ଦିନେ ଯିଏ ଗାଁ ଦାଣ୍ଡରେ ଧୂଳିବାଲିରେ ଖେଳୁଥିଲା, ଆଜି ସେ ବିଦେଶ ମାଟିରେ ଖେଳିବେ । ନିଜର ନିଷ୍ଠା ଓ କଠିନ ପରିଶ୍ରମ ବଳରେ ବିଦେଶ ଗସ୍ତ କରିବେ ଶିବାନୀ । ବର୍ଲିନରେ ଆୟୋଜିତ ସ୍ଵତନ୍ତ୍ର ଅଲିମ୍ପିକ୍ସ, ବିଶ୍ୱ ଗ୍ରୀଷ୍ମକ୍ରୀଡ଼ାରେ ଅଂଶଗ୍ରହଣ କରିବେ ।
ଭାରତୀୟ ବିଚ୍ ଭଲିବଲ ଦଳରେ ସାମିଲ ହେଲେ ଗାଁ ଝିଅ ଶିବାନୀ । କେନ୍ଦ୍ରାପଡ଼ା ମହାକାଳପଡ଼ା ବ୍ଲକ୍ ବଡ଼ତୋଟା ଛପାଲି ଗାଁର ପବିତ୍ର ପରିଡ଼ା ଓ ରୀନାରାଣୀଙ୍କ ଝିଅ ଶିବାନୀ ପ୍ରିୟଦର୍ଶିନୀ । ସେ ବିଦେଶରେ ହେବାକୁ ଥିବା ଅଲିମ୍ପିକ୍ସରେ ଭାଗ ନେବେ । ଜୁନ୍ ୧୨ରୁ ୨୬ ମଧ୍ୟରେ ଜର୍ମାନୀର ବର୍ଲିନରେ ଅନୁଷ୍ଠିତ ହେବ ସ୍ବତନ୍ତ୍ର ଅଲମ୍ପିକ୍ସ ବିଶ୍ୱ ଗ୍ରୀଷ୍ମକ୍ରୀଡ଼ା । ବିଚ୍ ଭଲିବଲ ଭାରତୀୟ ଦଳରେ ସ୍ଥାନ ପକ୍କା କରିଛନ୍ତି ଶିବାନୀ । ଏବେ ତାଙ୍କୁ ଅନ୍ତର୍ଜାତୀୟ ମ୍ୟାଚ୍ ଖେଳିବାର ସୁଯୋଗ ମିଳିଛି ।
ବହୁଦିନ ପରେ ଶିବାନୀଙ୍କ ସ୍ୱପ୍ନ ସାକାର ହୋଇଛି । ବିଦେଶରେ ଭଲ ପ୍ରଦର୍ଶନ କରି ଭାରତ ପାଇଁ ଗୌରବ ଆଣିବେ ବୋଲି ସେ ଆଶା ରଖିଛନ୍ତି ।
ଭୁବନେଶ୍ୱରର ଏକ ଘରୋଇ ଶିକ୍ଷାନୁଷ୍ଠାନର +୩ ପ୍ରଥମ ବର୍ଷ ଛାତ୍ରୀ ଶିବାନୀ । ପାଠ ପଢ଼ିବା ସହ ଗାଁର ଝିଅ ଏବେ ବିଦେଶରେ ନିଜ ଜଲୱା ଦେଖାଇବେ । ଏ ଖବର ପ୍ରଚାର ପରେ ଅଂଚଳରେ ଖୁସିର ଲହରୀ ଖେଳିଯାଇଛି । ଏହି ଅବସରରେ ମହାକାଳପଡ଼ା ବ୍ଲକ୍ କ୍ରୀଡ଼ା ଶିକ୍ଷକ ଆସୋସିଏସନ ପକ୍ଷରୁ ତାଙ୍କୁ ସମ୍ବର୍ଦ୍ଧିତ କରାଯାଇଛି ।