ଧୀରେ ଧୀରେ ଜମୁଛି ପାରାଦ୍ୱୀପ କଳିଙ୍ଗ ବାଲିଯାତ୍ରା । ଚଳିତ ବାଲିଯାତ୍ରାର ଉଦଘାଟନୀ ଓ ଦ୍ଵିତୀୟ ଦିବସରେ ରାଷ୍ଟ୍ରପତିଙ୍କ ଗସ୍ତକୁ ନେଇ ବାଲିଯାତ୍ରାକୁ ସାଧାରଣ ଲୋକଙ୍କ ଆଗମନ ଉପରେ ଲାଗିଥିଲା ପ୍ରତିବନ୍ଧକ। ହେଲେ ତୃତୀୟ ଦିନ ଜନଗହଳି ଦେଖିବାକୁ ମିଳିଛି । କାଁ ଭାଁ କିଛି ଘଟଣାକୁ ଛାଡିଦେଲେ ଶାନ୍ତି ଶୃଙ୍ଖଳାର ସହିତ ତୃତୀୟ ଦିନର ବାଲିଯାତ୍ରା ଶେଷ ହୋଇଛି । କଳିଙ୍ଗ ବାଲିଯାତ୍ରାରେ ହଜାର ଷ୍ଟଲ ପଡ଼ିଥିବା ବେଳେ ବିଶେଷ କରି ଖାଦ୍ୟ ସାମଗ୍ରୀ ଷ୍ଟଲ, ମିନାବଜାର, ରାମଦୋଳି ଓ ବିଭିନ୍ନ ଘରକରଣା ସାମଗ୍ରୀର ଷ୍ଟଲରେ ଜନଗହଳି ଦେଖିବାକୁ ମିଳିଛି । ସେପଟେ ପ୍ରତ୍ୟେକ ଦିନ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଉଛି। ତୃତୀୟ ଦିନରେ ଇଣ୍ଡିଆନ ଆଇଡିଲ ଫେମ ଡ଼ ରୋହନ ବିଶ୍ୱାଳ ଏବଂ ଟିମ ଦ୍ୱାରା ପରିବେଷଣ କରାଯାଇଥିବା ସାଂସ୍କୃତିକ କାର୍ଯ୍ୟକ୍ରମ ଦର୍ଶକଙ୍କ ଆକର୍ଷଣ ର କେନ୍ଦ୍ରବିନ୍ଦୁ ପାଲଟିଥିଲା l ଜଗତସିଂହପୁର ତଥା କୁଜଙ୍ଗ ମାଟିର ପୁଅ ଡ଼ ରୋହନ ବିଶ୍ୱାଳ ପେସାରେ ଡାକ୍ତର ହୋଇଥିବା ବେଳେ କିପରି ନିଜର ସଂଗୀତ ପ୍ରତି ରହିଥିବା ଦୁର୍ବଳତାକୁ ନେଇ ଓଡିଶା ରୁ ମୁମ୍ବାଇ ଇଣ୍ଡିଆନ ଆଇଡଲ ଯାତ୍ରା କଲେ ଏବଂ ଦର୍ଶକ ଙ୍କ ଭଲ ପାଇବା ସାଉଁଟିଲେ ଏ ନେଇ ମଞ୍ଚରେ ଦର୍ଶକ ମାନଙ୍କୁ ଏକ ଭିଡିଓ ମାଧ୍ୟମରେ ବାର୍ତ୍ତା ଦେବା ସହିତ ନିଜର ଚିରାଚରିତ କଣ୍ଠ ରେ ସଂଗୀତ ପରିବେଷଣ କରିଥିଲେ l
ବିଦ୍ୟୁତ ବିଭାଗର ଖମାଖିଆଲ ମନୋଭାବ ଯୋଗୁ ସନ୍ଧ୍ୟା ସମୟରେ ତିରିଶରୁ ଅଧିକ ଷ୍ଟଲରେ ପାଖାପାଖି ଏକଘଣ୍ଟା ଲାଇନ କଟିଯିବାରୁ କିଛି ବ୍ୟବସାୟୀ ହଟହଟା ହୋଇଥିବା ଅଭିଯୋଗ ହୋଇଛି। ଯାହା ଉଭୟ ବ୍ୟବସାୟୀ ଓ ସାଧାରଣ ଲୋକଙ୍କୁ ନିରୁତ୍ସାହିତ କରିଛି।