Category: ଜିଲ୍ଲା

ମୋତିଆବିନ୍ଦୁ ଅସ୍ତ୍ରୋପଚାର ପରେ ୧୩ ଜଣ ରୋଗୀ ସଂକ୍ରମଣର ଶିକାର, ଘରୋଇ କ୍ଲିନିକ ସିଲ୍

ମୋତିଆବିନ୍ଦୁ ଅସ୍ତ୍ରୋପଚାର ପଡିଲା ମହଙ୍ଗା । ଅସ୍ତ୍ରୋପଚାର ପରେ ହେଲେ ସଂକ୍ରମଣର ଶିକାର । ୧୩ ଜଣ ରୋଗୀଙ୍କୁ ଗୁରୁତର ଅବସ୍ଥାରେ ବୁର୍ଲା ମେଡିକାଲରେ ଭର୍ତ୍ତି କରାଯାଇଛି । ଏଭଳି ଅଭିଯୋଗ ପାଇବା ପରେ ପ୍ରଶାସନ ପକ୍ଷରୁ ଏକ ଘରୋଇ କ୍ଲିନିକକୁ ସିଲ କରାଯାଇଛି । ସୂଚନା ଅନୁଯାୟୀ ଅନୁଗୋଳ ଜିଲ୍ଲା ସଦର ମହକୁମାର ଅମଲାପଡା ଠାରେ ପ୍ରଧାନ ଆଇ କ୍ଲିନିକ ନାମକ ଏକ ଘରୋଇ ଚିକିତ୍ସାଳୟ ରହିଛି ।

ଗତ ୨୦ ତାରିଖ ଦିନ ଏହି ଚିକିତ୍ସାଳୟରେ କିଛି ରୋଗୀଙ୍କର ମୋତିଆବିନ୍ଦୁ ଅପରେସନ ହୋଇଥିଲା । ତେବେ ଅପରେସନର ତିନିଦିନ ପରେ ୧୩ ଜଣ ରୋଗୀଙ୍କ ଆଖି ସଂକ୍ରମଣର ଶିକାର ହୋଇଥିଲା । ଭୀଷଣ ସଂକ୍ରମଣ ଆଉ ଯନ୍ତ୍ରଣା ସହ୍ଯ ନ ବେବାରୁ ସେମାନଙ୍କୁ ବୁର୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଚିକିତ୍ସା ପରେ ଏବେ ସେମାନଙ୍କ ଅବସ୍ଥାରେ ସୁଧାର ଆସିଛି । ୩-୪ ଜଣ ରୋଗୀ ଭଲ ହୋଇ ଘରକୁ ଫେରିଛନ୍ତି ।

ଅପର ପକ୍ଷରେ, ଆଜି ଜିଲ୍ଲାପାଳଙ୍କ ନିର୍ଦେଶ କ୍ରମେ ପ୍ରଧାନ ଆଇ କେୟାରକୁ ସିଲ କରାଯିବା ସହ ଘଟଣାର ତଦନ୍ତ ନିମନ୍ତେ CDMOଙ୍କୁ ନିର୍ଦେଶ ଦିଆଯାଇଛି । CDMO ଘଟଣାର ତଦନ୍ତ କରି ଖୁବଶୀଘ୍ର ଜିଲ୍ଲାପାଳଙ୍କୁ ରିପୋର୍ଟ ପ୍ରଦାନ କରିବା ନିମନ୍ତେ କୁହାଯାଇଛି ।

ତେବେ, ବିଶେଷଜ୍ଞ ମାନେ ଅପରେସନ ପୂର୍ବରୁ ପଡ଼ୁଥ‌ିବା ତିନି ପ୍ରକାର ତରଳ ଔଷଧ, ଫାକୋ ଯନ୍ତ୍ର କିମ୍ବା ଓଟି ଏଥୁରୁ କୌଣସିଟିରେ ସଂକ୍ରମଣ ଯୋଗୁଁ ଏହି ସମସ୍ୟା ଉପୁଜିଥ‌ିବା ଆଶଙ୍କା କରୁଛନ୍ତି। ତରଳ ଔଷଧ ଗୁଡ଼ିକର ନମୁନା ଲାବରେଟରି ପରୀକ୍ଷା ପାଇଁ ପଠାଯାଇଛି।

— ଅଜିତ୍ କୁମାର ଭୋଇଙ୍କ ରିପୋର୍ଟ, Suchanatv24x7, ଅନୁଗୋଳ
ଦାଦନ ଖଟିବାକୁ ଯାଇ ଆଖି ବୁଜିଲେ ଡୋଲାମଣି, ଉଚ୍ଚସ୍ତରୀୟ ତଦନ୍ତ ଦାବି

ବଲାଙ୍ଗିର ଦାଦନ ପ୍ରବଣ ଜିଲ୍ଲା ଭାବେ କୁଖ୍ୟାତି ଅର୍ଜନ କରିଛି। ଏହି ଜିଲ୍ଳାର ହଜାର ହଜାର ଲୋକ ପେଟପାଟଣା ପାଇଁ ଭିଟାମାଟି ଛାଡ଼ି ବାହାର ରାଜ୍ୟକୁ ଦାଦନ ଖଟିବାକୁ ଯାଇଥାନ୍ତି। ସେଠାରେ ଯାଇ ଅନେକ ନିର୍ଯାତନାର ଶିକାର ମଧ୍ୟ ହେବାର ବହୁ ନଜିର ରହିଛି। ଖାଲି ନିର୍ଯାତନାର ଶିକାର ହୋଇନଥାନ୍ତି, ଅନେକ ସମୟରେ ନିର୍ଯାତନା ସହି ନ ପାରି ଅନେକ ମୃତ୍ୟୁବରଣ କରନ୍ତି। ଯାହାକୁ ନେଇ ରାଜ୍ୟରେ ଚହଳ ପଡେ। ସରକାର ଉପରେ ଅଙ୍ଗୁଳି ନିର୍ଦ୍ଦେଶ କରାଯାଏ, ହେଲେ ଦାଦନଙ୍କ ସ୍ଥିତିରେ କୌଣସି ପରିବର୍ତ୍ତନ ହୋଇନାହିଁ। ତେଣୁ ଆଉ ଜଣେ ଦାଦନ, କାମ ପାଇଁ ବାହାର ରାଜ୍ୟକୁ ଯାଇ ଆଖି ବୁଜିଦେଇଛନ୍ତି। ଏହି ଘଟଣା ଜିଲ୍ଲାରେ ଚହଳ ସୃଷ୍ଟି କରିଛି।

ସୂଚନା ଅନୁଯାୟୀ, ବଲାଙ୍ଗିର ଜିଲ୍ଲା ପାଟଣାଗଡ ବ୍ଲକ୍ ସାଲେପାଲି ଗ୍ରାମ ପଞ୍ଚାୟତ କର୍ଲାମାଲ ଗାଁର ୨୬ ବର୍ଷୀୟ ଡୋଲାମଣି ପୁଟେଲ ଜିଲ୍ଲା କି ରାଜ୍ୟରେ କାମ ଧନ୍ଦା ନ ପାଇ ହତାଶ ହୋଇଯାଇଥିଲେ। ତାଙ୍କ ହତାଶାର ସୁଯୋଗ ନେଇ ସ୍ଥାନୀୟ ଦାଦନ ସର୍ଦ୍ଦାର ଲିଙ୍ଗ ଷାଣ୍ଢ ଡୋଲାମଣିଙ୍କୁ ବହୁ ଲୋଭନୀୟ ପ୍ରତିଶ୍ରୁତି ଦେଇ ବାହାର ରାଜ୍ୟକୁ ପଠାଇ ଦେଇଥିଲେ। ସେଠାକୁ ଯିବାର କିଛି ଦିନ ପରେ ଅକଥନୀୟ ଖଟଣି ପାଇଁ ଅସୁସ୍ଥ ହେଲେ ଡୋଲାମଣି। ତେଣୁ ସର୍ଦ୍ଦାରକୁ ଫୋନ ଯୋଗେ ଅଭିଯୋଗ କରିଥିଲେ ଓ ସେଠାରୁ ଗାଁକୁ ଫେରାଇ ନେବାକୁ ଅନୁରୋଧ କରିଥିଲେ। ହେଲେ ସର୍ଦ୍ଦାର କିଛି ଶୁଣି ନ ଥିଲା। ରୋଗ ସାଙ୍ଗକୁ ଅର୍ଥାଭାବରେ ଡୋଲାମଣି ଶେଷରେ ଆଖି ବୁଜି ଦେଇଛନ୍ତି। ଡୋଲାମଣିଙ୍କ ମୃତ୍ୟୁ ପରେ ସର୍ଦ୍ଦାର ଘର ଲୋକଙ୍କୁ ମିଛ କହିଲା କି, ଦୁର୍ଘଟଣାରେ ମୃତ୍ୟୁ ହୋଇଛି । ସେପଟେ ପରିବାର ଲୋକଙ୍କୁ ସହଯୋଗ କରିବା ପାଇଁ ଇଟାଭାଟି ମାଲିକ ଦୁଇ ଲକ୍ଷ ଟଙ୍କା ପଠାଇ ଦେଇଥିବା ବେଳେ ସର୍ଦ୍ଦାର ସବୁ ଟଙ୍କା ଆତ୍ମସାତ କରିନେଇଥିବା ଅଭିଯୋଗ ହୋଇଛି। ଅଭିଯୋଗ ଆଧାରରେ ଜିଲ୍ଲା ପ୍ରଶାସନ ସର୍ଦ୍ଦାର ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
ଉଗ୍ର ହେଉଛି ବିଜେପିର ଗୋଷ୍ଠୀ କନ୍ଦଳ, ଆଶାୟୀଙ୍କ ଉପରେ ପରାସ୍ତ ପ୍ରାର୍ଥୀଙ୍କ ଆକ୍ରମଣ ଅଭିଯୋଗ
ଯାଜପୁର ବିଜେପିରେ ଉଗ୍ର ହେବାରେ ଲାଗିଛି ଗୋଷ୍ଠୀ କନ୍ଦଳ। ଯେଉଁ ବିଦ୍ରୋହ ଭିତରେ ଭିତରେ କୁହୁଳୁଥିଲା, ଏବେ ତାହା ଆଗ୍ନେୟ ଉଦଗୀରଣର ରୂପ ନେଇଛି। ବିଧାୟକ ପ୍ରାର୍ଥୀ ଏବଂ ଦଳୀୟ ଟିକେଟ ଆଶାୟୀଙ୍କ ମଧ୍ୟରେ ଏବେ ସମ୍ମୁଖ ଯୁଦ୍ଧର ବିଗୁଲ ବାଜିଲାଣି। ଟିକେଟ ଆଶାୟୀ ସଂଗ୍ରାମ ପାତ୍ରଙ୍କ ଉପରେ ହୋଇଛି ମରଣାନ୍ତକ ଆକ୍ରମଣ। ଆକ୍ରମଣରେ ସଂଗ୍ରାମଙ୍କ ଗାଡି ଭାଙ୍ଗି ଚୁରମାର ହୋଇଯାଇଛି। ଏହି ଆକ୍ରମଣ ବିଧାୟକ ପ୍ରାର୍ଥୀଙ୍କ ନିର୍ଦ୍ଦେଶରେ ହୋଇଥିବା ଅଭିଯୋଗ ହେଉଛି। ଯାହା ଜିଲ୍ଲା ବିଜେପିରେ ସବୁକିଛି ଠିକ ନ ଥିବା ସ୍ପଷ୍ଟ କରିଛି। ଯାଜପୁର ବ୍ଲକ ଭୁବନେଶ୍ବରପୁର ପଞ୍ଚାୟତରେ ରବିବାର ସଂଧ୍ୟାରେ ଶ୍ୟାମା ଚରଣ ମୁଖାର୍ଜୀଙ୍କ ବଳିଦାନ ଦିବସ ପାଳନ ହେଉଥିଲା। ଏହି କାର୍ଯ୍ୟକ୍ରମକୁ ସଂଗ୍ରାମ ପାତ୍ର ନିମନ୍ତ୍ରଣ କ୍ରମେ ଯାଇଥିଲେ। ସଂଗ୍ରାମ ସେହି କାର୍ଯ୍ୟକ୍ରମ ସାରି ଫେରୁଥିବା ବେଳେ ତାଙ୍କ ଗାଡିକୁ କିଛି ଲୋକ ଅଟକାଇ, ଗୌତମ ଭାଇ ଆସୁଛନ୍ତି କହିଥିଲେ। ସଂଗ୍ରାମ ସେଠାରେ ଗୌତମଙ୍କ ପାଇଁ ଅପେକ୍ଷା କରୁଥିବା ବେଳେ ଗୌତମ ତାଙ୍କ କିଛି ନିକଟତମ ସମର୍ଥକଙ୍କ ସହ ଠେଙ୍ଗା, ବାଡି ମାରଣାସ୍ତ୍ର ସହ ପହଞ୍ଚିଥିଲେ ଓ ସମର୍ଥକମାନେ ସଂଗ୍ରାମଙ୍କ ଉପରେ ଆକ୍ରମଣ କରିଥିବା ଅଭିଯୋଗ ଆଣିଛନ୍ତି ସଂଗ୍ରାମ ଓ ତାଙ୍କ ସହ ଥିବା ସମର୍ଥକମାନେ। ଗୌତମଙ୍କ ପରାଜୟ ପଥରେ ସଂଗ୍ରାମଙ୍କ ହାତଥିବା ସନ୍ଦେହରେ ଏହି ଆକ୍ରମଣ ହୋଇଛି ବୋଲି କହିଛନ୍ତି ନିଜେ ସଂଗ୍ରାମ। ଆକ୍ରମଣରେ ସଂଗ୍ରାମଙ୍କ ହାତ ଭାଙ୍ଗିଛି, ସେ ଯାଇଥିବା ଗାଡି ଭାଙ୍ଗି ଯାଇଛି ଓ ଗାଡିର ଡ୍ରାଇଭର ଆହତ ହୋଇଛନ୍ତି।
```
ଏଠାରେ କହି ରଖୁଛୁ କି, ନିର୍ବାଚନ ପୂର୍ବରୁ ଟିକେଟ ଆଖେଇଥିବା ସଂଗ୍ରାମଙ୍କୁ ପଛରେ ପକେଇ ଜିଲ୍ଲା ବିଜେପି ସଭାପତି ଗୌତମ ରାୟ ଟିକେଟ ହାତେଇ ନେଇଥିଲେ। ଯାହାକୁ ନେଇ ଦୁଇ ନେତାଙ୍କ ମଧ୍ୟରେ ବିବାଦ ବଢିଥିଲା। ନିର୍ବାଚନରେ ଗୌତମଙ୍କ ପରାଜୟ ପରେ ଏଥିପାଇଁ ସଂଗ୍ରାମଙ୍କୁ ଦାୟୀ କରୁଛନ୍ତି ଗୌତମ ଓ ତାଙ୍କ ସମର୍ଥକମାନେ। ଯାହାକୁ ନେଇ ବିଜେପିର ଦୁଇ ଆଗଧାଡିର ନେତା ପରସ୍ପର ବିରୋଧୀ ହୋଇଛନ୍ତି। ଏପରି ସ୍ଥିତି ଯାଜପୁର ବିଜେପି ପାଇଁ ଆଗାମୀ ଦିନରେ କାଳ ହେବାକୁ ଯାଉଥିବା ପରି ମନେ ହେଉଛି। 
```
ପାରାଦ୍ଵୀପ ରଙ୍ଗିଆଗଡ ନିକଟରେ ମାଲବାହୀ ଟ୍ରେନର ୩ ବଗି ଲାଇନଚ୍ୟୁତ, ବାଧାପ୍ରାପ୍ତ ଯାତାୟତ

ପାରାଦ୍ଵୀପ ରଙ୍ଗିଆଗଡ ନିକଟରେ ଲାଇନ ଚ୍ୟୁତ ହୋଇଛି ଏକ ମାଲବାହୀ ଟ୍ରେନ। ପିପିଏଲ (PPL) ସାର କାରଖାନାରୁ ଜିପସମ ଲୋଡିଂ କରି ଯାଉଥିବା ବେଳେ ଘଟିଛି ଏଭଳି ଘଟଣା । ଟ୍ରେନର ତିନୋଟି ବଗି ଲାଇନଚ୍ୟୁତ ହୋଇଥିବା ବେଳେ, ତୁରନ୍ତ ଏହାକୁ ଠିକ କରିବା ପାଇଁ ରେଲୱେର ଅଧିକାରୀମାନେ ପ୍ରୟାସ କରିଛନ୍ତି।

ପ୍ରଥମେ ଅନ୍ୟ ଏକ ଇଞ୍ଜିନ ସହାୟତାରେ ଟ୍ରେନକୁ ପଛକୁ ଟାଣିବା ସହିତ ତିନୋଟି ବଗିକୁ ହାଇଡ୍ରୋଲିକ ମେସିନ ସହାୟତାରେ ସିଧା କରାଯାଇଛି। ଟ୍ରେନକୁ ପୁଣି ପିପିଏଲ (PPL) ଭିତରକୁ ନିଆଯାଇଛି। ଲାଇନକୁ ମରାମତି କରିବା ପରେ ଟ୍ରେନ ଗୁଡିକ ଯିବା ଆସିବା କରିବ। ତେବେ ଟ୍ରେନ ଲାଇନ ଚ୍ୟୁତ ହେବାର ସଠିକ କାରଣ ଜଣାପଡି ନାହିଁ।

— ପାରାଦ୍ଵୀପରୁ ସୁମନ୍ତ ସ୍ୱାଇଁଙ୍କ ରିପୋର୍ଟ
ଡିପଥେରିଆ ମୁକାବିଲା ପାଇଁ ସଂକ୍ରମିତ ଅଞ୍ଚଳରେ ଦିଆଯିବ ବୁଷ୍ଟର ଡୋଜ

ଡିପଥେରିଆ ମୁକାବିଲା ପାଇଁ ହେବ ଟୀକାକରଣ। ଆସନ୍ତା କାଲିଠାରୁ ସଂକ୍ରମିତ ଅଞ୍ଚଳରେ ଦିଆଯିବ ବୁଷ୍ଟର ଡୋଜ। ସଂକ୍ରମଣ ରୋକିବାକୁ ମାସ୍କ ପରିଧାନ କରିବାକୁ ସୂଚନା ଦେଲେ ପରିବାର କଲ୍ୟାଣ ନିର୍ଦ୍ଦେଶକ। ପ୍ରାୟ ୧୫ ଦିନ ହେବ ରାୟଗଡା କାଶୀପୁରରେ ଆତଙ୍କ ଖେଳାଇଥିବା ସଂକ୍ରମଣ ଏବେ କୋରାପୁଟ ଓ କଳାହାଣ୍ଡିକୁ ବ୍ୟାପିଲାଣି। ଏହି ରୋଗରେ ତିନୋଟି ଜିଲ୍ଲାରେ ୨୧ ଜଣ ସଂକ୍ରମିତ ହୋଇଥିବା ବେଳେ ଜଣଙ୍କ ସ୍ଥିତି ଗୁରୁତର ରହିଛି।

ସେମାନଙ୍କ ମଧ୍ୟରୁ ଏକା ରାୟଗଡା ଜିଲ୍ଲାରୁ ୧୫ ଜଣ ଥିବା ବେଳେ କଳାହାଣ୍ଡିରୁ ୫ ଓ କୋରାପୁଟରେ ଜଣେ ଡିପଥେରିଆ ସଂକ୍ରମିତ ଚିହ୍ନଟ ହୋଇଛନ୍ତି। ଏହି ରୋଗରେ ବର୍ତ୍ତମାନ ପର୍ଯ୍ୟନ୍ତ ୫ ଜଣଙ୍କ ମୃତ୍ୟୁ ହଲାଣି। ସେପଟେ ଡାକ୍ତରୀ ଟିମ ସଂକ୍ରମିତଙ୍କ ନମୁନା ସଂଗ୍ରହ ପରେ ଜାଣିବାକୁ ପାଇଥିଲା କି, ଏହି ଅଜଣା ରୋଗ ହେଉଛି ଡିପଥେରିଆ ଜୀବାଣୁ ଦ୍ବାରା ସଂକ୍ରମିତ ରୋଗ। ସଂକ୍ରମିତଙ୍କ ଚିକିତ୍ସା ପାଇଁ ସଂକ୍ରମିତ ସ୍ଥଳରେ ଜିଲ୍ଲା ଓ ରାଜ୍ୟ ସ୍ବାସ୍ଥ୍ୟ ବିଭାଗ ସହ ବିଶ୍ବ ସ୍ବାସ୍ଥ୍ୟ ସଂସ୍ଥାର ଟିମ ମଧ୍ୟ ପହଞ୍ଚିଛନ୍ତି।

ସଂକ୍ରମଣ ରୋକିବାକୁ ଆସନ୍ତା କାଲିଠାରୁ ସଂକ୍ରମିତ ଅଞ୍ଚଳରେ ପିଲାମାନଙ୍କ ଟୀକାକରଣ କରାଯିବ। ଏହି ରୋଗରେ ସାଧାରଣତଃ ଛୋଟ ପିଲାମାନେ ଏପର୍ଯ୍ୟନ୍ତ ଆକ୍ରାନ୍ତ ହୋଇଥିବା ଦେଖିବାକୁ ମିଳୁଥିବା ବେଳେ ଏଥିରେ ୬୦ ବର୍ଷରୁ ଅଧିକ ବୟସର ବ୍ୟକ୍ତି ମଧ୍ୟ ଆକ୍ରାନ୍ତ ହେବା ସମ୍ଭବନା ରହିଛି। ଅନ୍ୟପଟେ ସବୁ ଦଳର ନେତା ରାୟଗଡାର ସଂକ୍ରମିତ ଅଞ୍ଚଳକୁ ଯାଇ ସ୍ଥିତି ଅନୁଧ୍ୟାନ କରୁଛନ୍ତି

— ରାୟଗଡା ବିଷମ କଟକରୁ ରବିନ୍ଦ୍ର ସାହୁଙ୍କ ରିପୋର୍ଟ
ବିଜେପି ରାଜ୍ୟ ଯୁବ ମୋର୍ଚ୍ଚା ସଭାପତି ଅଭିଳାଷ ପଣ୍ଡା ଆକ୍ରମଣ ଘଟଣାରେ ଆଉ ୫ ଗିରଫ

ବିଜେପି ରାଜ୍ୟ ଯୁବ ମୋର୍ଚ୍ଚା ସଭାପତି ଅଭିଳାଷ ପଣ୍ଡାଙ୍କୁ ଆକ୍ରମଣ ଘଟଣାରେ ଆଉ ୫ ଜଣଙ୍କୁ ଗିରଫ କରିଛି ପୋଲିସ । ବର୍ତ୍ତମାନ, ଏହି ଘଟଣାରେ ମୋଟ ଗିରଫଦାରୀ ସଂଖ୍ୟା ୧୦କୁ ବୃଦ୍ଧି ପାଇଛି। ପୂର୍ବରୁ ପୋଲିସ ୫ ଜଣଙ୍କୁ ଗିରଫ କରିଥିଲା।

ଗତକାଲି, ଅଭିଳାଷ ପଣ୍ଡାଙ୍କୁ ଆକ୍ରମଣ ଘଟଣାରେ ଅଭିଯୁକ୍ତ ମାନଙ୍କୁ ଗିରଫ କରା ନଗଲେ ଡିଜିପିଙ୍କ ଅଫିସ ଘେରାଉ କରିବାକୁ ଚେତାବନୀ ଦେଇଥିଲା ରାଜ୍ୟ ବିଜେପି ଯୁବ ମୋର୍ଚ୍ଚା । ପୂର୍ବରୁ ଏହି ଘଟଣାକୁ ନେଇ ସିଇଓଙ୍କ ନିକଟରେ ଫେରାଦ ହୋଇଥିଲା ବିଜେପି ପ୍ରତିନିଧି ଦଳ । ଦୋଷୀଙ୍କୁ ତୁରନ୍ତ ଗିରଫ କରିବା ସହ କେନ୍ଦ୍ରୀୟ ସୁରକ୍ଷା ଫୋର୍ସ ମୁତୟନ କରିବା ପାଇଁ ଦାବି କରିଥିଲା ଦଳ । ଏହାପରେ, ଭଦ୍ରକ ଜିଲ୍ଲାର ସବୁ ନିର୍ବାଚନ ମଣ୍ଡଳୀରେ ୧୪୪ ଧାରା ଜାରି କରାଯାଇଥିଲା ।

ଏଠାରେ ଉଲ୍ଲେଖ କରାଯାଇ ପରେ କି, ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକରେ ମେ’ ୩୦ ତାରିଖରେ ବିଜେପି ଯୁବ ମୋର୍ଚ୍ଚା ରାଜ୍ୟ ସଭାପତି ଅଭିଳାଷ ପଣ୍ଡା, ସମ୍ପାଦକ ସୁବ୍ରତ ବିଶ୍ୱାଳଙ୍କ ସହ ଅନ୍ୟ ୨୦ଜଣଙ୍କ ଉପରେ ଚାନ୍ଦବାଲି ନିର୍ବାଚନମଣ୍ଡଳୀ ଅନ୍ତର୍ଗତ କରଞ୍ଜମାଳ ପଂଚାୟତର ଖପୁରିଆ ଛକ ନିକଟରେ ମରଣାନ୍ତକ ଆକ୍ରମଣ ହୋଇଥିବା ଅଭିଯୋଗ ହୋଇଥିଲା । ଏକ ନିର୍ଦ୍ଦିଷ୍ଟ ଦଳର କର୍ମୀମାନେ ଆକ୍ରମଣ କରିବା ସହ ଗାଡି ଭଙ୍ଗାରୁଜା କରିବା ଅଭିଯୋଗ ହୋଇଥିଲା । ଏହି ଆକ୍ରମଣ ପରେ ଗୁରୁତର ଅବସ୍ଥାରେ ୪ଜଣଙ୍କୁ ବାସୁଦେବପୁର ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା । ତେବେ ଏହି ଆକ୍ରମଣ ଘଟଣାରେ ଆଉ ୫ଜଣଙ୍କୁ ଗିରଫ କରିଛି ପୁଲିସ। ପୂର୍ବରୁ ପୁଲିସ ୫ ଜଣଙ୍କୁ ଗିରଫ କରିଥିଲା। ଏବେ ଯାଏଁ ମୋଟ ଗିରଫଦାରୀ ସଂଖ୍ୟା ୧୦ରୁ ବୃଦ୍ଧି ପାଇଛି।
ଟିମ ଇଣ୍ଡିଆର ମୁଖ୍ୟ କୋଚ ଭାବେ ରାହୁଲ ଦ୍ରାବିଡ଼ଙ୍କ ସ୍ଥାନ ନେବେ ଗୌତମ ଗମ୍ଭୀର !

ଟିମ ଇଣ୍ଡିଆର ମୁଖ୍ୟ କୋଚ ଭାବେ ରାହୁଲ ଦ୍ରାବିଡ଼ଙ୍କ ସ୍ଥାନ ନେଇପାରନ୍ତି ଗୌତମ ଗମ୍ଭୀର | ଭାରତୀୟ ପ୍ରିମିୟର୍ ଲିଗ୍ 2024 (IPL) ର ଲିଗ୍ ପର୍ଯ୍ୟାୟରେ Kolkata Knight Riders (KKR) ଉତ୍କୃଷ୍ଟ ମାନର କ୍ରୀଡା ପ୍ରଦର୍ଶନ କରିଥିବାରୁ ଗୌତମ ଗମ୍ଭୀରଙ୍କ ନାମ ଟିମ ଇଣ୍ଡିଆର ମୁଖ୍ୟ ପ୍ରଶିକ୍ଷକ (Coach) ଭାବରେ ଚର୍ଚ୍ଚାର ପରିସରକୁ ଆସିଥିଲା | Knight Riders ଫାଇନାଲ ମ୍ୟାଚରେ ସନରାଇଜର୍ସ ହାଇଦ୍ରାବାଦକୁ (Sunrisers Hyderabad) ପରାସ୍ତ କରି ଟାଇଟଲ୍ ଜିତିବା ପରେ ଏହି ଚର୍ଚ୍ଚା ଜୋର ଧରିଥିଲା | ଫାଇନାଲ ମ୍ୟାଚ ପରେ ଗମ୍ଭୀର ମଧ୍ୟ ବିସିସିଆଇ (BCCI) ସଚିବ ଜୟ ଶାହାଙ୍କ ସହିତ ଦୀର୍ଘ ସମୟ ଧରି ଆଲୋଚନା କରିଥିବା କଥା ବିଭିନ୍ନ ଗଣ ମାଧ୍ୟମରେ ପ୍ରକାଶିତ ହୋଇଥିଲା |

ଯଦିଓ ପୂର୍ବତନ ଭାରତ ଓପନର୍ଙ୍କର ଜାତୀୟ ଦଳର ମୁଖ୍ୟ ପ୍ରଶିକ୍ଷକ, କିମ୍ବା ଆଇପିଏଲ୍ ହେବାର କୌଣସି ଅଭିଜ୍ଞତା ନାହିଁ; ତଥାପି ଚଳିତ ବର୍ଷ KKR କୁ IPLରେ ବିଜୟୀ କରାଇବାରେ ତାଙ୍କ ଭୂମିକା BCCI ପାଇଁ ଗମ୍ଭୀରଙ୍କୁ ଦ୍ରାବିଡଙ୍କ ଉତ୍ତରାଧିକାରୀ ଭାବରେ ଭାବରେ ବିଚାର କରିବାକୁ ଯଥେଷ୍ଟ ଖୋରାକ ଯୋଗାଇଥିଲା ।

ବୋର୍ଡ ଅଫ୍ କଣ୍ଟ୍ରୋଲ୍ ଫର୍ କ୍ରିକେଟ୍ ଇନ୍ ଇଣ୍ଡିଆ (BCCI) ମଧ୍ୟ ଭାରତୀୟ ଦଳର ମୁଖ୍ୟ ପ୍ରଶିକ୍ଷକଙ୍କ ଭୂମିକା ପାଇଁ ଷ୍ଟିଫେନ୍ ଫ୍ଲେମିଂ ଏବଂ ଆଣ୍ଡି ଫୁଲଙ୍କ ପରି ଅନ୍ୟ ଆଇପିଏଲ୍ କୋଚ୍ ତଥା ଅଷ୍ଟ୍ରେଲୀୟ ନାମ ପ୍ରତି ଆଗ୍ରହୀ ଥିବା ପରି ମନେ ହେଉଥିଲା, କିନ୍ତୁ ବର୍ତ୍ତମାନ ସୁଦ୍ଧା ଗମ୍ଭୀରଙ୍କ ନାମ ଅନ୍ୟମାନଙ୍କ ତୁଳନାରେ ଆଗରେ ଅଛି ବୋଲି କୁହାଯାଉଛି | ଭାରତୀୟ ପ୍ରିମିୟର୍ ଲିଗ୍ (ଆଇପିଏଲ୍) 2024 ଫ୍ରାଞ୍ଚାଇଜ୍ ପାଇଁ ମେଣ୍ଟର ଭାବରେ ଗମ୍ଭୀରଙ୍କ ଗୁରୁତ୍ୱ ବୃଦ୍ଧି ପାଇଛି |

୨୦୨୩ ବିଶ୍ୱକପ ପରେ ଟିମ ଇଣ୍ଡିଆର ମୁଖ୍ୟ କୋଚ ଭାବେ ରାହୁଲ ଦ୍ରାବିଡ଼ ଓ ଭାରତୀୟ ଟିମର ସର୍ପୋଟ ଷ୍ଟାଫଙ୍କ କାର୍ଯ୍ୟକାଳ ସମାୟିକ ଭାବେ ବୃଦ୍ଧି କରାଯାଇଥିଲା ଯାହାକି ଜୁନ ମାସରେ ଶେଷ ହେବାକୁ ଯାଉଛି । ଭାରତୀୟ ପୁରୁଷ ଟିମର ମୁଖ୍ୟ କୋଚ୍‌ ପଦ ପାଇଁ ବିସିସିଆଇ ଆବେଦନ ପତ୍ର ଗ୍ରହଣ କରିଥିବାରୁ ରାହୁଲ ଦ୍ରାବିଡ଼ଙ୍କ କାର୍ଯ୍ୟକାଳକୁ ଆଉ ବୃଦ୍ଧି କରାଯିବ ନାହିଁ ବୋଲି ସ୍ପଷ୍ଟ ହୋଇଯାଇଛି। ତେବେ, ଜୟ ଶାହ କହିଛନ୍ତି ଯେ ରାହୁଲ ଦ୍ରାବିଡ଼ ଚାହିଁଲେ ମୁଖ୍ୟ କୋଚ ପଦ ପାଇଁ ଆବେଦନ କରିପାରିବେ।

ମେ’ 27 ସୁଦ୍ଧା ମୁଖ୍ୟ ପ୍ରଶିକ୍ଷକଙ୍କ ଭୂମିକା ପାଇଁ ବିସିସିଆଇ ବିଜ୍ଞପ୍ତି ପ୍ରକାଶ କରିଥିଲା ଏବଂ 3,000 ରୁ ଅଧିକ ଆବେଦନପତ୍ର ପାଇଥିଲା । ବିସିସିଆଇ ଗ୍ରହଣ କରିଥିବା ଦରଖାସ୍ତ ବା ଆବେଦନପତ୍ର ଗୁଡିକ ମଧ୍ୟରେ ‘ସଚିନ୍ ତେନ୍ଦୁଲକର’, ‘ନରେନ୍ଦ୍ର ମୋଡିସ୍’ ଏବଂ ‘ଅମିତ ଶାହାସ୍’ ଙ୍କ ନାମରେ କିଛି ନକଲି ଆବେଦନପତ୍ର ମଧ୍ୟ ସାମିଲ ଥିଲା |

ବିସିସିଆଇର ସମ୍ପାଦକ ଜୟ ଶାହଙ୍କ ସୂଚନା ଅନୁସାରେ କ୍ରିକେଟର ୩ ଫମାର୍ଟ ପାଇଁ ଭିନ୍ନଭିନ୍ନ କୋଚ୍ ନିଯୁକ୍ତିର କୌଣସି ସମ୍ଭାବନା ନାହିଁ । ତେବେ, କ୍ରିକେଟ୍ ଉପଦେଷ୍ଟା କମିଟିର ମାର୍ଗଦର୍ଶନରେ BCCI ମନୋନୀତ ହୋଇଥିବା ଖୁବ୍ ଶୀଘ୍ର ପ୍ରାର୍ଥୀଙ୍କର ସାକ୍ଷାତକାର ନେଇପାରେ ।
ଚାନ୍ଦବାଲି କରଞ୍ଜମାଳରେ ନିର୍ବାଚନୀ ହିଂସା ନେଇ ଆକ୍ସନମୋଡରେ ଜିଲ୍ଲା ପ୍ରଶାସନ, ଭଦ୍ରକରେ ୧୪୪ ଧାରା ଜାରି

ଭଦ୍ରକ: ଚାନ୍ଦବାଲି ବ୍ଲକ କରଞ୍ଜମାଳରେ ରାଜନୌତିକ ହିଂସାକୁ ନେଇ ଆକ୍ସନମୋଡରେ ଜିଲ୍ଲା ପ୍ରଶାସନ । BJP ଯୁବ ମୋର୍ଚ୍ଚା ସଭାପତି ଅଭିଳାଷ ପଣ୍ଡାଙ୍କ ସହ ଅନ୍ୟ ୨୦ ଜଣଙ୍କ ଉପରେ ଚାନ୍ଦବାଲି ନିର୍ବାଚନମଣ୍ଡଳୀ ଅନ୍ତର୍ଗତ କରଞ୍ଜମାଳ ପଂଚାୟତର ଖପୁରିଆ ଛକ ନିକଟରେ ମରଣାନ୍ତକ ଆକ୍ରମଣ ହୋଇଥିବା ଅଭିଯୋଗରେ ୫ ବ୍ୟକ୍ତିଙ୍କୁ ଗିରଫ କରାଯାଇଛି । ଆକ୍ରମଣ ପରେ ଗୁରୁତର ଅବସ୍ଥାରେ ଥିବା ୪ ଜଣ ବ୍ୟକ୍ତିଙ୍କର ବାସୁଦେବପୁର ଡାକ୍ତରଖାନାରେ ପ୍ରାଥମିକ ଚିକିତ୍ସା କାରାଯିବା ପରେ ସେମାନଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଛି । ନିର୍ଦ୍ଧିଷ୍ଟ ରାଜନୈତିକ ଦଳର କର୍ମୀମାନେ ବିପକ୍ଷ ଦଳର କର୍ମୀମାନଙ୍କ ଉପରେ ଆକ୍ରମଣ କରିଥିବା ଅଭିଯୋଗ ହୋଇଛି । ଏହାସହ ଗାଡି ଭଙ୍ଗାରୁଜା ହୋଇଥିବାର ଖବର ମଧ୍ୟ ମିଳିଛି । ପୁଲିସ ଘଟଣାସ୍ଥଳରେ ପଂହଚି ସ୍ଥିତିକୁ ନିୟନ୍ତ୍ରଣ ପାଇଁ ଉଦ୍ୟମ ଜାରି ରଖିଛି ।

ସେପଟେ ନିର୍ବାଚନକୁ ଦୃଷ୍ଟିରେ ରଖି, ସୁରକ୍ଷା ନିମନ୍ତେ ଭଦ୍ରକ ଜିଲ୍ଲାର ସବୁ ନିର୍ବାଚନ ମଣ୍ଡଳୀରେ ୧୪୪ ଧାରା କରିଛନ୍ତି ଜିଲ୍ଲାପାଳ । ଆଜି ସନ୍ଧ୍ୟା ୬ଟାରୁ ଜୁନ ୨ ତାରିଖ ପର୍ଯ୍ୟନ୍ତ ଭଦ୍ରକ ଜିଲାରେ ୧୪୪ ଧାରା ଜାରି କରାଯାଇଛି। ଜିଲ୍ଲାରେ ୧୪୪ ଧାରା ଲାଗୁ କରାଯିବା ଦ୍ବାରା ୫ ଜଣରୁ ଅଧିକ ବ୍ୟକ୍ତି ଏକାଠି ହେବା, ବୁଲିବା, ପ୍ରଚାର କରିବା ଆଦି ମନା ହୋଇଛି।
ନରେନ୍ଦ୍ର ପୁଷ୍କରିଣୀ ବାଣ ବିସ୍ଫୋରଣ ଘଟଣା: ସମ ଅଲଟିମେଟମରେ ଗୁରୁତରଙ୍କୁ ଭେଟିଲେ ମୁଖ୍ୟମନ୍ତ୍ରୀ

ପୁରୀ ନରେନ୍ଦ୍ର ପୁଷ୍କରିଣୀ ବାଣ ବିସ୍ଫୋରଣ ଘଟଣାରେ ମୁଖ୍ୟମନ୍ତ୍ରୀ ଶୋକ ବ୍ୟକ୍ତ କରିବା ସହ ଆଜି ସମ ଅଲଟିମେଟମରେ ଚିକିତ୍ସିତ ହେଉଥିବା ଗୁରୁତରମାନଙ୍କୁ ବୁଲି ଦେଖିଛନ୍ତି। ଡାକ୍ତରୀ ଟିମଠାରୁ ସେମାନଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିବା ସହ ସେମାନଙ୍କ ଚିକିତ୍ସା ସମ୍ପର୍କରେ ଆଲୋଚନା କରିଛନ୍ତି। ପୀଡିତଙ୍କ ପରିବାର ବର୍ଗଙ୍କୁ ମଧ୍ୟ ଭେଟି ସେମାନଙ୍କୁ ସହାନୁଭୂତି ଜଣାଇଛନ୍ତି ମୁଖ୍ଯମନ୍ତ୍ରୀ।

ମୁଖ୍ୟମନ୍ତ୍ରୀଙ୍କ ସମ ଭିଜିଟ ପୂର୍ବରୁ ହସ୍ପିଟାଲରେ ମୁଖ୍ଯମନ୍ତ୍ରୀଙ୍କ ସୁରକ୍ଷା କର୍ମୀ ଉପସ୍ଥିତ ରହି ସୁରକ୍ଷା ପ୍ରତି ଧ୍ୟାନ ଦେଇଥିବା ଦେଖିବାକୁ ମିଳିଥିଲା। ଗତକାଲି ନରେନ୍ଦ୍ର ପୁଷ୍କରିଣୀରେ ଠାକୁରଙ୍କ ଚାପଖେଳ ଚାଲିଥିଲା। ବହୁ ସଂଖ୍ୟାରେ ଲୋକ ଚାପ ଖେଳ ଉପଭୋଗ କରୁଥିଲେ. ଏହି ସମୟରେ ଏକ ରକେଟ ବାଣ ଫୁଟା ଯାଇଥିଲା। ବାଣ ଫୁଟିବା ପରେ ସେଠାରେ ଗଚ୍ଛିତ ଥିବା ବାଣ ସବୁ ଉପରେ ପଡିଥିଲା ଓ କେହି କିଛି ବୁଝିବା ପୂର୍ବରୁ ଭୟଙ୍କର ବିସ୍ଫୋରଣ ହୋଇଥିଲା।

ନିଆଁ ଧାସ ବାଜିବାରୁ ଲୋକମାନେ ଜୀବନ ବିକଳରେ ପାଣିକୁ ଡେଇଁ ପଡିଥିଲେ। ୩ ଜଣଙ୍କ ମୃତ୍ୟୁ ହୋଇଥିବା ବେଳେ ୨୭ରୁ ଅଧିକ ଗୁରୁତର ହୋଇଛନ୍ତି। ଗୁରୁତରମାନେ କଟକର ଏସସିବି ସହ ବହୁ ଘରୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ନିଖୋଜଙ୍କ ଖୋଜା ମଧ୍ୟ ଜାରି ରହିଛି ପୁଷ୍କରିଣୀରେ। ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ଲେଖାଏଁ ଅନୁକମ୍ପମୂଳକ ସହାୟତା ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ।
ଇଭିଏମ ଭାଙ୍ଗିବା ଘଟଣାରେ ଗିରଫ ହେଲେ ପ୍ରଶାନ୍ତ ଜଗଦ୍ଦେବ

ଦବଙ୍ଗ ନେତା ଗଣେଶ ଜଗଦ୍ଦେବ ଗିରଫ। ବୁଥରେ ଦବଙ୍ଗଗିରି ଗଣେଶଙ୍କୁ ପଡିଲା ମହଙ୍ଗା। ଗତ ମଧ୍ୟରାତ୍ରରେ ଗିରଫ କଲା ପୋଲିସ। ଜାମିନ ନାମଞ୍ଜୁର ହେବାରୁ ଗଲେ ଜେଲ। ତାଙ୍କ ବିରୋଧରେ ଲାଗିଛି ୧୬ଟି ସଂଗୀନ ଦଫା। ଗତକାଲି ଅପରାହ୍ନରେ ଚିଲିକା ବିଧାୟକ ତଥା ବର୍ତ୍ତମାନର ଖୋର୍ଦ୍ଧା ବିଜେପି ବିଧାୟକ ପ୍ରାର୍ଥୀ ପ୍ରଶାନ୍ତ ଜଗଦ୍ଦେବ ବା ଗଣେଶ ଜଗଦ୍ଦେବ ଖୋର୍ଦ୍ଧା ବୋଲଗଡ ବ୍ଲକ କାଉଁରିପାଟଣା ବୁଥରେ ପସି ହଙ୍ଗାମା କରିବା ସହ ଇଭିଏମ ଭାଙ୍ଗିଥିଲେ ଯାହାକୁ ନେଇ ପ୍ରିଜାଇଡିଂ ଅଧିକାରୀଙ୍କ ଅଭିଯୋଗ ଆଧାରରେ ପୋଲିସ ତାଙ୍କୁ ଗିରଫ କରିଛି।

ତାଙ୍କ ବିରୋଧରେ ୧୬ ଟି ଦଫା ଲଗାଯାଇ ତାଙ୍କୁ ପୋଲିସ ଗିରଫ କରିଥିଲା। ତେବେ କୋର୍ଟ ଜାମିନ ନାମଞ୍ଜୁର କରିବାରୁ ତାଙ୍କୁ ଜେଲକୁ ପଠାଇ ଦିଆଯାଇଛି। ତେବେ ଗତକାଲି ପ୍ରାୟ ସାଢେ ତିନିଟାରେ ବୁଥରେ ପସି ଜଗଦ୍ଦେବ ପ୍ରିଜାଇଡିଂ ଅଧିକାରୀଙ୍କ ସହ ଯୁକ୍ତିତର୍କ କରିବା ସହ ସେଠାରେ ଥିବା ଇଭିଏମ ଭାଙ୍ଗି ସେଠାରୁ ଖସି ପଳାଇଥିଲେ। ହେଲେ କିଛି ବାଟରେ ତାଙ୍କୁ କାବୁ କରିନେଇଥିଲା ପୋଲିସ। ପୋଲିସ ତାଙ୍କୁ ଉଠାଇ ନେଇ ଖୋର୍ଦ୍ଧା ରିଜର୍ଭ ପୋଲିସ କ୍ୟାମ୍ପରେ ଅଟକ ରଖିବାରୁ ଧାରଣାରେ ବସିଥିଲେ ଜଗଦ୍ଦେବ। ସେ କିଛି କରି ନାହାନ୍ତି କହିବା ସହ ପୋଲିସ ଓ ପିର୍ଜାଇଡିଂ ଅଧିକାରୀଙ୍କ ଆଡକୁ ଅଙ୍ଗୁଳି ନିର୍ଦ୍ଦେଶ କରି ସିସିଟିଭି ଯାଞ୍ଚ କରିବା ଦାବିରେ ଅଡିବସିଥିଲେ ଜଗଦ୍ଦେବ। ସେପଟେ ସମର୍ଥକମାନେ ଜଗଦ୍ଦେବଙ୍କୁ ମୁକୁଳେଇବା ପାଇଁ ବୋଲଗଡ ଭାଲିଆବାଡି ଗାଁରେ ଘେରାବନ୍ଦୀ କରି ରଖିଥିଲେ। ଏହି ଖବର ପାଇ ଉପଜିଲ୍ଲାପାଳ ସେଠାରେ ପହଞ୍ଚି ଲୋକଙ୍କୁ ବୁଝାସୁଝା କରିବାକୁ ଚେଷ୍ଟା କରିବା ବେଳେ ସମର୍ଥକମାନେ ହୋହଲ୍ଲା ପାଟିତୁଣ୍ଡ କରିଥିଲେ। ଏମିତି କି ତାଙ୍କୁ ଠେଲାପେଲା କରିବା ସହ ତାଙ୍କ ସହ ତାଙ୍କ ଉପସ୍ଥିତିରେ ଅସଭ୍ୟ ଭାଷାରେ ଗାଲିମନ୍ଦ କରିଥିଲେ। ତେବେ ବୁଥର ପ୍ରିଜାଇଡିଂ ଅଧିକାରୀ ଏନେଇ ଥାନାରେ ଗୋଟିଏ ଅଭିଯୋଗ କରିବାରୁ ଜଗଦ୍ଦେବଙ୍କୁ ରାତିରେ ଗିରଫ କରିଛି ପୋଲିସ।