Month: May 2023

ଶେଷ ବଲରେ ଚୌକା,କୋଲକାତାକୁ ଜିତାଇ ପୁଣି ହିରୋ ବନିଲେ ରିଙ୍କୁ

IPLରେ ଗୁଜରାଟ ପରେ ପଞ୍ଜାବର ପାଳି । ରିଙ୍କୁ ସିଂଙ୍କ ପ୍ରହାରରୁ ବର୍ତ୍ତିପାରିଲାନି ଦଳ । ଶେଷରେ କୋଲକାତାକୁ ପୁଣି ଏକ ବିଜୟ ଭେଟି ଦେଇଛନ୍ତି ରିଙ୍କୁ ସିଂ । ଏବେ ପ୍ଲେ ଅଫ୍ ଖେଳିବା ପାଇଁ କେକେଆର୍ ଆଶା ଉଜ୍ଜିବୀତ ରହିଛି ।

କୋଲକାତାରେ ଇଡେନ୍ ଗାର୍ଡେନ । କୋଲକାତା ପାଇଁ ୧୮୦ ରନ୍ ଟାର୍ଗେଟ୍ ରଖିଥିଲା ପଞ୍ଜାବ । ଧୂଆଁଧାର ବ୍ୟାଟିଂ ଆରମ୍ଭ କରିଥିଲେ ଜସନ ରୟ ଏବଂ ଗୁରବାଜ । ତେବେ ରୟ ୨୪ ବଲରୁ ୩୮ ଏବଂ ୧୨ ବଲରୁ ୧୫ ରନ୍ କରି ପ୍ୟାଭିଲିୟନ ଫେରିଥିଲେ । ଅଧିନାୟକ ନିତିଶ ରାଣା ୩୮ ବଲରୁ ୫୧ ଏବଂ ଭେଙ୍କେଟସ୍ ଆୟର ମାତ୍ର ୧୧ ରନ୍ କରି ଆଉଟ୍ ହୋଇଥିଲେ । ତେବେ ବିପଦ ବେଳେ ଟିମ୍ ପାଇଁ ସାହାରା ବନିଥିଲେ ଦୁଇ ବିସ୍ଫୋରକ ବ୍ୟାଟସମ୍ୟାନ୍ ରସେଲ ଏବଂ ରିଙ୍କୁ ସିଂ । ୨୩ ବଲରୁ ୩ଟି ଛକା ଏବଂ ୩ଟି ଚୌକା ସହାୟତାରେ ୪୨ ରନର ବିସ୍ଫୋରକ ଇନିଂସ ଖେଳିଥିଲେ ରସେଲ ।

ଶେଷ ଓଭରରେ କୋଲକାତାକୁ ବିଜୟ ପାଇଁ ୬ ବଲରେ ୬ ରନ୍ ଆବଶ୍ୟକ ଥିଲା । ରସେଲଙ୍କୁ ବୋଲିଂ କରିଥଲେ ଅର୍ଶଦୀପ । ପ୍ରଥମ ବଲ୍ ଫେଲ୍ ମାରିଥିଲା । ଦ୍ୱିତୀୟ ବଲ୍ ଏବଂ ତୃତୀୟ ବଲରେ ମାତ୍ର ୨ ରନ୍ ଆସିଥିବା ବେଳେ ଚତୁର୍ଥ ବଲରେ ଦଳକୁ ମିଳିଥିଲା ମାତ୍ର ୨ ରନ୍ । ପଞ୍ଚମ ବଲରେ କିନ୍ତୁ ରନ୍ ଆଉଟ୍ ହୋଇଥିଲେ ବିସ୍ଫୋରକ ରସେଲ୍ । ମ୍ୟାଚ୍ ରୋମାଞ୍ଚକ ସ୍ଥିତିରେ । କିଏ ଜିତିବ ସେ ନେଇ ଦର୍ଶକ ହୋହଲ୍ଲା ବି ବନ୍ଦ । ସମସ୍ତେ ସ୍ତବ୍ଧ । କାହାର ବାଜିମାତ୍ ହେବ, ସେଇ ନେଇ ସସପେନ୍ସରେ ଦର୍ଶକ ।

କୋଲକାତାକୁ ବିଜୟ ପାଇଁ ୧ ବଲରେ ଆବଶ୍ୟକ ଥିଲା ୨ ରନ୍ । ସାମ୍ନାରେ ଥିଲେ ବ୍ୟାଟସମ୍ୟାନ୍ ରିଙ୍କୁ ସିଂ । ଅର୍ଶଦୀପ ସିଂ ବି ପୁରା ଯୋଶରେ ବୋଲିଂ କଲେ । ହେଲେ ଶେଷ ବଲ୍ କିନ୍ତୁ ଅର୍ଶଦୀପଙ୍କୁ ଅଡୁଆରେ ପକାଇଲା । ଫୁଲ୍ ଟସ୍ ବଲକୁ ଚୌକା ମାରିଲେ ରିଙ୍କୁ । କେହି ଅଟକାଇପାରିଲାନି । ଚୌକା ମାରି ଦଳକୁ ପୁଣି ଏକ ବିଜୟ ଭେଟି ଦେଲେ ରିଙ୍କୁ ସିଂ । ଅପରାଜିତ ୧୦ ବଲରୁ ୨ଟି ଚୌକା ଏବଂ ଗୋଟିଏ ଛକା ସହାୟତାରେ ୨୧ ରନର ଇନିଂସ ଖେଳି ସେ ଟିମକୁ ପୁଣି ଥରେ ବିଜୟୀ କରାଇଛନ୍ତି । ବେଷ୍ଟ ଫିନିସର ଭାବେ କୋଲକାତା ପାଇଁ ପୁଣି ଥରେ ଲକି ପ୍ଲେୟାର ବନିଛନ୍ତି ଏହି ବିସ୍ଫୋରକ ବ୍ୟାଟସମ୍ୟାନ୍ ।

କିଛି ଦିନ ପୂର୍ବେ ଗୁଜରାଟ ବିପକ୍ଷରେ ଶେଷ ୫ ବଲରେ ଲଗାତାର ୫ଟି ଛକା ମାରି କୋଲକାତାକୁ ଜିତାଇଥିଲେ । ଗୁଜରାଟ ହାତରୁ ମ୍ୟାଚ୍ ଛଡ଼ାଇ ଆଣିଥିଲେ ରିଙ୍କୁ । ବିସ୍ଫୋରକ ବ୍ୟାଟିଂ କରି ଦଳକୁ ଅବିଶ୍ୱାସନୀୟ ବିଜୟ ଭେଟି ଦେଇଥିଲେ । ଆଉ ରାତାରାତି ସେ ଷ୍ଟାର ପାଲଟି ଯାଇଥିଲେ । ଏବେ ପଞ୍ଜାବ ବିପକ୍ଷରେ ଦଳ ଭଲ ସ୍ଥିତିରେ ଥିଲା କିନ୍ତୁ ଶେଷ ବଲରେ ସ୍ଥିତି ବେଶ୍ ରୋମାଞ୍ଚକ ହୋଇଥିଲା । ରିଙ୍କୁ ଏହି ମୌକାର ଫାଇଦା ନେଇ ଚୌକା ମାରିବା ସହ ପଞ୍ଜାବ ହାତରୁ ମ୍ୟାଚ୍ ଛଡ଼ାଇ ନେଲେ ।
ମା’ଙ୍କୁ ମୁଖାଗ୍ନି ଦେଲା ଝିଅ, ପଚାରିଲେନି ୩ ପୁଅ

ଦୃଶ୍ୟ ଦେଖିବା ଭାରି କଷ୍ଟକର । ପୁଅ କାହାପାଇଁ,କାହାର ସେବା କରିବାକୁ ସେମାନେ ଜନ୍ମ । ଯେଉଁ ମା’ଦଶ ମାସ ଗର୍ଭରେ ଧରି, କଷ୍ଟ ଯନ୍ତ୍ରଣା ସହି ପୁଅକୁ ଜନ୍ମଦିଏ ଆଉ ଦୁନିଆ ଦେଖାଏ ଶେଷରେ କ’ଣ ଏମିତି କିଛି ଆଶା ରଖେ । ବାର୍ଦ୍ଧକ୍ୟ ଅବସ୍ଥାରେ ମା’ର ମୃତ୍ୟୁ ପରେ ପୁଅଙ୍କ ଅବହେଳା ନିହାତି ନିନ୍ଦନୀୟ । ଏଭଳି ଦୁଃଖଦ ଘଟଣା ଘଟିଛି କେନ୍ଦୁଝର ତେଲକୋଇ ଥାନା ସଲେଇକେନା ଗାଁରେ ।

ଯୋଡ଼ା ବ୍ଲକ୍ ମରସୁଆଁ ଗାଁର ମୁକୁନ୍ଦ ନାଏକଙ୍କ ୮୦ ବର୍ଷୀୟ ସ୍ତ୍ରୀ ଅପୂର୍ବ ନାଏକ । ଆଜି ତାଙ୍କର ବାର୍ଦ୍ଧକ୍ୟଜନିତ ମୃତ୍ୟୁ ହୋଇଥିଲା । ତେଲକୋଇ ବ୍ଲକ୍ ସଲେଇକେନା ଗାଁରେ ଅପୂର୍ବଙ୍କ ବଡ଼ ଝିଅ ନିରାଶ ନାଏକ ବିବାହ କରିଥିଲେ । ପୁଅଙ୍କ ଅବହେଳା ଯୋଗୁଁ ଦୀର୍ଘ ୫ ବର୍ଷ ହେଲା ଝିଅ ଘରେ ରହି ଆସୁଥିଲେ ଅପୂର୍ବ ନାୟକ । ଆଜି ମା’ଙ୍କ ମୃତ୍ୟୁ ଖବର ୩ ଭାଇଙ୍କ ନିକଟକୁ ପଠାଇଥିଲେ ଭଉଣୀ ନିରାଶ ନାଏକ । କିନ୍ତୁ ସର୍ବଦା ଅବହେଳା କରୁଥିବା ଭାଇ ମନୁ, ଅନାମ ଓ ସାଇବ ଶବ ନେବା ପାଇଁ ମନା କଲେ । ଶେଷରେ ବୃଦ୍ଧାଙ୍କ ଝିଅ ନିରାଶ ଏବଂ ଜ୍ୱାଇଁ ସତ୍ୟାନନ୍ଦ ନିଜ ଗାଁରେ ଶବ ସତ୍କାର କଲେ ।

ସରପଞ୍ଚ ପାଙ୍ଗେଲା ମୁଣ୍ଡା, ଗାଁର ୱାର୍ଡମେମ୍ବର ଏବଂ ଭଦ୍ରବ୍ୟକ୍ତିଙ୍କ ସହଯୋଗରେ ବୃଦ୍ଧାଙ୍କ ଝିଅ ନିରାଶ, ଶ୍ମଶାନ ଯାଏ ଶବକୁ କାନ୍ଧରେ ନେଇଥିଲେ । ସମସ୍ତଙ୍କ ଉପସ୍ଥିତିରେ ସେ ମା’ଙ୍କୁ ମୁଖାଗ୍ନି ଦେଇଥିଲେ । ପୁଅଙ୍କ ଅବହେଳା, ଜିଦଖୋର ମନୋଭାବ ଯୋଗୁଁ ଶେଷରେ ଝିଅ ଶବ ସତ୍କାର କରିବାକୁ ବାଧ୍ୟ ହୋଇଥିଲେ ।

ବାପା ମୁକୁନ୍ଦଙ୍କ ମୃତ୍ୟୁ ପରେ ୩ ପୁଅ ମା’ଙ୍କ ସେବାରେ ଅବହେଳା କଲେ, ତାଙ୍କୁ ହଇରାଣ କରିବାରୁ ବୃଦ୍ଧା ଶେଷରେ ଝିଅ ଘରେ ରହି ଆସୁଥିଲେ । ହେଲେ ମଲା ପରେ ବି ପୁଅମାନେ ଶବ ଛୁଇଁଲେ ନାହିଁ । ଯାହା ସମାଜ ପାଇଁ ଏକ କଳଙ୍କ । ବାପାମାଙ୍କ ପ୍ରତି ପୁଅମାନଙ୍କ ଏଭଳି ବ୍ୟବହାର, ଅବହେଳା, ମୁହଁମୋଡ଼ା ନୀତି ସମାଜରେ ଗ୍ରହଣୀୟ ନୁହେଁ । ମା’ଙ୍କ ମୃତ୍ୟୁ, ଗାଁରେ ଶୋକାକୁଳ ପରିବେଶ ଏଭଳି ସ୍ଥିତିରେ ମା’ଙ୍କ ପ୍ରତି ପୁଅଙ୍କ ଅବହେଳା ନେଇ ପ୍ରଶ୍ନ ଉଠିଛି ।
ସରକାରୀ ଅଫିସରେ ତାଲା ପକାଇଲେ ନେତା

ସରକାରୀ ଅଫିସରେ ତାଲା ପକାଇଲେ ବିଜେପି ନେତା। ଅଫିସ ଅଛି ହେଲେ କର୍ମଚାରୀ ନାହାନ୍ତି କି ନାହାନ୍ତି ଅଧିକାରୀ। ଫଳରେ ଲୋକେ ନିଜ ଅଭିଯୋଗ ନେଇ ଆସି ଖାଲି ହେଉଛନ୍ତି ହନ୍ତସନ୍ତ । ଏମିତି ନିତିଦିନିଆ ଅଭ୍ୟାସକୁ ଦେଖି ଆଜି ହଠାତ କଟକ ବିଜେପି ଜିଲ୍ଲା ସଭାପତି ପ୍ରକାଶ ବେହେରା କଟକ ଜିଲ୍ଲା ସାଲେପୁର ବ୍ଲକରେ ପହଞ୍ଚି କର୍ମଚାରୀ ନଥିବା ସବୁ ବିଭାଗରେ ପକେଇ ଦେଇଥିଲେ ତାଲା। ଏହି ପରିସରେ ଏବିଡ଼ିଓ, ସହକାରୀଯନ୍ତ୍ରୀ, ଯୋଗାଣ ଅଧିକାରୀଙ୍କ ସମେତ ବହି ବିଭାଗ ରହିଛି।

ସକାଳୁ ହଠାତ କିଛି ସମର୍ଥକଙ୍କୁ ଧରି ସାଲେପୁର ବ୍ଲକ କାର୍ଯ୍ୟାଳୟ ଭିତରକୁ ପହଞ୍ଚିଥିଲେ ବିଜେପି ନେତା ପ୍ରକାଶ ବେହେରା। ହେଲେ ଅଫିସରଙ୍କ କଥା ଦୂରେ ଥାଉ କର୍ମଚାରୀମାନେ ମଧ୍ୟ କାର୍ଯ୍ୟାଳୟରେ ଅନୁପସ୍ଥିତ ଥିବା ଦେଖିବାକୁ ପାଇଥିଲେ। ଅନ୍ୟପଟରେ କିଛି ଅଭିଯୋଗକାରୀ ସେମାନଙ୍କ ଅଭିଯୋଗ ନେଇ ଅଫିସରେ ଅପେକ୍ଷା କରିଥିଲେ। ପ୍ରକାଶଙ୍କୁ ସେଠାରେ ଦେଖି ସମସ୍ତେ ତାଙ୍କୁ ଘରିଯାଇଥିଲେ ଓ ନିଜ ଅସୁବିଧା କରିବା ସହ କେହି ସେମାନଙ୍କ କଥା ବୁଝୁ ନ ଥିବା କରିଥିଲେ ଅଭିଯୋଗ। ଲୋକଙ୍କ ସମସ୍ୟା ସମାଧାନ ହେଉ ନ ଥିବା ଓ ଅଫିସରେ କର୍ମଚାରୀଙ୍କ ଅନୁପସ୍ଥିତିକୁ ଦେଖି ରାଗି ଯାଇ ଅଫିସରେ ତାଲା ପକାଇଥିଲେ ବୋଲି ପ୍ରକାଶ କହିଛନ୍ତି।

ସେପଟେ ଅଫିସର ନଥିବା ଅଭିଯୋଗକୁ ଖଣ୍ଡନ କରିଛନ୍ତି ଏବିଡିଓ। ତାଲା ପକାଯାଇଥିବା ଅଫିସ’ର ଅଫିସରମାନେ ଫିଲ୍ଡ ଭିଜିଟରେ ଯାଇଥିବା ଏବିଡିଓ କହିଛନ୍ତି। ତେବେ କିଛି ସମୟ ତାଲା ପଡିବା ପରେ ସାଲେପୁର ପୋଲିସ ସୂଚନା ପାଇ ସେଠାରେ ପହଞ୍ଚିଥିଲା ଓ ତାଲା ଭାଙ୍ଗି ଅଫିସ ପୁନଃ ଖୋଲିଥିବା ଦେଖିବାକୁ ମିଳିଛି।
ସର୍ଟ ସର୍କିଟରୁ ଦୁଇ ପରିବାରରେ ଲାଗିଲା ନିଆଁ

ଆଜି ମଧ୍ୟହ୍ନରେ ନିଆଁ ଲାଗି ଦୁଇ ପରିବାରର ୪ ବଖରା ଘର ପୋଡି ଯାଇଛି। ମୟୂରଭଞ୍ଜ ଜିଲ୍ଲା ବାବନଘାଟି ଉପଖଣ୍ଡର ବିଜାତଳା ବ୍ଲକ୍ ବଣକାଟି ପଞ୍ଚାୟତ ବାଲିଆଢ଼ିପା ପରାଉଡ଼ି ଗ୍ରାମରେ ଏହି ଅଗ୍ନିକାଣ୍ଡ ହୋଇଛି। ତେବେ ମଧ୍ୟାହ୍ନରେ ସମସ୍ତ କାମକୁ ଯାଇଥିବାରୁ କେହି ମୃତାହତ ହୋଇ ନ ଥିବାର ସୂଚନା ରହିଛି।

ବାଲିଆଢ଼ିପା ପରାଉଡ଼ି ଗାଁର ଅନନ୍ତ ଚରଣ ଟୁଡୁ ଓ ଦୁବରାଜ ବାସକେଙ୍କ ପରିବାର ସବୁଦିନ ପରି ଆଜି ମଧ୍ୟ କାମକୁ ଯାଇଥିଲେ। ମଧ୍ୟାହ୍ନ ପ୍ରାୟ ୧ଟାରେ ହଠାତ୍ ସାହି ପଡିଶା ଦେଖିଥିଲେ କି ସେମାନଙ୍କ ଅନନ୍ତ ଓ ଦୁବରାଜଙ୍କ ଘରେ ନିଆଁ ଲାଗିଯାଇଛି ଓ ଚାଳରୁ ହୁତୁ ହୁତୁ ହୋଇ ଜଳୁଛି। ଏହା ଦେଖି ଗ୍ରାମବାସୀ ୱାର୍ଡ ମେମ୍ୱରଙ୍କୁ ଖବର ଦେଇଥିଲେ। ୱାର୍ଡ ମେମ୍ବରଙ୍କଠାରୁ ଖବର ପାଇ ବିଜାତାଲା ଦମକଳ ବାହିନୀ ଆସି ନିଆଁକୁ ଆୟତ୍ତ କରିଥିଲା।

ନିଆଁ ଲାଗିବା ବେଳେ ପରିବାରର କେହି ଘରେ ନଥିବାରୁ ଏକ ବଡଧରଣର ଅଘଟଣ ଟଳିଯାଇଥିବା ବେଳେ କିନ୍ତୁ ଦୁଇ ପରିବାରର ସମସ୍ତ କାଗଜ ପତ୍ର ଓ ନିତ୍ୟବ୍ୟବହାର୍ଯ୍ୟ ସାମଗ୍ରୀ ପୋଡି ପାଉଁଶ ହୋଇ ଯାଇଛି। ନିଆଁ ସର୍ଟସର୍କିଟରୁ ଲାଗିଥିବା ସନ୍ଦେହ କରାଯାଉଛି।
ଜନ ଅଭିଯୋଗର ତ୍ୱରିତ ସମାଧାନ ପାଇଁ ଜିଲ୍ଲାପଳଙ୍କ ନିର୍ଦ୍ଦେଶ

ଆଜି ବାମନଘାଟି ଉପଖଣ୍ଡ ସଦର ମହକୁମା ରାଇରଙ୍ଗପୁର ଠାରେ ବାମନଘାଟୀ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ଯୁଗ୍ମ ଜନ ଶୁଣାଣି ଅଭିଯୋଗ ଶିବିର ଅନୁଷ୍ଠିତ ହୋଇ ଯାଇଛି । ବାମନଘାଟି ଉପଜିଲ୍ଲାପାଳ ସରୋଜ କୁମାର ଦାଶଙ୍କ ପ୍ରତ୍ୟକ୍ଷ ତତ୍ତ୍ୱlବଧାନରେ ଆୟୋଜିତ ତଥା ମୟୁରଭଞ୍ଜ ଜିଲ୍ଲାପାଳ ବିନୀତ ଭରଦ୍ୱାଜଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ ଶିବିରରେ ଜିଲ୍ଲା ଆରକ୍ଷୀ ଅଧିକ୍ଷକ ଶ୍ରୀଯୁକ୍ତ ଋଷିକେଶ ଦ୍ୟାନ ଦେଓ ଖିଲାରୀ , ଅତିରିକ୍ତ ଜିଲ୍ଲାପାଳ ହେମନ୍ତ କୁମାର ସିଂ , ରାଇରଙ୍ଗପୁର ଉପଖଣ୍ଡ ଆରକ୍ଷୀ ଅଧିକାରୀ ଗୋକୁଳା ନନ୍ଦ ସାହୁ ଓ ଉପଖଣ୍ଡ ଚିକିତ୍ସା ଅଧିକାରୀ ଡ଼ା. ପ୍ରମୋଦ କୁମାର ସାହୁ ପ୍ରମୁଖ ଯୋଗ ଦେଇଥିଲେ । .

ପ୍ରାରମ୍ଭ ରେ ଜିଲ୍ଲାପାଳ ଜନସାଧାରଣଙ୍କ ଠାରୁ ଆସୁଥିବା ସମସ୍ତ ଆପତ୍ତି ଅଭିଯୋଗ ଗୁଡିକର ସମାଧାନ ତ୍ୱରିତ ପ୍ରକ୍ରିୟା ରେ ସମ୍ପନ୍ନ କରିବା ପାଇଁ ଉପସ୍ଥିତ ସମସ୍ତ ଅଧିକାରୀ ମାନଙ୍କୁ ପରାମର୍ଶ ଦେଇଥିଲେ. ।ଆଜିର ଏହି ଶିବିର ରେ ଜନସାଧାରଣ ଙ୍କ ଠାରୁ ମୋଟ ୧୦୬ ଟି ଅଭିଯୋଗ ପତ୍ର ଗ୍ରହଣ ହୋଇଥିବା ବେଳେ ୯୩ ଟି ବ୍ୟକ୍ତିଗତ ସମସ୍ୟା ଭିତ୍ତିକ ଏବଂ ୧୩ ଟି ଗ୍ରାମବାସୀ ଙ୍କ ବିଭିନ୍ନ ସମସ୍ୟା ଭିତ୍ତିକ ସାମୁହିକ ଅଭିଯୋଗ ଥିଲା.। ସହାୟତା ରାଶି ପ୍ରଦାନ ପାଇଁ ଆସିଥିବା ୨ ଟି ଅଭିଯୋଗର ଗୁରୁତ୍ୱ ଓ ପରିସ୍ଥିତିକୁ ବିଚାର କରି ଟ.୫000/- ଲେଖାଏଁ ମୋଟ ଟ.୧0000/-(ଦଶ ହଜାର ଟଙ୍କା ) ସହାୟତା ରାଶି ମୁଖ୍ୟମନ୍ତ୍ରୀ ରିଲିଫ ପାଣ୍ଠି ରୁ ଜିଲ୍ଲାପାଳ ମଂଜୁର କରିଛନ୍ତି।

ଅନ୍ୟାନ୍ୟ ଆପତ୍ତି ଅଭିଯୋଗ ଗୁଡିକର ବିଷୟ ପ୍ରସଙ୍ଗ ଉପରେ ସବିଶେଷ ତଦନ୍ତ କରି ଅନୁଧ୍ୟାନ ପୂର୍ବକ ବିହିତ କାର୍ଯ୍ୟାନୁଷ୍ଠାନ ନେବା ସହ ତ୍ୱରିତ ପ୍ରକ୍ରିୟା ରେ ସମାଧାନ କରିବା ପାଇଁ ସମ୍ପୃକ୍ତ ବିଭାଗୀୟ ଅଧିକାରୀ ମାନଙ୍କୁ ନିର୍ଦେଶ ଦେଇଥିଲେ ।. ଅନୁଷ୍ଠିତ ଉକ୍ତ ବୈଠକ ରେ ବାମନଘାଟି ଉପଖଣ୍ଡ ଅଧିନସ୍ଥ ସମସ୍ତ ଉପଖଣ୍ଡ ସ୍ତରୀୟ ବିଭାଗୀୟ ଅଧିକାରୀ, ରାଇରଙ୍ଗପୁର ପୌରପାଳିକା ର କାର୍ଯ୍ୟନିର୍ବାହୀ ଅଧିକାରୀ,ଗୋଷ୍ଠୀ ଉନ୍ନୟନ ଅଧିକାରୀ, ତହସିଲଦାର, ଗୋଷ୍ଠୀ ଶିକ୍ଷା ଅଧିକାରୀ, ବିଭିନ୍ନ ଲାଇନ ବିଭାଗ ର ଅଧିକାରୀ ପ୍ରମୁଖ ଉପସ୍ଥିତ ଥିବା ବେଳେ ଉପଜିଲ୍ଲାପାଳ ଙ୍କ କାର୍ଯ୍ୟାଳୟ ର କର୍ମଚାରୀ ମାନଙ୍କ ଦ୍ୱାରା ଶିବିର କାର୍ଯ୍ୟକ୍ରମ ପରିଚାଳନା କରାଯାଇଥିଲା ।
ସବୁ ଜିଲ୍ଲାପାଳଙ୍କୁ ସତର୍କ କଲେ ଏସଆରସି

ଦକ୍ଷିଣ-ପୂର୍ବ ବଙ୍ଗୋପସାଗରରେ ସୃଷ୍ଟ ଲଘୁଚାପ କ୍ଷେତ୍ରକୁ ଦେଖି ରାଜ୍ୟ ସରକାର ସଜାଗ। ଆଜି ସ୍ବତନ୍ତ୍ର ରିଲିଫ କମିସନର (ଏସ୍‌ଆରସି) ସମ୍ଭାବ୍ୟ ବାତ୍ୟାକୁ ନେଇ ସମସ୍ତ ଜିଲ୍ଲାପାଳଙ୍କୁ ଚିଠି ଲେଖିଛନ୍ତି। ଏସଆରସି ତାଙ୍କ ବାର୍ତ୍ତାରେ ମତ୍ସଜୀବୀ ଓ ଚାଷୀମଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି।

ବାତ୍ୟା ଓ ବର୍ଷାରେ ଫସଲ ନଷ୍ଟ ହେବାର ସମ୍ଭାବନା ରହିଛି। ତେଣୁ ସମ୍ଭାବିତ ବର୍ଷାକୁ ଦୃଷ୍ଟିରେ ରଖି ଚାଷୀମାନେ ପନିପରିବା, ଉଦ୍ୟାନ କୃଷି, ଅମଳ ହୋଇଥିବା ଫସଲ ତଥା ମଣ୍ଡିରେ ପଡ଼ିଥିବା ଧାନକୁ ସୁରକ୍ଷିତ ରଖନ୍ତୁ। ସେହିପରି ବିପର୍ଯ୍ୟୟ ମୁକାବିଲା କରିବା ପାଇଁ ଜିଲ୍ଲା ପ୍ରଶାସନ ପ୍ରସ୍ତୁତ ରହିବାକୁ ପରାମର୍ଶ ଦିଆଯାଇଛି। ସେହିପରି ସମୁଦ୍ରରେ ଉଚ୍ଚ ତରଙ୍ଗର ସମ୍ଭାବନା ଥିବାରୁ ମତ୍ସଜୀବୀମାନେ ମେ’ ୯ ତାରିଖରୁ ଛୋଟ ଜାହାଜ, ଡଙ୍ଗା ଓ ଟ୍ରଲର ଯୋଗେ ନେଇ ଦକ୍ଷିଣ-ପୂର୍ବ ବଙ୍ଗୋପସାଗରକୁ ନଯିବା ପାଇଁ ବାରଣ କରିଛନ୍ତି ଏସଆରସି।

ପୂର୍ବରୁ ଭାରତୀୟ ପାଣିପାଗ ବିଭାଗ ପକ୍ଷରୁ ଏହାର ଗତିପଥ ସଂପର୍କରେ ପୂର୍ବାନୁମାନ କରାଯାଇଥିଲା। ବିଭାଗର ମହାନିର୍ଦ୍ଦେଶକ ଡ.ମୃତ୍ୟୁଞ୍ଜୟ ମହାପାତ୍ର ସାମ୍ବାଦିକ ସମ୍ମିଳନୀରେ ସୋମବାର ଏହି ଲଘୁଚାପ ଆହୁରି ଘନୀଭୂତ ହୋଇ ଏକ ଅତି ଭୀଷଣ ବାତ୍ୟାରେ ପରିଣତ ହେବ । କିନ୍ତୁ ଏହା ବାଂଲାଦେଶ ଓ ମିଆଁମାର ଅଭିମୁଖେ ଗତି କରିବାର ସମ୍ଭାବନା ରହିଛି । ଏଣୁ ଓଡ଼ିଶା ପ୍ରତି କୌଣସି ବିପଦର ଆଶଙ୍କା ନାହିଁ ବୋଲି କହିଥିଲେ।

ପାଣିପାଗ ବିଭାଗ ପକ୍ଷରୁ କୁହାଯାଇଥିଲା କି, ଏହି ଲଘୁଚାପ ଆସନ୍ତାକାଲି ସୁଦ୍ଧା ଡିପ୍ରେସନରେ ପରିଣତ ହେବ ଓ ଉତ୍ତର ଓ ଉତ୍ତରପଶ୍ଚିମ ଦିଗରେ ଗତି କରିବ। ମେ’ ୧୦ରେ ଏହା ଏକ ସାମୁଦ୍ରିକ ବାତ୍ୟା ରୂପ ନେବ। ମେ’ ୧୨ ତାରିଖ ସୁଦ୍ଧା ଏକ ବଡ ବାତ୍ୟାରେ ପରିଣତ ହେବାର ସମ୍ଭାବନା ରହିଥିବା କହିଥିଲେ।
ପେରୁ: ସୁନା ଖଣିରେ ନିଆଁ ଲାଗି ୨୭ ମୃତ

ପେରୁର ସୁନା ଖଣିରେ ଭୟଙ୍କର ନିଆଁ ଲାଗି ବହୁ ଶ୍ରମିକଙ୍କ ମୃତ୍ୟୁ ହୋଇଛି। ଦକ୍ଷିଣ ପେରୁର ଗୋଟାଏ ନିର୍ଜନ ଅଞ୍ଚଳରେ ଏହି ସୁନାଖଣିଟି ରହିଛି। ରବିବାର ସରକାରୀ ସୂଚନା ମୁତାବକ, ଅଗ୍ନିକାଣ୍ଡରେ ସେଠାରେ କାର୍ଯ୍ୟରତ ୨୭ ଶ୍ରମିକଙ୍କର ମୃତ୍ୟୁ ହୋଇଛି।

ପୁଲିସ ଏବଂ ପବ୍ଲିକ୍‌ ପ୍ରୋସିକ୍ୟୁଟଙ୍କ ଅଫିସ ପକ୍ଷରୁ କୁହାଯାଇଥି କି, ଏରେକ୍ୱିପା ଅଞ୍ଚଳରେ ଥିବା ଲା’ ଏସ୍‌ପେରାଞ୍ଜା-୧ ଖଣିରୁ ସୁନା ଖନନ ଚାଲିଥିଲା। ଶ୍ରମିକମାନେ ଖନନରେ ବ୍ୟସ୍ତ ଥିବା ବେଳେ ଏକ ସୁଡ଼ଙ୍ଗରେ ସର୍ଟସର୍କିଟ୍‌ ହୋଇଥିଲା ଓ ନିଆଁ ସୁଡଙ୍କ ଦେଇ ବ୍ୟାପୀ ଯାଇଥିଲା। ଏଥିରେ ଅତି କମରେ ୨୭ ଶ୍ରମିକଙ୍କ ମୃତ୍ୟୁ ହୋଇଥିବା ‘ଚାନେଲ୍‌ ଏନ୍‌’ ଟେଲିଭିଜନ୍‌କୁ ପବ୍ଲିକ୍ ପ୍ରୋସିକ୍ୟୁଟର୍‌ ଜିଓଭାନି ମାତୋସ୍‌ କହିଛନ୍ତି।

ମୃତ ବ୍ୟକ୍ତିମାନଙ୍କର ଶବ ଉଦ୍ଧାର କରିବା ପୂର୍ବରୁ ଉଦ୍ଧାରକାରୀ ଦଳ ଖଣିକୁ ନିରାପଦ ରଖିବାକୁ ଉଦ୍ୟମ କରିଥିଲେ। କାରଣ ଭିତରକୁ ପ୍ରବେଶ କରି ଶବ ଉଦ୍ଧାର କରିବା ନିମନ୍ତେ ତାହାହିଁ ଏକମାତ୍ର ଉପାୟ ଥିଲା ବୋଲି ପବ୍ଲିକ୍ ପ୍ରୋସିକ୍ୟୁଟର୍‌ ଜିଓଭାନି ମାତୋସ୍‌ କହିଛନ୍ତି। ପୁଲିସ ମୃତବ୍ୟକ୍ତିମାନଙ୍କ ସମ୍ବନ୍ଧରେ ସବିଶେଷ ତଥ୍ୟ ସଂଗ୍ରହ କରିଥିଲା। ତେଣୁ ରବିବାର ସରକାରୀସ୍ତରରେ ସୂଚନା ଦିଆଯାଇଛି।

ଏହା ପୂର୍ବରୁ ଆଞ୍ଚଳିକ ଗଣମାଧ୍ୟମ ରିପୋର୍ଟ କରିଥିଲା ଯେ, କଣ୍ଡେସୁୟୋସ୍‌ ପ୍ରଦେଶ ଅନ୍ତର୍ଗତ ୟାନାକ୍ବିହୁଆ ନଗରୀରେ ଥିବା ଖଣିରେ ବିସ୍ଫୋରଣ ଘଟି ନିଆଁ ଲାଗିଥିଲା। ବିସ୍ଫୋରଣ ହେବା ଫଳରେ ଖଣି ଭିତରେ ଲାଗିଥିବା କାଠଖୁଣ୍ଟିସବୁ ନିଆଁ ଲାଗି ଜଳିବାକୁ ଲାଗିଥିଲା। ଖଣିରେ ନିଆଁ ଲାଗିଥିବା ବେଳେ ଖଣିର ୧୦୦ ମିଟର ଗଭୀରରେ ଶ୍ରମିକମାନେ କାର୍ଯ୍ୟରତ ଥିଲେ। ଭିତରଟି ଏକ ସୁଡଙ୍ଗ ପରି ହୋଇଥିବାରୁ ଅଧିକାଂଶ ଶ୍ରମିକଙ୍କ ଧୂଆଁରେ ଶ୍ୱାସରୁଦ୍ଧ ହୋଇ ମୃତ୍ୟୁ ହୋଇଥିଲା। ଏସମ୍ପର୍କରେ ୟାନାକ୍ବିହୁଆର ମେୟର୍‌ ଜେମ୍‌ସ୍‌ କାସକ୍ବିନୋ ଗଣମାଧ୍ୟମକୁ ସୂଚନା ଦେଇଥିଲେ।

ତେବେ ଖଣିରେ କେତେ ଜଣ କାର୍ଯ୍ୟରତ ଥିଲେ ତାହା ଜଣାପଡି ନାହିଁ। ଶେଷ ରିପୋର୍ଟ ମୁତାବକ ଖଣିରୁ ୧୭୫ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ୨୭ ଜଣଙ୍କ ମୃତଦେହ ଉଦ୍ଧାର ହୋଇଛି। ପେରୁ ଇତିହାସରେ ଏହା ହେଉଛି ଅନ୍ୟତମ ଦୁଃଖଦ ଖଣି ଦୁର୍ଘଟଣା। ଦୁର୍ଘଟଣାର ଖବର ପାଇ ଶ୍ରମିକମାନଙ୍କ ଶୋକସନ୍ତପ୍ତ ଆତ୍ମୀୟ ଖଣି ନିକଟରେ ରୁଣ୍ଡ ହୋଇଥିଲେ। ପୋଲିସ ପ୍ରଶାସନକୁ ଏମାନଙ୍କୁ ନିୟନ୍ତ୍ରଣ କରି ଉଦ୍ଧାର କାର୍ଯ୍ୟ କରିବାରେ ବହୁ ସମୟ ଲାଗିଯାଇଥିଲା।

ସୂଚନାଯୋଗ୍ୟ, ପେରୁ ହେଉଛି ବିଶ୍ୱର ସର୍ବ ବୃହତ ସୁନା ଉତ୍ପାଦନକାରୀ ରାଷ୍ଟ୍ର। ପ୍ରତିବର୍ଷ ଏଠାରୁ ୧୦୦ ଟନ ସୁନା ଉତ୍ତୋଳନ ହୋଇଥାଏ, ଯାହା ବିଶ୍ୱର ମୋଟ ସୁନା ସପ୍ଲାଇର ୪ପ୍ରତିଶତ ହେବ। ଚଳିତ ଖଣି ଦୁର୍ଘଟଣାକୁ ସବୁଠାରୁ ଦୁର୍ଭାଗ୍ୟପୂର୍ଣ୍ଣ ଘଟଣା କୁହାଯାଉଛି। କାରଣ ଗୋଟିଏ ବର୍ଷରେ ଡର୍ଜନ ଡର୍ଜନ ଲୋକଙ୍କ ମୃତ୍ୟୁ ଦେଶର ଖଣି ଉଦ୍ୟୋଗରେ ସାଧାରଣ କଥା ନୁହେଁ। ତେବେ ଛୋଟ ମୋଟ ଦୁର୍ଘଟଣା ସେଠାକାର ଖଣିରେ ପ୍ରତି ବର୍ଷ ଘଟିଥାଏ।
ଦଳ ନାହିଁ, ବିଚାର ଧାରାରେ ପରିବର୍ତ୍ତନ ହୋଇଛି : ସୌମ୍ୟରଞ୍ଜନ

ସାମ୍ପ୍ରତିକ ରାଜନୀତିକୁ ନେଇ ବର୍ଷିଛନ୍ତି ବରିଷ୍ଠ ସାମ୍ବାଦିକ ତଥା ବିଜେଡି ବିଧାୟକ ସୌମ୍ୟରଞ୍ଜନ ପଟ୍ଟାନୟକ। ରାଜନୀତିରେ ବର୍ତ୍ତମାନ ଦେଖାଦେଉଥିବା ଚଳଣି, ରାଜନୈତିକ ଦଳଗୁଡିକର କ୍ଷମତା ଲୋଭ, ନେତା ବନାମ ପ୍ରଶାସନିକ ଅଧିକାରୀ ପରି ବିଭିନ୍ନ ପ୍ରସଙ୍ଗରେ ମୁହଁ ଖୋଲିଛନ୍ତି ପଟ୍ଟନାୟକ। ଆଜି ଜୟଦେବ ଭବନଠାରେ ଅନୁଷ୍ଠିତ ଆଲୋଚନା, ‘ଜାନକୀବାବୁ ଓ ବସନ୍ତବାବୁଙ୍କ ଯୋଡି, ଓଡିଶା ରାଜନୀତିର ସୁବର୍ଣ୍ଣଯୁଗ’ ଅବସରେ ବର୍ତ୍ତମାନର ରାଜନୈତିକ ବାତାବରଣକୁ ନେଇ ନିଜ ଅସନ୍ତୋଷ ଜାହିର କରିଛନ୍ତି ସୌମ୍ୟ।

ସେ କହିଛନ୍ତି, ଏବେ ରାଜନୀତିର ପରିଭାଷା ବଦଳି ଯାଇଛି। ସବୁ ଦଳ ଏବେ କ୍ଷମତାକୁ ଆସିବା ପାଇଁ ନିର୍ବାଚନ ଲଢୁଛନ୍ତି। କୌଣସି ଉପାୟରେ ରାଜନୀତିକୁ ଆସିବାକୁ ପଡିବ, ନିର୍ବାଚନ ଜିତିବାକୁ ହେବ । ନିର୍ବାଚନ କହିଲେ ଏବେ କେବଳ ପଇସା। ସର୍ଭେ କହୁଛି ୩୦ ହଜାର କୋଟି ଖର୍ଚ୍ଚ ହୋଇଛି କର୍ଣ୍ଣାଟକ ନିର୍ବାଚନରେ। ଏଥିରେ ପ୍ରଧାନମନ୍ତ୍ରୀଙ୍କ ରାଲି ଖର୍ଚ୍ଚ ଯୋଡାଯାଇନାହିଁ। ଏହା ଗଣିଲେ ଦିଆଯାଇଥିବା ସଂଖ୍ୟା ଆହୁରି ବଢିଯିବ।

ବିଜେପିକୁ ଆକ୍ଷେପ କରି ପଟ୍ଟନାୟକ କହିଛନ୍ତି, ବିଜେପି ଆଉ ରାଜ୍ୟରେ ଦଳ ହୋଇ ନାହିଁ ବୋଲି ମୁଁ ଭାବୁଛି । ରାଜ୍ୟରେ ବିରୋଧୀ ଅଛି ବୋଲି ମୁଁ ବିଧାନସଭାରେ ଅନୁଭବ କରି ପାରୁନି । ଅର୍ଥାତ୍ ରାଜ୍ୟର ବିରୋଧୀ ଦଳ ବିଜେପି ବିଧାନସଭାରେ ସ୍ୱର ଶାଣିତ କରିବାରେ ବିଫଳ ହୋଇଛି। ସେ ଆହୁରି ବିଜେପିକୁ ନେଇ କହିଛନ୍ତି କି, ୨୦୧୪ରେ ନରେନ୍ଦ୍ର ମୋଦୀଙ୍କ ଟାର୍ଗେଟରେ ଥିଲା କଂଗ୍ରେସ। ସେତେବେଳେ ମୋଦି କଂଗ୍ରେସ ମୁକ୍ତ ଭାରତର ଆହ୍ୱାନ ଦେଇଥିଲେ। ତେବେ କଣ ଦେଶରେ ଗୋଟିଏ ଦଳ? ଆଉ ସେ ହେଉଛି କଂଗ୍ରେସ ବୋଲି ବିଜେପିକୁ ପ୍ରଶ୍ନ କରିଛନ୍ତି ଖଣ୍ଡପଡା ବିଧାୟକ।

ସମ୍ପ୍ରତି ରାଜ୍ୟରେ ମନ୍ତ୍ରୀ ବନାମ ସଚିବ ଚର୍ଚ୍ଚାରେ କିଏ ବଡ଼ ? ମନ୍ତ୍ରୀ ବଡ଼ ନା ସଚିବ ? ରାଜ୍ୟ ସରକାରଙ୍କ ବିଭିନ୍ନ ଯୋଜନାରେ ମନ୍ତ୍ରୀ ତଥା ଜନପ୍ରତିନିଧିଙ୍କ ଗୁରୁତ୍ୱ ହ୍ରାସକୁ ନେଇ ପରୋକ୍ଷରେ ସରକାରକୁ ଟାର୍ଗେଟ କରିଛନ୍ତି ସୌମ୍ୟ। ଏହାକୁ ନେଇ ସେ କହିଛନ୍ତି, ପ୍ରାଶାସନିକ ବ୍ୟବସ୍ଥାରେ ପରିବର୍ତ୍ତନ ହୋଇଛି । ମନ୍ତ୍ରୀଙ୍କୁ କେବଳ ସଂଗଠନ ବୁଝିବାକୁ ଛାଡ଼ି ଦିଆଯାଇଛି। ବାକି ସବୁକିଛି ପ୍ରଶାସନ ବୁଝୁଛି। ଖବରକାଗଜରେ ବିଭିନ୍ନ ଯୋଜନାକୁ ତଥା ସରକାରୀ କାର୍ଯ୍ୟକ୍ରମରେ ବାହାରୁ ଥିବା ଫଟୋରେ ମନ୍ତ୍ରୀ ନାହିଁନ୍ତି। କେବଳ ସଚିବଙ୍କର ରହୁଛି। ସଚିବମାନେ ହିଁ ଆଜି ସବୁକିଛି।

ତେବେ ଆଲୋଚନାଟି ଜାନକୀ ପଟ୍ଟନାୟକ ଓ ବସନ୍ତ ବିଶ୍ୱାଳଙ୍କ ଜୁଗଳବନ୍ଦୀକୁ ନେଇ ହୋଇଥିବା ବେଳେ ସୌମ୍ୟଙ୍କର ଉପସ୍ଥିତି କେମିତି ଗୋଟିଏ ଅଡୁଆ ଲାଗୁଛି। ଖାଲି ଶ୍ୱଶୁର ଏଥିର ବିଷୟ ବସ୍ତୁ ଥିବାରୁ ସୌମ୍ୟ ସେଠାରେ ଉପସ୍ଥିତ ଥିଲେ ନାଁ ଜଣେ ବରିଷ୍ଠ ସାମ୍ବାଦିକ ରୂପେ? ଅଥବା ଦଳରେ ଏକ ପ୍ରକାର କୋଣଠେଁସା ହୋଇରହିବା ଓ ସଚିବଙ୍କ କାୟାବିସ୍ତାରରେ ନିଜ ଛବି ହଜିଯାଉଥିବାରୁ ପୁଣି କଂଗ୍ରେସକୁ ପ୍ରତ୍ୟାବର୍ତ୍ତନ କରିବାକୁ ଚାହୁଁଛନ୍ତି ସୌମ୍ୟ?କାରଣ ଜାତୀୟସ୍ତରରେ ରାହୁଲ ଓ ପ୍ରିୟଙ୍କାଙ୍କ ନେତୃତ୍ୱ ଦଳକୁ ପୁଣି ଲୋକାଦୃତ କରିବାରେ ଲାଗିଥିବା ବେଳେ ରାଜ୍ୟ କଂଗ୍ରେସ ନିଜକୁ ସୁଦୃଢ କରିବାରେ ଲାଗିଛି।
ଅନ୍ତର୍ଜାତୀୟ ଫିଲ୍ମ ଫେଷ୍ଟରେ ଓଡିଆ ଫିଲ୍ମ ‘ଅଦ୍ୱିତୀୟ’କୁ ଦୁଇ ପୁରସ୍କାର
ଅନ୍ତର୍ଜାତୀୟ ଫିଲ୍ମ ମହୋତ୍ସବରେ ଓଡିଶାର ଫିଲ୍ମର ବାଜିମାତ୍। ଦକ୍ଷିଣ ଆଫ୍ରିକାର ମରିସସରେ ଆୟୋଜିଚ ଅନ୍ତର୍ଜାତୀୟ ଫିଲ୍ମ ଫେଷ୍ଟିଭାଲରେ ଦୁଇଟି ଶ୍ରେଣୀରେ ଚଳଚ୍ଚିତ୍ର ‘ଅଦ୍ୱିତୀୟ’ ପୁରସ୍କାର ହାତେଇଛି। ଗଞ୍ଜାମ ଜିଲ୍ଲାର ହିଞ୍ଜିଲିକାଟୁର ନିତ୍ୟମ କାଳା ଗବେଷଣା କେନ୍ଦ୍ର ଦ୍ୱାରା ଏହି ଚଳଚ୍ଚିତ୍ର ଟି ନିର୍ମିତ ହୋଇଛି।

କୃଷ୍ଣ ଡି.କେଙ୍କ ନିର୍ଦ୍ଦେଶିତ ଏହି କ୍ଷୁଦ୍ର ଡକ୍ୟୁମେଣ୍ଟାରୀ ଚଳଚ୍ଚିତ୍ରଟି କେତେକ ବାସ୍ତବ ଘଟଣା ଉପରେ ଆଧାରିତ, ଯେଉଁଥିରେ ଦର୍ଶାଯାଇଛି, କିପରି ପୋଲିସ ଚାହିଁଲେ ଏକ ଅପରାଧ ସମ୍ପନ୍ନ ସହରକୁ ଅପରାଧ ମୁକ୍ତ କରିପାରିବ। ଅପରାଧୀଙ୍କୁ ଅପରାଧର କଳା ସାମ୍ରାଜ୍ୟରୁ ବାହାର କରି ସମ୍ମାନଜନକ ଜୀବନ ଅତିବାହିତ କରିବାରେ ସହାୟକ ହୋଇପାରିବ।

ଚଳଚିତ୍ରର ବିଷୟବସ୍ତୁ ଆସ୍କା ଓ ଏହାର ଆଖପାଖ ଅଞ୍ଚଳକୁ ନେଇ ଗଢିଉଠିଛି। ଆସ୍କା ପୋଲିସ୍ ଷ୍ଟେସନର ଆଇଆଇସି ଲୋକଙ୍କ ବିଶ୍ୱାସ ଭାଜନ ହେବାରେ ସକ୍ଷମ ହୋଇଛନ୍ତି ଓ ଅପରାଧୀଙ୍କୁ ସମାଜର ମୁଖ୍ୟ ସ୍ରୋତକୁ ଫେରାଇ ଆଣିଛନ୍ତି। ଏକ ଅପରାଧର ସହରକୁ ଅପରାଧ ନିୟନ୍ତ୍ରିତ ସହରରେ ପରିଣତ କରିଛନ୍ତି। ଚଳଚ୍ଚିତ୍ରରେ ବରିଷ୍ଠ ଆଇପିଏସ୍ ଅଧିକାରୀ ଆଇଜି, ଦକ୍ଷିଣାଞ୍ଚଳ ସତ୍ୟବ୍ରତ ଭୋଇ, ଏସପି ଗଞ୍ଜାମ ଜଗମୋହନ ମୀନାଙ୍କ ସହ ଆସ୍କା ଥାନା ଅଧିକାରୀ ପ୍ରଶାନ୍ତ କୁମାର ସାହୁ ଏବଂ କର୍ମଚାରୀମାନେ ପ୍ରମୁଖ ଭୂମିକା ତୁଲାଇଛନ୍ତି।
```
ଡକୁମେଣ୍ଟାରୀ ଫିଲ୍ମର କାହାଣୀ ରଚନା ସିମାଞ୍ଚଳ ମହାରଣା କରିଥିବା ବେଳେ ନିର୍ଦ୍ଦେଶନା ଦେଇଛନ୍ତି କୃଷ୍ଣ ଡି କେ।  ଫିଲ୍ମର ସହକାରୀ ନିର୍ଦ୍ଦେଶକ ଭାର ତୁଲାଇଛନ୍ତି ରାମକୃଷ୍ଣ ସାହୁ। ସିନେମାଟୋଗ୍ରାଫୀରେ  ମୋହିତ ତ୍ରିପାଠୀଙ୍କ ଦକ୍ଷତା ଦେଖିବାକୁ ମିଳିଛି। ଏହାର ସମ୍ପାଦକ ଅଛନ୍ତି ଦେବାଶିଷ ମହାରାଣା । 
```
```
ଏପ୍ରିଲ୍ ୨୯ ରେ ଉତ୍ତର ଆଫ୍ରିକାର ମରିସସ୍ ଠାରେ ଅନୁଷ୍ଠିତ ହୋଇଥିବା ଭାରତ ମହାସାଗର ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବର ପୁରସ୍କାର ବିତରଣୀ ଉତ୍ସବକୁ ଅଦ୍ୱିତୀୟର ନିର୍ଦ୍ଦେଶକ ତଥା ଲେଖକଙ୍କୁ ନିମନ୍ତ୍ରଣ କରାଯାଇଥିଲା। ଫିଲ୍ମଟି ଦୁଇଟି କ୍ଷେତ୍ରରେ ପୁରଷ୍କାର ହାତେଇବା ପରେ ଫିଲ୍ମର ଟିମ ଭିତରେ ଦେଖିବାକୁ ମିଳିଛି ଖୁସି। ଆଗକୁ ମଧ୍ୟ ଏମିତି ସତ୍ୟ ଓ ପ୍ରେରଣାଦାୟୀ ଘଟଣାକୁ ନେଇ ଫିଲ୍ମ କରି ସମାଜରେ ପରିବର୍ତ୍ତନ ଆଣିବାକୁ ଆଗ୍ରହୀ ହୋଇଉଠିଛନ୍ତି ଟିମ।
```
୧୦ ତାରିଖରେ ଅବପାତର ରୂପ ନେବ

ଦକ୍ଷିଣ ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିଝଡ଼ ଘନୀଭୂତ ହୋଇ ଆଜି ଲଘୁଚାପ କ୍ଷେତ୍ରରେ ପରିଣତ ହୋଇଛି। ୧୦ ତାରିଖରେ ଘନୀଭୂତ ହୋଇ ଅବପାତର ରୂପ ନେବ। ପ୍ରଥମେ ଉତ୍ତର ଓ ଉତ୍ତର ପଶ୍ଚିମ ଦିଗରେ ଗତି କରିବ। ଏହା ବାଙ୍ଗଲାଦେଶ ଓ ମିଆଁମାର ଉପକୂଳ ମୁହାଁ ହେବା ନେଇ ଆକଳନ କରିଛି ଭାରତୀୟ ପାଣିପାଗ କେନ୍ଦ୍ର।

ବିଭାଗର ସୂଚନା ଅନୁଯାୟୀ, ଦକ୍ଷିଣ ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିଝଡ଼ ଘନୀଭୂତ ହୋଇ ଆଜି ଲଘୁଚାପର ରୂପ ନେଇଛି। ମେ’୯ ତାରିଖରେ ଏହି ଲଘୁଚାପ କ୍ଷେତ୍ରଟି ଅଧିକ ଘନୀଭୂତ ହେବ ଓ ଅବପାତରେ ପରିଣତ ହୋଇ ବାତ୍ୟାର ରୂପ ନେବାର ଅନୁମାନ କରୁଛି ବିଭାଗ। ତେବେ

ବାତ୍ୟା ଓଡିଶା ସ୍ଥଳଭାଗ ଛୁଇଁବ କି ନାହିଁ ତାହା ସ୍ପଷ୍ଟ ହୋଇନଥିଲେ ବି, ଏହି ସମୟରେ ସମୁଦ୍ର ଅଶାନ୍ତ ରହୁବାରୁ ମତ୍ସ୍ୟଜୀବୀଙ୍କୁ ଦକ୍ଷିଣପୂର୍ବ ବଙ୍ଗୋପସାଗର ଯିବାକୁ ବାରଣ କରାଯାଇଛି।

ବାତ୍ୟାକୁ ନେଇ ପାଣିପାଗ ବିଭାଗ ସମ୍ଭାବନା ଥିବା କହୁଥିବା ବେଳେ କିନ୍ତୁ ରାଜଧାନୀ ଭୁବନେଶ୍ୱରରେ ଗତ କାଲି ଓ ଆଜି ଅସମ୍ଭାଳ ତାତି ଅନୁଭୂତ ହେଉଛି। ସକାଳ ୮ଟା ୩୦ ସୁଦ୍ଧା ରାଜଧାନୀର ତାପମାତ୍ରା ୩୧ ଡିଗ୍ରୀ ହୋଇଥିବା ବେଳେ ଆର୍ଦ୍ରତା ୮୫ ପ୍ରତିଶତ ହୋଇଥିବାରୁ ଅସହ୍ୟ ଗୁଳୁଗୁଳି ମଧ୍ୟ ଅନୁଭୂତ ହେଉଛି। ରାଜଧାନୀବାସୀ ଅସରାଏ ବର୍ଷାକୁ ଯେମିତି ଅପେକ୍ଷା କରି ରହିଛନ୍ତି।