ଆଜି ନୀତି ଆୟୋଗ ବୈଠକ । ନୂଆଦିଲ୍ଲୀରେ ବସିବ ନୀତି ଆୟୋଗର ଗଭର୍ଣ୍ଣିଂ କାଉନସିଲ ବୈଠକ । ଆଜି ଅନୁଷ୍ଠିତ ଏହି ବୈଠକରେ ନିଜର ହକ୍ ମାଗିବ ଓଡ଼ିଶା ।
ଓଡ଼ିଶାର ବିକାଶ ପାଇଁ ନୀତି ଆୟୋଗ ବୈଠକରେ ଦାବି ଉଠାଇବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଜ୍ୟ ବିକାଶରେ ଏକ ପ୍ରକାର ବାଧକ ସାଜିଛି କେନ୍ଦ୍ର । କେନ୍ଦ୍ର ବିଜେପି ସରକାରଙ୍କ ଅସହଯୋଗ ଯୋଗୁଁ ରାଜ୍ୟ ବିକାଶ ଆଡ଼କୁ ଯାଇପାରୁନାହିଁ । ଏଯାଏ ପୂରଣ ହେଉନାହିଁ ସ୍ବତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦାବି । ରାଜ୍ୟକୁ ସ୍ବତନ୍ତ୍ର ଆର୍ଥିକ ସହାୟତା ପ୍ୟାକେଜ ବି ମିଳୁନି । ବ୍ୟାଙ୍କିଙ୍ଗ, ରେଳବାଇ, ଶିକ୍ଷା କ୍ଷେତ୍ରରେ ଓଡ଼ିଶାକୁ ବିଶେଷ ଦୃଷ୍ଟି ଦେଉନାହାଁନ୍ତି କେନ୍ଦ୍ର ସରକାର । ପ୍ରତିବର୍ଷ ଓଡ଼ିଶା ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛି ।
ବନ୍ୟା,ବାତ୍ୟା,ମରୁଡ଼ି ପରି ପ୍ରାକୃତିକ ବିପର୍ଯ୍ୟୟ ଯୋଗୁଁ ରାଜ୍ୟର ଆର୍ଥିକ ସ୍ଥିତି ଭୁଷୁଡ଼ିପଡ଼ିଛି । ତଥାପି କେନ୍ଦ୍ର ସହାୟତା ପ୍ରଦାନ ଦିଗରେ ଅବହେଳା କରୁଥିବା ଅଭିଯୋଗ ହୋଇଛି । କେନ୍ଦ୍ର ବିଜେପି ସରକାର ଲଗାତାର ୨ ଥର ଶାସନରେ ବସିଛି । କିନ୍ତୁ ରାଜ୍ୟର ହକ୍ ପ୍ରଦାନ କ୍ଷେତ୍ରରେ ଅବହେଳା କରୁଛି । ଓଡ଼ିଶାର ଏହି ହକକୁ ଅଣଦେଖା କରି ଚାଲିଛି । ରାଜ୍ୟବାସୀଙ୍କ ଏସବୁ ଦାବି ନୀତି ଆୟୋଗ ବୈଠକରେ ଉଠାଇବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଜି ବୈଠକରେ ଯୋଗଦେଇ ମୁଖ୍ୟମନ୍ତ୍ରୀ ଏସବୁ ଉଠାଇବେ ।
