Category: ରାଜ୍ୟ ଖବର

କୋରେଇ ରେଳ ଷ୍ଟେସନ ନିକଟରେ ଅଘଟଣ। ସୋମବାର ଅପରାହ୍ନ ସମୟରେ ଏକ ମାଲବାହୀ ଟ୍ରେନ ଏହି ରୁଟ ଦେଇ ଦେଇ ଯାଉଥିବା ବେଳେ କୋରେଇ ଷ୍ଟେସନ ନିକଟରେ ଇଞ୍ଜିନ୍ ରୁ ଡବା ଅଲଗା ହେଇଯାଇଥିଲା। ତେବେ ଏଥିରେ କୌଣସି କ୍ଷୟକ୍ଷତି ହେଇନଥିବା ଦେଖିବାକୁ ମିଳିଛି।

ସୂଚନା ଅନୁଯାୟୀ ସୋମବାର ଦିନ ଯାଜପୁର ରୋଡ ରେଳ ଷ୍ଟେସନରୁ ଭଦ୍ରକ ଅଭିମୁଖେ ଏକ ମାଳବାହୀ ଟ୍ରେନ ଯାଉଥିଲା । ହଠାତ କୋରେଇ ରେଳ ଷ୍ଟେସନର କିଛି ଦୂରରେ ଏହି ଟ୍ରେନର ଇଞ୍ଜିନରୁ ଡବା ଅଲଗା ହେଇଯାଇଥିଲା। ସୌଭାଗ୍ୟ ବଶତଃ ଏଥିରେ ସେମିତି କିଛି କ୍ଷତି ହେଇନଥିଲା।

ସେପଟେ ରେଳ ବିଭାଗ ପକ୍ଷରୁ ଏହି ଦୁର୍ଘଟଣାର ତଦନ୍ତ ଆରମ୍ଭ ହୋଇଛି। କିଛି ସମୟରେ ଇଞ୍ଜିନ ସହ ଡବା ଯୋଡାଯିବା ପରେ ଟ୍ରେନ ଭଦ୍ରକ ଅଭିମୁଖେ ଆଗେଇ ଯାଇଥିଲା

ଚମ୍ପୁଆ ରେଞ୍ଜ ଗୁରୁବେଡ଼ା ଅଞ୍ଚଳରେ ୧୭ ଟିକିଆ ହାତୀପଲଙ୍କ ଉପଦ୍ରବ ଦେଖିବାକୁ ମିଳିଛି , ହାତୀ ପଲଙ୍କୁ ଦେଖି ଲୋକେ ଭୟଭୀତ । ଗତ କାଲି ସନ୍ଧ୍ୟାରେ ଏହି ହାତୀପଲ, ଯୋଡ଼ା – ଜୁରୁଡ଼ି ରାସ୍ତାର ଗୁରୁବେଡ଼ା ଛକରେ ଦୁଇ ଘଣ୍ଟା ଧରି ଡେରା ପକାଇଥିଲେ, ଯାହାଫଳରେ ରାସ୍ତାର ଉଭୟ ପାର୍ଶ୍ଵରେ ଲୋକେ ଯାତାୟାତ ନ କରିପାରି ଦୀର୍ଘ ସମୟ ଧରି ଅଟକି ରହିଥିଲେ ।

ପରେ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ହାତୀପଲଙ୍କୁ ଜଙ୍ଗଲ ଭିତରକୁ ଘଉଡାଇବା ପରେ ରାସ୍ତାରେ ଯାତାୟତ ସ୍ଵାଭାବିକ ହୋଇଥିଲା । ଏବେ ଏହି ହାତୀପଲ ଗୁରୁବେଡ଼ା ପମ୍ପ ହାଉସ ନିକଟ ଜଙ୍ଗଲରେ ରହିଛନ୍ତି । ବନ କର୍ମଚାରୀ ହାତୀଙ୍କ ଗତିବିଧି ଉପରେ ନଜର ରଖିବା ସହ ଲୋକଙ୍କୁ ସତର୍କ କରାଉଛନ୍ତି ।

ସେପଟେ ହାତୀଙ୍କ ସୁରକ୍ଷା ଦୃଷ୍ଟିରୁ ଜୂରୁଡ଼ି ଅଞ୍ଚଳରେ ବିଦ୍ୟୁତ୍ କାଟ କରାଯାଇଛି । ଯୋଡ଼ା ସେକ୍ସନ୍ ବୈତରଣୀ ସଂରକ୍ଷିତ ଜଙ୍ଗଲରେ ଏହି ୧୭ ଟିକିଆ ହାତୀପଲ ଗତ କିଛିଦିନ ଧରି ଚଳପ୍ରଚଳ କରୁଥିବାବେଳେ, ଆଜି ଗୁରୁବେଡ଼ା ଛକ ନିକଟରେ ଡେରା ପକାଇଥିଲେ । ଏହି ହାତୀପଲ ମଧ୍ଯରେ ୪ଟି ଦନ୍ତା, ୭ଟି ମାଈହାତୀ ଓ ୬ଟି ଛୁଆହାତୀ ରହିଥିବା ବନ ବିଭାଗ କହିଛି ।

ଆଜି କେନ୍ଦୁଝରରେ ରେଳ ବନ୍ଦ, ଦୋକାନ ବଜାର ବନ୍ଦ, ରାସ୍ତା ଘାଟ ବନ୍ଦ। ଯୁଆଡେ ଦେଖିବ ସିଆଡେ ବନ୍ଦ। ଜିଲ୍ଲା ଟ୍ରକ୍ ମାଲିକ ସଂଘ ପକ୍ଷରୁ ନିଆଯାଇଥିବା ନିଷ୍ପତ୍ତି ଅନୁଯାୟୀ ବନ୍ଦ ପାଳନ କରାଯାଉଛି। OMC ଶୁଆକାଠି ଠାରୁ ଗୁହାଳଡ଼ିହି ପର୍ଯ୍ୟନ୍ତ ନୂତନ ପ୍ରସ୍ତାବିତ ରେଳ ଲାଇନକୁ ବିରୋଧ କରି ଜିଲା ଟ୍ରକ ମାଲିକ ସଂଘର ଏହି ବନ୍ଦ ପାଳନ। ଟ୍ରକ, ବସ , ଟ୍ରେନ ସହ ସରକାରୀ, ବେସରକାରୀ ଅନୁଷ୍ଠାନ ଗୁଡିକୁ ବନ୍ଦ କରାଯାଇଛି। କେନ୍ଦୁଝର ରେଳ ଷ୍ଟେସନ, ଜିଲାପାଳ ଅଫିସ ସମ୍ମୁଖ, ଗାନ୍ଧୀ ଛକ,ଓଏମ୍ସି ଶୁଆକାଠି, ସହିତ ଜିଲାର ବିଭିନ୍ନ ସ୍ଥାନରେ ଟ୍ରକ ମାଲିକ ସଂଘର କର୍ମକର୍ତ୍ତା ଉପସ୍ଥିତ ରହି ବନ୍ଦର ତଦାରଖ କରୁଛି।

କେନ୍ଦୁଝରର ବିଭିନ୍ନ ସ୍ଥାନରେ ରେଳ ଧାରଣା ଉପରେ ବସି ରେଳ ରୋକ କରିବା ସହ ଆନ୍ଦୋଳନକାରୀ ନାରାବାଜି ଦେଉଥିବା ଦେଖିବାକୁ ମିଳିଛି। ତେବେ ଜରୁରୀକାଳୀନ ସେବା ଓ ଅତ୍ୟାବଶ୍ୟକ ଯାତାୟାତକୁ ଏହି ବନ୍ଦରୁ ବାଦ ଦିଆଯାଇଛି। ଅନ୍ୟପଟେ ରେଳ ଯାତ୍ରା ପାଇଁ ଆସୁଥିବା ଯାତ୍ରୀ ଏହାକୁ ନେଇ ବହୁ ଅସୁବିଧା ଭୋଗୁଥିବା ଦେଖିବାକୁ ମିଳୁଛି। ଷ୍ଟେସନରେ ବହୁ ସଂଖ୍ଯାରେ ଲୋକ ଟ୍ରେନ ପାଇଁ ଅପେକ୍ଷା କରିଛନ୍ତି ତ କିଏ ଟ୍ରେନରୁ ଓହ୍ଲାଇ କୌଣସି ସ୍ଥାନକୁ ଯିବା ପାଇଁ ବସ, ଅଟୋ ନ ପାଇ ହନ୍ତସନ୍ତ ହେଉଛନ୍ତି।

ଏଠାରେ ସୂଚନା ଯୋଗ୍ୟ, କେନ୍ଦୁଝର ଜିଲ୍ଲା ଶୁଆକାଠି ସ୍ଥିତ ଗନ୍ଧମାର୍ଦ୍ଦନ ମାଇନ୍ସ ଠାରୁ ଗୁହାଳଡ଼ିହି ପର୍ଯ୍ୟନ୍ତ ଟ୍ରେନ ଲାଇନ ପ୍ରକଳ୍ପ ପାଇଁ ବଜେଟରେ ବ୍ୟୟ ବରାଦ ପରେ କେନ୍ଦ୍ର ସରକାର ଦ୍ୱାରା ପ୍ରସ୍ତାବ ଅନୁମୋଦିତ ହୋଇଛି । ଯାହାକି ସିଧା ସଳଖ କେନ୍ଦୁଝର ଜିଲ୍ଲା ର ଭାତ ହାଣ୍ଡି କୁହାଯାଉଥିବା ଟ୍ରକ ବ୍ୟବସାୟ ଉପରେ ପକାଇଛି ପ୍ରଭାବ । ଜିଲ୍ଲାର ୩୦ ହଜାର ଟ୍ରକ ମାଲିକଙ୍କ ସମେତ ପ୍ରତ୍ୟକ୍ଷ ଓ ପରୋକ୍ଷ ଭାବରେ ୩ ଲକ୍ଷ ଲୋକ ଏହାଦ୍ୱାରା କ୍ଷତିଗ୍ରସ୍ତ ହେବାକୁ ଥିବାରୁ ଜିଲ୍ଲାର ସମସ୍ତ ଟ୍ରକ୍ ମାଲିକ ସଂଘ ଏହି ପ୍ରସ୍ତାବ ପ୍ରତ୍ୟାହାର କରିବାକୁ ଦାବି କରି ଆଜି ବନ୍ଦ ପାଳୁଛନ୍ତି। ଏଥିରେ ବସ ମାଲିକ ସଂଘ ,ବଣିକ ସଂଘ ସହ ୧୫ ଉର୍ଦ୍ଧ୍ବ ବିଭିନ୍ନ ସଙ୍ଗଠନ ସମର୍ଥନ ଦେଇଛନ୍ତି ।