ମଦୁଆ ପୋଲିସ ବାଲାଙ୍କୁ ନାହିଁ ନିସ୍ତାର। ଚାକିରିରୁ ଖାଇବେ ତଡା। ମଦୁଆ ପୋଲିସ କର୍ମଚାରୀଙ୍କୁ ବାଧ୍ୟତାମୂଳକ ଅବସର ଦେବାକୁ ଆସାମ ସରକାର ନିଷ୍ପତ୍ତି ନେଇଛନ୍ତି। ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ଏମିତି ଘୋଷଣା ପରେ ଭାଳେଣି ପଡ଼ିଲାଣି। ମେ’ ୧୦ରେ ବିଜେପି ସରକାରକୁ ଆସାମରେ ୨ ବର୍ଷ ପୂରିବାକୁ ଯାଉଛି। ଏହି ଅବସରରେ ରାଜ୍ୟ ପ୍ରଶାସନ ଓ ପୋଲିସ୍ ଫୋର୍ସକୁ ଅଧିକ ଶାଣିତ କରିବାକୁ ଲକ୍ଷ୍ୟ ରଖିଛନ୍ତି ମୁଖ୍ୟମନ୍ତ୍ରୀ।
ରବିବାର ମୁଖ୍ୟମନ୍ତ୍ରୀ ମଦୁଆ ପୁଲିସ୍ କର୍ମଚାରୀଙ୍କୁ ବାଧ୍ୟତାମୂଳକ ଅବସର ଦିଆଯିବା ସମ୍ପର୍କରେ ଘୋଷଣା କରିଥିଲେ। ସେ କହିଥିଲେ କି, ୩୦୦ ପୋଲିସ କର୍ମଚାରୀ ନିୟମିତ ମଦ ପିଅନ୍ତି। ତେଣୁ ସେମାନଙ୍କ ପାଇଁ ସରକାର ଭିଆରଏସର ବ୍ୟବସ୍ଥା କରିଛନ୍ତି। ବିଶ୍ୱଶର୍ମା ଆହୁରି କହିଛନ୍ତି କି, ଏହି ବାଧ୍ୟତାମୂଳକ ଅବସର ବ୍ୟବସ୍ଥା ରହିଛି। ହେଲେ ଏହାକୁ ଲାଗୁ କରାଯାଉ ନାହିଁ। ପ୍ରଥମଥର ପାଇଁ କଡ଼ାକଡ଼ି ଭାବେ ଲାଗୁ କରାଯିବ ଓ ଖାଲି ପଦବୀକୁ ତୁରନ୍ତ ପୂରଣ କରାଯିବ।
ଗୁରୁବାର ବିଶ୍ୱଶର୍ମା ପୋଲିସ ବିଭାଗର ବରିଷ୍ଠ ଅଧିକାରୀଙ୍କ ସହ ଭିସିରେ ବୈଠକ କରିଥିଲେ। ଏହି ସମୟରେ ମଧ୍ୟ ସେ ବିଶୃଙ୍ଖଳା କରୁଥିବା ପୁଲିସ୍ କର୍ମଚାରୀଙ୍କୁ ବିଦା କରିବା ପାଇଁ କହିଥିଲେ। ଏଥିସହ ଫିଟନେସ ଉପରେ ଗୁରୁତ୍ୱ ଦେଇଥିଲେ। ବିଶେଷ କରି ଅଭ୍ୟାଦସଗତ ମଦୁଆ, ଦୁର୍ନୀତିଗ୍ରସ୍ତ କର୍ମଚାରୀଙ୍କୁ ଭିଆରଏସ୍ ଦେବାକୁ ମୁଖ୍ୟମନ୍ତ୍ରୀ କହିଥିଲେ।