ଶଙ୍ଖ କ୍ଷେତ୍ରରୁ ଆରମ୍ଭ ଶଙ୍ଖ ନାଦ। ପୁରୀ ସଂସଦୀୟ କ୍ଷେତ୍ର ପ୍ରାର୍ଥୀ ଚୟନରୁ ଆରମ୍ଭ ହୋଇଛି ନିର୍ବାଚନୀ ଆକ୍ଟିଭିଟି। ସାଧାରଣ ନିର୍ବାଚନ ପାଇଁ ବିଗୁଲ ବାଜି ସାରିଛି।ନିର୍ବାଚନ ଆଚରଣ ବିଧି ଲାଗୁ ହୋଇଛି । ତେଣୁ ଆରମ୍ଭ ହୋଇଛି ବିଜେଡିର ଟିକଟ କସରତ । ନବୀନ ନିବାସରେ ପୁରୀ ସଂସଦୀୟ କ୍ଷେତ୍ରର ନେତାଙ୍କୁ ନେଇ ହୋଇଯାଇଛି ବୈଠକ । ମେଣ୍ଟ ଚର୍ଚ୍ଚା ଭିତରେ ବିଜୁ ଜନତା ଦଳ ପୁରୀ ଲୋକସଭା ଆସନ ଓ ଏହା ଅନ୍ତର୍ଗତ ୭ ବିଧାନସଭା କ୍ଷେତ୍ରରୁ କାହାକୁ ଟିକେଟ ଦେବ ଏବଂ କିଏ ବାଦ ବଡିବ ସେନେଇ ଆରମ୍ଭ ହୋଇଛି ଅଙ୍କକଷା ।
ବିଜେଡି ସୁପ୍ରିମୋଙ୍କ ଡକରାରେ ନବୀନ ନିବାସରେ ଭିଡ ଜମାଇଥିଲେ ଆଶାୟୀ ଓ ବସିଥିଲା ଗୁରୁତ୍ୱପୂର୍ଣ୍ଣ ବୈଠକ । ବୈଠକରେ 5ଟି ଅଧ୍ୟକ୍ଷ ଭିକେ ପାଣ୍ଡିଆନ, ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ, ହେଡକ୍ୱାର୍ଟର ସମ୍ପାଦକ ସଞ୍ଜୟ ଦାସବର୍ମା, ରାଜ୍ୟସଭା ସାଂସଦ ଶୁଭାଶିଷ ଖୁଣ୍ଟିଆ, ନୟାଗଡ଼ ବିଧାୟକ ଅରୁଣ ସାହୁ, ରଣପୁର ବିଧାୟକ ସତ୍ୟ ନାରାୟଣ ପ୍ରଧାନ, ସତ୍ୟବାଦୀ ବିଧାୟକ ଉମା ସାମନ୍ତରାୟ, ପିପିଲି ବିଧାୟକ ରୁଦ୍ର ପ୍ରତାପ ମହାରଥୀ ଓ ଜିଲ୍ଲାର ପର୍ଯ୍ୟବେକ୍ଷକ ଓ ବରିଷ୍ଠ ନେତା ଉପସ୍ଥିତ ଥିଲେ ।
ମୁଖ୍ୟମନ୍ତ୍ରୀ ପୁରୀ ସଂସଦୀୟ କ୍ଷେତ୍ରର ସାଙ୍ଗଠନିକ ସ୍ଥିତି ବିଷୟରେ ଆଲୋଚନା କରିଥିଲେ। ଏଥିସହ ଦଳୀୟ ନେତୃତ୍ବଙ୍କୁ ସବୁ ନିର୍ବାଚନ ମଣ୍ଡଳୀରେ ବିଜେଡିର ଶକ୍ତି ବୃଦ୍ଧି କରିବା, ଜନ ସାଧାରଣ ପାଖକୁ ଯିବା କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବା ଏବଂ ସାଂଗଠନିକ ପ୍ରକ୍ରିୟାକୁ ବଢ଼େଇବା ପାଇଁ ନିର୍ଦ୍ଦେଶ ଦେଇଥିଲେ । ବିଜେଡି ସଂଗଠନ କୁ କିଭଳି ମଜଭୁତ କରାଯିବ ଏବଂ ଦଳ ନିର୍ବାଚନକୁ କିପରି ସାମ୍ନା କରିବ ତା ଉପରେ ବୈଠକରେ ଆଲୋଚନା ହୋଇଥିବା ବେଳେ ପ୍ରାର୍ଥୀ ଚୟନକୁ ନେଇ ମୁଖ୍ୟମନ୍ତ୍ରୀ ଠିକଣା ସମୟରେ ନିଷ୍ପତ୍ତି ନେବେ ବୋଲି କହିଛନ୍ତି ବୈଠକରେ ଉପସ୍ଥିତ ବିଜେଡି ନେତୃତ୍ବ।
ସେପଟେ ମେଣ୍ଟକୁ ନେଇ ଦ୍ଵନ୍ଦ ଏବେ ବି ଜାରି ରହିଛି । ଯଦି ମେଣ୍ଟ ହୁଏ ବିଜେଡି ଖାତାକୁ କେଉଁ ଆସନ ଆସିବ, ସେଠାରେ କିପରି ସମୀକରଣ ତିଆରି ହେବ ଓ ଯଦି ମେଣ୍ଟ ନହୁଏ, ତେବେ ବିଜେଡିରୁ କିଏ କେଉଁ ଆସନରୁ ଲଢ଼ିବ ତା ଉପରେ ସମସ୍ତଙ୍କ ନଜର । ଅନ୍ୟପଟେ ୨୦୧୯ ସାଧାରଣ ନିର୍ବାଚନରେ ବିଜେଡି ହାତରୁ ପୁରୀ ସଦର, ବ୍ରହ୍ମଗିରି ବିଧାନସଭା ନିର୍ବାଚନ ମଣ୍ଡଳୀ ଖସି ବିଜେପି ଖାତାକୁ ଯାଇଥିଲା । ବିଜେପିର ଲୋକସଭା ପ୍ରାର୍ଥୀ ସମ୍ବିତ ପାତ୍ର ବିଜେଡିର ପିନାକୀ ମିଶ୍ରଙ୍କ ଠାରୁ ସ୍ଵଳ୍ପ ଭୋଟ ବ୍ୟବଧାନରେ ପରାଜିତ ହୋଇଥିଲେ । ତେଣୁ ଏସବୁ ଆସନ ବିଜେଡି ପାଇଁ ଚ୍ୟାଲେଞ୍ଜ ହୋଇ ଠିଆହୋଇଥିବାରୁ ଦଳ ଲୋକସଭା ଓ ୭ ବିଧାନସଭା ଆସନରେ ନିଜକୁ ସୁଦୃଢ କରିବା ଉପରେ ଗୁରୁତ୍ବ ଦେଇଛି।