ଚମ୍ପୁଆ ଉପଖଣ୍ଡ ସ୍ତରୀୟ କୃଷି ଯନ୍ତ୍ରପାତି ମେଳା ଉଦଘାଟିତ

ଚମ୍ପୁଆ ବ୍ଲକ କାର୍ଯ୍ୟଳୟ ପରିସରରେ କୃଷି ବିଭାଗ ତରଫରୁ ଏକ ଉପଖଣ୍ଡ ସ୍ତରୀୟ କୃଷି ଯନ୍ତ୍ର ପାତି ମେଳା ଉଦଘାଟିତ ହୋଇ ଯାଇଛି। ଏହି ମେଳାକୁ ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ତଥା ପାଟଣା ବିଧାୟକ ଜଗନ୍ନାଥ ନାୟକ ଆନୁଷ୍ଠାନିକ ଭାବେ ଉଦଘାଟନ କରିଥିଲେ। ଏଥିରେ ସମ୍ମାନିତ ଅତିଥି ଭାବେ ଚମ୍ପୁଆ ବିଧାୟିକା ମିନାକ୍ଷୀ ମହାନ୍ତ, କେନ୍ଦୁଝର ସଦର ବିଧାୟକ ମୋହନ ମାଝୀ, କେନ୍ଦୁଝର ଜିଲ୍ଲା ମୁଖ୍ୟ କୃଷି ଅଧିକାରୀ ମିହିର ସାହୁ ତଥା କୃଷି ବିଭାଗର ବହୁ ଅଧିକାରୀ ଯୋଗଦେଇଥିଲେ। ଏଥିସହ କାର୍ଯ୍ୟକ୍ରମରେ ସଫଳ ମାଣ୍ଡିଆ ଚାଷୀ ସୁବାସ ମହାନ୍ତଙ୍କୁ ଉପଢୌକନ ଓ ପୁଷ୍ପ ମାଲ୍ୟ ଦେଇ ସ୍ବାଗତ କରାଯାଇଥିଲା। ଚାଷୀଙ୍କୁ ଉନ୍ନତ ମାନର ଏବଂ ରିହାତି ଦରରେ କୃଷି ଯନ୍ତ୍ର ପାତି ଯୋଗାଇ ଦେବା ଲକ୍ଷରେ ଏହି ମେଳା ର ଆୟୋଜନ କରାଯାଇଛି । ସମଗ୍ର କେନ୍ଦୁଝର ଜିଲ୍ଲା ରୁ କୃଷି ଯନ୍ତ୍ରପାତି ଡିଲର ମାନେ ଏଥିରେ ଅଂଶ ଗ୍ରହଣ କରି ଚାଷୀଙ୍କୁ ସରକାରଙ୍କ ତରଫରୁ ସେମାନଙ୍କୁ ଯୋଗାଇ ଦିଆଯାଉଥିବା ରିହାତି ବିଷୟରେ ଅବଗତ କରିବା ସହିତ କୃଷି ଯନ୍ତ୍ର ପାତିର ବ୍ୟବହାର ସଂପର୍କରେ ବୁଝାଇ ଥିଲେ। ଏହି ମେଳାରେ ଓଡ଼ିଶା କୃଷି ଶିଳ୍ପ ନିଗମ, ଖେତୱାର୍କ ର ସୌର ଚାଳିତ ଜଳ ସେଚନ ଯନ୍ତ୍ରପାତି, ଉତ୍କଳ ସେଲ୍ସ, କୃଷକ ସେବା କେନ୍ଦ୍ର , ଓମ ଏଣ୍ଟରପ୍ରାଇସେସ, ଓପିକଲ, ଓଡ଼ିଶା ମିଲେଟ ମିଶନ ଇତ୍ୟାଦି ମୋଟ ୪୬ ଟି ଷ୍ଟଲ ଖୋଲା ଯାଇ ଚାଷୀଙ୍କୁ ବିଭିନ୍ନ କୃଷି ସମ୍ବନ୍ଧୀୟ ପରାମର୍ଶ ଦିଆଯାଇଥିଲା ।ଏହି କୃଷି ଯନ୍ତ୍ରପାତି ମେଳା ୩ ଦିନ ଧରି ଚାଲିବ।