Month: May 2023

ଆଜି ୧୮ଟି ସହର ୪୦ ଡିଗ୍ରୀ ଉପରେ,ବୌଦ୍ଧ ସର୍ବାଧିକ

ଦକ୍ଷିଣ ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିଝଡ଼ ଘନୀଭୂତ ହୋଇ ୱେଲ ମାର୍କଡ ଲୋ ପ୍ରେସର୍ ବା ସୁଦୃଶ୍ୟ ଲଘୁଚାପ କ୍ଷେତ୍ରରେ ପରିଣତ ହୋଇଛି। ଆଇଏମଡି କହିଛି, ପୂର୍ବାନୁମାନ ଅନୁସାରେ କାଲି ସୁଦ୍ଧା ଏହା ଅଧିକ ଘନୀଭୂତ ହୋଇ ଅବପାତରେ ପରିଣତ ହେବାର ସମ୍ଭାବନା ରହିଛି। ୧୦ ତାରିଖ ସୁଦ୍ଧା ଏହା ବାତ୍ୟାରେ ପରିଣତ ହେବାର ସମ୍ଭାବନା ରହିଛି। ୧୨ ତାରିଖ ପର୍ଯ୍ୟନ୍ତ ଉତ୍ତର-ଉତ୍ତର ପଶ୍ଚିମ ଦିଗକୁ ଗତି କରିବ ବାତ୍ୟା। ୧୨ ତାରିଖ ପରେ ବାତ୍ୟାର ଗତିପଥ ପରିବର୍ତ୍ତନ ହେବ। ବାତ୍ୟା ବାଂଲାଦେଶ ଓ ମିଆଁମାର ଉପକୂଳ ଛୁଇଁପାରେ। ତେବେ ବର୍ତ୍ତମାନ ସ୍ଥିତିରେ ଓଡ଼ିଶା ପାଇଁ କିଛି ୱାର୍ଣ୍ଣିଂ ନାହିଁ ।

ସେପଟେ ବେଶ୍ କିଛି ଦିନର ବ୍ୟବଧାନ ପରେ ରାଜ୍ୟକୁ ପୁଣି ଫେରିଛି ତାତି। ଏପ୍ରିଲ ମାସରେ ପ୍ରାୟ ଦୁଇ ସପ୍ତାହ ଧରି ରାଜ୍ୟର ବିଭିନ୍ନ ସହରର ତାପମାତ୍ରା ୪୦ ଡିଗ୍ରୀରୁ ଅଧିକ ରହିଥିବା ବେଳେ ଲୋକେ ଅସହ୍ୟ ଗରମରେ ସନ୍ତୁଳି ହୋଇଯାଇଥିଲେ। ତା’ପରେ ବିଭିନ୍ନ ସମୟରେ କାଳବୈଶାଖୀ ବର୍ଷା ଯୋଗୁ ପ୍ରାୟ ଦୁଇ ସପ୍ତାହ ଧରି ଖରାରୁ ରକ୍ଷା ପାଇଥିଲେ ଲୋକେ। କିନ୍ତୁ ଏବେ ପୁଣି ଆରମ୍ଭ ହୋଇଯାଇଛି ଗ୍ରୀଷ୍ମ ପ୍ରବାହ। ଆଜି ରାଜ୍ୟର ୧୮ଟି ସହରର ସର୍ବୋଚ୍ଚ ତାପମାତ୍ରା ୪୦ ଡିଗ୍ରୀ ବା ତା’ଠାରୁ ଅଧିକ ରେକର୍ଡ କରାଯାଇଛି। ସବୁଠୁ ଅଧିକ ତାପମାତ୍ରା ରେକର୍ଡ କରାଯାଇଛି ବୌଦ୍ଧରେ। ଏଠାରେ ଆଜି ଦିନର ସର୍ବୋଚ୍ଚ ତାପମାତ୍ରା ୪୨.୫ ଡିଗ୍ରୀ ରହିଥିଲା।
ସେହିପରି ଝାରସୁଗୁଡ଼ାର, ସମ୍ବଲପୁର, ରାଉରକେଲା, ଅନୁଗୋଳ, ସୁନ୍ଦରଗଡ଼, ତାଳଚେର, ବଲାଙ୍ଗିର, ଜଗତସିଂହପୁର, ଚାନ୍ଦବାଲି, ଟିଟିଲାଗଡ଼, ସୋନପୁର, ନୟାଗଡ଼ ଓ କେନ୍ଦ୍ରାପଡ଼ାରେ 40 ଡିଗ୍ରୀ ଉପରେ ରେକର୍ଡ କରାଯାଇଛି।

ରାଜଧାନୀ ଭୁବନେଶ୍ୱରର ସର୍ବୋଚ୍ଚ ତାପମାତ୍ରା ଆଜି ୩୮.୭ ଡିଗ୍ରୀ ରହିଥିବା ବେଳେ କଟକ, ହୀରାକୁଦ, ବରଗଡ଼, ନୂଆପଡ଼ା, ଭବାନୀପାଟଣା, ଦେବଗଡ଼, ମାଲକାନଗିରି, ଢେଙ୍କାନାଳ, ଯାଜପୁର, ଫୁଲବାଣୀ, ଭଦ୍ରକ, ପାରଳାଖେମୁଣ୍ଡି, ବାରିପଦା, ଛତ୍ରପୁର, ଖୋର୍ଦ୍ଧା, ବାଲେଶ୍ୱର ଓ କେନ୍ଦୁଝରରେ ୪୦ ଡିଗ୍ରୀ ତଳେ ଥିଲା ତାପମାତ୍ରା।
‘ଆମେ ଭଲ ବନ୍ଧୁ, ରାଜନୈତିକ ଚର୍ଚ୍ଚା କରିନୁ’

ବିଜେପି ବିରୋଧୀ ମେଣ୍ଟ ପ୍ରୟାସରେ ଥିବା ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଆଜି ନବୀନ ନିବାସ ଆସି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି । ଉଭୟଙ୍କ ମଧ୍ୟରେ ପ୍ରାୟ ଦେଢ଼ ଘଣ୍ଟା ଧରି ଆଲୋଚନା ହୋଇଥିଲା । ତେବେ ଏଥିରେ କୌଣସି ରାଜନୈତିକ ଚର୍ଚ୍ଚା କି ମେଣ୍ଟ ନେଇ ଆଲୋଚନା ହୋଇନାହିଁ ବୋଲି ଉଭୟ ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି । ଆମେ ପୁରୁଣା ବନ୍ଧୁ ବୋଲି କହି ରାଜନୈତିକ ପ୍ରସଙ୍ଗକୁ ଏଡ଼ାଇ ଦେଇଛନ୍ତି । ବିହାର ତୀର୍ଥଯାତ୍ରୀଙ୍କ ପାଇଁ ପୁରୀରେ ଦେଢ଼ ଏକର ଜମି ମାଗଣାରେ ଯୋଗାଇ ଦେବାକୁ ନବୀନ ଏହି ଅବସରରେ ପ୍ରତିଶ୍ରୁତି ଦେଇଛନ୍ତି ।

ଆଜି ଦିନ ପ୍ରାୟ ୧୨ଟାରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଭୁବନେଶ୍ୱର ବିମାନ ବନ୍ଦରରେ ପହଞ୍ଚିଥିଲେ । ସେଠାରେ ବିଜେଡିର ଦୁଇ ବରିଷ୍ଠ ନେତା ଦେବୀ ପ୍ରସାଦ ମିଶ୍ର ଏବଂ ଅଶୋକ ପଣ୍ଡା ତାଙ୍କୁ ସ୍ୱାଗତ କରିଥିଲେ । ବିମାନବନ୍ଦରରୁ ନୀତୀଶ ସିଧାସଳଖ ନବୀନ ନିବାସ ଆସିଥିଲେ । ନବୀନ ତାଙ୍କୁ ସ୍ୱାଗତ ଜଣାଇ ପାଛୋଟି ନେଇଥିଲେ । ଉଭୟ ମୁଖ୍ୟମନ୍ତ୍ରୀଙ୍କ ମଧ୍ୟରେ ପ୍ରାୟ ଦେଢ଼ ଘଣ୍ଟା ଧରି ଆଲୋଚନା ହୋଇଥିଲା । ଏହା ଭିତରେ ସେମାନେ ମଧ୍ୟାହ୍ନ ଭୋଜନ କରିଥିଲେ ।

ଏହାପରେ ଉଭୟ ମୁଖ୍ୟମନ୍ତ୍ରୀ ବାହାରକୁ ଆସି ଗଣମାଧ୍ୟମକୁ ପ୍ରତିକ୍ରିୟା ଦେଇଥିଲେ । ନବୀନ କହିଥିଲେ, ଆମେ ପୁରୁଣା ବନ୍ଧୁ । ବାଜପେୟୀ ସରକାରରେ ଉଭୟ ମନ୍ତ୍ରୀ ଥିଲୁ । ପୁରୀରେ ବିହାରର ତୀର୍ଥଯାତ୍ରୀଙ୍କ ପାଇଁ ଓଡ଼ିଶା ସରକାର ଦେଢ଼ ଏକର ଜମି ଯୋଗାଇଦେବେ । ସେଥିରେ ବିହାର ଭବନ ନିର୍ମାଣ ହେବ । ସମ୍ପୂର୍ଣ୍ଣ ମାଗଣାରେ ଏହି ଜମି ଦିଆଯିବ ବୋଲି ନବୀନ କହିଥିଲେ । ଆଜିର ବୈଠକରେ ମେଣ୍ଟ ଆଲୋଚନା ହୋଇନି ବୋଲି ସାମ୍ବାଦିକଙ୍କ ପ୍ରଶ୍ନରେ ନବୀନ କହିଥିଲେ ।

ସେହିଭଳି ନୀତୀଶ ମଧ୍ୟ ସମାନ ପ୍ରତିକ୍ରିୟା ଦେଇଥିଲେ । କହିଥିଲେ, ବିଜୁବାବୁଙ୍କ ସମୟରୁ ଆମର ପୁରୁଣା ସମ୍ପର୍କ । ଆମେ ଉଭୟ ପୁରୁଣା ବନ୍ଧୁ । ମୁଁ ଏଠାକୁ ଆଗରୁ ବାରମ୍ବାର ଆସିଛି । କରୋନା ଯୋଗୁଁ ମଝିରେ ଆସି ପାରି ନ ଥିଲି । ନବୀନ ବାବୁଙ୍କୁ ଭେଟିବାକୁ ବହୁ ଦିନରୁ ଇଚ୍ଛା ଥିଲା । ଆଜି ଦେଖା ହେଲା । ଦୁଇ ପୁରୁଣା ବନ୍ଧୁ କଥା ହେଲୁ । ଆମ ଭିତରେ କୌଣସି ରାଜନୈତିକ ଆଲୋଚନା ହୋଇନି ବୋଲି ନୀତୀଶ କହିଥିଲେ । ପୁରୀରେ ବିହାର ତୀର୍ଥଯାତ୍ରୀଙ୍କୁ ଦେଢ଼ ଏକର ଜମି ମାଗଣାରେ ଯୋଗାଇଦେବାକୁ ନବୀନବାବୁ ଘୋଷଣା କରିଥିବାରୁ ସେ ଧନ୍ୟବାଦ ଜଣାଇଥିଲେ ।

ସୂଚନାଯୋଗ୍ୟ, ୨୦୨୪ ସାଧାରଣ ନିର୍ବାଚନ ପରିପ୍ରେକ୍ଷୀରେ ବିଜେପି ବିରୋଧୀ ମେଣ୍ଟ ପାଇଁ ନୀତୀଶ କୁମାର ନବୀନଙ୍କୁ ମନେଇବାକୁ ଓଡ଼ିଶା ଆସୁଥିବା ଚର୍ଚ୍ଚା ହୋଇଥିଲା । ପୂର୍ବରୁ ନୀତୀଶ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ.ଷ୍ଟାଲିନ୍, ସମାଜବାଦୀ ପାର୍ଟି ନେତା ଅଖିଳେଶ ଯାଦବ ପ୍ରମୁଖଙ୍କୁ ସାକ୍ଷାତ କରିଥିଲେ । କଂଗ୍ରେସ ଅଧ୍ୟକ୍ଷ ମଲିକାର୍ଜୁନ ଖଡ଼ଗେ ଓ ରାହୁଲ ଗାନ୍ଧୀଙ୍କୁ ମଧ୍ୟ ଭେଟିଥିଲେ । ଚଳିତ ମାସ ୧୮ ତାରିଖରେ ନୀତୀଶ ଅଣ ବିଜେପି ଦଳମାନଙ୍କର ଏକ ମେଳି ଆୟୋଜନ କରୁଛନ୍ତି । ଏଥିରେ ସାମିଲ ହେବା ପାଇଁ ନବୀନଙ୍କୁ ନୀତୀଶ ଅନୁରୋଧ କରିବେ ବୋଲି ମଧ୍ୟ ଚର୍ଚ୍ଚା ହେଉଥିଲା ।

ମାତ୍ର ଆଜି ନୀତୀଶ ନବୀନ ନିବାସ ଆସି ନବୀନଙ୍କ ସହ ଦୀର୍ଘ ସମୟ ଆଲୋଚନା କରିବା ଏବଂ ଏହି ଆଲୋଚନାକୁ ଉଭୟ ବନ୍ଧୁତ୍ୱ ସମ୍ପର୍କର ଦ୍ୱାହି ଦେଇ ରାଜନୈତିକ ପ୍ରସଙ୍ଗକୁ ଏଡାଇଦେବା ସମସ୍ତଙ୍କ ମୁଣ୍ଡ ଟିଣ କରିଦେଇଛି । ବନ୍ଧୁ ନବୀନଙ୍କୁ ନୀତୀଶ କ’ଣ ଖାଲି ସ୍ନେହରେ ଭେଟିବାକୁ ଆସିଥିଲେ ନା ନୀତୀଶଙ୍କ ପ୍ରସ୍ତାବରେ ନବୀନ ରାଜି ହେଲେ ନାହିଁ? ଏହାକୁ ନେଇ ରାଜନୈତିକ ମହଲରେ ବିଭିନ୍ନ ଆଲୋଚନା ହେଉଛି ।

ରାଜନୈତିକ ପର୍ଯ୍ୟବେକ୍ଷକଙ୍କ କହିବାନୁଯାୟୀ, ଯଦି ବି ନବୀନଙ୍କୁ ମନାଇବା ନୀତୀଶଙ୍କ ପାଇଁ ଏତେ ସହଜ ନୁହେଁ । କେନ୍ଦ୍ରରେ ବିଭିନ୍ନ ପ୍ରସଙ୍ଗରେ ବିଜେପି ସରକାରଙ୍କୁ ସମର୍ଥନ କରୁଥିଲେ ମଧ୍ୟ କଂଗ୍ରେସ ଓ ବିଜେପିଠାରୁ ସମଦୂରତା ନୀତିକୁ ଧରି ସେ ରାଜନୀତି କରୁଛନ୍ତି । ଜାତୀୟ ରାଜନୀତିରେ ଏହା ତାଙ୍କ ପାଇଁ ଗୁରୁତ୍ୱ ରଖୁଛି । ତେଣୁ କଂଗ୍ରେସକୁ ସାଥୀରେ ରଖିବାକୁ ଚାହୁଁଥିବା ନୀତୀଶଙ୍କ ପାଲରେ ନବୀନ ପଡ଼ିବେ ବୋଲି ବିଶ୍ୱାସ ହେଉନାହିଁ । ସମ୍ଭାବ୍ୟ ରାଜନୈତିକ ଦୃଶ୍ୟପଟରେ ନବୀନଙ୍କ ରଣନୀତି ଓ ଗୋଟିଚାଳନା ଏବେଠାରୁ ବୁଝିବା କଷ୍ଟକର ବୋଲି ସେମାନଙ୍କର ମତ ।

ଏହାପୂର୍ବରୁ ଗତ ମାର୍ଚ୍ଚ ୨୩ ତାରିଖରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନବୀନ ନିବାସ ଆସି ନବୀନଙ୍କୁ ସାକ୍ଷାତ କରିଥିଲେ । ସାକ୍ଷାତକାର ସୌଜନ୍ୟମୂଳକ ଥିଲା ଏବଂ କୌଣସି ଗମ୍ଭୀର ରାଜନୈତିକ ଚର୍ଚ୍ଚା ହୋଇନାହିଁ ବୋଲି ଉଭୟ ମୁଖ୍ୟମନ୍ତ୍ରୀ ଗଣମାଧ୍ୟମକୁ ପ୍ରତିକ୍ରିୟା ଦେଇଥିଲେ । ସଶକ୍ତ ସଂଘୀୟ ବ୍ୟବସ୍ଥା ଉପରେ ସୁନ୍ଦର ଆଲୋଚନା ହୋଇଥିବା ଜଣାଇଥିଲେ ।
ବୋମା ମାଡ଼ରୁ ଅଳ୍ପକେ ବର୍ତ୍ତିଲେ ବାହାରେ ଶୋଇଥିବା ପରିବାର

କେନ୍ଦୁଝର ଜିଲ୍ଲା ତେଲକୋଇ ଥାନା ଅଧୀନ ପଡିଆପଶି ଗାଁ ପୁଢେଇଝୁଲ ସାହିରେ ବୋମା ମାଡ। ବୋମା ମାଡରେ ଏକ ପରିବାରର ସମସ୍ତ ଆସବାବ ପତ୍ର ନଷ୍ଟ ହୋଇଯାଇଥିବା ବେଳେ ସୌଭାଗ୍ୟବଶତଃ ପରିବାରବର୍ଗ ସୁରକ୍ଷିତ ଅଛନ୍ତି। ଗରମ ପାଇଁ ପରିବାରର ୮ ସଦସ୍ୟ ବର୍ତ୍ତି ଯାଇଛନ୍ତି। ତେବେ କିଏ ବୋମାମାଡ କରିଛି ତାହା ଜଣାପଡି ନାହିଁ।

ଗତକାଲି ରାତିରେ ପଡିଆପଶି ପୁଢେଇଝୁଲ ସାହିର କୀର୍ତ୍ତନ ନାୟକ ତାଙ୍କ ପୁଅ, ସ୍ତ୍ରୀ, ଝିଅ, ଜ୍ୱାଇଁ ଓ ୩ ନାତୁଣୀ ଘର ଭିତରେ ଗରମ ହେବାରୁ ଘର ବାହାରେ ଶୋଇଥିଲେ। ରାତି ପ୍ରାୟ ୧୨ ଟା ସମୟରେ ଘର ଭିତରେ ଏକ ବମ ଫୁଟିବା ପରି ଶବ୍ଦ ଶୁଣା ଯାଇଥିଲା। ପରିବାର ଲୋକେ ଉଠିପଡିଥିଲେ ସେହି ଶବ୍ଦରେ। ଭୟ ଓ ଆତଙ୍କ ଦେଖିନ୍ତି ତ ଘରର ଝରକା ପଟରେ ନିଆଁ ବାହାରୁଛି। ଘର ଭିତରେ ନିଆଁ ହୁତୁହୁତୁ ହେଇ ଜଳୁଛି। ବୋମା ଫାଟିବାର ଶବ୍ଦ ଶୁଣି ଆଖପାଖ ଲୋକେ ମଧ୍ୟ ନିଦରୁ ଉଠି ଦେଖନ୍ତି କେହି ଦୁଇ ଜଣ ଦୌଡି ପଳାଉଥିବା ବେଳେ, କୀର୍ତ୍ତନ ନାୟକଙ୍କ ଘର ଜଳୁଛି। କାଳ ବିଳମ୍ବ ନ କରି ଗାଁ ଲୋକେ ପହଞ୍ଚି ନିଆଁକୁ ଆୟତ୍ତ କରିଥିଲେ।

ପୂର୍ବ ଶତ୍ରୁତାରୁ କେହି ଏପରି କରିଥାଇପାରେ ବୋଲି ତେଲକୋଇ ଥାନାରେ ଅଭିଯୋଗ ହୋଇଛି। ଘଟଣାସ୍ଥଳରେ ତେଲକୋଇ ପୋଲିସ ପହଞ୍ଚି ତଦନ୍ତ କରୁଛି।
ପାକ୍ ପୂର୍ବତନ ପ୍ରଧାନମନ୍ତ୍ରୀ ଗିରଫ: ଅସନ୍ତୁଷ୍ଟ ହାଇକୋର୍ଟ

ପାକିସ୍ତାନର ପୂର୍ବତନ କ୍ରିକେଟ ଅଧିନାୟକ ତଥା ପୂର୍ବତନ ପ୍ରଧାନମନ୍ତ୍ରୀ ଇମରାନ ଖାଁଙ୍କୁ ଆଜି ଗିରଫ କରାଯାଇଛି। ଏକ ମାମଲାରେ ସେ ଇସ୍ଲାମାବାଦ ହାଇକୋର୍ଟ ଆସୁଥିବା ବେଳେ କୋର୍ଟ ନିକଟରୁ ଗିରଫ କରିଛି ରେଞ୍ଜର୍ସ। ତେବେ ହାଇକୋର୍ଟ ପରିସରରୁ ଇମରାନଙ୍କୁ ଏପରି ଗିରଫ କରାଯିବାକୁ ନେଇହାଇକୋର୍ଟ ମୁଖ୍ୟ ବିଚାରପତି ଆମିର୍ ଫାରୁକ୍ ଅସନ୍ତୋଷ ପ୍ରକାଶ କରିଥିଲେ। ସମଗ୍ର ପାକିସ୍ତାନରେ ହିଂସା ଆରମ୍ଭ ହୋଇଯାଇଛି ।

ଗିରଫଦାରୀ ପରେ ଇମ୍ରାନଙ୍କ ଦଳ ପିଟିଆଇ ନିଜ ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରେ ଏକ ଭିଡିଓ ପୋଷ୍ଟ କରି ଗିରଫ କରିବା ବେଳେ ପୂର୍ବତନ ପ୍ରଧାନମନ୍ତ୍ରୀଙ୍କୁ ଧକ୍କା ଦିଆଯାଇଥିବା ଅଭିଯୋଗ କରାଯାଇଛି । ଏକ ଭିଡିଓ ସହ ପିଟିଆଇ ପକ୍ଷରୁ ଉଲ୍ଲେଖ କରାଯାଇଛି କି, ରେଞ୍ଜର୍ସ ଯବାନମାନେ ଇମରାନଙ୍କୁ ଠେଲାପେଲା କରିଥିଲେ । ପାକିସ୍ତାନ, ଦେଶର ଲୋକଙ୍କୁ ବଞ୍ଚାଇବାର ଏହି ସମୟ… ଏହାପରେ ଆଉ କୌଣସି ସୁଯୋଗ ମିଳିବ ନାହିଁ ବୋଲି ଉଲ୍ଳେଖ ରହିଛି। ଏହି ଗିରଫଦାରୀକୁ ବିରୋଧ କରି ଦେଶର ପ୍ରମୁଖ ସହରରେ ପିଟିଆଇ ବ୍ଲକିଂ ଆରମ୍ଭ କରି ଦେଲାଣି।

ସେପଟେ ହାଇକୋର୍ଟ ପରିସରରୁ ଇମ୍ରାନଙ୍କୁ ଗିରଫ କରାଯିବାକୁ ନାପସନ୍ଦ କରି କୋର୍ଟ ୧୫ ମିନିଟ ଭିତରେ ଇସ୍ଲାମାବାଦ ପୁଲିସ ମୁଖ୍ୟ, ଆଭ୍ୟନ୍ତରୀଣ ମନ୍ତ୍ରାଳୟର ସଚିବ ଓ ଅତିରିକ୍ତ ଆଟର୍ଣ୍ଣି ଜେନେରାଲଙ୍କୁ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦେଇଥିଲେ । ପୁଲିସ ମୁଖ୍ୟ ୧୫ ମିନିଟ ମଧ୍ୟରେ ହାଜର ନହେଲେ ଖୋଦ୍ ପ୍ରଧାନମନ୍ତ୍ରୀଙ୍କୁ ବି ସମନ ପଠାଇବାକୁ ମୁଖ୍ୟ ବିଚାରପତି କହିଥିବା ସୂଚନା ରହିଛି ।

କେଉଁ ମାମଲାରେ ଇମ୍ରାନଙ୍କୁ ଗିରଫ କରାଯାଇଛି ତାହା ଜଣାଇବାକୁ କୋର୍ଟ ପୁଲିସ ମୁଖ୍ୟଙ୍କୁ ନିର୍ଦ୍ଦେଶ ଦେଇଛନ୍ତି । ଗଣମାଧ୍ୟମ ରିପୋର୍ଟ ଅନୁସାରେ ଇମରାନ ଆଜି ଏକ ମାମଲାକ ଶୁଣାଣି ପାଇଁ କୋର୍ଟରେ ହାଜର ହେବାକୁ ଯାଉଥିଲେ। କୋର୍ଟ ପରିସରରେ ଇମରାନଙ୍କ ଗାଡି ପ୍ରବେଶ କରିବା ପରେ ପୁଲିସ ହାଇକୋର୍ଟ ଗେଟକୁ ବନ୍ଦ କରିଦେବା ସହ ତାଙ୍କୁ ଗିରଫ କରିଥିଲେ । ଏହି ଘଟଣା ପରେ ପାକିସ୍ତାନରେ ଦେଖାଦେଇଛି ଦଙ୍ଗା ପରିସ୍ଥିତି।

https://twitter.com/KhaleejMag/status/1655874707634155526

ଗତବର୍ଷ ସତ୍ତା ହରାଇବା ପରଠାରୁ ଇମରାନ ଖାଁ ଲଗାତର ବର୍ତ୍ତମାନର ସେହବାଜ ସରକାରକୁ ଟାର୍ଗେଟ କରି ଆସୁଥିଲେ। ସମ୍ପ୍ରତି ପାକିସ୍ତାନ କାଙ୍ଗାଳ ସ୍ଥିତିରେ ପହଞ୍ଚି ଥିବା ବେଳେ ଇମରାନ ସେଠାକାର ସରକାର ଓ ସେନାକୁ ଦାୟୀ କରି ଆସୁଥିଲେ। ଯାହା ସରକାର ପାଇଁ ମୁଣ୍ଡ ବ୍ୟଥାର କାରଣ ପାଲଟିଯାଇଛି। ତେଣୁ ଗତ ନଭେମ୍ବରରେ ଯେତେବେଳେ ଇମରାନ ସରାକର ବିରୋଧରେ ଏକ ବଡ ରାଲିର ଆହ୍ୱାନ କରି ରାଲି ଆୟୋଜନ କରିଥିଲେ, ତାଙ୍କ ଉପରକୁ ଗୁଳିମାଡ ହୋଇଥିଲା। କିନ୍ତୁ ଭାଗ୍ୟ ବଳରୁ ଇମରାନ ସେତେବେଳେ ସାମାନ୍ୟ ଆହତ ହୋଇଥିଲେ।
ରାତି ପାହିଲେ ଝାରସୁଗୁଡ଼ା ଭୋଟ

ଝାରସୁଗୁଡ଼ା ଉପନିର୍ବାଚନ ପାଇଁ ରାତି ପାହିଲେ ହେବ ଭୋଟ୍ । ବୁଧବାର ସକାଳ ୭ଟାରୁ ଭୋଟିଂ ଆରମ୍ଭ ହୋଇ ସଂଧ୍ୟା ୬ଟା ପର୍ଯ୍ୟନ୍ତ ଚାଲିବ । ୧୯୭ ଟି ସ୍ଥାନରେ ୨୫୩ ବୁଥରେ ଭୋଟିଂ ହେବ । ସମୁଦାୟ ୨ ଲକ୍ଷ ୨୧ ହଜାର ୭୧୯ ଭୋଟର୍ ଭୋଟ୍ ଦେବେ । ସେମାନଙ୍କ ମଧ୍ୟରେ ୧ ଲକ୍ଷ ୧୦ ହଜାର ୬୮୩ ମହିଳା ଭୋଟର୍ ଥିବା ବେଳେ ୧ ଲକ୍ଷ ୧୦ ହଜାର ୩୨୩ ପୁରୁଷ ଭୋଟର୍ ଅଛନ୍ତି ।

ଉପନିର୍ବାଚନକୁ ଶାନ୍ତି ଶୃଙ୍ଖଳାର ସହ କରାଇବା ପାଇଁ ନିର୍ବାଚନ କମିସନଙ୍କ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଇଛି । ୬୯ ଟି ସ୍ଥାନରେ ୧୦୬ଟି ବୁଥ୍ ସମ୍ବେଦନଶୀଳ ଚିହ୍ନଟ କରାଯାଇଛି । ଏହି ସମ୍ବେଦନଶୀଳ ବୁଥଗୁଡ଼ିକରେ ମାଇକ୍ରୋ ଅବଜର୍ଭର ରହିବେ । ସମସ୍ତ ୨୫୩ ବୁଥରେ ୱେବ୍ କାଷ୍ଟିଂ ବ୍ୟବସ୍ଥା ହୋଇଛି । ସମୁଦାୟ ୧୧୯୪ ପୋଲିଂ କର୍ମଚାରୀଙ୍କୁ ନିୟୋଜିତ କରାଯାଇଛି ।

ଶାନ୍ତିଶୃଙ୍ଖଳା ରକ୍ଷା ପାଇଁ ନିର୍ବାଚନମଣ୍ଡଳୀକୁ ୫ଟି ଜୋନରେ ବିଭକ୍ତ କରାଯାଇଛି । ଓଡ଼ିଶା ପୁଲିସର ୧୯ ପ୍ଲାଟୁନ୍ ଫୋର୍ସ, ୩୦୦ ଓଆର୍ କନେଷ୍ଟବଳ, ୧୫୦ ହୋମଗାର୍ଡ, ୧୦୦ ଅଫିସରଙ୍କୁ ଆଇନ ଶୃଙ୍ଖଳା ବଜାୟ ରଖିବାକୁ ନିୟୋଜିତ କରାଯାଇଥିବା ବେଳେ ୭ କମ୍ପାନୀ କେନ୍ଦ୍ରୀୟ ଫୋର୍ସ ୧୪୪ ବୁଥ୍ ଉପରେ ବିଶେଷ ନଜର ରଖିବେ ।

ଝାରସୁଗୁଡ଼ା ଉପନିର୍ବାଚନ ମୈଦାନରେ ମୋଟ ୯ ଜଣ ପ୍ରାର୍ଥୀ ଅଛନ୍ତି । ବିଜେଡି ପ୍ରାର୍ଥୀ ଦୀପାଳି ଦାସ, ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀ ଏବଂ କଂଗ୍ରେସ ପ୍ରାର୍ଥୀ ତରୁଣ ପାଣ୍ଡେଙ୍କ ମଧ୍ୟରେ ମୁଖ୍ୟତଃ ପ୍ରତିଦ୍ୱନ୍ଦିତା ହେଉଛି । ଆସନ୍ତା ୧୩ ତାରିଖରେ ଭୋଟଗଣତି ହେବ ।
ବିଜେପି ନେତାଙ୍କ ଘରୁ ୪୦୦ ଶାଢ଼ୀ ଜବତ

ରାତି ପାହିଲେ ଝାରସୁଗୁଡା ଉପନିର୍ବାଚନ ପାଇଁ ଭୋଟ। ସୋମବାରଠାରୁ ନିର୍ବାଚନ ପ୍ରଚାର ବନ୍ଦ ହୋଇଛି। ସ୍ଥାନୀୟ ବିଧାନସଭା ମଣ୍ଡଳୀରେ ଜାରି ରହିଛି ସାଇଲେଣ୍ଟ ପିରିଅଡ। ନିୟମ ଅନୁଯାୟୀ କୌଣସି ଦଳ ପକ୍ଷରୁ ଭୋଟରଙ୍କୁ ପ୍ରଭାବିତ କରାଯିବ ନାହିଁ କି ପ୍ରଚାର ହେବ ନାହିଁ। କିନ୍ତୁ ନିୟମ ବାହାରେ ସବୁ ଦଳ ପକ୍ଷରୁ ଶେଷ ମୁହୂର୍ତ୍ତରେ ଭୋଟରଙ୍କୁ ପ୍ରଭାବିତ କରିବାକୁ ସବୁ ପ୍ରକାର ଚେଷ୍ଟା ଜାରିରହିଛି। ଏପରି ସମୟରେ ବିଜେପି ପକ୍ଷରୁ ମହିଳା ଭୋଟରଙ୍କୁ ଆକୃଷ୍ଟ କରିବାକୁ ଶାଢୀ ଅଣାଯାଇଥିବା ବେଳେ ଏହାକୁ ଜବତ କରାଯାଇଛି।

ଆଜି କୋଲାବିରା ବ୍ଲକ ଜମିଦାରପଡାକୁ ବିଜେପି ମଣ୍ଡଳ ଉପସଭାପତି ସଞ୍ଜୟ ପୂଜାରୀ ବିପୁଳ ଶାଢ଼ୀ ନେଇ ଆସୁଥିବା ବେଳେ ଫ୍ଲାଇଙ୍ଗ ସ୍କ୍ୱାଡ଼ ଶାଢୀ ସବୁକୁ ଜବତ କରିଥିବା ସୂଚନା ମିଳିଛିl ଫ୍ଲାଇଙ୍ଗ ସ୍କ୍ୱାଡ ଚଢ଼ାଉ ପରେ ପୂଜାରୀଙ୍କ ଘରୁ ୪୦୦ ଖଣ୍ଡ ନୂଆ ଶାଢ଼ୀ ମିଳିଥିଲା। ଜବତ ସମସ୍ତ ଶାଢ଼ୀ ଆଜି ଝାରସୁଗୁଡାର ଏକ ଦୋକାନରୁ କିଣା ଯାଇଥିବା ବେଳେ ମେସର୍ସ ସ୍ନେହା ମଲ୍ଟିମିଡ଼ିଆ ନାଁରେ ବିଲ କଟାଯାଇଛି। ସ୍କ୍ୱାଡ଼ ଶାଢ଼ୀ ଗୁଡିକ ଜବତ କରିଥିବା ବେଳେ ତଦନ୍ତ ଆରମ୍ଭ କରିଛିl

ସୂଚନାଯୋଗ୍ୟ, ଝାରସୁଗୁଡ଼ା ଉପନିର୍ବାଚନ ପାଇଁ ମୋଟ ୨୫୩ଟି ଭୋଟଗ୍ରହଣ କେନ୍ଦ୍ରରେ ଆସନ୍ତା ୧୦ତାରିଖରେ ଭୋଟଗ୍ରହଣ ଅନୁଷ୍ଠିତ ହେବ ଓ ମୋଟ ୨.୨୧ଲକ୍ଷ ଭୋଟର ମତାଧିକାର ସାବ୍ୟସ୍ତ କରିବେ । ସେପଟେ ନିର୍ବାଚନ ପାଇଁ ପୋଲିଂ ପାର୍ଟି ସବୁ ଝାରସୁଗୁଡା ହେଡ କ୍ୱାଟରରୁ ବାହାରି ଗଲେଣି ନିଜ ନିଜ ବୁଥକୁ।
ବିଜେପି ରାଜ୍ୟ ବିକାଶରେ ସାଜିଛି ବାଧକ

ବିଜେପି ଦଳର ନେତା ରାଜ୍ୟର ବିକାଶ ଧାରାକୁ ସହ୍ୟ କରି ପାରୁନାହାଁନ୍ତି । ବ୍ଲକରେ ପସି ବିଭିନ୍ନ ଅଫିସରେ ତାଲା ପକାଇ ଦେଉଥିବା କାର୍ଯ୍ୟରୁ ଏହା ସ୍ପଷ୍ଟ ଜଣାପଡୁଛି। ବିଜେପି ପକ୍ଷରୁ ବ୍ଲକରେ ତାଲା ପକାଇବା ଏକ ନିନ୍ଦନୀୟ ଘଟଣା । ଗଣତାନ୍ତ୍ରିକ ବାଟରେ ଯାଉ ନାହିଁ ବିଜେପି । ବ୍ଲକରେ ସେମାନେ ତାଲା ପକାଇନାହାଁନ୍ତି ବରଂ ସେମାନେ ବ୍ଲକର ବିକାଶଧାରାରେ ତାଲା ପକାଇଛନ୍ତି ବୋଲି ଗତକାଲି ଘଟଣା ଉପରେ କାଉଣ୍ଟର ଅଟାକ କରିଛନ୍ତି କଟକ ଜିଲ୍ଲା ସାଲେପୁର ବ୍ଲକ ବିଜେଡି ଦଳ ଓ ପଂଚାୟତ ସମିତିର ଅଧ୍ୟକ୍ଷ ।

ଏନେଇ ସାଲେପୁର ବ୍ଲକ କାର୍ଯ୍ୟାଳୟ ସମ୍ମୁଖରେ ବ୍ଲକ ଯୁବ ବିଜେଡି ଓ ପଂଚାୟତ ସମିତି ଅଧ୍ୟକ୍ଷ , ସମର୍ଥିତ ସରପଞ୍ଚ, ସମିତି ସଭ୍ୟ ମାନେ ଧାରଣାରେ ବସିବା ସହ ଗତାକଲିର କାର୍ଯ୍ୟକୁ ତୀବ୍ର ନିନ୍ଦା କରିଛନ୍ତି। ଏହାକୁ ନେଇ ଏକ ପ୍ରତିବାଦ ସଭା ସ୍ଥାନୀୟ ବିଜେଡି ଦ୍ୱାରା କରାଯାଇଛି। ଅନ୍ୟପଟେ ବ୍ଲକରେ ସାଧାରଣ ଲୋକଙ୍କ କୌଣସି କାର୍ଯ୍ୟ ହେଉନାହିଁ । ବ୍ଲକକୁ କର୍ମଚାରୀମାନେ ଠିକ ସମୟରେ ଅସୁନାହାଁନ୍ତି । ଲୋକେ ବ୍ଲକକୁ ଆସି ହଇରାଣ ହରକତ ହେଉଛନ୍ତି ବୋଲି ଅଭିଯୋଗ ଆଣି ଗତକାଲି ସାଲେପୁରର ପୂର୍ବତନ ବିଧାୟକ ତଥା କଟକ ଜିଲ୍ଲା ବିଜେପି ଜିଲ୍ଲା ସଭାପତି ପ୍ରକାଶ ବେହେରା ଅଚାନକ ବ୍ଲକକୁ ଆସି ବ୍ଲକର ସମସ୍ତ କାର୍ଯ୍ୟାଳୟରେ ତାଲା ପକାଇ ଦେଇଥିଲେ ।

ଗତକାଲିର ଘଟଣା ଉପରେ ବ୍ଲକ କାର୍ଯ୍ୟାଳୟ ପକ୍ଷରୁ ଏକ ଲିଖିତ ଅଭିଯୋଗ ସାଲେପୁର ଥାନାରେ କରାଯାଇଛି ପୋଲିସ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ବିଜେଡି କହିଛି ।
‘ହାତୀ ମୃତ୍ୟୁ ରୋକିବାକୁ ସୌରଚାଳିତ ବିଦ୍ୟୁତକୁ ବିକଳ୍ପ କର’

ହାତୀ ମୃତ୍ୟୁକୁ ନେଇ ଜଏଣ୍ଟ ଟାସ୍କ ଫୋର୍ସ ରିପୋର୍ଟ ଉପରେ ଓଡିଶା ହାଇକୋର୍ଟଙ୍କ ଉଦବେଗ। ଯଥାଶୀଘ୍ର ଜଙ୍ଗଲରେ ବିଦ୍ୟୁତ୍ ଯୋଗାଣରେ ବିକଳ୍ପ ଆଣିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ, ସୌରଚାଳିତ ବିଦ୍ୟୁତ୍ ବ୍ୟବହାର ଉପରେ ଗୁରୁତ୍ୱାରୋପ କରିଛନ୍ତି କୋର୍ଟ।

ଟାସ୍କ ଫୋର୍ସ ରିପୋର୍ଟ ମୁତାବକ, ଗତ ଦୁଇ ମାସରେ ୧୪ ହାତୀଙ୍କ ମୃତ୍ୟୁ ହୋଇଥିବା ବେଳେ ହାତୀ ଆକ୍ରମଣରେ ୨୦ ମଣିଷଙ୍କ ଜୀବନ ଯାଇଛି। ବିଦ୍ୟୁତ୍ ଆଘାତରେ ୪ ହାତୀଙ୍କ ମୃତ୍ୟୁ ହୋଇଥିବା ଶୁଣାଣି ବେଳେ ସ୍ପଷ୍ଟ ହୋଇଛି। ତେଣୁ ଆଜି ଶୁଣାଣି କାଳରେ ହାଇକୋର୍ଟ ଜଙ୍ଗଲରେ ଟଣାଯାଇଥିବା ବିଦ୍ୟୁତ୍ ଯୋଗାଣର ବିକଳ୍ପ ଆଣିବାକୁ କହିଛନ୍ତି। ଏଥିପାଇଁ ସପ୍ତାହକ ଭିତରେ ଚାରି ବିଦ୍ୟୁତ ବିତରଣ କମ୍ପାନୀର ସିଇଓଙ୍କ ମିଟିଂ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ବୈଠକରେ ଜଏଣ୍ଟ ଟାସ୍କ ଫୋର୍ସ ଅଧ୍ୟକ୍ଷତା କରିବ ବୋଲି ଉଚ୍ଚନ୍ୟାୟାଳୟଙ୍କ ପକ୍ଷରୁ ନିର୍ଦ୍ଦେଶ ଦିଭାଯାଇଛି।

ନିର୍ଦ୍ଦିଷ୍ଟ ସମୟ ସୀମା ଭିତରେ ପଦକ୍ଷେପ ପ୍ରସଙ୍ଗରେ ପଦକ୍ଷେପ ନେଇ ନିଷ୍ପତି ନେବେ କରାଯାଇଥିବା ଆକ୍ସନ ପ୍ଲାନ ର ଅଗ୍ରଗତି ସମ୍ପର୍କରେ ଜଏଣ୍ଟ ଟାସ୍କ ଫୋର୍ସ ଅଧ୍ୟକ୍ଷ ହାଇକୋର୍ଟରେ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି।
ନିତିଶ-ନବୀନ ଆଲୋଚନା,’ବିହାର ଭବନ’ ପାଇଁ ୧.୫ ଏକର ଜମି ଦେବେ ମୁଖ୍ୟମନ୍ତ୍ରୀ

କେନ୍ଦ୍ର ସରକାରଙ୍କ ବିରୋଧରେ ବିରୋଧୀଙ୍କୁ ଏକାଠି କରୁଥିବା ତଥା ବିହାର ମୁଖ୍ୟମନ୍ତ୍ରୀ ନିତିଶ କୁମାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି । ଗସ୍ତ ପୂର୍ବରୁ ସମସ୍ତେ ଭାବୁଥିଲେ ମେଣ୍ଟ ସରକାର ଗଠନ ପାଇଁ ଆଲୋଚନା କରିବାକୁ ଆସୁଛନ୍ତି ନିତିଶ । ମୋଦି ସରକାର ବିରୋଧରେ ଆଞ୍ଚଳିକ ଦଳ ଗୁଡ଼ିକୁ ଏକାଠି କରିବାରେ ଲାଗିଛନ୍ତି ନିତିଶ । ଏଥିରେ ତାଙ୍କର କିଛି ବ୍ୟକ୍ତିଗତ ସ୍ୱାର୍ଥ ନାହିଁ ବୋଲି ସେ କହିଥିଲେ । ତେବେ ବିଜେପି ସରକାରକୁ ହଟାଇବା ପାଇଁ ସେ ଉଦ୍ୟମ ଜାରି ରଖିଛନ୍ତି ।

ଆଜି ନିତିଶ କୁମାର ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ତାଙ୍କୁ ସ୍ୱାଗତ କରିଥିଲେ ମନ୍ତ୍ରୀ ଅଶୋକ ପଣ୍ଡା ଓ ବିଧାୟକ ଦେବୀ ମିଶ୍ର । ନିତିଶଙ୍କ ସ୍ବାଗତ ପାଇଁ ନବୀନ ନିବାସରେ ସ୍ୱତନ୍ତ୍ର ବ୍ୟବସ୍ଥା କରାଯାଇଥିଲା । ବିମାନ ବନ୍ଦରରୁ ସିଧାସଳଖ ନବୀନ ନିବାସ ଯାଇଥିଲେ ନିତିଶ । ସେଠାରେ ତାଙ୍କୁ ସ୍ୱାଗତ କରାଯାଇଥିବା ବେଳେ ମଧ୍ୟାହ୍ନ ଭୋଜନର ବ୍ୟବସ୍ଥା ହୋଇଥିଲା । ଭୋଜନରେ ଓଡ଼ିଆ ଖାଦ୍ୟ ପରଷା ଯାଇଥିଲା । ନିତିଶ,ନବୀନ ଏବଂ ଭି.କେ.ପାଣ୍ଡିଆନ ଏକାଠି ଖାଇଥିଲେ ।

ବିହାର ମୁଖ୍ୟମନ୍ତ୍ରୀ ନିତିଶ କୁମାର ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଢ଼ ଘଣ୍ଟା ଆଲୋଚନା କରିଥିଲେ। କିନ୍ତୁ ଏଥିରେ ରାଜନୀତି ନଥିଲା କି ମେଣ୍ଟ ଆଲୋଚନା ହୋଇନି । ପ୍ରେସମିଟରେ ଏଭଳି କହିଛନ୍ତି ମୁଖ୍ୟମନ୍ତ୍ରୀ । ସେପଟେ ନବୀନ ଓ ନିତିଶ ପୁରୁଣା ବନ୍ଧୁ। ବାଜପେୟୀ ସରକାର ବେଳୁ ସେମାନେ ପରସ୍ପରକୁ ଜାଣିଛନ୍ତି । ସେ ବିଜୁ ବାବୁଙ୍କୁ ଜାଣିଥିବା କହିଛନ୍ତି ନିତିଶ । ଅନେକ ବିହାରୀ ଜଗନ୍ନାଥ ଭକ୍ତ ପୁରୀ ଆସୁଛନ୍ତି । ତେଣୁ ସେଠାରେ ବିହାର
ଭବନ ପାଇଁ ନବୀନ ଦେଢ଼ ଏକର ଜାଗା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି । ଏହା ଏକ ସୌଜନ୍ୟମୂଳକ ସାକ୍ଷାତ ଥିଲା, ଏକାଠି ଖାଇଥିବା ନେଇ କହିଲେ ନିତିଶ କୁମାର । ସାକ୍ଷାତକାର କେବଳ ପାରିବାରିକ ବୋଲି ସେ କହିଛନ୍ତି ।

https://youtu.be/-4GKsK1b3CA

ଦେଶରେ ନବୀନଙ୍କ ଲୋକପ୍ରିୟତା ବଢ଼ିବାରେ ଲାଗିଛି । ରାଜ୍ୟର ବିକାଶ ପାଇଁ ନବୀନଙ୍କ ପଦକ୍ଷେପ, ବିଭିନ୍ନ ଯୋଜନା ତଥା ତାଙ୍କର ଭାବମୂର୍ତ୍ତି ଅନ୍ୟମାନଙ୍କ ଉପରେ ପ୍ରଭାବ ପକାଇଛି । ଦେଶରେ ମେଣ୍ଟ ସରକାର ଗଠନ ପାଇଁ ବିଜେପି ବିରୋଧୀ ଗୋଷ୍ଠୀ ଉଦ୍ୟମ ଜାରି ରଖିଛନ୍ତି । ସେଥିପାଇଁ ମମତା ବାନାର୍ଜୀ, ନିତିଶ କୁମାରଙ୍କ ପରି ନେତାମାନେ ନବୀନଙ୍କ ସହ ଆଲୋଚନା କରୁଛନ୍ତି । ପୂର୍ବରୁ ଅନେକ ନେତା ନବୀନ ନିବାସ ଆସିଛନ୍ତି ହେଲେ ଥାର୍ଡ ଫ୍ରଣ୍ଟ ଗଠନ ନେଇ ମୁଖ୍ୟମନ୍ତ୍ରୀ କୌଣସି ଗ୍ରୀନ ସିଗନାଲ ଦେଇନାହାଁନ୍ତି ।
ଲାଞ୍ଚ ନେଉଥିବା ବେଳେ ମାଡି ବସିଲା ଭିଜିଲାନ୍ସ

ଲାଞ୍ଚ ନେଉଥିବା ବେଳେ ତରଭା ଉପନିବନ୍ଧକ କାର୍ଯ୍ୟାଳୟର ମୁଖ୍ୟ କିରାଣି ଶିବ ପ୍ରସାଦ ଗୁରୁ ଓ ଦଲାଲ ହେମନ୍ତ ବିଶିଙ୍କୁ ମାଡି ବସିଛି ରାଜ୍ୟ ଦୁର୍ନୀତି ନିବାରଣ ସଂସ୍ଥା। ଜମି କାଗଜ ପତ୍ର ପ୍ରସ୍ତୁତ କରିବାକୁ ଅଭିଯୋଗକାରୀଙ୍କଠାରୁ ୨୪ହଜାର ଟଙ୍କା ଲାଞ୍ଚ ନେଉଥିବା ବେଳେ ସୋନପୁର ଓ ବଲାଙ୍ଗୀର ଭିଜିଲାନ୍ସ ଟିମ ଉଭୟଙ୍କୁ ଧରିଛି।

ସୂଚନା ମୁତାବକ, ୬ ଜଣଙ୍କର ଜମି ରେଜିଷ୍ଟେସନ ପାଇଁ ଦସ୍ତାବିଜ ପ୍ରସ୍ତୁତ କରିବାକୁ ଥିଲା। ଉପନିବନ୍ଧକ କାର୍ଯ୍ୟାଳୟକୁ ଯିବାରୁ ସେଠାରେ କାମ କରେଇ ଦେବାକୁ ପ୍ରତି ଆବେଦନକାରୀଙ୍କୁ ୪ ହଜାର ଲେଖା ଦେବାକୁ କହିଥିଲେ କାର୍ଯ୍ୟାଳୟର ମୁଖ୍ୟ କିରାଣି ଶିବ ପ୍ରସାଦ ଓ ଦଲାଲ ହେମନ୍ତ। ଏହାକୁ ନେଇ ସୁନାରିପଡାର ପ୍ରଦୀପ ସାହୁ ସୋନପୁର ଭିଜିଲାନ୍ସ ଅଫିସରେ ଅଭିଯୋଗ କରିଥିଲେ। ଅଭିଯୋଗ ଆଧାରରେ ଏକ ଯୋଜନା ହୋଇଥିଲା ଉଭୟଙ୍କୁ ଧରିବାକୁ।

ଯୋଜନା ମୁତାବକ, ଆଜି ପ୍ରଦୀପ ସାହୁ ୬ ଜଣଙ୍କର ୨୪ ହଜାର ଟଙ୍କା ଦେବାକୁ ଯାଇଥିଲେ। କାର୍ଯ୍ୟାଳୟ ବାହାରେ ସୋନପୁର ଓ ବଲାଙ୍ଗୀର ଭିଜିଲାନ୍ସର ମିଳିତ ଟିମ ଜଗିବସିଥିଲେ। ପ୍ରଦୀପ କିରାଣି ଓ ଦଲାଲଙ୍କୁ ୨୪ ହଜାର ଟଙ୍କା ଦେବା ବେଳେ ଭିଜିଲାନ୍ସ ଟିମ୍ ସେମାନଙ୍କୁ ରେଡ ହ୍ୟାଣ୍ଡେଡ ମାଡି ବସିଥିଲେ। ଉଭୟଙ୍କ ନିକଟରୁ ଲାଞ୍ଚ ଟଙ୍କା ଜବତ କରାଯାଇଛି। ମାମଲାରେ ପୋଲିସ ଉଭୟଙ୍କୁ ନିଜ ଅଧୀନକୁ ନେବା ସହ ଅଧିକ ତଦନ୍ତ ଚଳାଇଛି। ସମ୍ବଲପୁର ଭିଜିଲାନ୍ସରେ ମାମଲା ରୁଜୁ ହୋଇଛି।