ପାଣିଆ ଡାଲି, ପୋକ ସୋୟାବିନରେ ସ୍କୁଲରେ ଚାଲିଛି ମଧ୍ୟାହ୍ନ ଭୋଜନ

ପିଲାଙ୍କ ପୁଷ୍ଟି ସାଧନ ପାଇଁ ସରକାର ଯୋଗାଉଛନ୍ତି ମଧ୍ୟାହ୍ନ ଭୋଜନ। ଅସାଧୁ ଏସଏଚଜି ମହିଳା ପିଲାଙ୍କ ଜୀବନ ସହ ଖେଳୁଛନ୍ତି ଖେଳ। ମଧ୍ୟାହ୍ନ ଭୋଜନ ଟଙ୍କା ହରିଲୁଟ କରି ପିଲାଙ୍କୁ ଯୋଗାଉଛନ୍ତି ପୋକଲଗା ଖାଦ୍ୟ ବୋଲି ହେଉଛି ଅଭିଯୋଗ। ରାଜ୍ୟ ସରକାର ପିଲାଙ୍କ ପୁଷ୍ଟିହୀନତା ଦୂର କରିବା ସହ ପିଲାଙ୍କୁ ସରକାରୀବିଦ୍ୟାଳୟ ପ୍ରତି ଆକୃଷ୍ଟ କରିବାକୁ ମଧ୍ୟାହ୍ନ ଭୋଜନ ବ୍ୟବସ୍ଥା କରିଛନ୍ତି। ଏଥିପାଇଁ ସରକାରୀ ତହବିଲରୁ ଯାଉଛି କୋଟି କୋଟି ଟଙ୍କା। କିନ୍ତୁ ଉପଯୁକ୍ତ ତଦାରଖ ଅଭାବରୁ ଏହାର ଫାଇଦା ଉଠାଉଛନ୍ତି ଦାୟିତ୍ବରେ ଥିବା ଲୋକେ। ସ୍କୁଲକୁ ନିମ୍ନମାନର ଖାଦ୍ୟ ସାମଗ୍ରୀ କରୁଛନ୍ତି ଯୋଗାଣ। ଏଇ ଯେମିତି ବଲାଙ୍ଗୀର ଜିଲ୍ଲା ସଇଁତଲା ବ୍ଲକ ଡୁଙ୍ଗୁରିପାଲି ପଂଚାୟତ ଟେଣ୍ଡିପାଲି ଗ୍ରାମ ସରକାରୀ ନୂତନ ଉଚ୍ଚ ପ୍ରାଥମିକ ବିଦ୍ୟାଳୟର ମଧ୍ୟାହ୍ନ ଭୋଜନରେ ଦେଖିବାକୁ ମିଳିଛି। ସ୍କୁଲରେ ମଙ୍ଗଳବାର ପିଲାଙ୍କ ପାଇଁ ପ୍ରସ୍ତୁତ ହୋଇଥିବା ମଧ୍ୟାହ୍ନ ଭୋଜନ ସୋୟାବଡି ତରକାରୀରେ ପୋକ ସାଲୁବାଲୁ ହେଉଥିବା ଦେଖି ପିଲା କରିଥିଲେ ଅଭିଯୋଗ। ଆମ ପ୍ରତିନିଧି ବିଦ୍ୟାଳୟକୁ ଯାଇ ଖବର ସଂଗ୍ରହ କରିବା ବେଳେ ମଧ୍ୟାହ୍ନ ଭୋଜନ ଅତି ନିମ୍ନ ମାନର ଦିଆଯାଉଥିବା ତଥା ସୋୟାବଡିରେ ପୋକ, ପାଣିଆ ଡାଲି ତଥା ପଚାଅଣ୍ଡା ଦିଆଯାଉଥିବା ଅଭିଯୋଗ କରିଥିଲେ |

ଏହି ସ୍କୁଲର ମଧ୍ୟାହ୍ନ ଭୋଜନ ପ୍ରସ୍ତୁତିରେ ନିୟୋଜିତ ଜୟ ବଜରଙ୍ଗବଳି ଏସଏଚଜି ଗ୍ରୁପ ପିଲାଙ୍କୁ ଜାଣି ଶୁଣି ନିମ୍ନ ମାନର ଖାଦ୍ୟ ଦେଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏହି ଖବର ଜଣାପଡିବା ପରେ ମଙ୍ଗଳବାର ପ୍ରଧାନ ଶିକ୍ଷକ ସ୍କୁଲରେ ନ ଥିବା କହିଥିବା ବେଳେ ଏସମ୍ପର୍କରେ ବ୍ଲକ ଶିକ୍ଷା ଅଧିକାରୀ ଙ୍କୁ ଜଣାଇଥିବା କହିଛନ୍ତି। ବ୍ଲକ ଶିକ୍ଷା ଅଧିକାରୀ ଜଣେ ଅତିରିକ୍ତ ଶିକ୍ଷା ଅଧିକାରୀଙ୍କୁ ଘଟଣାର ତଦନ୍ତ କରିବା ପାଇଁ ନିର୍ଦେଶ ଦେଇଥିବା କହିଛନ୍ତି।

ଏପରି ଖାଦ୍ୟ ପିଲାଙ୍କ ପୁଷ୍ଟି ସାଧନରେ ସହାୟକ ହେବ କି ନାହିଁ ତାହା ତ ଜଣାନାହିଁ, ହେଲେ ସେମାନଙ୍କ ସ୍ବାସ୍ଥ ହାନୀର କାରଣ ହେବ ବୋଲି ଅଭିଯୋଗ ହେଉଛି। ତେବେ ସରକାର ମଧ୍ୟାହ୍ନ ଭୋଜନରେ ସ୍ବଚ୍ଛତା ଆଣିବାକୁ ତଥା ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ କାର୍ଯ୍ୟ ଯୋଗାଇ ଦେବାକୁ ଏସଏଚଜି ମହିଳାଙ୍କୁ ଏଥିରେ ସାମିଲ କରିଛନ୍ତି। ରୋଷେଇ ପାଇଁ ଗ୍ୟାସ ମଧ୍ୟ ଯୋଗା ଯାଉଛି। କିନ୍ତୁ ଏହି ବିଦ୍ୟାଳୟରେ ମଧ୍ୟାହ୍ନ ଭୋଜନ ପ୍ରସ୍ତୁତ କରୁଥିବା ଗ୍ରୁପ ଗ୍ୟାସ ବଦଳରେ କାଠ ବ୍ୟବହାର କରୁଛନ୍ତି। ଫଳରେ ସ୍କୁଲର କାନ୍ଥ ବାଡ ସବୁ କଳା ହୋଇଗଲାଣି। ଗ୍ରୁପ ମହିଳା ଆଇନର କରୁ ନାହାନ୍ତି ପାଳନ ବୋଲି ଅଭିଯୋଗ ହେଉଛି।