କଟକ ଜିଲ୍ଲାର ମାହାଙ୍ଗା ବ୍ଲକର ଜଣେ ପରିଚିତ ଯୁବ ସାମ୍ବାଦିକ ଏବଂ ବିଭିନ୍ନ ସମ୍ବାଦପତ୍ରର ବ୍ଲକ ପ୍ରତିନିଧି ଭାବେ ଦୀର୍ଘଦିନ ଧରି କାର୍ଯ୍ୟରତ ଥିବା ଦୀପକ କୁମାର ସାହୁଙ୍କ ଅକାଳ ବିୟୋଗ ସମଗ୍ର ମାହାଙ୍ଗା ଅଞ୍ଚଳ ପାଇଁ ଏକ ଅପୂରଣୀୟ କ୍ଷତି ସୃଷ୍ଟି କରିଛି। ତାଙ୍କର ପରଲୋକ ଖବର ପ୍ରଚାରିତ ହେବା ପରେ ସାମ୍ବାଦିକ ମହଳ, ସାମାଜିକ ସଂଗଠନ ଓ ସ୍ଥାନୀୟ ବୁଦ୍ଧିଜୀବୀଙ୍କ ମଧ୍ୟରେ ଗଭୀର ଶୋକର ଛାୟା ଖେଳିଯାଇଛି।
ଜଣେ ନିଷ୍ଠାବାନ, କର୍ମଠ ଓ ଜନସମସ୍ୟା ପ୍ରତି ସଦା ସଚେତନ ସାମ୍ବାଦିକ ଭାବେ ଦୀପକ କୁମାର ସାହୁ ମାହାଙ୍ଗା ଅଞ୍ଚଳରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ। ସାଧାରଣ ଲୋକଙ୍କ ସମସ୍ୟାକୁ ପ୍ରଶାସନ ନିକଟରେ ପହଞ୍ଚାଇବା ଓ ଅଞ୍ଚଳର ବିଭିନ୍ନ ଘଟଣାବଳୀକୁ ନିର୍ଭୀକ ଭାବରେ ପରିବେଷଣ କରିବାରେ ସେ ସର୍ବଦା ଆଗରେ ରହୁଥିଲେ। ସାମ୍ବାଦିକତା ପ୍ରତି ତାଙ୍କର ଅକୁଣ୍ଠ ସମର୍ପଣ ଓ ନିଷ୍ଠା ତାଙ୍କୁ ସମସ୍ତଙ୍କ ପ୍ରିୟପାତ୍ର କରିଥିଲା।କିଛିଦିନ ଧରି ସେ ଗୁରୁତର ଅସୁସ୍ଥ ଥିବାବେଳେ ଟାଙ୍ଗୀ ସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଥିଲେ। ଚିକିତ୍ସା ଚାଲିଥିବା ସମୟରେ ତାଙ୍କର ପରଲୋକ ଘଟିଥିଲା। ତାଙ୍କର ଅକାଳ ବିୟୋଗରେ ପରିବାର ସଦସ୍ୟଙ୍କ ସହିତ ସମଗ୍ର ସାମ୍ବାଦିକ ଜଗତ ମର୍ମାହତ ହୋଇପଡ଼ିଛି।ସ୍ୱର୍ଗତ ସାହୁଙ୍କ ସ୍ମୃତି ଉଦ୍ଦେଶ୍ୟରେ ମାହାଙ୍ଗା ବ୍ଲକର ବଣୁଆସ୍ଥିତ ମହାପୁରୁଷଙ୍କ ପୀଠରେ ଏକ ସ୍ମୃତି ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଥିଲା। ମାହାଙ୍ଗା ଅଞ୍ଚଳର ସମସ୍ତ ସାମ୍ବାଦିକ, ସାମ୍ବାଦିକା, ସମାଜସେବୀ ଓ ବୁଦ୍ଧିଜୀବୀମାନେ ଏହି ସଭାରେ ଯୋଗଦେଇ ସ୍ୱର୍ଗତ ସାହୁଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
ବରିଷ୍ଠ ସାମ୍ବାଦିକ ଅଖିଳେଶପଦ ମହାନ୍ତିଙ୍କ ସଭାପତିତ୍ୱରେ ଆୟୋଜିତ ଏହି ଶୋକସଭାରେ ବରିଷ୍ଠ ସାମ୍ବାଦିକ ରଶ୍ମିରଞ୍ଜନ ମହାନ୍ତି, ବିଜୟ ଜେନା, ତାପସ ବିଶ୍ୱାଳଙ୍କ ସମେତ ଅନ୍ୟାନ୍ୟ ବକ୍ତାମାନେ ଯୋଗଦେଇ ସ୍ୱର୍ଗତ ଦୀପକ କୁମାର ସାହୁଙ୍କ ଜୀବନ, କର୍ମ ଓ ସାମ୍ବାଦିକତା କ୍ଷେତ୍ରରେ ତାଙ୍କ ଅବଦାନ ଉପରେ ଆଲୋକପାତ କରିଥିଲେ। ବକ୍ତାମାନେ କହିଥିଲେ ଯେ, ଦୀପକ ସାହୁ କେବଳ ଜଣେ ସାମ୍ବାଦିକ ନୁହେଁ, ବରଂ ଜନସାଧାରଣଙ୍କ ସ୍ୱର ଭାବେ କାର୍ଯ୍ୟ କରୁଥିଲେ। ତାଙ୍କର ମୃଦୁଭାଷୀ ସ୍ୱଭାବ, ସହଯୋଗୀ ମନୋଭାବ ଓ ସମାଜ ପ୍ରତି ଦାୟିତ୍ୱବୋଧ ସମସ୍ତଙ୍କୁ ସଦା ପ୍ରେରଣା ଯୋଗାଇବ।
ସଭାରେ ଉପସ୍ଥିତ ସମସ୍ତେ ଦୁଇ ମିନିଟ ନିରବ ପ୍ରାର୍ଥନା କରି ସ୍ୱର୍ଗତ ଆତ୍ମାର ସଦ୍ଗତି କାମନା କରିଥିଲେ। ଏହାସହ ଶୋକସନ୍ତପ୍ତ ପରିବାରବର୍ଗଙ୍କୁ ଏହି ଦୁଃଖଦ ସମୟରେ ଧୈର୍ଯ୍ୟ ଓ ଶକ୍ତି ପ୍ରଦାନ କରିବାକୁ ଈଶ୍ୱରଙ୍କ ନିକଟରେ ପ୍ରାର୍ଥନା କରାଯାଇଥିଲା।ଦୀପକ କୁମାର ସାହୁଙ୍କ ବିୟୋଗ ସହିତ ମାହାଙ୍ଗା ଅଞ୍ଚଳ ଜଣେ ସଚେତନ, ନିଷ୍ଠାବାନ ଓ ଜନମୁଖୀ ସାମ୍ବାଦିକଙ୍କୁ ହରାଇଛି। ତାଙ୍କର କର୍ମମୟ ଜୀବନ, ସାମ୍ବାଦିକତା ପ୍ରତି ଅବଦାନ ଓ ସମାଜସେବାର ସ୍ମୃତି ସଦାସର୍ବଦା ମାହାଙ୍ଗାବାସୀଙ୍କ ହୃଦୟରେ ଅମ୍ଳାନ ହୋଇ ରହିବ।