Category: ଦେଶ-ବିଦେଶ

କେନ୍ଦ୍ର ସରକାରଙ୍କ ବିରୋଧରେ ବିରୋଧୀଙ୍କୁ ଏକାଠି କରୁଥିବା ତଥା ବିହାର ମୁଖ୍ୟମନ୍ତ୍ରୀ ନିତିଶ କୁମାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି । ଗସ୍ତ ପୂର୍ବରୁ ସମସ୍ତେ ଭାବୁଥିଲେ ମେଣ୍ଟ ସରକାର ଗଠନ ପାଇଁ ଆଲୋଚନା କରିବାକୁ ଆସୁଛନ୍ତି ନିତିଶ । ମୋଦି ସରକାର ବିରୋଧରେ ଆଞ୍ଚଳିକ ଦଳ ଗୁଡ଼ିକୁ ଏକାଠି କରିବାରେ ଲାଗିଛନ୍ତି ନିତିଶ । ଏଥିରେ ତାଙ୍କର କିଛି ବ୍ୟକ୍ତିଗତ ସ୍ୱାର୍ଥ ନାହିଁ ବୋଲି ସେ କହିଥିଲେ । ତେବେ ବିଜେପି ସରକାରକୁ ହଟାଇବା ପାଇଁ ସେ ଉଦ୍ୟମ ଜାରି ରଖିଛନ୍ତି ।

ଆଜି ନିତିଶ କୁମାର ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ତାଙ୍କୁ ସ୍ୱାଗତ କରିଥିଲେ ମନ୍ତ୍ରୀ ଅଶୋକ ପଣ୍ଡା ଓ ବିଧାୟକ ଦେବୀ ମିଶ୍ର । ନିତିଶଙ୍କ ସ୍ବାଗତ ପାଇଁ ନବୀନ ନିବାସରେ ସ୍ୱତନ୍ତ୍ର ବ୍ୟବସ୍ଥା କରାଯାଇଥିଲା । ବିମାନ ବନ୍ଦରରୁ ସିଧାସଳଖ ନବୀନ ନିବାସ ଯାଇଥିଲେ ନିତିଶ । ସେଠାରେ ତାଙ୍କୁ ସ୍ୱାଗତ କରାଯାଇଥିବା ବେଳେ ମଧ୍ୟାହ୍ନ ଭୋଜନର ବ୍ୟବସ୍ଥା ହୋଇଥିଲା । ଭୋଜନରେ ଓଡ଼ିଆ ଖାଦ୍ୟ ପରଷା ଯାଇଥିଲା । ନିତିଶ,ନବୀନ ଏବଂ ଭି.କେ.ପାଣ୍ଡିଆନ ଏକାଠି ଖାଇଥିଲେ ।

ବିହାର ମୁଖ୍ୟମନ୍ତ୍ରୀ ନିତିଶ କୁମାର ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଢ଼ ଘଣ୍ଟା ଆଲୋଚନା କରିଥିଲେ। କିନ୍ତୁ ଏଥିରେ ରାଜନୀତି ନଥିଲା କି ମେଣ୍ଟ ଆଲୋଚନା ହୋଇନି । ପ୍ରେସମିଟରେ ଏଭଳି କହିଛନ୍ତି ମୁଖ୍ୟମନ୍ତ୍ରୀ । ସେପଟେ ନବୀନ ଓ ନିତିଶ ପୁରୁଣା ବନ୍ଧୁ। ବାଜପେୟୀ ସରକାର ବେଳୁ ସେମାନେ ପରସ୍ପରକୁ ଜାଣିଛନ୍ତି । ସେ ବିଜୁ ବାବୁଙ୍କୁ ଜାଣିଥିବା କହିଛନ୍ତି ନିତିଶ । ଅନେକ ବିହାରୀ ଜଗନ୍ନାଥ ଭକ୍ତ ପୁରୀ ଆସୁଛନ୍ତି । ତେଣୁ ସେଠାରେ ବିହାର
ଭବନ ପାଇଁ ନବୀନ ଦେଢ଼ ଏକର ଜାଗା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି । ଏହା ଏକ ସୌଜନ୍ୟମୂଳକ ସାକ୍ଷାତ ଥିଲା, ଏକାଠି ଖାଇଥିବା ନେଇ କହିଲେ ନିତିଶ କୁମାର । ସାକ୍ଷାତକାର କେବଳ ପାରିବାରିକ ବୋଲି ସେ କହିଛନ୍ତି ।

ଦେଶରେ ନବୀନଙ୍କ ଲୋକପ୍ରିୟତା ବଢ଼ିବାରେ ଲାଗିଛି । ରାଜ୍ୟର ବିକାଶ ପାଇଁ ନବୀନଙ୍କ ପଦକ୍ଷେପ, ବିଭିନ୍ନ ଯୋଜନା ତଥା ତାଙ୍କର ଭାବମୂର୍ତ୍ତି ଅନ୍ୟମାନଙ୍କ ଉପରେ ପ୍ରଭାବ ପକାଇଛି । ଦେଶରେ ମେଣ୍ଟ ସରକାର ଗଠନ ପାଇଁ ବିଜେପି ବିରୋଧୀ ଗୋଷ୍ଠୀ ଉଦ୍ୟମ ଜାରି ରଖିଛନ୍ତି । ସେଥିପାଇଁ ମମତା ବାନାର୍ଜୀ, ନିତିଶ କୁମାରଙ୍କ ପରି ନେତାମାନେ ନବୀନଙ୍କ ସହ ଆଲୋଚନା କରୁଛନ୍ତି । ପୂର୍ବରୁ ଅନେକ ନେତା ନବୀନ ନିବାସ ଆସିଛନ୍ତି ହେଲେ ଥାର୍ଡ ଫ୍ରଣ୍ଟ ଗଠନ ନେଇ ମୁଖ୍ୟମନ୍ତ୍ରୀ କୌଣସି ଗ୍ରୀନ ସିଗନାଲ ଦେଇନାହାଁନ୍ତି ।

କେରଳର ମଲପ୍ପୁରମ ଜିଲ୍ଲାରେ ୨୫ରୁ ଅଧିକ ଲୋକଙ୍କୁ ନେଇ ଯାଉଥିବା ଏକ ଡଙ୍ଗା ଓଲଟି ପଡିବାରୁ ପାଣିରେ ବୁଡ଼ିଯିବା ଅତି କମରେ ୨୧ ଜଣ ଲୋକଙ୍କ ମୃତ୍ୟୁ ହୋଇଛି । ମେ ୭ ତାରିଖ ପାଖାପାଖି ସନ୍ଧ୍ୟା ୭ଟା ସମୟରେ ତନ୍ନୁରର ତୁଭାଲ ତେରମ ପର୍ଯ୍ୟଟନ ସ୍ଥଳରେ ଏହି ଦୁର୍ଘଟଣା ଘଟିଛି । ଆଞ୍ଚଳିକ ଫାୟାର ରେଞ୍ଜ ଅଧିକାରୀ ସିଜୁ କେ.କେ କହିଛନ୍ତି ଯେ, ଏପର୍ଯ୍ୟନ୍ତ ୨୧ଟି ମୃତଦେହ ଉଦ୍ଧାର କରାଯାଇଛି । ଏପର୍ଯ୍ୟନ୍ତ ଡଙ୍ଗାରେ କେତେଜଣ ବସିଥିଲେ ତାର ବାସ୍ତବ ସଂଖ୍ୟା ଜଣାପଡି ନାହିଁ । ତେଣୁ ଏପର୍ଯ୍ୟନ୍ତ ସର୍ଚ୍ଚ ଅପରେସନ ଜାରି ରହିଛି ।

ଘଟଣା ଜଣାପଡିବା ମାତ୍ରେ ଅନେକ ଗାଡି ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । କେରଳ ସ୍ୱାସ୍ଥ୍ୟମନ୍ତ୍ରୀ ବିନା ଜର୍ଜ ମଧ୍ୟରାତ୍ରିରେ ରାଜ୍ୟ ସ୍ୱାସ୍ଥ୍ୟ ବିଭାଗର ଜରୁରୀକାଳିନ ବୈଠକ ଡାକି ଆହତଙ୍କୁ ଉତ୍ତମ ଚିକିତ୍ସା ସୁନିଶ୍ଚିତ କରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ପୋଷ୍ଟମର୍ଟମ ପ୍ରକ୍ରିୟାକୁ ତ୍ୱରାନ୍ୱିତ କରିବା ଏବଂ ଆହତମାନଙ୍କୁ ଉତ୍ତମ ଚିକିତ୍ସା ପାଇଁ ସ୍ୱାସ୍ଥ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ସୋମବାର ସକାଳ ୬ଟାରୁ ବ୍ୟବଚ୍ଛେଦ ଆରମ୍ଭ କରିବାକୁ ମନ୍ତ୍ରୀ କଡା ନିର୍ଦ୍ଦେଶ ଦେଇଛନ୍ତି ।

ରବିବାର ଦିନ କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟନ ମଲପ୍ପୁରମରେ ଡଙ୍ଗା ବୁଡ଼ିଯିବା ଘଟଣାରେ ପ୍ରାଣ ହରାଇଥିବା ବ୍ୟକ୍ତିଙ୍କ ପାଇଁ ଶୋକ ବ୍ୟକ୍ତ କରିବ ସହିତ ଉଦ୍ଧାର କାର୍ଯ୍ୟକୁ ପ୍ରଭାବଶାଳୀ କରିବାକୁ ନିର୍ଦ୍ଦେଶ ଦେଇଛନ୍ତି । ସିଏମ ପିନାରାଇ ବିଜୟନ କହିଛନ୍ତି, “ମଲପ୍ପୁରମରେ ତନୁର ଡଙ୍ଗା ଦୁର୍ଘଟଣାରେ ପ୍ରାଣ ହରାଇଥିବା ଲୋକଙ୍କ ପାଇଁ ମୁଁ ଦୁଃଖିତ । କ୍ୟାବିନେଟ ମନ୍ତ୍ରୀଙ୍କ ଦ୍ବାରା ତଦାରଖ କରାଯାଉଥିବା ବେଳେ ଉଦ୍ଧାର କାର୍ଯ୍ୟକୁ ତ୍ବରିତ କରିବା ପାଇଁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛି । ଟ୍ବିଟ ମାଧ୍ୟମରେ ମୃତକଙ୍କ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି ମୁଖ୍ୟମନ୍ତ୍ରୀ ପିନାରାଇ ।

ଏହି ଘଟଣାରେ ଲୋକଙ୍କ ମୃତ୍ୟୁକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଦୁଃଖ ପ୍ରକାଶ କରିଛନ୍ତି ଏବଂ ମୃତକଙ୍କ ପରିବାରକୁ ଦୁଇ ଲକ୍ଷ ଟଙ୍କା ଲେଖାଏଁ କ୍ଷତିପୂରଣ ଘୋଷଣା କରିଛନ୍ତି । ଏଥିସହ ସେ ଟ୍ୱିଟ୍ କରି ନିଜର ଦୁଃଖ ପ୍ରକାଶ କରିଛନ୍ତି । ପ୍ରତ୍ୟେକ ମୃତକଙ୍କ ସମ୍ପର୍କୀୟଙ୍କୁ PMNRFରୁ ୨ ଲକ୍ଷ ଟଙ୍କା ଏକ୍ସ-ଗ୍ରାଟିଆ ରାଶି ପ୍ରଦାନ କରାଯିବ ।

ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଧ୍ୟ ମଲାପୁରାମରେ ଡଙ୍ଗା ବୁଡ଼ିଯିବା ଘଟଣାରେ ନିଜ ପ୍ରିୟଜନଙ୍କୁ ହରାଇଥିବା ପରିବାର ପ୍ରତି ସମବେଦନା ଜଣାଇଛନ୍ତି। ରାଷ୍ଟ୍ରପତି ମୁର୍ମୁ ଟୁଇଟ୍ କରି କହିଛନ୍ତି, “କେରଳର ମଲାପ୍ପୁରମ ଡଙ୍ଗା ଦୁର୍ଘଟଣାରେ ଲୋକଙ୍କ ଦୁଃଖଦ ମୃତ୍ୟୁ ଅତ୍ୟନ୍ତ ଚକିତ କଲାଭଳି ଏବଂ ଦୁଃଖଦାୟକ । ପ୍ରିୟଜନଙ୍କୁ ହରାଇଥିବା ପରିବାରବର୍ଗଙ୍କୁ ମୋର ହୃଦୟରୁ ସମବେଦନା ଜଣାଉଛି । ଦୁର୍ଘଟଣାରେ ବର୍ତ୍ତିଯାଇଥିବା ଲୋକଙ୍କ ମଙ୍ଗଳ ପାଇଁ ମୁଁ ପ୍ରାର୍ଥନା କରୁଛି ।”