ବନ୍ଦର ସହର ପାରାଦ୍ଵୀପ ମ୍ୟୁନିସିପାଲଟି କଲ୍ୟାଣ ମଣ୍ଡପ ପରିସରରେ ୫ମ ବାର୍ଷିକ ଅଲ୍ ଓଡ଼ିଶା ଓପନ୍ କରାଟେ ଚମ୍ପିୟାନସିପ୍ ଅତ୍ୟନ୍ତ ଉତ୍ସାହର ସହ ସମ୍ପନ୍ନ ହୋଇଯାଇଛି। କରାଟେ ପ୍ରଶିକ୍ଷକ ସଞ୍ଜୟ ସାହାଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଆୟୋଜିତ ଏହି ମହାକୁମ୍ଭରେ ଓଡ଼ିଶାର ବିଭିନ୍ନ ପ୍ରାନ୍ତରୁ କୁନି କୁନି କରାଟେକାମାନେ ନିଜର ଶକ୍ତି ଓ କୌଶଳ ପ୍ରଦର୍ଶନ କରିଥିଲେ। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମ୍ୟୁନିସିପାଲଟି ଅଧ୍ୟକ୍ଷ ବସନ୍ତ ବିଶ୍ବାଳ ଯୋଗ ଦେଇଥିବା ବେଳେ, ପାରାଦ୍ଵୀପ ନଗର ବିଜେପି ସଭାପତି ସୁବ୍ରତ କୁମାର ପ୍ରଧାନ ଏବଂ ପାରିଷଦ ପ୍ରତାପ ନାୟକ ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ। ଅତିଥିମାନେ ସାମ୍ପ୍ରତିକ ସମୟରେ ଆତ୍ମସୁରକ୍ଷାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।
ଶିକ୍ଷା ସହିତ ଶାରୀରିକ ଓ ମାନସିକ ସୁସ୍ଥତା ପାଇଁ କରାଟେ ଏକ ଶ୍ରେଷ୍ଠ ମାଧ୍ୟମ। ବିଶେଷ କରି ଛାତ୍ରଛାତ୍ରୀମାନେ ନିଜର ଆତ୍ମବିଶ୍ଵାସ ବଢ଼ାଇବା ଓ ସୁରକ୍ଷିତ ରହିବା ପାଇଁ ଏହି ପ୍ରଶିକ୍ଷଣ ନେବା ଜରୁରୀ। ଓଡ଼ିଶାର ବିଭିନ୍ନ ଜିଲ୍ଲାରୁ ପ୍ରାୟ ୨୦୦ ରୁ ଅଧିକ ପ୍ରତିଯୋଗୀ ଭିନ୍ନ ଭିନ୍ନ ବର୍ଗରେ ଭାଗ ନେଇଥିଲେ। ବିଜୟୀ ପ୍ରତିଯୋଗୀମାନଙ୍କୁ ସାର୍ଟିଫିକେଟ୍, ପଦକ ଓ ଟ୍ରଫି ପ୍ରଦାନ କରାଯାଇ ସମ୍ଵର୍ଦ୍ଧିତ କରାଯାଇଥିଲା। ପ୍ରତିଯୋଗୀମାନଙ୍କ ଦ୍ୱାରା ପ୍ରଦର୍ଶିତ ‘କାତା’ ଓ ‘କୁମାଇଟ୍’ କୌଶଳ ଉପସ୍ଥିତ ଦର୍ଶକଙ୍କୁ ବେଶ୍ ମନ୍ତ୍ରମୁଗ୍ଧ କରିଥିଲା। ଏହି ଚମ୍ପିୟାନସିପ୍ କେବଳ ଏକ ଖେଳ ପ୍ରତିଯୋଗିତା ନଥିଲା, ବରଂ ଏହା ଯୁବପିଢ଼ିଙ୍କ ମଧ୍ୟରେ ଅନୁଶାସନ ଓ ସାହସ ସୃଷ୍ଟି କରିବାର ଏକ ମାଧ୍ୟମ ସାଜିଥିଲା।
ଆଗାମୀ ଦିନରେ ଏହି ଛାତ୍ରଛାତ୍ରୀମାନେ ଜାତୀୟ ଓ ଆନ୍ତର୍ଜାତୀୟ ସ୍ତରରେ ଓଡ଼ିଶା ପାଇଁ ଗୌରବ ଆଣିବେ ବୋଲି ଆଶା କରାଯାଉଛି। ପ୍ରଶିକ୍ଷକ ସଞ୍ଜୟ ସାହା କହିଛନ୍ତି ଯେ, ପାରାଦ୍ଵୀପ ଭଳି ସ୍ଥାନରେ ଏଭଳି ପ୍ରତିଯୋଗିତା ଆୟୋଜନ ହେବା ଦ୍ୱାରା ସ୍ଥାନୀୟ ପ୍ରତିଭାମାନେ ଏକ ବଡ଼ ପ୍ଲାଟଫର୍ମ ପାଇପାରୁଛନ୍ତି।