ବିହାର: ବିଳମ୍ବିତ ରାତିରେ ଘଟିଲା ଭୟଙ୍କର ସଡ଼କ ଦୁର୍ଘଟଣା। ନଦୀକୁ ଖସିପଡ଼ିଲା ଯାତ୍ରୀବାହୀ ସ୍କର୍ପିଓ। ଅକାଳରେ ଚାଲିଗଲା ୬ ଜଣଙ୍କ ଜୀବନ। ବିହାରର ଅରରିଆ ଜିଲ୍ଲାରେ ଘଟିଛି ଏଭଳି ଏକ ହୃଦୟବିଦାରକ ଘଟଣା। ବୁଧବାର ବିଳମ୍ବିତ ରାତିରେ ତାରାବାରି ଥାନା ଅଞ୍ଚଳ ନିକଟରେ ଥିବା ବିଡ଼ି ବ୍ରିଜ୍ରୁ ଏକ ସ୍କର୍ପିଓ ଗାଡ଼ି ନଦୀକୁ ଖସିପଡ଼ିଥିବା ସୂଚନା ମିଳିଛି। ଏହି ମର୍ମନ୍ତୁଦ ଦୁର୍ଘଟଣାରେ ୬ ଜଣଙ୍କର ମୃତ୍ୟୁ ଘଟିଥିବା ଜଣାପଡ଼ିଛି।
ମିଳିଥିବା ସୂଚନା ଅନୁଯାୟୀ, ବୁଧବାର ରାତିରେ ସ୍କର୍ପିଓ ଗାଡ଼ିଟି ବିଡ଼ି ବ୍ରିଜ୍ ଦେଇ ଯାଉଥିବା ବେଳେ ଏହି ଅଘଟଣ ଘଟିଥିଲା। କୌଣସି କାରଣରୁ ଗାଡ଼ିଟି ପୋଲ ତଳକୁ ଖସି ନଦୀରେ ପଡ଼ିଯାଇଥିଲା। ଫଳରେ ଗାଡ଼ିରେ ଥିବା ଯାତ୍ରୀମାନେ ଭୟଙ୍କର ଦୁର୍ଘଟଣାର ଶିକାର ହୋଇଥିଲେ। ଘଟଣାରେ ୬ ଜଣଙ୍କ ଜୀବନ ଚାଲିଯାଇଥିବା ଖବର ସାମ୍ନାକୁ ଆସିଛି।
ସୂଚନା ଅନୁସାରେ, ସ୍କର୍ପିଓରେ ମୋଟ ୭ ଜଣ ଯାତ୍ରା କରୁଥିଲେ। ସେମାନେ ସୁପୌଲ ଜିଲ୍ଲାର ପିପ୍ରା ଅଞ୍ଚଳର ବାସିନ୍ଦା ଥିଲେ। ଏକ ତିଳକ ଉତ୍ସବରେ ଯୋଗଦେଇ ଘରକୁ ଫେରୁଥିବା ବେଳେ ବିଡ଼ି ବ୍ରିଜ୍ ନିକଟରେ ଗାଡ଼ିଟି ନିୟନ୍ତ୍ରଣ ହରାଇଥିଲା। ପୋଲ ନିକଟରେ ଥିବା ବୁଲାଣି ରାସ୍ତାରେ ଦୁର୍ଘଟଣା ଘଟିଥିବା ସୂଚନା ମିଳିଛି।
ଦୁର୍ଘଟଣା ସମ୍ପର୍କରେ ଖବର ପାଇ ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚିଥିଲେ। ପରେ ପୋଲିସ ଓ ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା। ଗାଡ଼ିରେ ଥିବା ସମସ୍ତ ୭ ଜଣଙ୍କୁ ଉଦ୍ଧାର କରି ଅରରିଆ ସଦର ହସ୍ପିଟାଲକୁ ନିଆଯାଇଥିଲା। ସେଠାରେ ଡାକ୍ତର ୬ ଜଣଙ୍କୁ ମୃତ ଘୋଷଣା କରିଥିବା ବେଳେ ଜଣେ ଆହତ ଅବସ୍ଥାରେ ବଞ୍ଚିଯାଇଛନ୍ତି।
ଏହି ଦୁର୍ଘଟଣା ପରେ ମୃତକଙ୍କ ପରିବାରରେ ଶୋକର ଛାୟା ଖେଳିଯାଇଛି। ଏକ ଖୁସିର କାର୍ଯ୍ୟକ୍ରମରୁ ଫେରୁଥିବା ବେଳେ ଏଭଳି ଅଘଟଣ ସମସ୍ତଙ୍କୁ ସ୍ତବ୍ଧ କରିଦେଇଛି। ଅନ୍ୟପଟେ ଦୁର୍ଘଟଣାର ପ୍ରକୃତ କାରଣ ଜାଣିବା ପାଇଁ ପୋଲିସ ତଦନ୍ତ ଆରମ୍ଭ କରିଛି।