ନିର୍ବାଚନ ପୂର୍ବରୁ ବଦଳିବେ ରାଜ୍ୟ କଂଗ୍ରେସ ସଭାପତି। ଆଉ ଦଳୀୟ କର୍ମକର୍ତ୍ତା ଶରତ ପଟ୍ଟନାୟକଙ୍କ ନେତୃତ୍ବକୁ କରି ପାରୁନାହାନ୍ତି ହଜମ। ପଟ୍ଟନାୟକ ଆଜ୍ଞାଙ୍କ ନାହିଁ ନେତୃତ୍ବ ଦକ୍ଷତା। ତାଙ୍କ ନେତୃତ୍ବରେ ଦଳ ନିର୍ବାଚନ ମୈଦାନରେ ବିରୋଧୀ ଦଳଙ୍କୁ ଟକ୍କର ଦେଇ ପାରିବେ ନାହିଁ । ଏମିତି କିଛି ଚର୍ଚ୍ଚା ସହ ଦଳୀୟ କର୍ମୀଙ୍କ ମଧ୍ୟରେ ହତୋତ୍ସାହ ବୃଦ୍ଧିପାଇବାରେ ଲାଗିଛି। ଯାହା ଆଧାରରେ ଦଳର ସଭାପତି ବଦଳିବାକୁ ଯାଉଛନ୍ତି। କଂଗ୍ରେସ କେନ୍ଦ୍ରୀୟ ନେତୃମଣ୍ଡଳୀ ଏହା ଉପରେ ନିଷ୍ପତ୍ତି ନେଇଥିବା ଦଳୀୟ ଶିବିରରେ ଟୁପୁରଟାପର ଚାଲିଛି। କଂଗ୍ରେସ ଭିତିରି ମହଲ ସୂଚନା ମୁତାବକ, ନିରଞ୍ଜନ ପଟ୍ଟନାୟକଙ୍କ ନେତୃତ୍ବରେ କଂଗ୍ରେସ ରାଜ୍ୟର ସାଧାରଣ ନିର୍ବାଚନ ସହ ସବୁ ଉପନିର୍ବାଚନରେ ପରାଜୟ ବରଣ କରିଥିଲା। ଏହାକୁ ନେଇ କଂଗ୍ରେସ ଶିବିରରେ ନେତୃତ୍ବ ପ୍ରତି ଦେଖାଦେଇଥିଲା ଅନାସ୍ଥା ଭାବ। ନିରଞ୍ଜନ ତାଙ୍କ ଭାଇ ସୌମ୍ୟଙ୍କ ପାଇଁ ବିଜେଡିକୁ ଟକ୍କର ଦେବାକୁ ପଛଘୁଞ୍ଚା ଦେବା ସହ ଟିକେଟ ବଣ୍ଟନରେ ଟାଳଟୁଳ ନୀତି ଆପଣାଉଥିବା ହୋଇଥିଲା ଅଭିଯୋଗ। ଏନେଇ କେନ୍ଦ୍ରୀୟ ନେତୃତ୍ବଙ୍କ ନିକଟରେ ହୋଇଥିଲା ଅଭିଯୋଗ। କର୍ମକର୍ତ୍ତାଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବା ଦେଖି ମେ ୨୦୨୨ରେ ଶରତ ପଟ୍ଟନାୟକଙ୍କୁ ଦିଆଯାଇଥିଲା ରାଜ୍ୟ କଂଗ୍ରେସ କମାଣ । ଏହା ମଧ୍ୟରେ ଦେଢ ବର୍ଷ ବିତିଗଲାଣି। କିନ୍ତୁ କଂଗ୍ରେସ ସେମିତି କିଛି ଆଖି ଦୃଶିଆ ପଦକ୍ଷେପ ନେଇ ପାରିନି ରାଜ୍ୟ ସରକାର ବିରୋଧରେ। ଯାହାଦ୍ୱାରା କଂଗ୍ରେସ, ଲୋକଙ୍କ ଆସ୍ଥା ଭାଜନ ହୋଇପାରୁ ନାହିଁ। ଫଳରେ ହାତ ଦଳିଆଙ୍କ ଭିତରେ ମଧ୍ୟ ବୃଦ୍ଧିପାଉଛି ନିରାଶା। ସେପଟେ ଆଉ ମାସ କେଇଟାରେ ହେବ ସାଧାରଣ ନିର୍ବାଚନ। ଯଦି ସ୍ଥିତି ଏମିତି ରହିବ ତେବେ ଦଳ ଗୋଟିଏ ବି ଆସନ ହାତେଇବ ନାହିଁ ବୋଲି କଂଗ୍ରେସିଆଙ୍କ ମଧ୍ୟରେ ଚର୍ଚ୍ଚା ହେବାରେ ଲାଗିଛି। ତେଣୁ ଶରତଙ୍କୁ ସଭାପତି ପଦରୁ ହଟାଇବାକୁ ଜାତୀୟ କଂଗ୍ରେସ ସ୍ଥିର କରିଛି। ହେଲେ ଏହି ପଦରେ କାହାକୁ ବସାଯାଇ ପାରିବ? ଅନେକ ଆଲୋଚନା ପରେ ପୂର୍ବତନ ମନ୍ତ୍ରୀ ଭକ୍ତ ଦାସଙ୍କୁ ଚୟନ କରିଛି ଏଆଇସିସି। ସମ୍ପ୍ରତି ଜାତୀୟ କଂଗ୍ରେସ ନେତୃତ୍ବ ଆଗରେ ଏମିତି କୌଣସି ଜଣେ ରାଜ୍ୟର ନେତା ଦେଖାଯାଉ ନାହାନ୍ତି, ଯାହାଙ୍କୁ ଏହି ଦାୟିତ୍ବ ଦିଆଯାଇପାରିବ। ଯେଉଁ ନେତା ଅଛନ୍ତି, ସେମାନଙ୍କ ଭିତରେ ଚାଲିଛି ଟଣାଓଟରା। ଯାହା ଦଳକୁ ନିର୍ବାଚନ ବର୍ଷରେ ଆହୁରି ବିପର୍ଯ୍ୟୟ ଆଡକୁ ଠେଲିଦେବ। ଯଦି ପ୍ରଦୀପ ମାଝୀ ବିଜେଡିକୁ ଡେଇଁ ନ ଥାନ୍ତେ, ତେବେ ହୁଏତ କେନ୍ଦ୍ର ନେତୃତ୍ବ ତାଙ୍କୁ ଏହି ପଦରେ ଅବସ୍ଥାନ କରିଥାନ୍ତେ। ତେଣୁ ଭକ୍ତଙ୍କୁ ଭରସାକରିଛି କେନ୍ଦ୍ର ନେତୃତ୍ବ। କାରଣ ଦାସଙ୍କର ଜାତୀୟସ୍ତରରେ ରହିଛି ଭଲ ଦବଦବା। ସେ ଛତିଶଡ, ବିହାର, ମଣିପୁର ପର୍ଯ୍ୟବେକ୍ଷକ ଦାୟିତ୍ବ ତୁଲାଇଛନ୍ତି। ଭକ୍ତଙ୍କର ଏଆଇସିସି ସହ ରହିଛି ସୁସମ୍ପର୍କ। ତେଣୁ ଓଡିଶାରେ କଂଗ୍ରେସକୁ ସୁଦୃଢ କରିବାକୁ ଭକ୍ତଙ୍କୁ ଆଶ୍ରା କରିଛି ଏଆଇସିସି ବୋଲି ଭିତିରି ମହଲରେ ଚର୍ଚ୍ଚା ହେଉଛି। ତେବେ ଏହି ଚର୍ଚ୍ଚାରେ କେତେ ସତ୍ୟତା ରହିଛି ତାହା ଦେଖିବାକୁ ବାକି ରହିଲା।
ନିର୍ବାଚନ ପୂର୍ବରୁ ବଦଳିବେ ରାଜ୍ୟ କଂଗ୍ରେସ ସଭାପତି!
ଦଳୀୟ କର୍ମକର୍ତ୍ତା ଶରତ ପଟ୍ଟନାୟକଙ୍କ ନେତୃତ୍ବକୁ କରି ପାରୁନାହାନ୍ତି ହଜମ
ନିରଞ୍ଜନଙ୍କ ନେତୃତ୍ବରେ କଂଗ୍ରେସର ସାଧାରଣ ନିର୍ବାଚନ ସହ ସବୁ ଉପନିର୍ବାଚନରେ ପରାଜୟ
ଭାଇ ସୌମ୍ୟଙ୍କ ପାଇଁ ବିଜେଡିକୁ ଟକ୍କର ଦେବାକୁ ଦେଲେ ପଛଘୁଞ୍ଚା
ମେ ୨୦୨୨ରେ ଶରତ ପଟ୍ଟନାୟକଙ୍କୁ ଦିଆଗଲା ରାଜ୍ୟ କଂଗ୍ରେସ କମାଣ
ସ୍ଥିତି ଏମିତି ରହିଲେ ଦଳ ଗୋଟିଏ ବି ଆସନ ହାତେଇବ ନାହିଁ
ପୂର୍ବତନ ମନ୍ତ୍ରୀ ଭକ୍ତ ଦାସଙ୍କୁ ଚୟନ କରିଛି ଏଆଇସିସି
ଏମିତି ଜଣେ ରାଜ୍ୟର ନେତା ନାହାନ୍ତି, ଯାହାଙ୍କୁ ଦାୟିତ୍ବ ଦିଆଯାଇପାରିବ
ଦଳକୁ ନିର୍ବାଚନ ବର୍ଷରେ ଆହୁରି ବିପର୍ଯ୍ୟୟ ଆଡକୁ ଠେଲିଦେବ
ଦାସଙ୍କର ଜାତୀୟସ୍ତରରେ ରହିଛି ଭଲ ଦବଦବା
ଭକ୍ତଙ୍କର ଏଆଇସିସି ସହ ରହିଛି ସୁସମ୍ପର୍କ
କଂଗ୍ରେସକୁ ସୁଦୃଢ କରିବାକୁ ଭକ୍ତଙ୍କୁ ଆଶ୍ରା କରିଛି ଏଆଇସିସି
