ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରକୁ ପୁଣି ଫିଙ୍ଗିଲେ ମୋବାଇଲ । ରବିବାର ଦିନ କର୍ଣ୍ଣାଟକାର ମହୀଶୂରରେ ଏକ ନିର୍ବାଚନ ରାଲି ଚାଲିଥିବା ବେଳେ ଏପରି ଘଟଣା ଘଟିଛି । ଜଣେ ମହିଳା ପ୍ରଧାନମନ୍ତ୍ରୀ ରାଲି କରୁଥିବା ସମୟରେ ତାଙ୍କ ଗାଡି ଉପରକୁ ମୋବାଇଲ ଫିଙ୍ଗି ଦେଇଥିଲେ । ତେବେ ମୋବାଇଲଟି ପ୍ରଧାନମନ୍ତ୍ରୀଙ୍କ ଅତି ନିକଟରେ ପଡିଥିବା ବେଳେ ଜଣେ ମହିଳା ଅତି ଉତ୍ସାହିତ ହୋଇ ମୋବାଇଲଟି ଫିଙ୍ଗିଦେଇଥିବା କର୍ଣ୍ଣାଟକା ପୋଲିସ କହିଛି ।
କର୍ଣ୍ଣାଟକାର ଅତିରିକ୍ତ ପୋଲିସ ମହାନିର୍ଦ୍ଦେଶକ (ଆଇନ ଶୃଙ୍ଖଳା) କହିଛନ୍ତି, ପ୍ରଧାନମନ୍ତ୍ରୀ ରାଲି ସମୟରେ ଏସ୍ପିଜିର ସୁରକ୍ଷା ବଳୟ ମଧ୍ୟରେ ଥିଲେ। ମୋବାଇଲ ଫିଙ୍ଗିଥିବା ମହିଳା ଜଣକ ହେଉଛନ୍ତି ଜଣେ ବିଜେପି କର୍ମୀ ହୋଇଥିବା ବେଳେ ତାଙ୍କର କୌଣସି ମନ୍ଦ ଉଦ୍ଦେଶ୍ୟ ନଥିଲା । ମୋବାଇଲଟି ପଡିବା କ୍ଷଣି ତାକୁ ତୁରନ୍ତ କାବୁ କରାଯାଇଥିଲା । ଏହାପରେ ସେହି ମହିଳାଙ୍କୁ ତାଙ୍କ ମୋବାଇଲ ଫେରାଇ ଦିଆଯାଇଥିଲା । ତଥାପି ମହିଳାଙ୍କୁ ସମନ ଜାରି କରାଯାଇଛି । ସେ ମଙ୍ଗଳବାର ଦିନ ଥାନାରେ ପହଞ୍ଚିବା ପରେ ତାଙ୍କ ବୟାନ ରେକର୍ଡ କରାଯିବ ବୋଲି କହିଛନ୍ତି ଅତିରିକ୍ତ ପୋଲିସ ମହାନିର୍ଦ୍ଦେଶକ ।
