ଦୀର୍ଘ ଦିନର ଅପେକ୍ଷା ପରେ ମତ୍ସ୍ୟଜୀବୀଙ୍କ ଜାଲରେ ପଡ଼ିଛି ପ୍ରଚୁର ପରିମାଣର ଇଲିଶି। ମାଛର ରାଜା ଇଲିଶିକୁ ନେଇ ଏବେ ସରଗରମ ହୋଇଉଠିଛି ଓଡ଼ିଶା–ପଶ୍ଚିମବଙ୍ଗ ସୀମାନ୍ତ ଦିଘା ମୁହାଣ। ମଙ୍ଗଳବାର ଦିଘା ମତ୍ସ୍ୟ ଅବତରଣ କେନ୍ଦ୍ରରେ ୩୦ ଟନ୍ରୁ ଅଧିକ ଇଲିଶି ମାଛ ଆସିଥିବା ଜଣାପଡ଼ିଛି।
ଦୀର୍ଘ ସମୟ ପରେ ଏତେ ବଡ଼ ଧରଣ ହୋଇଥିବାରୁ ଟ୍ରଲର ମାଲିକ, ମତ୍ସ୍ୟଜୀବୀ ଓ ମାଛ ବ୍ୟବସାୟୀଙ୍କ ମଧ୍ୟରେ ଦେଖାଦେଇଛି ଖୁସିର ମାହୋଲ। ଦିଘା ମତ୍ସ୍ୟ ଅବତରଣ କେନ୍ଦ୍ରରେ ଇଲିଶି ଭର୍ତ୍ତି ଟ୍ରଲର ପହଞ୍ଚିବା ପରେ ଚଳଚଞ୍ଚଳ ହୋଇଉଠିଛି ପୂରା ଅଞ୍ଚଳ।
ବଜାରରେ ଇଲିଶିର ଆକାର ଓ ଓଜନ ଅନୁସାରେ କିଲୋପ୍ରତି ଦର ୬୦୦ ଟଙ୍କାରୁ ଆରମ୍ଭ କରି ୧୩୦୦ ଟଙ୍କା ପର୍ଯ୍ୟନ୍ତ ରହିଛି। ବିଶେଷକରି ବଡ଼ ଆକାରର ଇଲିଶି ପାଇଁ ବ୍ୟବସାୟୀଙ୍କ ମଧ୍ୟରେ ଅଧିକ ଚାହିଦା ଦେଖାଦେଇଛି। ଦିଘାରୁ ଇଲିଶି ଓଡ଼ିଶା ସମେତ ପଶ୍ଚିମବଙ୍ଗର ବିଭିନ୍ନ ବଜାରକୁ ପଠାଯାଉଛି।
ମତ୍ସ୍ୟଜୀବୀଙ୍କ କହିବା ଅନୁସାରେ, ଅନୁକୂଳ ପାଗ ଓ ସମୁଦ୍ରର ପରିସ୍ଥିତି ଯୋଗୁଁ ଏହି ସମୟରେ ଇଲିଶି ମାଛ କୂଳ ଆଡ଼କୁ ଆସୁଛି। ନଦୀ ମୁହାଣ ଅଞ୍ଚଳରେ ମିଠା ପାଣି ଓ ସମୁଦ୍ରର ଲୁଣିଆ ପାଣି ମିଶୁଥିବାରୁ ଇଲିଶିର ଗତିବିଧି ବଢ଼ିଥାଏ। ଫଳରେ ମତ୍ସ୍ୟଜୀବୀଙ୍କ ଜାଲରେ ବହୁ ପରିମାଣରେ ଇଲିଶି ଧରାପଡ଼ୁଛି।
ଚଳିତ ଋତୁରେ ଏହାକୁ ଏକ ବଡ଼ ଧରଣ ବୋଲି କହିଛନ୍ତି ମତ୍ସ୍ୟଜୀବୀ। ଏତେ ପରିମାଣର ଇଲିଶି ମିଳିଥିବାରୁ ଟ୍ରଲର ମାଲିକମାନେ ଭଲ ଲାଭ ଆଶାରେ ରହିଥିବା ବେଳେ ବ୍ୟବସାୟୀମାନେ ମଧ୍ୟ ଉତ୍ସାହିତ ହୋଇପଡ଼ିଛନ୍ତି।
ସେପଟେ ବଜାରରେ ପ୍ରଚୁର ଇଲିଶି ଆସିବା ଖବର ପରେ ଖାଦ୍ୟପ୍ରେମୀଙ୍କ ମଧ୍ୟରେ ବଢ଼ିଛି ଉତ୍ସାହ। ଆଗାମୀ ଦିନରେ ମଧ୍ୟ ପାଗ ଅନୁକୂଳ ରହିଲେ ଆହୁରି ବଡ଼ ପରିମାଣରେ ଇଲିଶି ଧରାପଡ଼ିବ ବୋଲି ଆଶା ରଖିଛନ୍ତି ମତ୍ସ୍ୟଜୀବୀ। ତେବେ ଦିଘା ମୁହାଣରେ ଇଲିଶିର ଏହି ବମ୍ପର ଧରଣ ମତ୍ସ୍ୟଜୀବୀଙ୍କ ମୁହଁରେ ଆଣିଛି ଖୁସିର ହସ।