ବୈଶାଖ ମାସର ସେହି ଅପରାହ୍ନଟି ଥିଲା ଅତି ଗୁଳୁଗୁଳିଆ। ଆକାଶଟା ଯେମିତି ନିଆଁ ବର୍ଷୁଥିଲା। ଗାଁର ଯୁବ ଚାଷୀ ଅଜିତ ନିଜ କ୍ଷେତରେ କାମ କରୁଥିଲେ। ସେଦିନ ତାଙ୍କ ମନରେ ଏକ ନୂଆ ଆଶା ଥିଲା। ଘରେ ସ୍ତ୍ରୀ ସୁମିତ୍ରା ତାଙ୍କ ପାଇଁ ଅପେକ୍ଷା କରିଥିଲେ, କାରଣ ସେମାନଙ୍କ ଛୋଟ ସଂସାରରେ ଖୁବ୍ ଶୀଘ୍ର ଜଣେ ନୂଆ ଅତିଥି ଆସିବାର ସୁଖଦ ଖବର ସେମାନେ ନିକଟରେ ପାଇଥିଲେ। ହେଲେ ସେହି କ୍ଷଣିକ ଭିତରେ ସବୁ କିଛି ଓଲଟ ପାଲଟା ହେଇଗଲା।
ହଁ ଆଜ୍ଞା ଯାଜପୁର ଜିଲ୍ଲାର ବଡ଼ଚଣା ବ୍ଲକ ଅନ୍ତର୍ଗତ ବଡ଼ ବାଲିକୁଦା ଗ୍ରାମ। ଅଜିତ ଜେନା ଥିଲେ ସେହି ଗାଁର ଜଣେ ପରିଶ୍ରମୀ ଯୁବକ। ନିଜର ଛୋଟ ପରିବାର, ସ୍ତ୍ରୀ ଓ ପିଲାଛୁଆଙ୍କୁ ନେଇ ସେ ବହୁତ ସ୍ୱପ୍ନ ଦେଖିଥିଲେ। ଚାଷ କାମ ହିଁ ତାଙ୍କ ପରିବାରର ମୁଖ୍ୟ ସାହାରା ଥିଲା। ସେଦିନ ଆକାଶ ନିର୍ମଳ ଥିଲା, କିନ୍ତୁ ଅଜାଣତରେ ମୃତ୍ୟୁ ତାଙ୍କ ପିଛା କରୁଥିଲା। ଅଜିତ ନିଜ ଚାଷ ଜମିରେ ଫସଲରେ ଔଷଧ ଛିଞ୍ଚିବା ପାଇଁ ଯାଇଥିଲେ। ସେ ସେଠାରେ ନିଜ କାମରେ ବ୍ୟସ୍ତ ଥିବାବେଳେ ହଠାତ୍ ପାଗ ବଦଳିଗଲା। କଳାହାଣ୍ଡିଆ ମେଘ ସାରା ଆକାଶକୁ ଢାଙ୍କି ଦେଲା। ଧୀରେ ଧୀରେ ପବନର ବେଗ ବଢ଼ିଲା ଏବଂ କାଳବୈଶାଖୀ ତା’ର କରାଳ ରୂପ ଧାରଣ କଲା।
ନିଜକୁ ବର୍ଷା ଓ ପବନରୁ ରକ୍ଷା କରିବା ପାଇଁ ଅଜିତ ଏକ ବିରାଟ ତାଳ ଗଛ ମୂଳେ ଆଶ୍ରୟ ନେଇଥିଲେ। ସେ ଭାବିଥିଲେ ଝଡ଼ଟା କମିଗଲେ ସେ ଘରକୁ ଫେରିଯିବେ। କିନ୍ତୁ ପ୍ରକୃତିର ନିଷ୍ଠୁରତା ଆଗରେ ସେ ହାରିଗଲେ। ଏକ ପ୍ରଚଣ୍ଡ ପବନର ଧକ୍କାରେ ସେହି ବିଶାଳ ତାଳ ଗଛଟି ମୂଳରୁ ଉପୁଡ଼ି ସିଧାସଳଖ ଅଜିତଙ୍କ ଉପରେ ପଡ଼ିଗଲା। ସେହି ଗଛ ତଳେ ଚାପି ହୋଇ ଘଟଣାସ୍ଥଳରେ ହିଁ ତାଙ୍କର ପ୍ରାଣବାୟୁ ଉଡ଼ିଗଲା।