ବଲାଙ୍ଗୀର ଜିଲ୍ଲା ମୁରିବାହାଲ ରେଞ୍ଜ ଅଞ୍ଚଳରେ ପୁଣିଥରେ ହାତୀ ଆତଙ୍କ ଦେଖାଦେଇଛି। କିଛି ଦିନର ବ୍ୟବଧାନ ପରେ ପୁଣି ଗାଁମୁହାଁ ହୋଇଛି ହାତୀପଲ। ମୁରିବାହାଲ ରେଞ୍ଜ ଅନ୍ତର୍ଗତ କୁମ୍ଭାରୀ ଗାଁର ମାଝୀପଡ଼ାରେ ପ୍ରବେଶ କରିଛି ୧୬ଟିକିଆ ହାତୀପଲ। ହାତୀପଲ ଗାଁ ଭିତରକୁ ପଶି ଘରଦ୍ୱାର ଭାଙ୍ଗିବା ସହ ଧାନ ନଷ୍ଟ କରିଥିବା ଅଭିଯୋଗ ହୋଇଛି।
ସୂଚନା ଅନୁସାରେ, ଗତ କିଛି ଦିନ ଧରି ଏହି ୧୬ଟିକିଆ ହାତୀପଲ ମୁରିବାହାଲ ରେଞ୍ଜର ବିଭିନ୍ନ ଅଞ୍ଚଳରେ ଘୁରି ବୁଲୁଛନ୍ତି। ରାତି ସମୟରେ ହାତୀପଲ ଜନବସତି ନିକଟକୁ ଆସୁଥିବାରୁ ଅଞ୍ଚଳବାସୀଙ୍କ ମଧ୍ୟରେ ଭୟ ଓ ଆତଙ୍କ ବଢ଼ିଛି। କୁମ୍ଭାରୀ ଗାଁର ମାଝୀପଡ଼ାରେ ହଠାତ୍ ହାତୀପଲ ପ୍ରବେଶ କରିବା ପରେ ଲୋକେ ଭୟଭୀତ ହୋଇପଡ଼ିଥିଲେ। ହାତୀଙ୍କୁ ଦେଖି ଲୋକମାନେ ଘରୁ ବାହାରକୁ ନଆସି ନିଜ ନିଜ ଘରେ ସତର୍କ ରହିଥିଲେ।
ହାତୀପଲ ଗାଁ ଭିତରେ ପଶି ବ୍ୟାପକ ଭାବେ ଫସଲ ନଷ୍ଟ କରିଥିବା ବେଳେ ଘରଦ୍ୱାର ମଧ୍ୟ ଭାଙ୍ଗିଥିବା ଜଣାପଡ଼ିଛି। ନେତ୍ର ଭୋଇଙ୍କ ଘର ହାତୀପଲ ଭାଙ୍ଗି ଦେଇଥିବା ଅଭିଯୋଗ ହୋଇଛି। ଘର ଭାଙ୍ଗିବା ସହ ଘରେ ରଖାଯାଇଥିବା ଧାନ ଓ ପଳା ନଷ୍ଟ ହୋଇଥିବାରୁ କ୍ଷତିଗ୍ରସ୍ତ ପରିବାର ଚିନ୍ତାରେ ପଡ଼ିଛନ୍ତି।
ହାତୀପଲ ବାରମ୍ବାର ଗାଁ ନିକଟକୁ ଆସୁଥିବାରୁ ଲୋକଙ୍କ ଜୀବନ ଓ ଧନସମ୍ପତ୍ତିର ସୁରକ୍ଷାକୁ ନେଇ ଆଶଙ୍କା ବଢ଼ିଛି। ବିଶେଷକରି ରାତି ସମୟରେ ହାତୀପଲର ଗତିବିଧି ଯୋଗୁଁ ଗ୍ରାମବାସୀ ଭୟଭୀତ ଅବସ୍ଥାରେ ରହୁଛନ୍ତି। ହାତୀପଲ କେତେବେଳେ ଗାଁ ଭିତରକୁ ପ୍ରବେଶ କରିବେ, ତାହାକୁ ନେଇ ଲୋକଙ୍କ ମଧ୍ୟରେ ସବୁବେଳେ ଆତଙ୍କ ଲାଗି ରହିଛି।
ଖବର ପାଇ ବନ ବିଭାଗର କର୍ମଚାରୀମାନେ ଗାଁରେ ପହଞ୍ଚି ଲୋକମାନଙ୍କୁ ସଚେତନ କରିଛନ୍ତି। ହାତୀପଲର ଗତିବିଧି ଉପରେ ବନ ବିଭାଗ ପକ୍ଷରୁ ନଜର ରଖାଯାଇଛି। ହାତୀପଲକୁ ସୁରକ୍ଷିତ ଭାବେ ଜନବସତିଠାରୁ ଦୂରେଇ ଜଙ୍ଗଲ ଆଡ଼କୁ ଘଉଡ଼ାଇବା ପାଇଁ ବନ କର୍ମଚାରୀମାନେ ଉଦ୍ୟମ ଜାରି ରଖିଛନ୍ତି।
ଅନ୍ୟପଟେ, ହାତୀପଲ ଯୋଗୁଁ ଘର ଓ ଫସଲ କ୍ଷତିଗ୍ରସ୍ତ ହୋଇଥିବା ପରିବାରଗୁଡ଼ିକୁ ନିୟମାନୁସାରେ ତୁରନ୍ତ କ୍ଷତିପୂରଣ ଦେବାକୁ ଦାବି ହୋଇଛି। ବାରମ୍ବାର ହାତୀ ଗାଁମୁହାଁ ହେଉଥିବାରୁ ହାତୀ-ମଣିଷ ସଂଘର୍ଷ ରୋକିବା ପାଇଁ ସ୍ଥାୟୀ ଓ ପ୍ରଭାବୀ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି। ହାତୀଙ୍କ ଗତିପଥ ଚିହ୍ନଟ କରି ସୁରକ୍ଷିତ ବ୍ୟବସ୍ଥା କରିବା ସହ ଗାଁ ନିକଟରେ ନିୟମିତ ପାଟ୍ରୋଲିଂ ବଢ଼ାଇବାକୁ ମଧ୍ୟ ଦାବି ହୋଇଛି।
ଏବେ ବନ ବିଭାଗର ନଜର ଏହି ୧୬ଟିକିଆ ହାତୀପଲର ପରବର୍ତ୍ତୀ ଗତିବିଧି ଉପରେ ରହିଛି। ହାତୀପଲ ଶୀଘ୍ର ଜନବସତିଠାରୁ ଦୂରେଇ ଜଙ୍ଗଲକୁ ଫେରିଯାଉ ଏବଂ ଆଗକୁ ଏଭଳି ଘଟଣା ନଘଟେ, ସେନେଇ ପ୍ରଶାସନ ଓ ବନ ବିଭାଗ ତୁରନ୍ତ ଠୋସ୍ ପଦକ୍ଷେପ ନେବାକୁ ଗ୍ରାମବାସୀ ଅପେକ୍ଷା କରିଛନ୍ତି।