କନ୍ଧମାଳ ଜିଲ୍ଲା ଜି. ଉଦୟଗିରି ବ୍ଲକ ଗ୍ରେସିଙ୍ଗିଆ ପଞ୍ଚାୟତ ସ୍ଥିତ ବନଶ୍ରୀ ବାଳିକା ଉଚ୍ଚ ବିଦ୍ୟାଳୟରେ ଏକ ଅଭାବନୀୟ ଚିତ୍ର ସାମ୍ନାକୁ ଆସିଛି। ମାତ୍ର ୧୦ ହଜାର ଟଙ୍କାର ବିଦ୍ୟୁତ୍ ବିଲ୍ ବକେୟା ଯୋଗୁଁ ଗତ ଶୁକ୍ରବାର ରାତିଠାରୁ ବିଦ୍ୟାଳୟ ଓ ହଷ୍ଟେଲର ବିଦ୍ୟୁତ୍ ସେବା ବିଚ୍ଛିନ୍ନ କରିଦିଆଯାଇଛି, ଯାହାଫଳରେ ୧୧୦ ଜଣ ଅନ୍ତେବାସୀ ଛାତ୍ରୀ ଗୁଳୁଗୁଳି ଓ ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ହନ୍ତସନ୍ତ ହେଉଛନ୍ତି। ଗତ ୩-୪ ଦିନ ହେବ ବିଦ୍ୟୁତ୍ ନଥିବାରୁ ଛାତ୍ରୀମାନଙ୍କ ପାଠପଢ଼ା ସମ୍ପୂର୍ଣ୍ଣ ବ୍ୟାହତ ହୋଇଛି। ବିଦ୍ୟୁତ୍ ଅଭାବରୁ ପାଣି ମୋଟର ଚାଲିପାରୁ ନାହିଁ।
ଫଳରେ ଛାତ୍ରୀମାନେ ଦୁଇ ଦିନ ହେବ ସ୍ନାନ କରିପାରି ନାହାନ୍ତି। ବିଦ୍ୟାଳୟ ଓ ହଷ୍ଟେଲଟି ଏକ ନିଛାଟିଆ ସ୍ଥାନରେ ଥିବାରୁ ରାତିରେ ଅନ୍ଧାର ମଧ୍ୟରେ ଛାତ୍ରୀମାନଙ୍କ ସୁରକ୍ଷାକୁ ନେଇ ସ୍ଥାନୀୟ ଲୋକେ ଭୟଭୀତ ହୋଇପଡ଼ିଛନ୍ତି। ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀ କ୍ୟାମେରା ସମ୍ମୁଖରେ କିଛି କହିବାକୁ ମନା କରିଥିଲେ ମଧ୍ୟ ସୂଚନା ଦେଇଛନ୍ତି ଯେ:
ସେ ଗଣମାଧ୍ୟମ ପ୍ରତିନିଧିଙ୍କୁ ବିଦ୍ୟାଳୟ ପରିସରକୁ ଯିବା ପାଇଁ ମଧ୍ୟ ବାରଣ କରିଥିବା ଦେଖିବାକୁ ମିଳିଛି।
୧୦,୦୦୦ ଟଙ୍କାର ବିଦ୍ୟୁତ୍ ବିଲ୍ ବକେୟା ଥିବା ଯୋଗୁଁ ବିଭାଗ ପକ୍ଷରୁ ସେବା ବନ୍ଦ କରାଯାଇଛି।
ବର୍ତ୍ତମାନ ଟଙ୍କା ପୈଠ କରାଯାଇଥିଲେ ମଧ୍ୟ ବିଦ୍ୟୁତ୍ ସଂଯୋଗ ପୁନଃସ୍ଥାପିତ ହୋଇପାରି ନାହିଁ।
ବିଦ୍ୟୁତ୍ ସେବା ବିଚ୍ଛିନ୍ନ ହେବା ଫଳରେ ସ୍ଥାନୀୟ ବାସିନ୍ଦାମାନେ ତୀବ୍ର ପ୍ରତିବାଦ କରିଛନ୍ତି। କୁମାରୀ ଛାତ୍ରୀମାନଙ୍କ ପାଇଁ ଏଭଳି ପରିସ୍ଥିତି ସୃଷ୍ଟି ହେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସେମାନେ ମତ ପ୍ରକାଶ କରିଛନ୍ତି।
ଛାତ୍ରୀମାନଙ୍କ ସ୍ୱାସ୍ଥ୍ୟ ଓ ସୁରକ୍ଷାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ତୁରନ୍ତ ଏଥିରେ ହସ୍ତକ୍ଷେପ କରନ୍ତୁ ଏବଂ ବିଦ୍ୟୁତ୍ ସେବା ସ୍ୱାଭାବିକ କରିବା ପାଇଁ ପଦକ୍ଷେପ ଗ୍ରହଣ କରନ୍ତୁ। ପ୍ରଶାସନିକ ଅବହେଳା ଯୋଗୁଁ କୁନି କୁନି ଛାତ୍ରୀମାନେ ଯେଉଁ କଷ୍ଟ ସହୁଛନ୍ତି, ତାହା ଶୀଘ୍ର ଦୂର ହେବା ଆବଶ୍ୟକ। ନଚେତ୍ ଆଗାମୀ ଦିନରେ ଏହା ଏକ ବଡ଼ ଦୁର୍ଘଟଣାକୁ ଆମନ୍ତ୍ରଣ କରିପାରେ।