ତୃଣମୂଳ କଂଗ୍ରେସର ବରିଷ୍ଠ ନେତା ଅଭିଷେକ ବାନାର୍ଜୀଙ୍କ ଉପରେ ହୋଇଥିବା ପ୍ରାଣାନ୍ତକ ଆକ୍ରମଣକୁ ନେଇ ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ତଥା ଟିଏମସି ସୁପ୍ରିମୋ ମମତା ବାନାର୍ଜୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ସୋନାରପୁରଠାରେ ଘଟିଥିବା ଏହି ଘଟଣାକୁ ନେଇ ସେ ସେଠାକାର ସ୍ଥାନୀୟ ପ୍ରଶାସନ ଓ ବିରୋଧୀ ଦଳକୁ କଡ଼ା ସମାଲୋଚନା କରିଛନ୍ତି। ମମତା ବାନାର୍ଜୀ କହିଛନ୍ତି ଯେ ଏହି ଆକ୍ରମଣ ଅତ୍ୟନ୍ତ ଭୟାବହ ଥିଲା।
ଯଦି ସେହି ସମୟରେ ଅଭିଷେକ ହେଲମେଟ୍ ପିନ୍ଧି ନଥାନ୍ତେ, ତେବେ ତାଙ୍କ ଜୀବନ ଚାଲିଯାଇଥାନ୍ତା। ଏହି ହିଂସାକାଣ୍ଡ ପଛରେ ବିଜେପିର ହାତ ଥିବା ସେ ସ୍ପଷ୍ଟ କରିଛନ୍ତି। ଏହା ସମ୍ପୂର୍ଣ୍ଣ ଭାବେ ‘ବିଜେପି ପ୍ରାୟୋଜିତ’ ଏକ ରାଜନୈତିକ ଷଡ଼ଯନ୍ତ୍ର ବୋଲି ସେ ଦାବି କରିଛନ୍ତି। ଅଭିଷେକଙ୍କ ଚିକିତ୍ସାରେ ଅବହେଳା କରାଯାଇଥିବା ନେଇ ସେ ସମ୍ପୃକ୍ତ ହସ୍ପିଟାଲ କର୍ତ୍ତୃପକ୍ଷଙ୍କୁ ଦାୟୀ କରିଛନ୍ତି ଏବଂ ଏଭଳି ବେପରୁଆ ମନୋଭାବକୁ ନିନ୍ଦା କରିଛନ୍ତି। ଏହି ଘଟଣା ପରେ ସମଗ୍ର ପଶ୍ଚିମବଙ୍ଗରେ ଟିଏମସି କର୍ମୀଙ୍କ ମଧ୍ୟରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଦଳ ପକ୍ଷରୁ ସାରା ରାଜ୍ୟରେ ବିକ୍ଷୋଭ ପ୍ରଦର୍ଶନ ପାଇଁ ରଣନୀତି ପ୍ରସ୍ତୁତ କରାଯାଉଛି। ଅପରପକ୍ଷରେ, ବିଜେପି ଏହି ଅଭିଯୋଗକୁ ସମ୍ପୂର୍ଣ୍ଣ ଭିତ୍ତିହୀନ ବୋଲି କହିଛି। ଏହା ଟିଏମସିର ଆଭ୍ୟନ୍ତରୀଣ ଗୋଷ୍ଠୀ କନ୍ଦଳର ପରିଣାମ ଏବଂ ସହାନୁଭୂତି ସାଉଣ୍ଟିବା ପାଇଁ ଏଭଳି ଡ୍ରାମା କରାଯାଉଛି ବୋଲି ବିଜେପି ପାଲଟା ଆରୋପ କରିଛି। ଦକ୍ଷିଣ ୨୪ ପ୍ରଗଣାର ସୋନାରପୁର ପୋଲିସ ଏହି ମାମଲାରେ ଏକ ସ୍ପେଶାଲ ଟାସ୍କ ଫୋର୍ସ ଗଠନ କରି ତଦନ୍ତ ଆରମ୍ଭ କରିଛି ଏବଂ ସନ୍ଦେହଜନକ କିଛି ବ୍ୟକ୍ତିଙ୍କୁ ଅଟକ ରଖି ପଚରାଉଚରା କରୁଛି।