ବିହାରର ସୁପୌଲ ଜିଲ୍ଲାରେ ଶୁକ୍ରବାର ଭୋରୁ ଭୋରୁ ଘଟିଯାଇଛି ବିରାଟ ବଡ ଦୁର୍ଘଟଣା। ଜିଲ୍ଲାରେ ନିର୍ମାଣାଧୀନ ପୋଲର ଏକ ଅଂଶ ଖସିପଡିବାରୁ ଜଣଙ୍କ ମୃତ୍ୟୁ ହେବା ସହ ୯ ଜଣ ଆହତ ହୋଇଥିବା ଆଧିକାରିକ ସୂତ୍ରରୁ ପ୍ରକାଶ। ବିହାର ଉପମୁଖ୍ୟମନ୍ତ୍ରୀ ବିଜୟ କୁମାର ସିହ୍ନା କହିଛନ୍ତି କି, ସୁପୌଲ ଓ ମଧୁବନୀ ଜିଲ୍ଲା ମଝିରେ ଭେଜା-ବକୌର ଠାରେ କୋସି ନଦୀ ଉପରେ ନିର୍ମାଣ ହେଉଥିବା ପୋଲର ଏକ ଅଂଶ ଖସିପଡିବାରୁ ଜଣେ ଶ୍ରମିକଙ୍କ ମୃତ୍ୟୁ ହୋଇଛି। କିଛି ଶ୍ରମିକ ଆହତ ହୋଇଛନ୍ତି। ଘଟଣାକୁ ନେଇ ସିହ୍ନା ଦୁଃଖ ବ୍ୟକ୍ତ କରିବା ସହ ମୃତକଙ୍କ ପରିବାର ପ୍ରତି ସମବେଦନା ଜ୍ଞାପନ କରିଛନ୍ତି। ପ୍ରତି ମୃତକଙ୍କ ପରିବାରକୁ ୧୦ ଲକ୍ଷ ସହାୟତା ରାଶି ଦେବାକୁ ଘୋଷଣା ହୋଇଛି। ସେହିପରି ପୀଡିତଙ୍କୁ ମଧ୍ୟ ସହାୟତା ଦିଆଯିବ ବୋଲି ଉପମୁଖ୍ୟମନ୍ତ୍ରୀ କହିଛନ୍ତି, ଘଟଣାର ତଦନ୍ତ କରି କାମ କରୁଥିବା କମ୍ପାନୀ ଓ ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ କହିଛନ୍ତି ଉପମୁଖ୍ୟମନ୍ତ୍ରୀ। ସିହ୍ନା ଆହୁରି କହିଛନ୍ତି, ଡବଲ ଇଞ୍ଜିନ ସରକାରରେ କୌଣସି ଭ୍ରଷ୍ଟାଚାରକୁ ବରଦାସ୍ତ କରାଯିବ ନାହିଁ। ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଘଟଣାରେ ୧୦ ଜଣ ଶ୍ରମିକ ଫସିଯାଇଥିଲେ ଓ ସମସ୍ତଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା। ସେମାନଙ୍କୁ ହସ୍ପିଟାଲ ନେବା ବାଟରେ ଜଣଙ୍କ ମୃତ୍ୟୁ ହୋଇଯାଇଛି। ଏହି ନିର୍ମାଣାଧୀନ ପୋଲରେ ମୋଟ ୧୭୧ ପିଲର ନିର୍ମାଣ ହେଉଥିବା ବେଳେ ୧୫୦ ପିଲର ନିର୍ମାଣ ଶେଷ ହୋଇସାରିଲାଣି। ପୋଲର ଦୈର୍ଘ୍ୟ ୧୦.୫ କିଲୋମିଟର ଥିବା ବେଳେ ଏଥିରେ ୧୨୦୦ କୋଟି ଟଙ୍କା ଖର୍ଚ୍ଚ ହେବ। ପୋଲ କାର୍ଯ୍ୟକ୍ଷମ ହେଲେ ସୁପୌଲ ଓ ମଧୁବନୀ ମଧ୍ୟରେ ଦୂରତା ୩୦ କିଲୋମିଟର କମିଯିବ। ବର୍ତ୍ତମାନ ଉଭୟ ଜିଲ୍ଲା ମଧ୍ୟରେ ଲୋକଙ୍କୁ ୧୦୦ କିଲୋମିଟର ବୁଲିବାକୁ ପଡୁଛି।