୍ୟା କରି ପରେ ଆତ୍ମହତ୍ୟା କରିଛନ୍ତି । ହେଲେ ଏହି ଭୟଙ୍କର ପଦକ୍ଷେପ ପଛର କାରଣ କଣ ତାହା ଏପର୍ଯ୍ୟନ୍ତ ଜଣାପଡି ନାହିଁ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଦେଇଛି ।

ପୋଲିସର ସୂଚନା ଅନୁସାରେ, ଦିଲ୍ଲୀ ମେଟ୍ରୋ ରେଳ ନିଗମ (ଡିଏମଆରସି) କର୍ମଚାରୀ ସୁଶୀଲ କୁମାର ମଙ୍ଗଳବାର ଦିନ ପୂର୍ବ ଦିଲ୍ଲୀର ଜ୍ୟୋତି କଲୋନୀ ଅଞ୍ଚଳରେ ତାଙ୍କ ପତ୍ନୀ ଏବଂ ଝିଅକୁ ହତ୍ୟା କରିବା ପରେ ନିଜେ ଆତ୍ମହତ୍ୟା କରିଛି ।

ମଧ୍ୟାହ୍ନ ପ୍ରାୟ ୧୨ଟା ସମୟରେ ଏକ PCRକୁ କଲ ମାଧ୍ୟମରେ ଏହି ଘଟଣା ବିଷୟରେ ସୂଚନା ମିଳିଥିଲା । ଦିଲ୍ଲୀ ମେଟ୍ରୋର ଜଣେ କର୍ମଚାରୀ କହିଛନ୍ତି ଯେ, ଯେତେବେଳେ ସେ ତାଙ୍କ ସହକର୍ମୀ ସୁଶୀଲ କୁମାର(୪୩)ଙ୍କୁ ଭେଟିବା ପାଇଁ ଅଫିସରେ ପହଞ୍ଚିଥିଲେ, ସେତେବେଳେ ତାଙ୍କ ସାକ୍ଷାତ ମିଳିନଥିଲା । ଯେତେବେଳେ ସେ ସୁଶୀଲଙ୍କୁ କଲ କରିଥିଲେ, ସେ କଲରେ କାନ୍ଦିବାକୁ ଲାଗିଲେ । ଫୋନରେ ସୁଶୀଲ କହିଥିଲେ ଯେ, ସେ ପରିବାରର ସମସ୍ତ ସଦସ୍ୟଙ୍କୁ ହତ୍ୟା କରିଛନ୍ତି ।

ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୋଲିସ ସୁଶୀଲ କୁମାରଙ୍କ ଘରେ ପହଞ୍ଚିଥିଲା । ପୋଲିସ ଘରେ ତିନିଟି ମୃତଦେହ ଜବତ କରିଛି । ପୋଲିସ ଦେଇଥିବା ସୂଚନା ଅନୁଯାୟୀ, ସୁଶୀଲ କୁମାରଙ୍କ ମୃତଦେହ ଛାତରେ ଝୁଲୁଥିବା ଦେଖିବାକୁ ମିଳିଛି । ତାଙ୍କ ପତ୍ନୀ ଅନୁରାଧା (୪୩) ଏବଂ ଛଅ ବର୍ଷର ଝିଅକୁ ଛୁରାମାଡ଼ କରାଯାଇଥିଲା । ଉଭୟଙ୍କ ମୃତଦେହ ଘର ଭିତରୁ ମିଳିଥିଲା । ପୋଲିସ କହିଛି ଯେ, ସୁଶୀଲ ତାଙ୍କ ୧୩ ବର୍ଷର ପୁଅକୁ ଛୁରୀରେ ଅତି ନିର୍ମମ ଭାବେ ଆକ୍ରମଣ କରିଥିଲା, କିନ୍ତୁ ସେ ବଞ୍ଚିଯାଇଥିଲେ । ଦିଲ୍ଲୀ ଜିଟିବି ହସ୍ପିଟାଲରେ ପୁଅର ଚିକିତ୍ସା ଚାଲିଛି ।
ଚଳିତ ବର୍ଷ ଛଟପଟ କରିବ ମୌସୁମୀ

ତାତି ଆଉ ପ୍ରବଳ ଗୁଳୁଗୁଳି ଓଡ଼ିଶାବାସୀଙ୍କୁ କଲବଲ କରୁଥିବା ବେଳେ ଧୋକ୍କା ଦେଇଛି ମୌସୁମୀ। ଜଲଦି ନୂହେଁ ଟିକେ ବିଳମ୍ବରେ ଆସିବ ବୋଲି ଆଗୁଆ ସୂଚେଇ ଦେଇଛି। ମାନେ ଏଥର କେରଳ ଦକ୍ଷିଣ-ପଶ୍ଚିମ ମୌସୁମୀ ବାୟୁ କିଛି ଦିନ ବିଳମ୍ବରେ ପ୍ରବେଶ କରିବ। ମେ ୩୦ ନୁହଁ, ଚଳିତ ଜୁନ ୪ ତାରିଖ ବେଳକୁ ମୌସୁମୀ କେରଳ ଛୁଇଁବାର ସମ୍ଭାବନା ଥିବା ଆଜି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି। ଯଦିଓ ବିଳମ୍ବରେ ମୌସୁମୀ ଆସିବ, ହେଲେ ଏହାର ପ୍ରଭାବରେ ସ୍ୱାଭାବିକ ବର୍ଷା ହେବ ବୋଲି ବିଭାଗ ପକ୍ଷରୁ କୁହାଯାଇଛି।

ସାଧାରଣତଃ ଦକ୍ଷିଣ ପଶ୍ଚିମ ମୌସୁମୀ ବାୟୁ ଜୁନ ୧ରେ କିମ୍ବା ମେ ୩୦ରେ କେରଳ ଛୁଇଁଥାଏ। ହେଲେ ଏଥର ଏହା ସାମାନ୍ୟ ବିଳମ୍ବରେ ଆସିବ। ଭାରତୀୟ ପାଣିପାଗ ବିଭାଗ ପକ୍ଷରୁ ଜାରି ପ୍ରେସ୍ ବିବୃତିରେ କୁହାଯାଇଛି “ଚଳିତ ବର୍ଷ ଦକ୍ଷିଣ-ପଶ୍ଚିମ ମୌମୁସୀ ବାୟୁ କେରଳ ଆସିବାରେ ସାମାନ୍ୟ ବିଳମ୍ବ ହେବ। ଜୁନ ୪ରେ ମୌସୁମୀ କେରଳ ଛୁଇଁବାର ସମ୍ଭାବନା ରହିଛି। ଏହା ୪ ଦିନ ଏପଟ ସେପଟ ମଧ୍ୟ ହୋଇପାରେ।” କେରଳ ଛୁଇଁବାର ୧୦ ଦିନ ପରେ ଏହା ଓଡ଼ିଶାକୁ ପ୍ରବେଶ କରିଥାଏ।

ଗତବର୍ଷ ମେ’ ୨୯ ତାରିଖରେ ମୌସୁମୀ କେରଳ ଛୁଇଁଥିଲା। ୨୦୨୧ରେ ଏହା ଜୁନ ୩ ଓ ୨୦୨୦ରେ ମୌସୁମୀ ଜୁନ ୧ରେ କେରଳରେ ତା’ର ଉପସ୍ଥିତି ଜାହିର କରିଥିଲା। ଗତ ମାସରେ ଆଇଏମଡି କହିଥିଲା ଯେ ଚଳିତ ବର୍ଷ ଏଲ. ନିନୋର ପ୍ରଭାବ ପଡ଼ିପାରେ। ତଥାପି ସମଗ୍ର ଦେଶରେ ସ୍ୱାଭାବିକ ବର୍ଷା ହେବ। ଆଇଏମଡି କହିଛି ଯେ ଜୁନ୍‌ରୁ ସେପ୍ଟେମ୍ବର ମଧ୍ୟରେ ମୌସୁମୀ ପ୍ରଭାବରେ ୯୬% ବର୍ଷା ହେବ। ଏହାର ଅର୍ଥ ସ୍ୱାଭାବିକ ବର୍ଷା ହେବ। ଏଠାରେ କହି ରଖୁଛୁ, ୯୬%ରୁ ୫ ପ୍ରତିଶତ ଉପର ତଳ ବର୍ଷାକୁ ସ୍ୱାଭାବିକ ବର୍ଷା କୁହାଯାଏ।

ସାରା ଦେଶରେ ସ୍ୱାଭାବିକ ବର୍ଷାର ଆକଳନ ହୋଇଥିଲେ ମଧ୍ୟ ଉତ୍ତର ପଶ୍ଚିମ ଭାରତର କିଛି ରାଜ୍ୟରେ ସ୍ୱାଭାବିକ ଠାରୁ କମ ବର୍ଷା ହେବାର ଆଶଙ୍କା ରହିଛି। ମୌସୁମୀ ବର୍ଷାର ପ୍ରଭାବ ଏଲ. ନିନୋ ଉପରେ ନର୍ଭର କରିଥାଏ। ଏଲ. ନିନୋର ପ୍ରଭାବ ପଡ଼ିଲେ ବର୍ଷାର ମାତ୍ରା ସାଧାରଣତଃ କମ ହୋଇଥାଏ। ଦକ୍ଷିଣ ଓ ପଶ୍ଚିମ ଭାରତରେ ଯଦି ମୌସୁମୀ ବର୍ଷା ଉପରେ ଏଲ ନିନୋର ପ୍ରଭାବ ପଡ଼ିବ, ତା’ହେଲେ ମରୁଡ଼ି ସମସ୍ୟା ମଧ୍ୟ ସୃଷ୍ଟି ହେବାର ଆଶଙ୍କା ରହିଛି।

ମୌସୁମୀ ଉପରେ ଚାଷୀମାନେ ନିର୍ଭର କରନ୍ତି। ତେଣୁ ସମସ୍ତେ ଭଲ ମୌସୁମୀ ବର୍ଷାକୁ ଅପେକ୍ଷା କରିଛନ୍ତି। ଏଲ ନିନୋର ପ୍ରଭାବ ଯଦି ମୌସୁମୀର ଦ୍ୱିତୀୟ ଭାଗରେ ଶକ୍ତିଶାଳୀ ହେବ, ତା’ହେଲେ ପଞ୍ଜାବ, ହରିଆଣା, ରାଜସ୍ଥାନ ଓ ଉତ୍ତର ପ୍ରଦେଶରେ ଚାଷ କାମ ପ୍ରଭାବିତ ହେବାର ଆଶଙ୍କା ରହିଛି।
ସରୁନି କର୍ଣ୍ଣାଟକ ନାଟକ, କଂଗ୍ରେସ ଅଧ୍ୟକ୍ଷ ଖଡଗେ ଏବଂ ରାହୁଲ ଗାନ୍ଧୀଙ୍କ ମଧ୍ୟରେ ଦେଢ ଘଣ୍ଟାର ବୈଠକ

କଂଗ୍ରେସ ନେତା ରାହୁଲ ଗାନ୍ଧୀ ମଙ୍ଗଳବାର ପାର୍ଟି ସଭାପତି ମଲ୍ଲିକାର୍ଜୁନ ଖଡଗେଙ୍କୁ ସାକ୍ଷାତ କରି କର୍ଣ୍ଣାଟକର ମୁଖ୍ୟମନ୍ତ୍ରୀ ପଦ ଦଉଡ଼ ମଧ୍ୟରେ ରାଜ୍ୟରେ ସରକାର ଗଠନ ଉପରେ ଆଲୋଚନା କରିଥିଲେ । ରାହୁଲ ଗାନ୍ଧୀ ଦିଲ୍ଲୀରେ ଖଡଗେଙ୍କ ବାସଭବନକୁ ଯାଇ କଂଗ୍ରେସ ମୁଖିଆଙ୍କ ସହ ପ୍ରାୟ ଦେଢ ଘଣ୍ଟା ବନ୍ଦ କୋଠରୀରେ ଆଲୋଚନା କରିଛନ୍ତି । ରାହୁଲ ଗାନ୍ଧୀଙ୍କ ବ୍ୟତୀତ ଦଳର ସାଙ୍ଗଠନିକ ସାଧାରଣ ସମ୍ପାଦକ କେ.ସି ଭେଣୁଗୋପାଳ ଏବଂ କର୍ଣ୍ଣାଟକର ଦାୟିତ୍ୱରେ ଥିବା ରଣଦୀପ ସୁରଜେୱାଲା ଖଡଗେଙ୍କ ବାସଭବନରେ ଅନୁଷ୍ଠିତ ବୈଠକରେ ଯୋଗ ଦେଇଥିଲେ ।

କଂଗ୍ରେସ ସଭାପତି ଖଡଗେ ସୋମବାର ଦଳର ସମସ୍ତ ୩ ପର୍ଯ୍ୟବେକ୍ଷକଙ୍କ ସହ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ ମଧ୍ୟ କୌଣସି ନିଷ୍ପତ୍ତି ନେଇପାରି ନାହାନ୍ତି । କର୍ଣ୍ଣାଟକରେ କଂଗ୍ରେସ ବିଧାନସଭା ଦଳର ନେତା ଚୟନ କରିବାକୁ ଖଡଗେ ବରିଷ୍ଠ ନେତା ସୁଶୀଲ କୁମାର ସିନ୍ଦେ, ଜିତେନ୍ଦ୍ର ସିଂ ଏବଂ ଦୀପକ ବାବରିଆଙ୍କୁ ପର୍ଯ୍ୟବେକ୍ଷକ ଭାବରେ ନିଯୁକ୍ତ କରିଥିଲେ । ଏହି ତିନି ପର୍ଯ୍ୟବେକ୍ଷକ ଦଳର ନବ ନିର୍ବାଚିତ ପ୍ରତିନିଧିଙ୍କ ଠାରୁ ସେମାନଙ୍କର ପୃଥକ ଭାବରେ ମତ ଜାଣିବା ପରେ ସେମାନେ ଖଡଗେଙ୍କ ନିକଟରେ ରିପୋର୍ଟ ଦାଖଲ କରିଥିଲେ । ଉଭୟ ସିଦ୍ଧରମେୟା ଏବଂ ରାଜ୍ୟ କଂଗ୍ରେସ ସଭାପତି ଡି.କେ ଶିବକୁମାର ମୁଖ୍ୟମନ୍ତ୍ରୀ ପଦ ପାଇଁ ପ୍ରତିଦ୍ୱନ୍ଦ୍ୱୀ ଅଟନ୍ତି ।

ସିଦ୍ଧରମେୟ ସୋମବାର ନିଜେ ଦିଲ୍ଲୀ ଆସିଥିବା ବେଳେ ଡି.କେ ଶିବକୁମାର ଆଜି ଦିଲ୍ଲୀରେ ପହଞ୍ଚିଛନ୍ତି । ଶିବକୁମାର ସୋମବାର ଦିଲ୍ଲୀ ଆସିବାର ଥିଲା, କିନ୍ତୁ ପେଟ ଇନଫେକ୍ସନ ଦର୍ଶାଇ ସେ ତାଙ୍କ ପ୍ରସ୍ତାବିତ ଯାତ୍ରାକୁ ବାତିଲ କରିଥିଲେ । ଶିବକୁମାର କହିଛନ୍ତି ଯେ, ମୁଁ ସମସ୍ତ ନେତାଙ୍କୁ ଭେଟିବି । ପ୍ରଥମେ ମୋତେ କଂଗ୍ରେସ ଅଧ୍ୟକ୍ଷଙ୍କୁ ଭେଟିବାକୁ ପଡିବ । ମୁଁ ଇସ୍ତଫା ଦେଉଛି ବୋଲି କିଛି ଲୋକ ଗୁଜବ ପ୍ରଚାର କରୁଛନ୍ତି, ଏହା ନିର୍ବୋଧତା । ମୋ ପାର୍ଟି ମୋର ମା । ଆମର ସମସ୍ତ ବିଧାୟକ ମିଳିତ ଅଛନ୍ତି ।

ସିଦ୍ଧରମେୟା ଏବଂ ଶିବକୁମାର କର୍ଣ୍ଣାଟକରେ ସରକାର ଗଠନ ପାଇଁ ଦଳର ମୁଖ୍ୟ ଖଡଗେଙ୍କ ସମେତ ଅନ୍ୟ ବରିଷ୍ଠ ନେତାଙ୍କ ସହ ଆଲୋଚନା କରିବେ । ଉଭୟ ନେତା ରାହୁଲ ଗାନ୍ଧୀଙ୍କୁ ମଧ୍ୟ ଭେଟିବେ ବୋଲି ଆଶା କରାଯାଉଛି । କର୍ଣ୍ଣାଟକରେ ମୁଖ୍ୟମନ୍ତ୍ରୀ ଚୟନ ଏବଂ ସରକାର ଗଠନ ଉପରେ କଂଗ୍ରେସର ପୂର୍ବତନ ଅଧ୍ୟକ୍ଷ ସୋନିଆ ଗାନ୍ଧୀ ମଧ୍ୟ ଆଲୋଚନା କରିବାର ସମ୍ବାବନା ରହିଛି । ସୋନିଆ ଗାନ୍ଧୀ ଆଜି ଶିମଳାରୁ ଫେରୁଛନ୍ତି। ତାଙ୍କର ଫେରିବା ପରେ କର୍ଣ୍ଣାଟକର ସିଏମଙ୍କ ନାମ ଘୋଷଣା କରାଯାଇପାରେ ।
ପ୍ରଧାନମନ୍ତ୍ରୀଙ୍କ ଆଗରୁ ରାହୁଲ ଗାନ୍ଧୀ ଯିବେ ଆମେରିକା

କର୍ଣ୍ଣାଟକ ବିଧାନସଭା ନିର୍ବାଚନରେ ଜିତିବା ପରଠାରୁ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ପ୍ରଶଂସାରେ ପୋତି ଦିଆଯାଉଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ରାହୁଲ ଗାନ୍ଧୀ ମେ ୩୦ ତାରିଖରେ ଆମେରିକା ଗସ୍ତରେ ଯାଉଛନ୍ତି । ରାହୁଲ ଗାନ୍ଧୀ ଆମେରିକାରେ ୧୦ ଦିନ ଧରି ରହିବେ । କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ଏହି ଗସ୍ତ ମଧ୍ୟ ଚର୍ଚ୍ଚାରେ ରହିଛି, କାରଣ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଜୁନ୍ ୨୨ରେ ଆମେରିକା ଗସ୍ତରେ ଯାଉଛନ୍ତି । କିନ୍ତୁ ପ୍ରଧାନମନ୍ତ୍ରୀଙ୍କ ପୂର୍ବରୁ ରାହୁଲ ଗାନ୍ଧୀ ଆମେରିକା ଯିବାକୁ ଯୋଜନା କରିଛନ୍ତି । ଏହି ସମୟରେ ରାହୁଲ ଗାନ୍ଧୀ ଏକ ରାଲି ମାଧ୍ୟମରେ ନ୍ୟୁୟର୍କର ମାଡିସନ୍ ସ୍କୋୟାରରେ ୫୦୦୦ ଭାରତୀୟଙ୍କୁ ସମ୍ବୋଧିତ କରିବେ ।

ଆମେରିକା ଗସ୍ତ ସମୟରେ ରାହୁଲ ଗାନ୍ଧୀ ୱାଶିଂଟନ୍ ଏବଂ କାଲିଫର୍ଣ୍ଣିଆରେ ପ୍ୟାନେଲ୍ ଆଲୋଚନାରେ ମଧ୍ୟ ଅଂଶଗ୍ରହଣ କରିବେ । ଏହା ବ୍ୟତୀତ ସେ ଷ୍ଟାନଫୋର୍ଡ ୟୁନିଭରସିଟିରେ ବକ୍ତା ଭାବରେ ଲୋକମାନଙ୍କ ମଧ୍ୟରେ ଉପସ୍ଥିତ ରହିବେ । ରାହୁଲ ଗାନ୍ଧୀଙ୍କ ଏହି ଗସ୍ତକୁ ନେଇ ଅନେକ ଆଲୋଚନା କରାଯାଉଛି । କାରଣ ଜୁନ୍ ୨୨ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହ୍ବାଇଟ ହାଉସର ଅତିଥି ଭାବ ସେଠାରେ ଉପସ୍ଥିତ ରହିବେ । ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ ତାଙ୍କ ପତ୍ନୀ ପିଏମ ମୋଦୀଙ୍କୁ ସ୍ୱାଗତ କରିବେ । ପ୍ରଧାନମନ୍ତ୍ରୀ ମୋଦୀ ହ୍ବାଇଟ ହାଉସରେ ରାତ୍ରୀ ଭୋଜନ କରିବେ । ବୈଦେଶିକ ମନ୍ତ୍ରଣାଳୟ ଗତ ସପ୍ତାହରେ ପ୍ରଧାନମନ୍ତ୍ରୀଙ୍କ ଗସ୍ତ ସମ୍ପର୍କରେ ପ୍ରେସ ବିବୃତ୍ତି ଜାରି କରିଛି ।

କଂଗ୍ରେସ ନେତା ରାହୁଲ ଗାନ୍ଧୀ ଏହା ପୂର୍ବରୁ ଲଣ୍ଡନ ଗସ୍ତରେ ଯାଇ କେମ୍ବ୍ରିଜ ବିଶ୍ୱବିଦ୍ୟାଳୟରେ ଉଦବୋଧନ ଦେଇଥିଲେ । ଯାହାକୁ ନେଇ ଅନେକ ଆଲୋଚନା ହୋଇଥିଲା । କେମ୍ବ୍ରିଜ୍ ବିଶ୍ୱବିଦ୍ୟାଳୟରେ ଦେଇଥିବା ବିବୃତ୍ତି ପାଇଁ ବିଜେପି ରାହୁଲ ଗାନ୍ଧୀଙ୍କ ଉପରେ ବର୍ଷିଥିଲା । ଭାରତୀୟ ଜନତା ପାର୍ଟିର ବହୁ ବରିଷ୍ଠ ନେତା ରାହୁଲ ଗାନ୍ଧୀଙ୍କୁ କେମ୍ବ୍ରିଜରେ ଭାଷଣ ଦେଇ ସମାଲୋଚନା କରିଥିଲେ । କେବଳ ଏତିକି ନୁହେଁ, ସଂସଦରେ ମଧ୍ୟ ଏକ ବଡ଼ ଧରଣର ଉତ୍ତେଜନା ଦେଖାଦେଇଥିଲା ।
ଆମ୍ବର ଅଭାବୀ ବିକ୍ରି ରୋକିବାକୁ ଜିଲ୍ଲା ପ୍ରଶାସନର ପ୍ରୟାସ, ଧର୍ମକୁ ଆଖିଠାର

ଆମ୍ବ କାହାକୁ ବା ଖାଇବାକୁ ଭଲ ନଲାଗେ । ସେ ପୁଣି ଖରା ଦିନିଆ ଆମ୍ବ । ପଖାଳ କଂସା ସାଙ୍ଗକୁ ପାଚିଲା ଆମ୍ବ, ସବୁ ଓଡ଼ିଆଙ୍କ ପ୍ରିୟ ଖାଦ୍ୟ ଭାବେ ବେଶ ପରିଚିତ । ଗାଁ ଗହଳିର ଦେଶୀ ଆମ୍ବ ସହ ବିଭିନ୍ନ ପ୍ରକାରର ସୁସ୍ୱାଦୁ ଆମ୍ବ ଏବେ ସହରରେ ପହଁଚିଲାଣି । ଏହି ଗାଁ ଆମ୍ବକୁ ସହରବାସୀଙ୍କ ନିକଟରେ ପହଞ୍ଚାଇବା ପାଇଁ କେନ୍ଦୁଝର ଜିଲ୍ଲା ପ୍ରଶାସନ ଆରମ୍ଭ କରିଛି ନିଆରା ପ୍ରୟାସ । ଚାଷୀଙ୍କୁ ସ୍ଵାବଲମ୍ବୀ କରିବାକୁ ଓ ଅଭାବି ବିକ୍ରୀର ସାମାନ୍ୟ ଦୂର କରିବାକୁ ଜିଲ୍ଲା ପ୍ରଶାସନ ଆରମ୍ଭ କରିଛି ଗାଁ ଆମ୍ବ ପସରା । ଯାହା ସହରରେ ୫ ଦିନ ଧରି ଚାଲିବ । ୪ଟି ଷ୍ଟଲରେ ତେଲକୋଇ , ଘଟଗାଁ ଓ ବାଂଶପାଳ ଅଞ୍ଚଳର ସ୍ୱୟଂ ସହାୟକ ଗୋଷ୍ଠିଙ୍କ ଜରିଆରେ ଏହି ଆମ୍ବ ବିକ୍ରି ହେବ ।

ବଜାରର କେମିକାଲ ଦିଆ ଆମ୍ବ ଅପେକ୍ଷା ଗାଁ ଚାଷୀଙ୍କ ସୁସ୍ୱାଦୁ ଆମ୍ବ ସହରବାସୀ ପାଇବେ ବୋଲି ଜିଲ୍ଲା ପ୍ରଶାସନ ପକ୍ଷରୁ କୁହାଯାଇଛି । ଓରମାସ ସହଯୋଗରେ ଏହି ଗାଁ ଆମ୍ବ ପସରାକୁ ଅତିରିକ୍ତ ଜିଲ୍ଲାପାଳ ଫିତା କାଟି ଉଦଘାଟନ କରିଥିଲେ । ଏହି ଅବସରରେ ଡିଏଫଓ, ସିଇଓ ଜିଲ୍ଲା ପରିଷଦ ଙ୍କ ସହ ବହୁ ଅଧିକାରୀ ଉପସ୍ଥିତ ଥିଲେ । ଏଭଳି ଆମ୍ବ ଦେଖି ସହରବାସୀ ମଧ୍ୟ କିଣି ନେଇଥିଲେ । ଚଳିତ ବର୍ଷ ରେକର୍ଡ ପରିମାଣର ଆମ୍ବ ହୋଇଛି । ହେଲେ ଏତେ ପରିମାଣର ଆମ୍ବ ୫ ଦିନରେ ୪ଟି ଷ୍ଟଲରେ ବିକ୍ରି ଆମ୍ବ ଚାଷୀଙ୍କୁ କେତେ ଫାଇଦା ଦେବ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଥିବା ବେଳେ ଏହା ପ୍ରଶାସନର ଚାଷ ଓ ଚାଷୀଙ୍କ ପାଇଁ ଥିବା ଦରଦକୁ ପଦାରେ ପକାଇଛି ।
ଵହଳଦାରେ ଗୁଳିକାଣ୍ଡ: ଆସାମୀ ସହ ଦୁଇ ଗୁରୁତର

ମୟୂରଭଞ୍ଜ ଜିଲ୍ଲା ବହଳଦା ଥାନା ଅଧୀନରେ ଗୁଳିକାଣ୍ଡ। ୩ ଦୁର୍ବୃତ୍ତଙ୍କ ଗୁଳିମାଡରେ ଜଣେ ଗୁରୁତର ଆହତ ହୋଇ ଚିକିତ୍ସିତ ହେଉଥିବା ବେଳେ ଘର ମାଲିକ ମଧ୍ୟ ଦୁର୍ବୃତ୍ତଙ୍କ ମାଡରେ ଆହତ ହୋଇଛନ୍ତି। ସେପଟେ ଲୋକଙ୍କ ହାବୁଡରେ ଜଣେ ଦୁର୍ବୃତ୍ତ ପଡିବାରୁ ବହେ ଛେଚା ଖାଇଛି।

ବହଳଦା ଥାନା ଅଧୀନ କୁଲଗି ଛକ ନିକଟରେ ଥିବା କାର୍ତ୍ତିକ ସ୍ୱାଇଁଙ୍କ ଘରେ ସୋମବାର ରାତି ପ୍ରାୟ ୯.୪୫ ରେ ୩ ଦୁର୍ବୃତ୍ତ ପଶି ଗଣ୍ଡଗୋଳ କରିଥିଲେ। ଘର ମାଲିକ କାର୍ତ୍ତିକ ସ୍ବାଇଁଙ୍କୁ ମାଡ ମାରି ଗୁରୁତର କରିଦେଇଥିଲେ। ପାଟିତୁଣ୍ଡ ଶୁଣି ପଡୋଶୀ ଗୌରବ ଦାସ ସେଠାରେ ପହଞ୍ଚିବାରୁ ଦୁର୍ବୃତ୍ତମାନେ ଗୌରବଙ୍କ ଉପରକୁ ନାଇନ ଏମଏମ ପିସ୍ତଲରୁ ଗୁଳି ମାରିବାରୁ ଗୌରବଙ୍କ ପେଟରେ ଗୁଳି ବାଜିଥିଲା ଓ ତାଙ୍କୁ ଗୁରୁତର ଅବସ୍ଥାରେ ଟାଟା ମେମୋରିଆଲ ହସ୍ପିଟାଲରେ ଭର୍ତ୍ତି କରାଯାଇଛି। ଦୁର୍ବୃତ୍ତମାନେ ଗୁଳିକରି ଖସି ପଳାଇବାକୁ ଚେଷ୍ଟା କରିବା ବେଳେ ଜଣେ ଗ୍ରାମବାସୀଙ୍କ ହାବୁଡରେ ପଡିଯାଇଥଲେ, ଆଉ ଗ୍ରାମବାସୀ ତା ଉପରେ କରିଥିଲେ ହାତ ସଫେଇ।

ପରେ ତାକୁ ଗୁରୁତର ଅବସ୍ଥାରେ ରାଇରଙ୍ଗପୁର ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ତାର ସ୍ଥିତି ଗମ୍ଭୀର ଥିବାରୁ ସେଠାରୁ ତାକୁ ରିପଦା ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ଖବର ପାଇ ରାଇରଙ୍ଗପୁର ଏସଡିପିଓ ଗୋକୁଳାନନ୍ଦ ସାହୁ, ଵହଳଦା ଥାନାଧିକାରୀ ରଂଜନ ବେହେରା ଏବଂ ରାଇରଙ୍ଗପୁର ଟାଉନଥାନା ଆଇଆଇସି ସ୍ଫର୍ଣଲତା ମିଞ୍ଜ ଘଟଣାସ୍ଥଳରେ ପହଞ୍ଚି ଛାନଭିନ କରିବା ସହ ତଦନ୍ତ ଜାରି ରଖିଛନ୍ତି । ଆସାମୀ ପାଖରୁ ୪ ମୋଵାଇଲ, ମାଉଜର ଓ ୬ ଟି ଗୁଳି ଜବତ କରିଛି । ତଦନ୍ତ ପରେ ସତ ପଦାକୁ ଆସିବ ବୋଲି କୁହାଯାଉଛି।
ପେଟ୍ରୋଲ କେବେ ଆବିଷ୍କାର ହେଲା, ଆଉ ଏହାକୁ ଓଡିଆରେ କ’ଣ କହନ୍ତି?

ପ୍ରତ୍ୟେକ ଦିନ ଆପଣ ପେଟ୍ରୋଲ ତ ନିହାତି ବ୍ୟବହାର କରୁଥିବେ । ବାଇକ, କାର ଏବଂ ଅନ୍ୟାନ୍ୟ ଯାନବାହାନ ତଥା ମେସିନ ଆଦି ପେଟ୍ରୋଲ ବିନା ଅଚଳ ହୋଇପଡେ । ହେଲେ ଆପଣ କେବେ ଭାବିଛନ୍ତି କି ଏହି ପେଟ୍ରୋଲର ମୂଲ୍ୟ ଏତେ ଅଧିକ ହୋଇଥିବା ବେଳେ ଏହା କେଉଁଠୁ ଆସୁଛି ଆଉ କେମିତି ତିଆରି ହେଉଛି । ସବୁଠୁ ରୋଚକ କଥା ହେଉଛି, ଆମେ ସମସ୍ତେ ଜାଣିଛନ୍ତି ପେଟ୍ରୋଲ କିମ୍ବା ଡିଜେଲ ହେଉଛି ଏକ ଇଂରାଜୀ ଶବ୍ଦ । ହେଲେ କେବେ ଜାଣିବାକୁ ଚେଷ୍ଟା କରିଛନ୍ତି କି ପେଟ୍ରୋଲକୁ ହିନ୍ଦୀ କିମ୍ବା ଓଡିଆରେ କଣ କହନ୍ତି । ତେବେ ଆଜି ଆସନ୍ତୁ ସେ ବିଷୟରେ ଜାଣିବା ।

ଆପଣ ପେଟ୍ରୋଲ ପମ୍ପକୁ ପଶିଗଲେ ସେଠାରେ ହିନ୍ଦୀରେ ବି ପେଟ୍ରୋଲ ଆଉ ଇଂରାଜୀରେ ବି ପେଟ୍ରୋଲ ଲେଖା ହୋଇଥାଏ । ନିକଟରେ ସୋସାଲ ମିଡିଆରେ ଏକ ପୋଷ୍ଟ ପ୍ରବଳ ଭଇରାଲ ହୋଇଥିଲା । ଯାହାକୁ ନେଇ ଏବେ ଏହି ପ୍ରଶ୍ନ ଉଙ୍କି ମାରିଛି । ମିଡିଆ ରିପର୍ଟ ମୁତାବକ ପେଟ୍ରୋଲକୁ ହିନ୍ଦୀରରେ ଶିଲାତେଲ କିମ୍ବା ଧ୍ରୁବସ୍ବର୍ଣ୍ଣ କୁହାଯାଇଥାଏ । ଓଡିଆରେ ମଧ୍ୟ ଏହାକୁ ଅନେକ ଲୋକ ଶିଳାତେଲ ବୋଲି କହନ୍ତି । ପେଟ୍ରୋଲର ଆହୁରି କେତୋଟି ପ୍ରଚଳିତ ହିନ୍ଦୀ ନାମ ମଧ୍ୟ ରହିଛି । ସେଥିମଧ୍ୟରୁ ଇନ୍ଧନ, ତେଲ, ସଫା ହୋଇଥିବା ପେଟ୍ରୋଲିୟମ, ସଫା ହୋଇଥିବା ମାଟିର ତେଲ ଆଦି ସାମିଲ ।

ସେହିପରି ଡିଜେଲକୁ ମଧ୍ୟ ହିନ୍ଦୀରେ ଶିଲାତେଲ କିମ୍ବା ଧ୍ରୁବସ୍ବର୍ଣ୍ଣ କୁଯାଇଥାଏ । ତେବେ ଏଠାରେ ଜଣାଇ ଦେଉଛୁ, ପେଟ୍ରୋଲର ଆବିଷ୍କାର ୧୮୫୯ରେ ଏଡଓ୍ବିନ ଢ୍ରେକ୍ କରିଥିଲେ । ସେହିପରି ଡିଜେଲର ଆବିଷ୍କାର ରୂଡୋଲ୍ଫ ଡିଜେଲ କରିଥିଲେ । ରୂଡୋଲ୍ଫ ଏହାର ଆବିଷ୍କାର ୧୮୯୦ ଦଶକରେ କରିଥିଲେ । ସେହି ସମୟରୁ ପେଟ୍ରୋଲ ଆଉ ଡିଜେଲ ଦୁନିଆର ସବୁଠୁ ପ୍ରମୁଖ ଇନ୍ଧନ ମଧ୍ୟରେ ସାମିଲ । ସହିପରି ଆଉ ଏକ ରିପୋର୍ଟରେ ଦର୍ଶାଯାଇଛି ଯେ, ପେଟ୍ରୋଲ କମ୍ବା ଡିଜେଲର କୌଣସି ଆଧିକାରୀକ ହିନ୍ଦୀ ନାମ ଏପର୍ଯ୍ୟନ୍ତ ବିକଶିତ ହୋଇନାହିଁ ।
DRDO ସାବାଡ଼ କରିବ କୁଟିଳ ପାକିସ୍ତାନକୁ!

thermobaric bomb generates high temperature explosion

ଥର୍ମୋବାରିକ ବୋମାର ଭୟାବହତାକୁ ନେଇ ଚର୍ଚ୍ଚା। ଡିଆରଡିଓର ଥରମୋବାରିକ ବୋମା ପାକିସ୍ତାନରେ ଆଣିବ ପ୍ରଳୟ। କୁଟିଳ ପାକିସ୍ତାନକୁ ମାତ୍ ଦେବାକୁ ଡିଆରଡିଓ ୪୫୦ କେଜିର ଥର୍ମୋବାରିକ ବୋମା ପ୍ରସ୍ତୁତ କରିଛି। ତେବେ କଣ ଏହି ବୋମା? କଣ ଏହାର ଭୟାବହତା? ଥର୍ମୋବାରିକ ଏକ ପ୍ରକାର ସାଇଲେଣ୍ଟ ବୋମା, ଯାହା ମଣିଷର ଶ୍ୱାସ କ୍ରିୟାକୁ ପ୍ରଭାବିତ କରିଥାଏ। ମଣିଷର ଫୁସଫୁସରୁ ଅମ୍ଲଜାନକୁ ବାହାର କରି ଦିଏ। ଏହା ଏମିତି ଏକ ବିନାଶକାରୀ ହତିଆର, ଯେଉଁଥିରେ ଧୀରେ ଧୀରେ ମଣିଷ ଭିତରେ ବିଷାକ୍ତ ବାୟୁର ପ୍ରବାହ ବୃଦ୍ଧି ହୋଇ ମୃତ୍ୟୁର କାରଣ ହୋଇଥାଏ। ତେଣୁ ବୋମାର ପ୍ରୟୋଗ ଉପରେ ଜେନେଭା କନଭେନ୍ସନ ପ୍ରତିବନ୍ଧକ ଲଗାଇ ସାରିଛି। କିନ୍ତୁ ରୁଷ ଏହି ନିଷିଦ୍ଧ ହତିଆରକୁ ବ୍ୟବହାର କରିଛି ୟୁକ୍ରେନ ଉପରେ ବୋଲି ଚର୍ଚ୍ଚା ହେଇଛି ।

ଏହି ବୋମା ସମ୍ପର୍କରେ କୁହାଯାଇଛି କି, ଏହା ଲୋକଙ୍କ ଫୁସଫୁସରୁ ଅମ୍ଳଜାନ ବାହାର କରିଦେଇପାରେ। ଏହାକୁ ବାୟୁ ବୋମା ବା ଭ୍ୟାକୁମ ବୋମା ମଧ୍ୟ କୁହାଯାଇଥାଏ। ଏହାର ବିସ୍ଫୋରଣରେ ବାୟୁମଣ୍ଡଳରେ ଅକ୍ସିଜେନ ନଷ୍ଟ ହୋଇଯାଇଥାଏ ଓ ଅକ୍ସିଜେନ ଅଭାବରୁ ମୃତ୍ୟୁ ହୋଇଥାଏ। ଅନ୍ୟ ପକ୍ଷରେ କହିବାକୁ ଗଲେ ଏହି ବୋମା ମାଡ ହୋଇଥିବା ଅଞ୍ଚଳରେ ତାପମାତ୍ରାରେ ଅହେତୁକ ଭାବେ ବୃଦ୍ଧି ଘଟି ଅଞ୍ଚଳକୁ ବିଷାକ୍ତ ରାସାୟନିକ କୋଠରୀରେ ପରିଣତ କରିଦିଏ ।

ଏହି ବୋମା ସ୍ଥାନୀୟ ଅଞ୍ଚଳର ଅମ୍ଳଜାନକୁ ଇନ୍ଧନ ଭାବେ ବ୍ୟବହାର କରି ବାୟୁମଣ୍ଡଳରେ ଘଟାଇଥାଏ ଉଚ୍ଚ ତାପମାତ୍ରାର ବିସ୍ଫୋରଣ । ଥର୍ମୋବାରିକ ହତିଆର ଶ୍ରେଣୀର ସବୁଠାରୁ ଶକ୍ତିଶାଳୀ ହତିଆର ଭାବେ ବେଶ ଜଣାଶୁଣା। ଥର୍ମୋବାରିକ ହତିଆର ସମ୍ପୂର୍ଣ୍ଣ ରୂପେ ଇନ୍ଧନରେ ପ୍ରସ୍ତୁତ। ଫଳ ସ୍ୱରୂପ ଏହା ସମାନ ପରିମାଣର ପାରମ୍ପରିକ ବିସ୍ଫୋରକଠାରୁ ଅଧିକ ଶକ୍ତିଶାଳୀ। ସବୁଠାରୁ ବଡ କଥା, ଥର୍ମୋବାରିକ ହତିଆରର ବ୍ୟବହାର ପାଇଁ ଖାଲି ରକେଟ ଲଞ୍ଚରର ଆବଶ୍ୟକତା ପଡି ନ ଥାଏ। ଅନେକ ହସ୍ତଚାଳିତ ଲଞ୍ଚର ଦ୍ୱାରା ମଧ୍ୟ ବ୍ୟବହାର ହୋଇପାରେ ଓ ବିମାନରୁ ମଧ୍ୟ ଉତକ୍ଷେପଣ କରାଯାଇପରେ। ତେବେ ରଷିଆ ନିକଟରେ ଥିବା ଏହି ଶ୍ରେଣୀର ବୋମା ମଧ୍ୟରୁ ସର୍ବ ବୃହତ ବୋମା ୭ ଟନ ତରଳ ଇନ୍ଧନର ଶକ୍ତିସମ୍ପନ୍ନ, ଯାହା ବିସ୍ଫୋରଣ ହେଲେ ୩୯.୯ ଟନ ଟିଏନଟିର ବିସ୍ଫୋରଣ ସୃଷ୍ଟି କରିପାରେ।

ଏଠାରେ କହି ରଖୁଛୁ କି, ୨୦୨୨ ଫେବୃଆରୀ ୨୮ରେ ୟୁକ୍ରେନର ରାଜଦୂତ ଆମେରିକାରେ କହିଥିଲେ କି, ରୁଷ ୟୁକ୍ରେନ ଉପରେ ଭାକ୍ୟୁମ ବୋମାର ବ୍ୟବହାକର କରିଥିଲା, ଯେଉଁଥିରେ ୭୦ ସୈନିକଙ୍କ ମୃତ୍ୟୁ ହୋଇଥିଲା। ଏହାର କିଛି ଦିନ ପୂର୍ବରୁ ସିଏନଏନ ପକ୍ଷରୁ ମଧ୍ୟ କୁହାଯାଇଥିଲା କି, ରଷିଆ ୟୁକ୍ରେନର ପୂର୍ବାଞ୍ଚଳରେ ଟିଓଏସ-୧ ରକେଟ ଲଞ୍ଚରଠୁଳ କରିଛି, ଯାହା ଥର୍ମୋବାରିକ ଯୁଦ୍ଧଯାନରୁ ୩୦ ରକେଟ ଲଞ୍ଚର ଧାରଣ କରିବାର କ୍ଷମତା ରଖିଛି।

ଚର୍ଚ୍ଚା ହେଉଥିଲା କି, ୟୁକ୍ରେନ ନାଗରିକଙ୍କ ପ୍ରାଣବାୟୁ ଛଡାଇବାକୁ ଚେଷ୍ଟା କରୁଛି ରୁଷ। ଦୀର୍ଘ ଏକ ବର୍ଷରୁ ଊର୍ଦ୍ଧ୍ୱ ସମୟ ହୋଇଗଲାଣି ରୁଷ ଓ ୟୁକ୍ରେନ୍ ଯୁଦ୍ଧକୁ। କିନ୍ତୁ ଏଯାବତ୍ ରୁଷ ରାଷ୍ଟ୍ରପତି ବ୍ଲାଦିମିର ପୁତିନ ଏହି କ୍ଷୁଦ୍ର ରାଷ୍ଟ୍ର ଉପରେ ପାଇ ପାରୁ ନାହାନ୍ତି ବିଜୟ। ତେଣୁ ମୃତ୍ୟୁର ଦୂତ କୁହାଯାଉଥିବା ପ୍ରତିବନ୍ଧିତ ଥର୍ମୋବାରିକ ବୋମାକୁ ୟୁକ୍ରେନ ଉପରେ ପ୍ରୟୋଗ କରିଥିବା ୟୁକ୍ରେନ ଲଗାତର ଅଭିଯୋଗ କରି ଆସୁଛି।
ବଲାଙ୍ଗିର: ବରିଷ୍ଠ ନେତା ଅନଙ୍ଗ ଉଦୟ ସିଂହଦେଓ ଓ ତାଙ୍କ ପରିବାର ବିରୋଧରେ ନିର୍ଯାତନା ଅଭିଯୋଗ କଲେ ସାନ ବୋହୂ
୧୮ରେ ମାଟ୍ରିକ୍ ରେଜଲ୍ଟ, ୧୦ଟାରେ ଘୋଷଣା, ୧୨ଟାରେ ୱେବସାଇଟରେ ଉପଲବ୍ଧ

ଆସନ୍ତା ୧୮ ତାରିଖରେ ପ୍ରକାଶ ପାଇବ ଚଳିତବର୍ଷର ମାଟ୍ରିକ ପରୀକ୍ଷା ଫଳ । ସ୍କୁଲ ଓ ଗଣଶିକ୍ଷା ମନ୍ତ୍ରୀ ଫଳାଫଳ ଘୋଷଣା କରିବେ । ପରୀକ୍ଷା ପରିଚାଳନା କମିଟି ପରୀକ୍ଷାଫଳ ପ୍ରକାଶ ପାଇଁ ପ୍ରଥମେ ଅନୁମୋଦନ ପାଇବା ପରେ ଦିନ ୧୦ଟା ବେଳେ ରେଜଲ୍ଚ ପ୍ରକାଶ ପାଇବ ।

ଆଉ ବେଶୀ ଦିନ ଅପେକ୍ଷା କରିବାକୁ ପଡ଼ିବନି । କାରଣ ଆସନ୍ତା ୧୮ ତାରିଖରେ ମାଟ୍ରିକ ରେଜଲ୍ଟ ପ୍ରକାଶ ପାଇବ । ଦିନ ୧୦ଟାରେ ରେଜଲ୍ଟ ଆସିବା ପରେ ମଧ୍ୟାହ୍ନ ୧୨ଟା ପରଠୁ ବୋର୍ଡ ୱେବସାଇଟ www.bseodisha.ac.inରେ ଛାତ୍ରଛାତ୍ରୀମାନେ ନିଜନିଜର ପରୀକ୍ଷା ଫଳ ଜାଣିପାରିବେ । ଯେଉଁଠି ଇଣ୍ଟରନେଟର ସୁବିଧା ନାହିଁ ସେଠାରେ ପରୀକ୍ଷାର୍ଥୀମାନେ ମଧ୍ୟ ମୋବାଇଲରେ ରେଜଲ୍ଟ ଜାଣିପାରିବେ । ନିଜର ମୋବାଇଲରୁ OR10 ଏବଂ ନିଜ ରୋଲ୍ ନମ୍ବରକୁ ଟାଇପ୍ କରି 5676750କୁ ମେସେଜ୍ ପଠାଇଲେ ଫଳାଫଳ ଜାଣିହେବ ବୋଲି ପ୍ରେସମିଟରେ ବୋର୍ଡ ପକ୍ଷରୁ ସୂଚନା ଦିଆଯାଇଛି ।

ଚଳିତବର୍ଷ ରାଜ୍ୟରେ ୩ହଜାର ୨୯ଟି ପରୀକ୍ଷା କେନ୍ଦ୍ରରେ ୫ ଲକ୍ଷ ୩୨ ହଜାର ୭୧୨ ଜଣ ପରୀକ୍ଷାର୍ଥୀ ମାଟ୍ରିକ ପରୀକ୍ଷା ଦେଇଥିଲେ । ୨ ହଜାର ୯୧୪ ଜଣ ମଧ୍ୟମା ଏବଂ ୭ହଜାର ୧୮୧ ଜଣ ଓପନ ସ୍କୁଲ ପରୀକ୍ଷାର୍ଥୀ ଏହି ପରୀକ୍ଷା ଦେଇଥିଲେ । ଏଥିପାଇଁ ରାଜ୍ୟରେ ୩୧୬ଟି ନୋଡାଲ ସେଣ୍ଟର କରାଯାଇଥିଲା । ଆୟୋଜିତ ସାମ୍ବାଦିକ ସମ୍ମିଳନୀରେ ମାଧ୍ୟମିକ ଶିକ୍ଷା ପରିଷଦ ବୋର୍ଡ ସଭାପତି ରାମଶିଷ ହାଜରା,ଉପସଭାପତି ଡକ୍ଟର ନିହାର ରଞ୍ଜନ ମହାନ୍ତି ଏବଂ ସମ୍ପାଦକ ସୁମିତ୍ରା ସରକାର ଉପସ୍ଥିତ ଥିଲେ ।

ପୂର୍ବରୁ ମାଟ୍ରିକ୍ ରେଜଲ୍ଟ କେବେ ପ୍ରକାଶ ହେବ ସେ ନେଇ ଛାତ୍ରଛାତ୍ରୀ ଟିକେ ଟେନସନରେ ଥିଲେ । ଏବେ ତାରିଖ ଘୋଷଣା ପରେ ସମସ୍ତଙ୍କ ମନରେ ଉତ୍ସାହ ଭରିଦେଇଛି କାରଣ ରେଜଲ୍ଟ ପ୍ରକାଶନରେ ଆଉ ବିଳମ୍ବ ହେବ ନାହିଁ । ଖୁବଶୀଘ୍ର ସେମାନେ ନିଜ ନିଜ ପରୀକ୍ଷାଫଳ ପାଇପାରିବେ । ଚଳିତଥର ତ୍ରୁଟିଶୂନ୍ୟ ମୂଲ୍ୟାୟନ ପାଇଁ ବୋର୍ଡ ପକ୍ଷରୁ ବ୍ୟାପକ ବ୍ୟବସ୍ଥା ହୋଇଥିଲା । ଏଥର ଯେପରି କୌଣସି ଅଭିଯୋଗ ନ ଆସେ କି କିଛି ବିଭ୍ରାଟ ନଘଟେ ସେଥିପ୍ରତି ବିଶେଷ ଧ୍ୟାନ ଦେଇଛି ମାଧ୍ୟମିକ ଶିକ୍ଷା ପରିଷଦ ।