ଇରାନ ସହ ଚାଲିଥିବା ସଂଘର୍ଷ ସାତ ସପ୍ତାହରେ ପହଞ୍ଚିଥିବା ବେଳେ, ମଧ୍ୟପ୍ରାଚ୍ୟର ସମୀକରଣ ଦ୍ରୁତ ଗତିରେ ବଦଳିବାରେ ଲାଗିଛି। ଯେଉଁ ଉପସାଗରୀୟ ଦେଶଗୁଡ଼ିକ ଦିନେ ଡୋନାଲ୍ଡ ଟ୍ରମ୍ପଙ୍କ ମୁଖ୍ୟ ସହଯୋଗୀ ଥିଲେ, ସେମାନେ ଏବେ ଆମେରିକାର ସାମରିକ ରଣନୀତି ଉପରେ ସନ୍ଦେହ ପ୍ରକାଶ କରିବା ସହ ଦୂରତା ବଜାୟ ରଖିବାକୁ ନିଷ୍ପତ୍ତି ନେଉଛନ୍ତି। ସାଉଦି ବୈଦେଶିକ ମନ୍ତ୍ରୀ ଫୈସଲ ବିନ୍ ଫରହାନଙ୍କ ବୟାନ ଆମେରିକା ପାଇଁ ଏକ ବଡ଼ ଚେତାବନୀ ସଦୃଶ। ଇରାନ ଦ୍ୱାରା ନିଜର ତୈଳ ବିଶୋଧନାଗାର ଉପରେ ଆକ୍ରମଣ ଏବଂ ହର୍ମୁଜ ପ୍ରଣାଳୀ ଅବରୋଧ ଯୋଗୁଁ ହୋଇଥିବା ବିପୁଳ ଆର୍ଥିକ କ୍ଷତି ପାଇଁ ସେ ପରୋକ୍ଷରେ ଟ୍ରମ୍ପଙ୍କ ବିଫଳ ରଣନୀତିକୁ ଦାୟୀ କରିଛନ୍ତି।
ସାଉଦି ଆରବ ଏବେ ନିଜର ସୁରକ୍ଷା ପାଇଁ କେବଳ ଆମେରିକା ଉପରେ ନିର୍ଭର ନକରି ବିକଳ୍ପ ପଥ ଖୋଜୁଛି। ୟୁଏଇ, ଯିଏ କି ପ୍ରାରମ୍ଭିକ ପର୍ଯ୍ୟାୟରେ ଆମେରିକା ଓ ଇସ୍ରାଏଲକୁ ଖୋଲାଖୋଲି ସମର୍ଥନ କରିଥିଲା, ଏବେ ସବୁଠାରୁ ଅଧିକ ନିରାଶ। ଏହାର କାରଣଗୁଡ଼ିକ ହେଲା: ଦୁବାଇ ଏବଂ ଆବୁଧାବି ଭଳି ଗ୍ଲୋବାଲ ସିଟି ଉପରେ ଇରାନର କ୍ଷେପଣାସ୍ତ୍ର ମାଡ଼କୁ ରୋକିବାରେ ଆମେରିକାର ପ୍ରତିରକ୍ଷା ପ୍ରଣାଳୀ ସଫଳ ହୋଇନାହିଁ। ୟୁଏଇର ବିଶେଷଜ୍ଞମାନେ ଏବେ ଆମେରିକୀୟ ସାମରିକ ଘାଟିଗୁଡ଼ିକୁ ବନ୍ଦ କରିବାକୁ ଦାବି କରୁଛନ୍ତି। ସେମାନଙ୍କ ମତରେ, ଏହି ଘାଟିଗୁଡ଼ିକ ସୁରକ୍ଷା ଦେବା ପରିବର୍ତ୍ତେ ଇରାନର ଲକ୍ଷ୍ୟ ସାଜୁଛନ୍ତି, ଯାହା ୟୁଏଇ ପାଇଁ ବିପଦ ସୃଷ୍ଟି କରୁଛି। ୟୁଏଇ ଏବେ କେବଳ ଆମେରିକାର ସୈନ୍ୟ ନୁହେଁ, ବରଂ ଉନ୍ନତ ପ୍ରତିରକ୍ଷା ପ୍ରଯୁକ୍ତିବିଦ୍ୟା ନିଜ ଅଧୀନରେ ଚାହୁଁଛି। ରାଷ୍ଟ୍ରପତି ଟ୍ରମ୍ପ ଏବେ ଏକ ଦ୍ୱନ୍ଦ୍ୱାତ୍ମକ ସ୍ଥିତିରେ ଅଛନ୍ତି। ଯୁଦ୍ଧ ଶେଷ ହେବାର କୌଣସି ସଙ୍କେତ ମିଳୁନଥିବା ବେଳେ ତାଙ୍କର “ସର୍ବାଧିକ ଚାପ” ନୀତି ଏବେ ନିଜ ସହଯୋଗୀଙ୍କୁ ହିଁ ଅତିଷ୍ଠ କଲାଣି। ସହଯୋଗୀ ଦେଶଗୁଡ଼ିକର ବିଶ୍ୱାସ ହରାଇବା ଟ୍ରମ୍ପଙ୍କ ପାଇଁ ଏକ ବଡ଼ ରାଜନୈତିକ ବିପର୍ଯ୍ୟୟ। ଇରାନ ବିରୋଧୀ ମେଣ୍ଟ ଦୁର୍ବଳ ହେବା ଦ୍ୱାରା ମଧ୍ୟପ୍ରାଚ୍ୟରେ ଆମେରିକାର ପତିଆରା ହ୍ରାସ ପାଉଛି। ଉପସାଗରୀୟ ଦେଶଗୁଡ଼ିକର ଏହି ‘ମୋହଭଙ୍ଗ’ ସୂଚାଉଛି ଯେ, ଆଗାମୀ ଦିନରେ ଏହି ଅଞ୍ଚଳର ଶକ୍ତି ସନ୍ତୁଳନ ବଦଳିବାକୁ ଯାଉଛି। ସହଯୋଗୀ ଦେଶଗୁଡ଼ିକ ଏବେ “ଆମେରିକା ଫାଷ୍ଟ” ପରିବର୍ତ୍ତେ ନିଜର ଆତ୍ମରକ୍ଷାକୁ ପ୍ରାଥମିକତା ଦେଉଛନ୍ତି।