ପୋଡିଗଲା ସୁନାର ଫସଲ, ସରକାରୀ ସାହାଯ୍ୟ ଅପେକ୍ଷାରେ ୩ ଚାଷୀ ପରିବାର

ଭଦ୍ରକ ବାସୁଦେବ ପୁର ବ୍ଲକ ଅନ୍ତର୍ଗତ ରାଜଘର ପୋଖରୀ ଗ୍ରାମ ପଂଚାୟତରେ ଭୟଙ୍କର ଅଗ୍ନିକାଣ୍ଡ। ନିଆଁରେ ତିନି ପରିବାରର ବର୍ଷକର କଷ୍ଟଲବ୍ଧ ଧାନ ପୋଡି ନଷ୍ଟ ହୋଇଯାଇଥିବା ବେଳେ ନିଆଁ ଲାଗିବାର କାରଣ ଏବେ ବି ଅସ୍ପଷ୍ଟ ରହିଛି। ସୂଚନା ମୁତାବକ, ରାଜଘର ପୋଖରୀ ପଞ୍ଚାୟତ ପାଟଣା ସାହିର ୱାର୍ଡ ନମ୍ବର ୬ରେ ଥିବା ଏକ ଧାନ ଖଳାରେ କୌଣିସି କାରଣରୁ ନିଆଁ ଲାଗିଯାଇଥିଲା। ନିଆଁ ସଙ୍ଗେ ସଙ୍ଗେ ୩ଟି ଗଦାକୁ ମାଡି ଯାଇଥିଲା। ନିଆଁ ଲାଗିବା ଦେଖି ସ୍ଥାନୀୟ ଲୋକେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିବା ସହ ଅଗ୍ନିଶମ ବାହିନୀକୁ ସୂଚନା ଦେଇଥିଲେ। ଅଗ୍ନିଶମବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କଲା ସତ ହେଲେ ଏହି ନିଆଁରେ ଜଳିପୋଡି ପାଉଁଶ ହୋଇଗଲା ପାଖାପାଖି ସାଡେ ପାଞ୍ଚ ଏକର ଜମିର ଧାନ । ଆଉ ଦିନ କେଇଟା ଭିତରେ ଅମଳ ହୋଇଥାନ୍ତା ବସ୍ତା ବସ୍ତା ଧାନ, ଆଉ ପୂର୍ଣ୍ଣ ହୋଇଥାନ୍ତା ଚାଷୀର ଭଣ୍ଡାର ଘର। ହେଲେ ସବୁ କିଛି ବିଗିଡି ଗଲା।ତେବେ ନି କ୍ଷତିଗ୍ରସ୍ତ ଚାଷୀମାନଙ୍କ ଭିତରେ ଅଛନ୍ତି ରତିକାନ୍ତ ମହାନ୍ତି,ତ୍ରିଲୋଚନ ମହାନ୍ତି , ବସନ୍ତ କୁମାର ମହାନ୍ତି । ଏବେ କେବଳ ମୁଣ୍ଡରେ ହାତ ଦେଇ, ଭାଗ୍ୟକୁ ଦୋଷ ଦେବା ବ୍ୟତୀତ ଚାଷୀ ପାଖରେ ଅନ୍ୟ କିଛି ଉପାୟ ନାହିଁ। ୩ ପରିବାର ଏହି ଧାନରୁ ବର୍ଷକର ଆହାର ଜୋଗାଡିବା ସହ ସେମାନଙ୍କ ବର୍ଷକର ଯାନି ଯାତ୍ରା ଓ ଯାବତୀୟ ଖର୍ଚ୍ଚ ତୁଲାଇ ଥାନ୍ତେ। ଏବେ ସେମାନେ କଣ କରିବେ, କେମିତି ପରିବାର ମୁହଁରେ ଦାନା ଦେବେ ତାକୁ ନେଇ ଚିନ୍ତାରେ। ସରକାରୀ ସାହାଯ୍ୟ ସମୁଦ୍ରକୁ ସଙ୍ଖେ ହୋଇଥିବା ବେଳେ ଏହି ସାହାଯ୍ୟ ତୁରନ୍ତ ଯୋଗାଇ ଦେଲେ ଚାଷୀଙ୍କ ଦୁଃଖ କିଛି ପରିମାଣରେ ଲାଘବ ହୁଅନ୍ତା ବୋଲି ସର୍ବ ସାଧାରଣରେ ଚର୍ଚ୍ଚା ହେଉଛି।