କୋରାପୁଟ ଜିଲ୍ଲା ବୈପାରୀଗୁଡା ଥାନା ଅଧୀନ ଗୁପ୍ତେଶ୍ୱର ଶୈବପୀଠ ପାଖରେ ଥିବା ସୁକୁନାଳ ନିକଟରେ ଜଣେ ମହିଳାଙ୍କର କ୍ଷତ-ବିକ୍ଷତ ଶବକୁ ପୋଲିସ ଜବତ କରିଛି । ବୁଧବାର ରାତିରେ ମହିଳାଙ୍କ ଶବ ସୁକୁନାଳ ନିକଟରେ ପଡିଥିବାର ସୂଚନା ପାଇବାପରେ ଘଟଣାସ୍ଥଳରେ ପହଞ୍ଚି ପୋଲିସ ଶବକୁ ଠାବ କରିଥିଲା । ବର୍ତ୍ତମାନ ସୁଦ୍ଧା ମୃତ ମହିଳାଙ୍କ ପରିଚୟ ଜଣା ପଡିନାହିଁ । ମହିଳାଙ୍କ ଶରୀରର ବିଭିନ୍ନ ଅଂଶ ଏବଂ ବେକରେ ଧାରୁଆ ଅସ୍ତ୍ର ଦ୍ୱାରା ହୋଇଥିବା ଆକ୍ରମଣର ଚିହ୍ନ ସ୍ପଷ୍ଟ ବାରି ହେଉଛି । ତେବେ, ସାଧାରଣରେ ଏହା ଆତ୍ମହତ୍ୟା ନୁହଁ ବରଂ ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଚର୍ଚ୍ଚା ହେଉଛି । ମହିଳାଙ୍କୁ ହତ୍ୟା କରିବା ପରେ ଫିଙ୍ଗି ଦିଆଯାଇଥିବା କିମ୍ବା ଶବ ପଡିଥିବା ସ୍ଥାନକୁ ଆଣି ହତ୍ୟା କରାଯାଇଥିବାର ସନ୍ଦେହ କରାଯାଉଛି । ତେବେ ବୈପାରୀଗୁଡା ଥାନାରେ, ଏପର୍ଯ୍ୟନ୍ତ କୌଣସି ବ୍ୟକ୍ତି ନିରୁଦ୍ଧିଷ୍ଟ ଥିବା କିମ୍ବା ହତ୍ୟାକାଣ୍ଡକୁ ନେଇ ଅଭିଯୋଗ କରିନାହାନ୍ତି । ତେଣୁ ମୃତ ମହିଳା ଜଣଙ୍କ କିଏ ଓ ତାଙ୍କୁ କିଏ, କାହଁକି ହତ୍ୟା କରିଥିଲେ ତାକୁ ନେଇ ବୈପାରୀଗୁଡା ପୋଲିସ ତଦନ୍ତ ଜୋରଦାର କରିଛି ।