‘ମଦର’ ତରଫରୁ ନାରୀ ଶକ୍ତି ସମ୍ବର୍ଦ୍ଧନା ସମାରୋହ

ଜଗତସିଂହପୁର ତିର୍ତୋଲ ଆନନ୍ଦ ମଣ୍ଡପ ହଲରେ ନାରୀ ଶକ୍ତି ସମ୍ବର୍ଦ୍ଧନା ସମାରୋହ ପାଳିତ ହୋଇଯାଇଛି। ସାମାଜିକ ଅନୁଷ୍ଠାନ ମଦର ତରଫରୁ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବିଶିଷ୍ଟ ସମାଜସେବୀ, ସୁଲେଖିକା ସସ୍ମିତା ଦାସ ଯୋଗ ଦେଇ ସମାଜ ଗଠନରେ ମହିଳାଙ୍କ ଗୁରୁତ୍ବ ଉପରେ ଦୃଷ୍ଟିପାତ କରିଥିଲେ। ସଚରାଚର ସୃଷ୍ଟିର ସର୍ଜନାରେ ପ୍ରକୃତି ବା ନାରୀ ଶକ୍ତିର ଭୂମିକା ପରି ସନ୍ତାନ ଧାରଣଠାରୁ ଆରମ୍ଭ କରି ପରିବାର ପରିଚାଳନା ତଥା ସମାଜ ଗଠନ ଦିଗରେ ମହିଳାମାନଙ୍କର ଗୁରୁତ୍ବପୂର୍ଣ୍ଣ ଭୂମିକା ରହିଛି।

ତେଣୁ ସମାଜ ଗଠନରେ ସାରଥୀ ସାଜିବାକୁ ମହିଳାଙ୍କୁ ପ୍ରୋତ୍ସାହିତ କରିବାକୁ ଏହି ସମ୍ବର୍ଦ୍ଧନା ସଭା ମଦର ପକ୍ଷରୁ ଆୟୋଜନ କରାଯାଇଛି। କାର୍ଯ୍ୟକ୍ରମରେ ଯୋଗଦେଇ ଅତିଥିଗଣ ମହିଳା ସଶକ୍ତିକରଣର ମହତ୍ବ ସମ୍ପର୍କରେ ସମ୍ୟକ ମତବ୍ୟକ୍ତ କରିଥିଲେ। ମଦର ନିର୍ଦେଶକ ସୁବାସ ରଥ, ଜିଲାରେ ମଦର ତରଫରୁ କରାଯାଉଥିବା ଆର୍ଥୀକ ସଚେତନତା ଓ ସାକ୍ଷରତା ଉପରେ ଗୁରୁତ୍ୱରୋପ କରିଥିଲେ।

ଏହି ଅବସରରେ ଜିଲ୍ଲାରେ ମହିଳାଙ୍କୁ ସଶକ୍ତ କରିବା ଦିଗରେ ଉଲେଖ୍ୟନୀୟ କାର୍ଯ୍ୟ କରି ସୁନାମ ଅର୍ଜନ କରିଥିବା 5ଜଣ ମହିଳାଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହିପରି ସମ୍ବର୍ଦ୍ଧନାରେ ଉତ୍ସାହିତ ହୋଇ ଆଗାମୀ ଦିନରେ ଅଧିକରୁ ଅଧିକ ମହିଳା ସାମାଜିକ ପରିବର୍ତ୍ତନ ଦିଗରେ କାର୍ଯ୍ୟକରି ଦେଶ ବିଦେଶରେ ସୁନାମ ଅର୍ଜନ କରିବେ।