ପାନୀୟ ଜଳ ସମସ୍ୟାକୁ ନେଇ ତାତିଲେ ଗ୍ରାମବାସୀ। ଗରା, ବାଲ୍ଟି ରଖି ଅବରୋଧ କଲେ ରାଜରାସ୍ତା। ଫଳରେ ଯାତାୟାତ ବାଧାପ୍ରାପ୍ତ। ପାନୀୟ ଜଳ ପାଇଁ ରାସ୍ତା ଅବରୋଧ ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା ବାଲିକୁଦା ବ୍ଲକ ଅଧୀନସ୍ଥ ଅନନ୍ତପୁର ପଞ୍ଚାୟତ ରେ । ପଞ୍ଚାୟତର ନହରଣା ତିହୁଡି ମୁଖ୍ୟ ରାସ୍ତାର ନୂଆଗାଁରେ ରାସ୍ତା ରୋକ କରିଛନ୍ତି ଗ୍ରାମବାସୀ । ସୂଚନା ମୁତାବକ ବାଲିସାହି, ନୂଆଗାଁ,ଗୋପୀନାଥପୁର ଓ ସାମନ୍ତରାପୁରକୁ ୧୫ ଦିନ ହେବ ପାଇପ ଯୋଗେ ଜଳ ଯୋଗାଣକୁ ବନ୍ଦ କରି ଦିଆଯାଇଛି।
ଫଳରେ ଲୋକେ ପିଇବା ପାଣି ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ସମ୍ପୃକ୍ତ ଗ୍ରାମବାସୀ ସ୍ଥାନୀୟ ସରପଞ୍ଚ, ବ୍ବିଡ଼ିଓଙ୍କ ସହିତ ସମସ୍ତ ଅଧିକାରୀଙ୍କୁ ଜଣାଇ ଥିଲେ ମଧ୍ୟ ସମାଧାନର ବାଟ ବାହାର କରାଗଲାନି। ତେଣୁ ରାସ୍ତାକୁ ଓହ୍ଲାଇଲେ ଗ୍ରାମବାସୀ। ୪ ଗ୍ରାମର ଗ୍ରାମବାସୀ ମିଳିତ ହୋଇ ଆଜି ସକାଳୁ ରାସ୍ତା ରୋକ କରିଥିଲେ। ମହିଳାମାନେ ରାସ୍ତାରେ ଗରା, ବାଲ୍ଟି, ଡେକ୍ଚି ଆଦି ରଖିବା ସହ ରାସ୍ତାରେ ବାଉଁଶ ଓ ତାର ବାନ୍ଧି ରାସ୍ତା ରୋକ କରି ଯାନବାହନ ଚଳାଚଳ କରିଥିଲେ ଠପ। ୩ ଘଣ୍ଟା ଧରି ରାସ୍ତାରୋକ କରିବା ପରେ ସ୍ଥାନୀୟ ସରପଞ୍ଚ ପ୍ରତିନିଧି ଓ ପୋଲିସ ଅଧିକାରୀ ବୁଝାସୁଝା କରିବା ପରେ ରାସ୍ତା ରୋକ ହଟିଛି।
ଗ୍ରାମବାସୀଙ୍କ ରାସ୍ତାରୋକ ପାଇଁ ୩ ଘଣ୍ଟା ଧରି ରାସ୍ତାରୁ ଦୁଇ ପାର୍ଶ୍ବରେ ଅଟକି ରହିଥିଲା ଗାଡି। ଏମିତି କି ଏକ ଆମ୍ବୁଲାନ୍ସକୁ ମଧ୍ୟ କିଛି ସମୟ ଅଟକା ଯାଇଥିବା ବେଳେ ଆମ୍ବୁଲାନ୍ସ ପାଇଁ ରାସ୍ତା ଛାଡିଥିଲେ। ତେବେ ପ୍ରତିଶ୍ରୁତି ମୁତାବକ, ଯଥାଶୀଘ୍ର ପାଣି ଯୋଗାଣ କରା ନ ଗଲେ ଆଗାମୀ ଦିନରେ ଆନ୍ଦୋଳନ ତୀବ୍ର ହେବ ବୋଲି ଗ୍ରାମବାସୀଙ୍କ ଚେତାବନୀ