ଦିଲ୍ଲୀ ମୁଖ୍ଯମନ୍ତ୍ରୀଙ୍କ ଗିରଫଦାରୀକୁ ନେଇ ଦିଲ୍ଲୀରେ ହଙ୍ଗାମା। ଗିରଫଦାରୀକୁ ବିରୋଧକରି ଆମ ଆଦମୀ ପାର୍ଟି ପକ୍ଷରୁ ଦେଶବ୍ୟାପୀ ବିରୋଧ। ବିଭିନ୍ନ ସ୍ଥାନରେ ଜାରି ରହିଛି ଆପ ନେତାଙ୍କ ବିରୋଧ ପ୍ରଦର୍ଶନ। ଗର୍ଜୁଛନ୍ତି କେଜରିୱାଲଙ୍କ ସମର୍ଥକ। ସେପଟେ ସୁପ୍ରିମ କୋର୍ଟରେ ଇଡି ଗିରଫଦାରୀ ବିରୋଧରେ କେଜରିୱାଲ କରିଥିବା ଆବେଦନକୁ ଫେରାଇ ନେଇଛନ୍ତି। ଏହାକୁ ସେ ନିମ୍ନ ଅଦାଲତରେ ଆବେଦନ କରିବେ ବୋଲି କହିଛନ୍ତି ତାଙ୍କ ଓକିଲ ଅଭିଷେକ ମନୁ ସିଂଘଭି। ଗତକାଲି ଦିଲ୍ଲୀ ହାଇକୋର୍ଟ କେଜରିୱାଲଙ୍କ ଦ୍ବାରା ପ୍ରବର୍ତ୍ତନ ନିର୍ଦ୍ଦେଶାଳୟର ଗିରଫଦାରୀରୁ ବର୍ତ୍ତିବାକୁ ହୋଇଥିବା ଆବେଦନକୁ ଖାରଜ କରିଦେଇ ତଦନ୍ତରେ ସାମିଲ ହେବାକୁ ତାଗିଦ କରିଥିଲେ। ଏହାପରେ ଇଡି ତାଙ୍କ ଦିଲ୍ଲୀସ୍ଥିତ ବାସଭବନରେ ପହଞ୍ଚି ତାଙ୍କୁ ପ୍ରାୟ ଦୁଇ ଘଣ୍ଟା ଜେରା କରିବା ପରେ ଗିରଫ କରିନେଇଥିଲା। କେଜରିୱାଲଙ୍କ ଗିରଫଦାରୀ ଖବର ପ୍ରଚାର ହେବା ପରେ ଆପ ପକ୍ଷରୁ ଏହାକୁ ଅବୈଧ, ଅନୈତିକ ବୋଲି କୁହାଯାଇଛି। କିଛି ସ୍ଥାନରେ ରାଜରାସ୍ତାକୁ ଓହ୍ଲାଇଥିଲେ ଦଳର ନେତା। ଦିଲ୍ଲୀ ଅର୍ଥମନ୍ତ୍ରୀ ଅତିସି ଗିରଫଦାରୀକୁ ନିନ୍ଦା କରିବା ସହ ମୋଦି କେବଳ କେଜରିୱାଲଙ୍କୁ ଭୟ କରୁଥିବାରୁ ଏପରି କରିଥିବା ଅଭିଯୋଗ ଆଣିଛନ୍ତି। ଏଥିସହ କେଜରିୱାଲ ଯେଉଁଠି ରହିଲେ ବି ସେ ଦିଲ୍ଲୀ ମୁଖ୍ୟମନ୍ତ୍ରୀ ରହିବେ ଓ ଜେଲରୁ ସରକାର ଚଳାଇବେ ବୋଲି କହିଛନ୍ତି ଅତିସି। ଆଜି ସୂର୍ଯ୍ୟୋଦୟ ହେଉ ହେଉ ଆପ ପକ୍ଷରୁ ଦେଶବ୍ୟାପୀ ବିଭିନ୍ନ ସ୍ଥାନରେ ପ୍ରଦର୍ଶନ କରାଯାଇଛି। କେଜରିୱାଲ ଜିନ୍ଦାବାଦ, ମୁଁ ବି କେଜରିୱାଲର ପ୍ଲା କାର୍ଡ ଧରି ନାନା ନାରାବାଜି ଦିଆଯାଇଛି। ସ୍ଥିତି ଏମିତି ହୋଇଛି କି ଚଣ୍ଡିଗଡ ସମେତ କିଛି ସ୍ଥାନରେ ପୋଲିସକୁ ଆନ୍ଦୋଳନକାରୀଙ୍କୁ ଘଉଡାଇବାକୁ ପାଣି ମାଡ କରିବାକୁ ପଡିଛି। ଦିଲ୍ଲୀ ମନ୍ତ୍ରୀ ଅତିସି ଓ ସୌରଭ ଭରଦ୍ବାଜଙ୍କ ନେତୃତ୍ବରେ ଦିଲ୍ଲୀରେ ହୋଇଥିବା ମେଗା ବିରୋଧକୁ ନେଇ ପୋଲିସ ଉଭୟ ନେତାଙ୍କ ସହ ବହୁ ଆପ ନେତାଙ୍କୁ ଅଟକ ରଖିଛି। ଚଣ୍ଡିଗଡ, ଲକ୍ଷ୍ନୌ, ପରି ବହୁ ରାଜ୍ୟର ରାଜଧାନୀରେ ଆପ ପକ୍ଷରୁ ବିରୋଧ କରାଯାଇଛି। ଅନ୍ୟପଟେ ଏହି ଗିରଫଦାରୀକୁ ବିଭିନ୍ନ ଦଳ ପକ୍ଷରୁ ନିନ୍ଦା କରାଯାଇଛି। ବିଭିନ୍ନ ମହଲରୁ ଏହାକୁ ବିରୋଧ କରାଯାଇଛି। କିନ୍ତୁ ଏକଦା କେଜରିୱାଲଙ୍କ ଗୁରୁ ବୋଲାଉଥିବା ସମାଜସେବୀ ଆନ୍ନ ହଜାରେ କହିଛନ୍ତି, ଏହା ହେବାର ଥିଲା। ଦିନେ ମୋ ସହ ମଦ ବିରୋଧରେ ଆନ୍ଦୋଳନ କରିଥିବା କେଜରିୱାଲ ଆଜି ଅର୍ଥ ପାଇଁ ମଦ ନୀତିକୁ କାର୍ଯ୍ୟକ୍ଷମ କରିଲେ। ତେବେ ଯାହା କିଛି ହେବ, ନିୟମ ଅନୁଯାୟୀ ହେବ। ଅନ୍ୟପଟେ ଇଡି କେଜରିୱାଲଙ୍କୁ ରିମାଣ୍ଡରେ ନେବାକୁ ପିଏମଏଲଏ କୋର୍ଟରେ ଦସ୍ତାବିଜ ସହ ଦାବି ରଖିଛି। ତେବେ କୌଣସି ଦୁର୍ନୀତି ମାମଲାରେ ଏହା ଦେଶର ପ୍ରଥମ ଘଟଣା, ଯେଉଁଥିରେ ଜଣେ ମୁଖ୍ୟମନ୍ତ୍ରୀଙ୍କୁ ଗିରଫ କରାଯାଇଛି। ଏବେ ଦେଖିବାକୁ ରହିଲା ଏହି ଘଟଣା କେଉଁ ମୋଡ ନେଉଛି।