ନିର୍ବାଚନୀ ପଶାପାଲିରେ ଗୋଟିଚାଳନା ଆରମ୍ଭ । ନିର୍ବାଚନ ବୈତରଣୀ ପାର ହେବା ପାଇଁ ଭୋଟର ମୁହାଁ ସବୁ ଦଳ। ଭୋଟରଙ୍କୁ ଆକୃଷ୍ଟ କରିବା ପାଇଁ ଚାଲିଛି ତୃଣମୂଳସ୍ତରରୁ ରଣନୀତି । ହେଲେ ଏବେଠୁ ରାଜନୀତିକ ଦଳ କହି ସାରିଲେଣି କାହା ହାତରେ ପଡିବ କେତେ ଭୋଟ? କାହାର ଟାଗେର୍ଟ କେତେ ? ବିଜେପି ୫୧ ପ୍ରତିଶତ ଟାର୍ଗେଟ୍ ଲକ୍ଷ୍ଯ ରଖିଥିବା ବେଳେ ଶାସକ ଦଳ କହୁଛି ୧୩୦ ଆସନର ଟାର୍ଗେଟ ରଖିଛି।
ଦିଲ୍ଲୀରୁ ଫେରିବା ପରେ ବିଜେପି ନେତାଙ୍କ ଭିତରେ ଜୋଶ୍ । ବିଜେପିର ରାଷ୍ଟ୍ରୀୟ ପଦାଧିକାରୀ ବୈଠକ ନିଷ୍ପତ୍ତି ଉପରେ ଓଡ଼ିଶାରେ ୫୧ ପ୍ରତିଶତ ଭୋଟ୍ ଟାର୍ଗେଟ ଉପରେ କାମ କରୁଛନ୍ତି ରାଜ୍ୟ ବିଜେପି। ସୂଚନା ଅନୁସାରେ ୨୨ ଜଣ ବିଧାୟକଙ୍କ ସହ ବିଳମ୍ବିତ ରାତି ପର୍ଯ୍ୟନ୍ତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ନଡ୍ଡା ବୈଠକ କରିଥିଲେ । ସାମ୍ପ୍ରତିକ ଜାତୀୟ ରାଜନୈତିକ ପାଣିପାଗକୁ ନଜରରେ ରଖି ୨୦୨୪ ନିର୍ବାଚନରେ ଓଡିଶାରେ ରେକର୍ଡ ବିଜୟ ପାଇଁ ରଣନୀତି ହୋଇଛି । ଲୋକସଭା ଓ ବିଧାନସଭା ପାଇଁ ଭିନ୍ନ ଭିନ୍ନ ରଣନୀତି ହେବ ସେ ନେଇ ଆଲୋଚନା ମଧ୍ୟ ହୋଇଛି । ଖୁବ୍ ଶୀଘ୍ର କେନ୍ଦ୍ରୀୟ ନେତୃତ୍ୱ ରାଜ୍ୟକୁ ଆସିବା ନେଇ ସୂଚନା ଦେଇଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ ।
ସେପଟେ ଶାସକଦଳ ବିଜେପିକୁ କଡା ସମାଲୋଚନା କରି କହିଛି ଯେ, କହିବାରେ କଷ୍ଟ କେଉଁଠି । ବିଜେପି ୧୪ ଓ ୧୯ ନିର୍ବାଚନ ବେଳେ ଭୋଟ ପ୍ରତିଶତକୁ ନେଇ ଏମିତି ସମାନ କଥା କହିଥିଲେ । ଗ୍ରାଉଣ୍ଡରେ ଲୋକଙ୍କର ମନୋଭାବ କଣ ଅଛି ତାକୁ ବୁଝିବାରେ ସେମାନେ ସମର୍ଥ ହୋଇ ପାରୁ ନାହାଁନ୍ତି । କିନ୍ତୁ ବିଜୁ ଜନତା ଦଳ ୧୩୦ରୁ ଅଧିକ ସିଟ ହାତେଇବ । ସଂଗଠନ ସମ୍ପାଦକ କର୍ମକର୍ତ୍ତା ଙ୍କୁ ସେ ନେଇ ଡାକରା ଦେଇଛନ୍ତି । ବିକାଶ ଆଧାରରେ ନବୀନ ପଟ୍ଟନାୟକଙ୍କୁ ଲୋକେ ଷଷ୍ଠ ଥର ଲାଗି ମୁଖ୍ୟମନ୍ତ୍ରୀ ଆସନରେ ବସେଇବା ପାଇଁ ମନସ୍ଥିର କରି ସାରିଛୁ । ବିରୋଧୀ ବ୍ଲକ ୱାରୀ, ନିର୍ବାଚନ ମଣ୍ଡଳୀ ୱାରୀ ଓ ସଂସଦୀୟ କ୍ଷେତ୍ର ୱାରୀ ରଣନୀତି କଲେ ବି ବିଜେଡି ଉପରେ ତାର କିଛି ପ୍ରଭାବ ପଡିବନି ବୋଲି କହିଛନ୍ତି ବିଜେଡି ବିଧାୟକ ସମୀର ଦାଶ ।
ତେବେ ନିର୍ବାଚନ ପୂର୍ବରୁ ରାଜନୀତିକ ଦଳମାନଙ୍କ ଅଙ୍କ କଷା ସାଧାରଣ ପ୍ରକ୍ରିୟା। ହେଲେ ଯଦି ଓଡ଼ିଶା ଭୋଟରଙ୍କୁ ନଜର ପକାଇବା ୨୦୧୯ ଇଲେକ୍ଟୋରାଲ୍ ଅନୁଯାୟୀ, ରାଜ୍ୟରେ ୩ କୋଟି ୨୪ଲକ୍ଷ ୬୮ହଜାର ୬3୬ ଭୋଟର ଥିଲେ, ଯେଉଁମାନଙ୍କ ମଧ୍ୟରୁ ୧ କୋଟି ୬୬ଲକ୍ଷ ୨୫ହଜାର ୫୫୫ ପୁରୁଷ, ୧କୋଟି ୫୮ଲକ୍ଷ ୪୦ ହଜାର ୧୩୮ ମହିଳା ଏବଂ ୨ ହଜାର ୯୪୩ ଟ୍ରାନ୍ସଜେଣ୍ଡର ରହିଥିଲେ। ସେହି ସମୟରେ ବିଜେପି ଚାଣକ୍ୟ ଅମିତ ସାହ ୧୨୦ ମିଶନ ପାଇଁ ଦୃଢୋକ୍ତି ପ୍ରକାଶ କରିଥିବା ବେଳେ କିନ୍ତୁ ଦଳ ୨୨ରେ ସୀମିତ ରହିଯାଇଥିଲା। ଏଥରକ ଦେଖିବାକୁ ରହିଲେ ଓଡିଶା ଭୋଟର ବିଜେପିକୁ କେତେ ଆସନରେ ବିଜୟ ଭେଟି ଦେଉଛି
