Author: suchanatv24x7

ଚାର୍ଲ୍ସ ୩ ହେଲେ ବ୍ରିଟେନର ୪୦ତମ ରାଜା

ବ୍ରିଟେନ ପାଇଲା ତାର ନୂଆ ରାଜା। ଚାର୍ଲ୍ସ ୩ଙ୍କର ଆଜି ହୋଇଛି ରାଜ୍ୟାଭିଷେକ। ୧୯୫୩ ପରେ, ୭୦ ବର୍ଷର ବ୍ୟବଧାନରେ ସଂଯୁକ୍ତ ରାଷ୍ଟ୍ରରେ ହେଉଛି ରାଜ୍ୟାଭିଷେକ। ଚାର୍ଲ୍ସଙ୍କ ମା’ କୁଇନ ଏଲିଜାବେଥ୨ଙ୍କ ଗତ ସେପ୍ଟେମ୍ୱରରେ ମୃତ୍ୟୁ ପରଠାରୁ ରାଜ ଗାଦି ଖାଲି ପଡିଥିଲା। ଶନିବାର ଦିନ ଚାର୍ଲ୍ସ ରାଜଗାଦି ଅଳଙ୍କୃତ କରିବା ସହ ହୋଇଛନ୍ତି ୪୦ତମ ସମ୍ରାଟ। ଏହି ଅବସରରେ ବିଶ୍ୱର ବିଭିନ୍ନ ରାଷ୍ଟ୍ରର ବହୁ ବରିଷ୍ଠ ବ୍ୟକ୍ତି ବିଶେଷ ଭାଗ ନେଇଛନ୍ତି।

ରାଜ୍ୟାଭିଷେକ ପାଇଁ କିଙ୍ଗ ଚାର୍ଲ୍ସ ଓ ତାଙ୍କ ପତ୍ନୀ କାମିଲା ଡାଇମଣ୍ଡ ଜୁବଲି ଷ୍ଟେଟ କୋଚରେ ଥିବା ୱେଷ୍ଟମିନିଷ୍ଟର ଆବେରେ ପହଞ୍ଚିଥିଲେ। ଉଭୟ ୬ଟି ଧୁଷର ଘୋଡା ଟାଣିଥିବା ଗାଡିରେ ସବାର ହୋଇ ସୁରକ୍ଷା କର୍ମୀ ଓ ଅଶ୍ବାରୋହୀଙ୍କ ସୁରକ୍ଷା ବଳୟରେ ସେଠାକୁ ଅଣାଯାଇଥିଲା। ବ୍ରେଟେନର ପରମ୍ପରା ଓ ସଂସ୍କୃତି ମୁତାବକ ରାଜ୍ୟାଭିଷେକ କରାଯାଇଛି।

ବ୍ରିଟେନର ରାଜ୍ୟାଭିଷେକ ଇତିହାସରେ ଚାର୍ଲ୍ସ ହେଉଛନ୍ତି କିଙ୍ଗ ଚାର୍ଲ୍ସ ୧୪ଦଶ ଶତାବ୍ଦୀର ଆବେରେ ସ୍ଥାପିତ ସିଂହାସନରେ ୩୬୦ ବର୍ଷ ପୁରୁଣା ମୁକୁଟ ପରିଧାନ କରିଥିବା ସବୁଠାରୁ ବୟସ୍କ ସମ୍ରାଟ ହୋଇଛନ୍ତି। ଏହି ବର୍ଣ୍ଣାଢ୍ୟ କାର୍ଯ୍ୟକ୍ରମରେ ୨୦୦୦ ଅତିଥିଙ୍କ ଆଗମନ ହୋଇଛି। ହେଲେ ୧୯୫୩ରେ ମହାରାଣୀ ଏଲିଜାବେଥ ଦ୍ୱିତୀୟଙ୍କ ରାଜ୍ୟାଭିଷେକ ବେଳେ ୮୦୦୦ ଅତିଥିଙ୍କ ଆଗମନ ହୋଇଥିଲା। ଚାର୍ଲ୍ସଙ୍କ ପତ୍ନୀ କାମିଲା ମଧ୍ୟ ମୁକୁଟ ଧାରଣ କରିବେ, ହେଲେ ଏଥିଲାଗି ଏକ ପୃଥକ ସମାନ କିନ୍ତୁ ସାଧାରଣ ସମାରୋହର ଆୟୋଜନ ହେବ।

ଆଜିର ଏହି ଭବ୍ୟ ସମାରୋହରେ ବ୍ରିଟେନ ରାଜପରିବାରରେ ପ୍ରଚଳିତ ସମସ୍ତ ନିତି ନିୟମର ପାଳନ ହୋଇଛି। ସମ୍ରାଟ ଚାର୍ଲ୍ସ ୩ଙ୍କ ହାତରେ ରାଜ୍ୟାଭିଷେକ କାଳରେ ସାମୂହିକ ବାଇବେଲ ପାଠ ସମୟରେ ଥିଲା ରାଜ ଦଣ୍ଡ ଓ ଖଣ୍ଡା। ରାଜଦଣ୍ଡ ସୁନାରେ ଛାଉଣି ହୋଇଥିବା ବେଳେ ଖଣ୍ଡାରେ ଜଡାଯାଇଛି ବିଶ୍ୱର ସବୁଠାରୁ ବଡ ରଙ୍ଗହୀନ ହୀରା। ତେବେ ଆଜିର ସମାରୋହ ତୁଳନାରେ ଏଲିଜାବେଥ୨ଙ୍କ ରାଜ୍ୟାଭିଷେକ ଅଧିକ ବଡଧରଣର ଥିଲା।

ଆଜିର ସମାରୋହରେ ବିଭିନ୍ନ ରାଷ୍ଟ୍ରରୁ ବହୁ ରାଜନେତା, ବିଶିଷ୍ଠ ବ୍ୟକ୍ତିଙ୍କ ଆଗମନ ହୋଇଛି। କାର୍ଯ୍ୟକ୍ରମରେ ବ୍ରିଟେନ ସରକାରରେ ସର୍ବୋଚ୍ଚ ସ୍ଥାନ ଅଧିକାର କରିଥିବା ହିନ୍ଦୁ ପ୍ରଧାନମନ୍ତ୍ରୀ ଋଷି ସୁନକ ବାଇବେଲ ପାଠ କରିବା ସହ ବ୍ରିଟେନର ଉଚ୍ଚ ପରମ୍ପରା ଓ ସଂସ୍କୃତିର ବର୍ଣ୍ଣନା କରିଛନ୍ତି। ତେବେ ଏହି କାର୍ଯ୍ୟକ୍ରମକୁ ରାଜ ଦମ୍ପତିଙ୍କ ଦୁଇ ପୁଅ ରାଜକୁମାର ହେରୀ ଓ ଆଣ୍ଡ୍ରେଉସାମିଲ ହୋଇଥିଲେ ମଧ୍ୟ ସେମାନଙ୍କର କାର୍ଯ୍ୟକ୍ରମରେ କୌଣସି ଭୂମିକା ନଥିଲା। ଉଭୟ ମଧ୍ୟ ଚାର୍ଲ୍ସଙ୍କ ପ୍ରସେସନରୁ ଅଲଗା ରଖା ଯାଇଥିଲା। ଏହା ବ୍ରିଟେନର ପରମ୍ପରା।

ରାଜ୍ୟାଭିଷେକ ପରେ ରାଜ ଦମ୍ପତିଙ୍କୁ ସେଠାରେ ଉପସ୍ଥିତ ଅତିଥିଗଣ ଅଭିନନ୍ଦନ ଜଣାଇଛନ୍ତି। ସମସ୍ତ କାର୍ଯ୍ୟକ୍ରମ ପରେ ରାଜ ଦମ୍ପତି ଗୋଲ୍ଡ ଷ୍ଟେଟ କୋଚସ୍ଥିତ ବେକିଂ ହାମ ପାଲେସକୁ ଫେରିଯିବେ। ଏହା ପରେ ସେ ରାଜ ପରିବାରର ସମସ୍ତ ସଦସ୍ୟଙ୍କ ସହ ଦେଶର କମନ ହେଲ୍ଥର ସଦସ୍ୟ ଓ ୪୦୦୦ ବ୍ରିଟିଶ ନାଗରିକଙ୍କ ସହ ରେଗାଲିଆରେ ଉପସ୍ଥିତ ହେବେ। ପୁଣି ବେକିଂ ହାମ ପାଲେସ ଫେରିଯାଇ ରାଜ ଭବନର ବାଲକୋନୀରୁ ସର୍ବସାଧାରଣ ଦର୍ଶନ ଦେବେ। ସେଠାରେ ତାଙ୍କୁ ସେନା ପକ୍ଷରୁ ଫ୍ଲାଇ ପାଷ୍ଟ ସହ ସମ୍ୱର୍ଦ୍ଧନା ଦିଆଯିବ। ଏହି ରାଜ୍ୟାଭିଷେକ କାର୍ଯ୍ୟକ୍ରମ ୩ ଦିନ ବ୍ୟାପୀ ଚାଲିବ।
କଟକ : ଯୋବ୍ରା ବ୍ୟାରେଜ ଗେଟରୁ ଯୁବକଙ୍କ ମୃତଦେହ ଠାବ

କଟକ ଯୋବ୍ରା ବ୍ୟାରେଜ୍ ଗେଟରୁ ମୃତଦେହ ଠାବ । ଜଣେ ଯୁବକଙ୍କ ମୃତଦେହ ଭାସିଭାସି ଗେଟରେ ଲାଗିଥିଲା । ମୃତଦେହ ଦେଖିବା ପରେ ପୋଲିସ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ ସ୍ଥାନୀୟ ଲୋକେ । ଘଟଣାସ୍ଥଳରେ ଅଗ୍ନିଶମ ବିଭାଗ ପହଞ୍ଚି ମୃତଦେହ ଉଦ୍ଧାର କରିଛି । ମୃତ ଯୁବକଙ୍କ କୌଣସି ପରିଚୟ ମିଳିପାରି ନାହିଁ ।

ସୂଚନା ଅନୁସାରେ ମୃତ ଯୁବକଙ୍କ ବୟସ ୨୫ରୁ ୩୦ ବର୍ଷ ହେବ । ଘଟଣାକୁ ନେଇ ଜଗତପୁର ଥାନା ପୋଲିସ ତଦନ୍ତ ଆରମ୍ଭ କରିଛି । ମୃତ ଶରୀରକୁ ବ୍ୟବଚ୍ଛେଦ ପାଇଁ କଟକ ଏସସିବି ପଠାଯାଇଛି । କାରଣ କଣ ସେ ନେଇ କୌଣସି ସ୍ପଷ୍ଟ ସୂଚନା ନାହିଁ । କିଏ ହତ୍ୟା କରିଛି ନା ନିଜେ ଆତ୍ମହତ୍ୟା କରିଛନ୍ତି ସେଇ ନେଇ ଖୋଳତାଡ଼ ଜାରି ରଖିଛି ପୋଲିସ । ସମସ୍ତଙ୍କ ଉପସ୍ଥିତିରେ ମୃତଦେହ ଉଦ୍ଧାର କରାଯାଇଥିଲା । ଏହା ପ୍ରଥମ ଘଟଣା ନୁହେଁ, ଅନେକ ଥର ଏଭଳି ଅଘଟଣ ଘଟିଲାଣି । ତେବେ, ଲୋକଙ୍କ ସୁରକ୍ଷା ଦିଗରେ ସମସ୍ତେ ଯତ୍ନବାନ ହେବାର ଆବଶ୍ୟକତା ରହିଛି ।
ଧରଣୀଧର ଜୟନ୍ତୀରେ ଉପେକ୍ଷା ପ୍ରତିବାଦରେ ଇସ୍ତଫା ଦେଲେ ସରପଞ୍ଚ

() ବିପ୍ଳବୀ ଧରଣୀଧରଙ୍କ ଜୟନ୍ତୀରେ ସ୍ଥାନୀୟ ଜନପ୍ରତିନିଧିଙ୍କୁ ଅଣଦେଖା ଅଭିଯୋଗ। ସଂଗ୍ରାମୀଙ୍କ ଜନ୍ମସ୍ଥାନ ସଦରବ୍ଲକ ବରଦାପାଳ ପଞ୍ଚାୟତ କସୁମିତା ଗ୍ରାମଠାରେ ଧରଣୀଧରଙ୍କ ଜୟନ୍ତୀ ପାଇଁ ଜିଲା ପ୍ରଶାସନ ପକ୍ଷରୁ ଆୟୋଜିତ ହୋଇଥିଲା ଏକ ସମାରୋହ। ଏହି କାର୍ଯ୍ୟକ୍ରମକୁ ନିର୍ବାଚିତ ଲୋକପ୍ରତିନିଧି ଓ ପ୍ରଶାସନିକ ଅଧିକାରୀଙ୍କୁ ନିମନ୍ତ୍ରଣ କରାଯାଇଥିଲା, କିନ୍ତୁ ସ୍ଥାନୀୟ ବରଦାପାଳ ସରପଞ୍ଚ ଗଣେଶଚନ୍ଦ୍ର ମୁଣ୍ଡାଙ୍କୁ ସାମାନ୍ୟ ସୂଚନା ମଧ୍ୟ ଦିଆଯାଇନଥିଲା ।

ଏକ ଜିଲାସ୍ତରୀୟ ସମାରୋହରେ ନିଜର ଉପେକ୍ଷାକୁ ବିରୋଧ କରି ସରପଞ୍ଚ ମୁଣ୍ଡା ନିଜ ଇସ୍ତଫା ପତ୍ର ସଦର ବିଡିଓଙ୍କୁ ପଠାଇ ଦେଇଛନ୍ତି । ଇସ୍ତଫାକୁ ନେଇ ମୁଣ୍ଡା କହିଛନ୍ତି କି, ସେ ଜଣେ ଆଦିବାସୀ ହୋଇଥିବାରୁ ତାଙ୍କୁ ଜଣାଯାଇନଥିଲା। ଏମିତି କି, ପଞ୍ଚାୟତର ନାମ କୌଣସି ସ୍ଥାନରେ ଉଲ୍ଲେଖ କରାଯାଇ ନ ଥିଲା। ଯାହା ମୋତେ ବ୍ୟଥିତ କରିଛି। ଏହାକୁ ଦେଖି ମନେ ହେଉଛି ସରପଞ୍ଚ ପଦରେ ରହିବାକୁ ମୁଁ ଯୋଗ୍ୟ ନୁହେଁ ।

ତେବେ ପ୍ରଶାସନିକ କାର୍ଯ୍ୟକ୍ରମରେ ଜଣେ ସ୍ଥାନୀୟ ସରପଞ୍ଚଙ୍କୁ ଉଦ୍ଦେଶ୍ୟମୂଳକ ଭାବେ ଉପେକ୍ଷା କରାଯାଇଛି ନା , ଆଦିବାସୀ ନେତା ବୋଲି ଅବହେଳା କରାଯାଇଛି ତାକୁ ନେଇ ଚର୍ଚ୍ଚା ଜୋର ଧରିଛି। ସେପଟେ ଏହି ଘଟଣାକୁ ନେଇ ବୁଦ୍ଧିଜୀବୀ ମହଲରେ ଉଦ୍‌ବେଗ ପ୍ରକାଶ ପାଇଛି। ଏନେଇ ସଦର ବିଡ଼ିଓ ବିକାଶ ଚନ୍ଦ୍ର ସାହୁଙ୍କୁ ପଚାରିବାରୁ ସେ କ୍ୟାମେରା ଆଗରେ କିଛି କହିବାକୁ ମନା କରିଛନ୍ତି । ଏଭଳି ସ୍ଥିତିରେ ଶ୍ରୀମୁଣ୍ଡାଙ୍କ ଇସ୍ତଫାପତ୍ରକୁ ପ୍ରଶାସନ ଗ୍ରହଣ କରୁଛି ନାଁ ତାଙ୍କୁ ବୁଝାଶୁଝା ପାଇଁ ଉଦ୍ୟମ କରୁଛି ତାହା ଦେଖିବାକୁ ବାକି ରହିଲା ।
ଫର୍ଚ୍ୟୁନ୍‌ ଇଣ୍ଡିଆ ମାଗାଜିନ୍‌ରେ ୪ ଓଡିଆ ଉଦ୍ୟୋଗୀ

ଓଡିଆ ଯୁବକଙ୍କ ସଫଳତା। ସମ୍ମାନଜନକ ଫରଚ୍ୟୁନ୍‌ ଇଣ୍ଡିଆ ମାଗାଜିନ୍‌ରେ ନିଜ ନାମ ସାମିଲ କରି ରାଜ୍ୟର କୋଟି କୋଟି ଯୁବକଙ୍କ ପାଇଁ ଉଦାହରଣ ପାଲଟିଛନ୍ତି ଓଡିଶାର ୪ ଉଦ୍ୟୋଗୀ । ମାଗାଜିନର ‘୪୦ ଅଣ୍ଡର ୪୦’ ସେଗ୍‌ମେଣ୍ଟରେ ଅଲିଭ ରିଡ୍‌ଲେ ମିଡିଆର ଫାଉଣ୍ଡର ସମର ପ୍ରତାପ ନାୟକ ସାମିଲ ହୋଇଛନ୍ତି, ଯିଏ ହେଉଛନ୍ତି ସର୍ବ କନିଷ୍ଠ ଉଦ୍ୟୋଗୀ।

IIM ଅହମ୍ମଦାବାଦରେ ମ୍ୟାନେଜମେଣ୍ଟ ପାଠ ପଢ଼ିଛନ୍ତି ସମର। ପାଠ ପଢ଼ା ସରିବା ପରେ ଚାକିରି ପଛରେ ନ ଧାଇଁ ବେଙ୍ଗାଲୁରରେ ବ୍ୟବସାୟ ଆରମ୍ଭ କରିଥିଲେ ସମର। ରାଜ୍ୟରେ କୁଶଳୀ ଶ୍ରମିକ ଓ ସୁଯୋଗର ଅଭାବ ଥିବା ଜାଣି ମଧ୍ୟ କିଛି ଦିନ ପରେ ଓଡ଼ିଶା ଫେରିଥିଲେ। ସମରଙ୍କ କହିବାନୁଯାୟୀ, ଉଦ୍ୟୋଗପତିମାନଙ୍କୁ ସବୁବେଳେ ଦୁଇଟି ବଡ଼ ସୁଯୋଗ ମିଳିଥାଏ। ଗୋଟିଏ ହେଲା କିଛି ସମସ୍ୟା ଆସିଲେ ଏହାକୁ ନିଜ ଢ଼ଙ୍ଗରେ ସମାଧନ କରିବା। ଆଉ ସମସ୍ୟାର ସମାଧାନ ହୋଇସାରିବା ପରେ ଏହାର ସ୍ୱାଦ ଚାଖିବା।

ସମରଙ୍କ ବ୍ୟତୀତ ଫାଲକନ ରିୟଲ ଇଷ୍ଟେଟର ଡାଇରେକ୍ଟର ପାର୍ଥଜିତ ପଟ୍ଟନାୟକ ଓ ଅଶ୍ୱିନୀ ଗ୍ରୁପ୍‌ ଅଫ୍‌ ହସ୍ପିଟାଲର ଜୟ ଦାଶ ଓ ସୁମା ଦାଶ ବି ଏହି ସମ୍ମାନଜନକ ପତ୍ରିକାରେ ସ୍ଥାନ ପାଇଛନ୍ତି। ପାର୍ଥଜିତ ୨୦୦୮ ମସିହାରେ ଲଣ୍ଡନରୁ ଏମବିଏ କରି ଓଡ଼ିଶା ଫେରିଥିଲେ। ଏହାପରେ ସେ ଫାଲକନ ରିୟଲ ଇଷ୍ଟେଟର ଡାଇରେକ୍ଟର ପଦବୀ ସମ୍ଭାଳିଥିବା ବେଳେ ଖୁବ୍‌ ଶୀଘ୍ର ସଫଳ ହୋଇଥିଲେ। ପାର୍ଥଜିତଙ୍କ ନେତୃତ୍ୱରେ ଫାଲକନ ଦିନକୁ ଦିନ ସଫଳତାର ଶିଡି ଚଢ଼ି ଚାଲିଛି।

ଆମେରିକାରରେ ରହୁଥିବା ଜୟ ଦାଶ ଓ ସୁମା ଦାଶ କୋଭିଡ ସମୟରେ ରାଜ୍ୟକୁ ଫେରି କିଛି କରିବାକୁ ନିଷ୍ପତ୍ତି ନେଇଥିଲେ। ନିଜ ରାଜ୍ୟକୁ ଫେରି ସେ ରାଜଧାନୀରେ ନୂଆ ଢାଞ୍ଚାର ପ୍ରଥମ ୱେଲନେସ୍ ଫାର୍ମାସୀ ଷ୍ଟୋର ଖୋଲିଲେ। ଯେଉଁଥିରେ ଗୋଟିଏ ଛାତ ତଳେ ବହୁ ହେଲଥ୍‌ ଫାସିଲିଟି ସହ 24×7 ଫର୍ମାଟରେ ହୋମ ଡେଲିଭରି ସେବା ବି ଆରମ୍ଭ ହେଲା। ବର୍ଷକ ଭିତରେ ସେମାନଙ୍କ କାର୍ଯ୍ୟକୁ ରାଜଧାନୀବାସୀଙ୍କ ଦ୍ୱାରା ଆଦୃତ ହୋଇପାରିଛି।
ରାଜଧାନୀରେ ରୋଡ୍ ରୋମିଓଙ୍କ ଆତଙ୍କରାଜ, ହଷ୍ଟେଲରେ ଭଙ୍ଗାରୁଜା

ରାଜଧାନୀ ଭୁବନେଶ୍ୱରର ଏକ ଲେଡିଜ୍ ହଷ୍ଟେଲରେ ରୋଡ୍ ରୋମିଓଙ୍କ ଆତଙ୍କରାଜ । ହଷ୍ଟେଲ ଛାତ୍ରୀଙ୍କୁ କମେଣ୍ଟ ମାରିବା ସହ ମାଡ଼ ମାରିଥିବା ଅଭିଯୋଗ ହୋଇଛି । ୧୦ରୁ ଅଧିକ ଯୁବକ ଏଭଳି କାଣ୍ଡ ଭିଆଇଥିବା ନୟାପଲ୍ଲୀ ଥାନାରେ ଅଭିଯୋଗ ପରେ ତଦନ୍ତ ଆରମ୍ଭ କରିଛି କମିଶନରେଟ ପୋଲିସ । ସ୍ଥାନୀୟ ଅଞ୍ଚଳର ସିସିଟିଭି ଫୁଟେଜକୁ ଯାଞ୍ଚ କରିବା ସହ ଫେରାର ଅଭିଯୁକ୍ତମାନଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ରେଡ୍ କରିଛି ପୋଲିସ ।

ନୟାପଲ୍ଲୀ ଥାନା ଅଧିନ ଉଗ୍ରତାରା ଲେଡିଜ ହଷ୍ଟେଲରେ ଛାତ୍ରୀମାନେ ଆକ୍ରମଣର ଶିକାର ହୋଇଛନ୍ତି । ଛାତ୍ରୀମାନେ ହଷ୍ଟେଲ ଆଗରେ ଛିଡ଼ା ହୋଇଥିବା ବେଳେ ଯୁବକ ଟେକା ଫିଙ୍ଗିଥିଲେ । ବିରୋଧ କରିବାରୁ ଧମକ ଦେଇଥିଲେ ଏବଂ ଧକ୍କା ମାରିବା ସହ ମାଡ଼ ମାରିଥିଲେ । ଆଉ କିଛି ଯୁବତୀ ବାହାରକୁ ଆସିବା ବେଳେ ସେମାନଙ୍କ ଉପରକୁ ଟେକା ଫିଙ୍ଗିଥିଲେ ରୋଡ୍ ରୋମିଓ । ନିଶା ଖାଇ ଏଭଳି କମେଣ୍ଟ ମାରୁଥିବା କହିଛନ୍ତି ଛାତ୍ରୀ ।

ଏପରିକି ହଷ୍ଟେଲ କାନ୍ଥ ଭାଙ୍ଗିବା ସହ ଟେକା ଫିଙ୍ଗି କାଚ ଭାଙ୍ଗିଥିଲେ । ୧୦ରୁ ଅଧିକ ଦୃର୍ବୃତ୍ତ ହଷ୍ଟେଲରେ ଆତଙ୍କ ଖେଳାଇଥିଲେ । ନୟାପଲ୍ଲୀ ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଛି । ସେପଟେ, ଯୁବକମାନେ ସ୍ଥାନୀୟ ଅଞ୍ଚଳର ବୋଲି ପୋଲିସକୁ ଖବର ମିଳିଛି । ଏହି ଘଟଣା ପରେ ମଦ୍ୟପାନ କରୁଥିବା ସ୍ଥାନରେ ଅତର୍କିତ ଚଢ଼ାଉ କରିଛି ପୋଲିସ ।
ସେନାରେ ଆଉ ଉଡିବନି ଧ୍ରୁବ ହେଲିକପ୍ଟର

ଜମ୍ମୁ କାଶ୍ମୀରର କିଶ୍ତୱାଡରେ ଗୁରୁବାର ହୋଇଥିବା ଏଏଲଏଚ ଧ୍ରୁବ ହେଲିକପ୍ଟର ଦୁର୍ଘଟଣା ପରେ ପ୍ରତିରକ୍ଷା ମନ୍ତ୍ରଣାଳୟ ସେନାର ସମସ୍ତ ବିଭାଗରେ ଏହାର ଉଡାଣକୁ ବନ୍ଦ କରି ଦେଇଛି। ଗୁରୁବାର କିଶ୍ତୱାଡାରେ ହୋଇଥିବା ଦୁର୍ଘଟଣାରେ ହେଲିକପ୍ଟରରେ ଥିବା ୨ ପାଇଲଟ ଗୁରୁତର ଆହତ ହୋଇଥିବା ବେଳେ ସେଥିରେ ଥିବା ଟେକ୍ନିସିଆନଙ୍କ ମୃତ୍ୟୁ ହୋଇଥିଲା। ଏହା ଜମ୍ମୁ କାଶ୍ମୀରରେ ୨୦୨୧ରୁ ହୋଇଥିବା ସେନା ହେଲିକପ୍ଟର ଦୁର୍ଘଟଣାର ୫ମ ଦୁର୍ଘଟଣା । ଜଳ ସେନାର ଦୁଇଟି ହେଲିକପ୍ଟର ମଧ୍ୟ ଦୁର୍ଘଟଣାଗ୍ରସ୍ତ ହୋଇଥିଲା।

ଏଏନଆଇ ରିପୋର୍ଟ ମୁତାବକ, ଭାରତୀୟ ସେନାର ଉତ୍ତରାଞ୍ଚଳ ମୁଖ୍ୟାଳୟ ପକ୍ଷରୁ କୁହାଯାଇଛି କି, ସେନାର ଉଡାଣ କ୍ଷେତ୍ରରେ ନିୟୋଜିତ ଏହି ହେଲିକପ୍ଟରରେ ଯାନ୍ତ୍ରିକ ତ୍ରୁଟି କାରଣରୁ ଜମ୍ମୁ କାଶ୍ମୀରର କିଶ୍ତୱାଡରେ ମାରୁଆ ନଦୀ ତଟରେ ଗୁରୁବାର ଦିନ ଜରୁରୀ ଲ୍ୟାଣ୍ଡିଂ ଆବଶ୍ୟକ ହୋଇପଡିଥିଲା। ପାଇଲଟମା ଏହାର ସୂଚନା ଏୟାର ଟ୍ରାଫିକ୍ କଣ୍ଟ୍ରୋଲ ରୁମକୁ ଦେଇଥିଲେ ଓ ଜରୁରୀ ଅବତରଣ କରିଥିଲେ। କିନ୍ତୁ ସେଠାରେ ଥିବା ଖାଲଢିପ ଓ ପଥୁରିଆ ଜମି କାରଣରୁ ହେଲିକପ୍ଟର ଲ୍ୟାଣ୍ଡିଂ ବେଳେ ଦୁର୍ଘଟଣାଗ୍ରସ୍ତ ହୋଇଥିଲା।

ତେବେ ଚଳିତ ମାର୍ଚ୍ଚରେ ଧ୍ରୁବ ହେଲିକପ୍ଟର ମୁମ୍ବାଇ ଉପକୂଳରେ ଦୁର୍ଘଟଣାର ଶିକାର ହୋଇଥିଲା। ଉଭୟ ହେଲିକପ୍ଟର ଭାରତୀୟ ଜଳସେନାରେ ନିୟୋଜିତ ଥିଲା। ଏଏଲଏଚ ହେଲିକପ୍ଟର ଦୁର୍ଘଟଣାକୁ ନେଇ ସଂସଦରେ ରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା କି, ବିଗତ ଦୁଇ ଦଶନ୍ଧି ଭିତରେ ୨୨ଟି ଏଏଲଏଚ ହେଲିକପ୍ଟର ଦୁର୍ଘଟଣାର ଶିକାର ହୋଇଛି। ଦେଶର ବିଭିନ୍ନ ଅଞ୍ଚଳରେ ଉଡାଣ ବେଳେ ସେଥିରୁ ଅଧିକାଂଶକୁ ଜରୁରୀ ଅବତରଣର ଆବଶ୍ୟକତା ପଡିଛି। ସଂସଦରେ ଦିଆଯାଇଥିବା ତଥ୍ୟରୁ ଜଣାପଡିଛି କି, ୨୦୧୭ରୁ୨୦୨୧ ଭିତରେ କେବଳ ମାତ୍ର ୬ଟି ଦୁର୍ଘଟଣାର ସୂଚନା ଦିଆଯାଇଥିଲା।

ସେନାର ଜଣେ ବରିଷ୍ଠ ଅଧିକାରୀ କହିଛନ୍ତି କି, ଏହାର ବିଶ୍ୱସନୀୟତାକୁ ନେଇ ଚିନ୍ତା ରହିଛି। ଏହା ବ୍ୟତୀତ ଖାଲି ଲ୍ୟାଣ୍ଡିଂ ନୁହେଁ, ଏଥିରେ ଥିବା ଯାନ୍ତ୍ରିକ ତ୍ରୁଟିକୁ ମଧ୍ୟ ବୁଝିବାକୁ ହେବ। ଏଥିସହ ନିର୍ମାଣ କ୍ଷେତ୍ରରେ ମଧ୍ୟ କୌଣସି ତ୍ରୁଟିର ଦିଗକୁ ଏଡାଇ ଦିଆଯାଇ ନ ପାରେ। ଯେତେବେଳେ ବାରମ୍ୱାର ଧ୍ରୁବର ଦୁର୍ଘଟଣାକୁ ନେଇ ପ୍ରଶ୍ନବାଚୀ ସୃଷ୍ଟି ହେଉଛି, ସେତେବେଳେ ହିନ୍ଦୁସ୍ଥାନ ଏରୋନେଟିକ ଲିମିଟେଡ ପ୍ରବକ୍ତା କହିଛନ୍ତି କି, ଆମେ ମଧ୍ୟ ଏହି ଘଟଣା ସମ୍ପର୍କରେ ଅବଗତ ଅଛୁ। କିନ୍ତୁ ଏହାର ତଦନ୍ତ ମିଲିଟାରୀ କୋର୍ଟ ଓ ସମ୍ପୃକ୍ତ କର୍ତ୍ତୃପକ୍ଷଙ୍କ ପକ୍ଷରୁ ଜାରି ରହିଥିବାରୁ ଏନେଇ କିଛି କହିପାରିବୁ ନାହିଁ।

ସୂଚନାକଯୋଗ୍ୟ, ଏଏଲଏଚ ଧ୍ରୁବ ହେଲିକପ୍ଟର ଭାରତର ହିନ୍ଦୁସ୍ଥାନ ଏରୋନେଟିକ ଲିମିଟେଡ ପକ୍ଷରୁ ନିର୍ମିତ ହୋଇଛି।
୨୦୨୨ରେ ୬୭ ସାମ୍ୱାଦିକଙ୍କ ହତ୍ୟା

ସତ୍ୟକୁ ଉଜାଗର କରି ଜନସଚେତନତା ସୃଷ୍ଟି କରିବା ହେଉଛି ସାମ୍ବାଦିକତା। କିନ୍ତୁ ସାମ୍ପ୍ରତିକ ପରିସ୍ଥିତିରେ ବିଶ୍ବର ପ୍ରତି କୋଣରେ ଏହି ମହତ ପେସାର କଣ୍ଠରୋଧ କରାଯାଉଛି। ସତକୁ ଲୋକଲୋଚନକୁ ଆଣିବା କ୍ଷେତ୍ରରେ କାମ କରୁଥିବା ବ୍ୟକ୍ତିମାନଙ୍କ ହତ୍ୟା କରାଯାଉଛି, ଯାହାକୁ ନେଇ ଚିନ୍ତାବ୍ୟକ୍ତ କରିଛି ଜାତିସଂଘ। ମଙ୍ଗଳବାର ବିଶ୍ୱ ପ୍ରେସ ଡେ ଅବସରରେ ୟୁଏନ ସେକ୍ରେଟାରୀ ଜେନେରାଲ ଆଣ୍ଟୋନିଓ ଗୁଟେରସ ଉଦବେଗ ପ୍ରକାଶ କରିଛନ୍ତି ।

ବିଶ୍ୱ ପ୍ରେସ ଦିବସର ୩୦ ତମ ବାର୍ଷିକୀ ପାଳନ ଅବସରରେ ଗୁଟେରସ କହିଛନ୍ତି କି, ୨୦୨୨ରେ ଗଣମାଧ୍ୟମ କର୍ମଚାରୀଙ୍କ ହତ୍ୟା ଘଟଣା ୫୦ ପ୍ରତିଶତ ବୃଦ୍ଧି ପାଇବା ଏକ ଅବିଶ୍ୱସନୀୟ ଘଟଣା। ସାରା ବିଶ୍ୱରେ କେବଳ ଏହି ବର୍ଷ ୬୮ଜଣ ଗଣମାଧ୍ୟମ କର୍ମଚାରୀଙ୍କୁ ହତ୍ୟା କରାଯାଇଛି, ଯାହା ପୂର୍ବ ବର୍ଷ ତୁଳନାରେ ୫୦ ପ୍ରତିଶତ ଅଧିକ ରହିଛି। ସେହିପରି ପ୍ରାୟ ତିନି ଚତୁର୍ଥାଂଶ ମହିଳା ସାମ୍ବାଦିକ ଅନଲାଇନ ହିଂସାର ଶରବ୍ୟ ହୋଇଛନ୍ତି। ସେମାନଙ୍କ ଭିତରୁ ପ୍ରତି ୪ ଜଣରେ ଜଣଙ୍କୁ ଶାରୀରିକ ଭାବେ ଆକ୍ରମଣ କରିବାକୁ ଧମକ ମିଳିଛି।

ଗୁଟେରସ ଆହୁରି କହିଛନ୍ତି କି, ସମ୍ପ୍ରତି ସତ୍ୟର ମୁହଁ ବନ୍ଦ କରିବାକୁ ଚେଷ୍ଟା କରାଯାଉଛି। ବିଭିନ୍ନ ଦେଶର ନିୟମ ଓ ସରକାର ସାମ୍ୱାଦିକଙ୍କ କାର୍ଯ୍ୟ ପଥରେ ବାଧା ସୃଷ୍ଟି କରୁଛନ୍ତି। ଏପରି କରି ପ୍ରେସର ଅଭିବ୍ୟକ୍ତି ଅଧିକାରକୁ ସଙ୍କୁଚିତ କରି ଦିଆଯାଉଛି। ସତ୍ୟ ସଂଗ୍ରହ ପଥରେ ବ୍ରତୀ ସାମ୍ୱାଦିକଙ୍କୁ ହଇରାଣ ହରକତ କରାଯାଉଛି। ଭୟଭୀତ କରାଯାଉଛି। ସତ୍ୟ ଓ କାଳ୍ପନିକ, ବିଜ୍ଞାନ ଓ ଷଡଯନ୍ତ୍ର ମଧ୍ୟରେ ଥିବା ରେଖାକୁ ଅସ୍ପଷ୍ଟ କରିବାକୁ ଚାହୁଁଥିବା ବିଚ୍ଛିନ୍ନତାବାଦ ଏବଂ ଘୃଣାର ବକ୍ତବ୍ୟ ଦ୍ୱାରା ସତ୍ୟ ପ୍ରତି ବିପଦ ରହିଛି। ଏସବୁ ସତ୍ତ୍ୱେ ମଧ୍ୟ ସେମାନେ ନିଜ କାର୍ଯ୍ୟରେ ଆଗେଇ ଚାଲିଲେ ସେମାନଙ୍କୁ ପୋଲିସ ଅଟକ ରଖୁଛି, ଜେଲ ପଠାଇ ଦିଆଯାଉଛି। ତେଣୁ ଏପରି କାର୍ଯ୍ୟ ବନ୍ଦ କରିବାକୁ ପ୍ରେସ ଦିବସରେ ଆହ୍ୱାନ ଦେଇଛନ୍ତି ଗୁଟେରସ।

ରିପୋର୍ଟର୍ସ ୱିଦାଉଟ ବଡର ତଥ୍ୟ ଅନୁଯାୟୀ, ୨୦୨୨ରେ ବିଶ୍ୱର ବିଭିନ୍ନ ଦେଶରେ ମୋଟ ୫୫ସାମ୍ୱାଦିକଙ୍କ ସହ ୪ ମିଡିଆ କର୍ମୀଙ୍କୁ ମଧ୍ୟ ହତ୍ୟା କରାଯାଇଛି। ଯାହା ବିଶ୍ୱବ୍ୟାପୀ ପ୍ରେସ ସ୍ୱାଧୀନତାକୁ ଦୁର୍ବଳ କରିବାକୁ ହେଉଥିବା ପ୍ରୟାସକୁ ସ୍ପଷ୍ଟ କରୁଛି। ସେହିପରି ସାମ୍ବାଦିକଙ୍କ ସୁରକ୍ଷା ପାଇଁ ଗଠିତ କମିଟି (ସିପିଜେ) ତଥ୍ୟ କହୁଛି କି, ୨୦୨୨ରେ ୬୮ଜଣ ଗଣମାଧ୍ୟମ କର୍ମଚାରୀଙ୍କୁ ହତ୍ୟା କରାଯାଇଛି। ୩୦ରୁ ଅଧିକ ଦେଶରେ ୩୬୩ ସାମ୍ୱାଦିକଙ୍କୁ ଜେଲରେ ବନ୍ଦୀ କରାଯାଇଛି। ଏହି କ୍ଷେତ୍ରରେ ଇରାନ, ଚୀନ, ମିଆମାର ଆଗରେ ରହିଛି। ଏହିସଂଖ୍ୟା ୨୦୧୫ ତୁଳନାରେ ଦ୍ୱିଗୁଣିତ ହୋଇଥିବା ଦେଖିବାକୁ ମିଳିଥିବା ସିପିଜେ କହିଛି।

ଏହି ହତ୍ୟା ପଛର କାରଣ ସମ୍ପର୍କରେ ୟୁକ୍ରେନ ଯୁଦ୍ଧ କିଛି ମାତ୍ରାରେ ଦାୟୀ କରାଯାଉଥିବା ବେଳେ କୁତ୍ସ ରାଜନୀତି ମଧ୍ୟ ଅନେକାଂଶରେ ସାମ୍ବାଦିକଙ୍କ ଜୀବନ ପ୍ରତି ବିପଦ ସୃଷ୍ଟି କରିଛି। ସେହିପରି ଆତଙ୍କବାଦ ମଧ୍ୟ ଗଣମାଧ୍ୟମର କଣ୍ଠରୋଧ କରିବା ଦେଖିବାକୁ ମିଳୁଛି। ଇଜରାଏଲରେ ଏପରି ହିଂସାରେ ବରିଷ୍ଠ ଆମେରିକୀୟ-ପାଲିଷ୍ଟିନୀୟ ସାମ୍ୱାଦିକ ଶ୍ରୀରିନ ଅବୁ ଅକଲେହଙ୍କ ହତ୍ୟା କରାଯାଇଥିଲା। ସାମ୍ପ୍ରତିକ ସ୍ଥିତିକୁ ଦେଖି ପ୍ରେସ ଡେ’ରେ ସାମ୍ୱାଦିକଙ୍କ କାର୍ଯ୍ୟକୁ ନିର୍ବିଘ୍ନରେ କରିବାକୁ ଦେବାକୁ ହେଲେ ପ୍ରେସ ସ୍ୱାଧୀନତାକୁ ସୁନିଶ୍ଚିତ କରିବାକୁ ହେବ ବୋଲି ଗୁଟାରସ ଆହ୍ୱାନ ଦେଇଛନ୍ତି।

ସୂଚନାଯୋଗ୍ୟ, ଡିସେମ୍ବର ୧୯୯୩ରୁ ୟୁଏନ୍ ସାଧାରଣ ସଭା ଦ୍ୱାରା ପ୍ରେସ ଡେ’ର ଘୋଷିତ ହୋଇଥିଲା ଏବଂ ପ୍ରତ୍ୟେକ ବର୍ଷ ମେ ୩ ତାରିଖ ରେ ଏହି ଦିବସର ପାଳନ ହୋଇ ଆସୁଛି।
ଆଜି ବ୍ରିଟେନରେ ହେବ ନୂଆ ରାଜାଙ୍କ ରାଜ୍ୟାଭିଷେକ, ରାଜା ସିଂହାସନରେ ବସିବେ ଫିଲିପ୍ ଆର୍ଥର ଜର୍ଜ ବା କିଙ୍ଗ୍ ଚାର୍ଲସ ତୃତୀୟ

ଆଜି ବ୍ରିଟେନବାସୀଙ୍କ ପାଇଁ ଖୁସି ଖବର । କିଙ୍ଗ୍ ଚାର୍ଲସଙ୍କର ରାଜ୍ୟାଭିଷେକ ପରେ ୟୁନାଇଟେଡ କିଙ୍ଗଡମକୁ ମିଳିବ ନୂଆ ରାଜା । ଆଜି ୱେଷ୍ଟମିନଷ୍ଟର ଆବେରେ ବିଧିବଦ୍ଧ ଭାବେ ବ୍ରିଟେନ ସିଂହାସନ ଆରୋହଣ କରିବେ ଚାର୍ଲସ ତୃତୀୟ । ଫିଲିପ୍ ଆର୍ଥର ଜର୍ଜ ବା କିଙ୍ଗ୍ ଚାର୍ଲସ ତୃତୀୟ ବ୍ରିଟେନ ସମେତ ଅନ୍ୟ ୧୪ଟି ଦେଶର ମଧ୍ୟ ୪୦ ତମ ରାଜା ହେବେ । ସେଥିପାଇଁ ଆଜି ବଙ୍କିଙ୍ଗହମ୍ ପ୍ୟାଲେସକୁ ଏକ ନବବଧୂ ପରି ସଜାଯାଇଛି । ଭାରତୀୟ ସମୟ ଅପରାହ୍ନ ୩ଟା ବେଳେ କିଙ୍ଗ୍ ଚାର୍ଲସ ଓ ରାଣୀ କାମିଲା ବଙ୍କିଙ୍ଗହମ୍ ପ୍ୟାଲେସରୁ ଶୋଭାଯାତ୍ରାରେ ବାହାରିବେ । ଏହାପରେ ସେମାନେ ୱେଷ୍ଟମିନଷ୍ଟର ଆବେକୁ ଯିବେ । ସେମାନେ ଯେଉଁ ବାହାନରେ ବସି ଯିବେ ତାହାର ନାମ ହେଉଛି, ଡାଇମଣ୍ଡ ଜୁବଲି ଷ୍ଟେଟ୍ କୋଚ । ୧୮ ଫୁଟ୍ ଲମ୍ବା, ୩ ଟନ୍ ଓଜନ ଡାଇମଣ୍ଡ ଜୁବଲି ଷ୍ଟେଟ୍ କୋଚକୁ ଟାଣିଟାଣି ନେବେ ୬ଟି ଘୋଡ଼ା ଆଉ ତାଙ୍କ ସାଥିରେ ଚାଲିବେ ଅଙ୍ଗରକ୍ଷୀ ।

ଅପରାହ୍ନ ସାଢ଼େ ୩ଟା ବେଳକୁ ରାଜପରିବାର ସଦସ୍ୟ ଏବଂ ଅତିଥିଙ୍କ ଉପସ୍ଥିତିରେ ରାଜ୍ୟାଭିଷେକ କରିବେ ଆର୍କ ବିଶପ୍ । ପ୍ରାୟ ଏକ ଘଣ୍ଟା ଧରି ଚାଲିବ ବିଭିନ୍ନ ରୀତିନୀତି । ଏହାପରେ ସନ୍ଧ୍ୟା ୬ଟା ୪୫ରେ ରାଜପରିବାର ବକିଙ୍ଗହମ୍ ପ୍ୟାଲେସ ବାଲକୋନିକୁ ଆସି ଜନସାଧାଣଙ୍କୁ ଦେଖା କରିବେ ।

ଦେଶ ତଥା ବିଦେଶରୁ ପ୍ରାୟ ୨ ହଜାର ଅତିଥି ଏହି ଭବ୍ୟ କାର୍ଯ୍ୟକ୍ରମରେ ଯୋଗଦେବେ । ଏହାର ସିଧା ପ୍ରସାରଣ ବିଭିନ୍ନ ଚ୍ୟାନେଲ ଜରିଆରେ କରାଯିବ । ଭାରତର ଉପରାଷ୍ଟ୍ରପତି ଜଗଦୀପ ଧନକଡ଼ ଓ ତାଙ୍କ ପତ୍ନୀ ଏହି ଅବସରରେ ଯୋଗ ଦେବାର କାର୍ଯ୍ୟକ୍ରମ ରହିଛି ।

ଗତ ସେପ୍ଟେମ୍ବରରେ କୁଇନ୍ ଏଲିଜାବେଥ ଦ୍ୱିତୀୟଙ୍କର ଦେହାନ୍ତ ହୋଇଥିଲା । ଏହାପରେ ଏହି ପଦ କିଙ୍ଗ୍ ଚାର୍ଲସ ହିଁ ସମ୍ଭାଳିଥିଲେ । ମାତ୍ର ତାଙ୍କର ବିଧିବଦ୍ଧ ରାଜ୍ୟାଭିଷେକ ହୋଇନଥିଲା, ଯାହା ଆଜି ସମାପନ ହେବ ।
ଘୂର୍ଣ୍ଣିବଳୟ ସୃଷ୍ଟି, ପ୍ରଭାବରେ ୮ ତାରିଖ ସକାଳ ସୁଦ୍ଧା ଲଘୁଚାପ ସୃଷ୍ଟି ସମ୍ଭାବନା

ଦକ୍ଷିଣ-ପୂର୍ବ ବଙ୍ଗୋପସାଗର ଓ ଏହାର ଆଖପାଖ ଅଞ୍ଚଳରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇଛି । ଏହା ମଧ୍ୟମ ଟ୍ରପୋସ୍ଫରିକ ସ୍ତର ପର୍ଯ୍ୟନ୍ତ ଲମ୍ବିଛି । ଏହାର ପ୍ରଭାବରେ ୮ ତାରିଖ ସକାଳ ସୁଦ୍ଧା ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି । ମେ’ ୯ ବେଳକୁ ଏହା ଦକ୍ଷିଣ-ପୂର୍ବ ବଙ୍ଗୋପସାଗରରେ ଘନୀଭୂତ ହୋଇ ଅବପାତର ରୂପ ନେବ । ଏହାପରେ କେନ୍ଦ୍ରୀୟ ବଙ୍ଗୋପସାଗର ଆଡ଼କୁ ଉତ୍ତର ଦିଗକୁ ଗତି କରୁଥିବା ବେଳେ ଏହା ଘୂର୍ଣ୍ଣିବଳୟର ରୂପ ନେବ । ଲଘୁଚାପ ସୃଷ୍ଟି ପରେ ଏହାର ଗତିପଥ ଓ ତୀବ୍ରତା ସମ୍ପର୍କରେ ସବିଶେଷ ତଥ୍ୟ ମିଳିବ ।

ଏହାର ପ୍ରଭାବରେ ୮ରୁ ୧୨ ତାରିଖ ମଧ୍ୟରେ ଅଧିକାଂଶ ସ୍ଥାନରେ ମଧ୍ୟମ ଧରଣର ବର୍ଷା ହେବ । ୮ରୁ ୧୧ ତାରିଖ ମଧ୍ୟରେ ପ୍ରବଳରୁ ଅତି ପ୍ରବଳ ବର୍ଷା ଏବଂ ୧୦ ତାରିଖରେ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ । ୭ ତାରିଖରୁ ଦକ୍ଷିଣ-ପୂର୍ବ ବଙ୍ଗୋପସାଗର ଓ ଏହାର ଆଖପାଖ ଅଞ୍ଚଳ, ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜ ଏବଂ ଆଣ୍ଡାମାନ ସାଗରରେ ୪୦ରୁ ୫୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି ।

୯ ତାରିଖ ବେଳକୁ ଦକ୍ଷିଣ-ପୂର୍ବ ବଙ୍ଗୋପସାଗର, ଆଣ୍ଡାମାନ-ନିକୋବର ଦ୍ୱୀପପୁଞ୍ଜ ଏବଂ ଆଣ୍ଡାମାନ ସାଗରର ଆଖପାଖ ଅଞ୍ଚଳରେ ପବନର ବେଗ ଘଣ୍ଟା ପ୍ରତି ୭୦ କିଲୋମିଟର ଯାଏ ବୃଦ୍ଧି ପାଇବା ସମ୍ଭାବନା ରହିଛି । ସେହିପରି ୧୦ ତାରିଖରୁ ପବନର ବେଗ ଧୀରେ ଧୀରେ ବୃଦ୍ଧି ପାଇ ଦକ୍ଷିଣ-ପୂର୍ବ ଏବଂ ଏହାର ଆଖପାଖ କେନ୍ଦ୍ରୀୟ ବଙ୍ଗୋପସାଗରରେ ଘଣ୍ଟା ପ୍ରତି ୬୦/୭୦ କିଲୋମିଟରରୁ ୮୦ କିଲୋମିଟରକୁ ବୃଦ୍ଧି ପାଇବ । ୭ ତାରିଖରୁ ଦକ୍ଷିଣ-ପୂର୍ବ ବଙ୍ଗୋପସାଗରରେ ସମୁଦ୍ର ଅଶାନ୍ତ ରହିବ ।

୯ ତାରିଖରୁ ପ୍ରବଳ ବର୍ଷିପାରେ । ୧୦ ତାରିଖରୁ ଦକ୍ଷିଣ-ପୂର୍ବ ଓ ସଂଲଗ୍ନ କେନ୍ଦ୍ରୀୟ ବଙ୍ଗୋପସାଗରରେ ପ୍ରବଳରୁ ଅତି ପ୍ରବଳ ବର୍ଷା ହେବା ଆଶଙ୍କା ରହିଛି । ୮ ଓ ୯ ତାରିଖ ବେଳକୁ ଆଣ୍ଡାମାନ ସମୁଦ୍ର ଅଶାନ୍ତ ରହିବ । ତେବେ ୧୦ ତାରିଖ ବେଳକୁ ଉତ୍ତର ଆଣ୍ଡାମାନ ସମୁଦ୍ର ଅଶାନ୍ତ ରହିବ । ବର୍ଷା, ପବନ ଆଶଙ୍କା ଥିବାରୁ ମତ୍ସ୍ୟଜୀବୀ,ଛୋଟ ଜାହାଜ,ଡଙ୍ଗା ଓ ଟ୍ରଲରଗୁଡ଼ିକୁ ୭ ତାରିଖରୁ ଦକ୍ଷିଣ-ପୂର୍ବ ବଙ୍ଗୋପସାଗର ଓ ଆଣ୍ଡାମାନ ସାଗରର ଆଖପାଖ ଅଞ୍ଚଳ ଏବଂ ୯ରୁ ଦକ୍ଷିଣ-ପୂର୍ବ ଓ ଆଖପାଖ କେନ୍ଦ୍ରୀୟ ବଙ୍ଗୋପସାଗରକୁ ଯିବାକୁ ବାରଣ କରାଯାଇଛି ।
ମୟୂରଭଞ୍ଜ: ରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର ସମାବର୍ତ୍ତନ ଉତ୍ସବ, ରାଷ୍ଟ୍ରପତିଙ୍କ ଅଭିଭାଷଣ ବେଳେ ୯ ମିନିଟ୍ ପାଇଁ ବିଜୁଳି କଟିଲା