ପାରାଦ୍ଵୀପ ବନ୍ଦର ଅଞ୍ଚଳରେ ଶ୍ରମିକମାନଙ୍କ ଦୀର୍ଘଦିନର ସମସ୍ୟା ଓ ଶୋଷଣକୁ ଦୂର କରିବା ପାଇଁ ପାରାଦ୍ଵୀପ ପୋର୍ଟ ମଜଦୁର ସଂଘ ଏବଂ ପାରାଦ୍ଵୀପ ପୋର୍ଟ ଶ୍ରମିକ କର୍ମଚାରୀ ୟୁନିଅନ ହାତ ମିଳାଇଛନ୍ତି। ଶ୍ରମିକଙ୍କ ସ୍ୱାର୍ଥ ରକ୍ଷା ଓ ଅଞ୍ଚଳର ସାମଗ୍ରିକ ବିକାଶ ପାଇଁ ଏହି ଦୁଇ ସଙ୍ଗଠନ ମଧ୍ୟରେ ଏକ ମେଣ୍ଟ ପ୍ରସ୍ତୁତ ହୋଇଛି। ଗୋଟିଏ କମ୍ପାନୀରେ ଏକାଧିକ ସଙ୍ଗଠନ ସକ୍ରିୟ ରହିବା ଫଳରେ କମ୍ପାନୀ କର୍ତ୍ତୃପକ୍ଷ ଓ ଶ୍ରମିକଙ୍କ ମଧ୍ୟରେ ଉଚିତ୍ ବୁଝାମଣା ହୋଇପାରୁନଥିଲା। ବିଭିନ୍ନ ସଙ୍ଗଠନ ମଧ୍ୟରେ ମତଭେଦ ଯୋଗୁଁ ସାଧାରଣ ଶ୍ରମିକମାନେ ସେମାନଙ୍କର ନ୍ୟାଯ୍ୟ ଦାବିରୁ ବଞ୍ଚିତ ହେଉଥିଲେ। କମ୍ପାନୀଗୁଡ଼ିକ ଉପରେ ଚାପ ସୃଷ୍ଟି କରି ଶ୍ରମିକଙ୍କ ସମସ୍ୟା ସମାଧାନ କରିବା ପାଇଁ ଏକତ୍ରିତ ଲଢ଼େଇର ଆବଶ୍ୟକତା ଅନୁଭବ କରାଯାଇଥିଲା।
ପାରାଦ୍ଵୀପର ବିଜୁ କନଭେନସନ ପଡ଼ିଆଠାରେ ଆୟୋଜିତ ଏକ ବିଶାଳ ସାଧାରଣ ସଭାରେ ଏହି ନୂତନ ସମୀକରଣ ବିଷୟରେ ଆଧିକାରିକ ଭାବେ ଘୋଷଣା କରାଯାଇଛି। ପାରାଦ୍ଵୀପ ପୋର୍ଟ ଶ୍ରମିକ କର୍ମଚାରୀ ୟୁନିଅନର ସଭାପତି ସତ୍ୟ ସାରଥୀ ମହାନ୍ତିଙ୍କୁ ପାରାଦ୍ଵୀପ ପୋର୍ଟ ମଜଦୁର ସଂଘର ମୁଖ୍ୟ ପରାମର୍ଶଦାତା ଭାବେ ନୂତନ ଦାୟିତ୍ୱ ଦିଆଯାଇଛି।
ପୋର୍ଟ ମଜଦୁର ସଂଘର ସଭାପତି ପ୍ରକାଶ ତ୍ରିପାଠୀ ଅନ୍ୟ ସମସ୍ତ ଶ୍ରମିକ ସଙ୍ଗଠନକୁ ମଧ୍ୟ ଏହି ମହତ୍ ପଦକ୍ଷେପରେ ସାମିଲ ହେବାକୁ ଆହ୍ୱାନ ଦେଇଛନ୍ତି। ବରିଷ୍ଠ ନେତା ତଥା ଉପଦେଷ୍ଟା ସୁଧାକର ମନ୍ତ୍ରୀଙ୍କ ସମେତ ବହୁ ସଂଖ୍ୟାରେ ଶ୍ରମିକ ନେତା ଏହି ଏକତାକୁ ସ୍ୱାଗତ କରିଛନ୍ତି।