ଆମେରିକା ଓ ଇରାନ ମଧ୍ୟରେ ଘଟିଯାଇଥିବା ଭୟଙ୍କର ସାମରିକ ମୁହାଁମୁହିଁ ପରେ ମଧ୍ୟପ୍ରାଚ୍ୟରେ ଅସ୍ତ୍ରବିରତି ଲାଗୁ ହୋଇଛି, କିନ୍ତୁ ଉତ୍ତେଜନା ଏବେ ବି ଜାରି ରହିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାରମ୍ବାର ଧମକ ସେମାନଙ୍କ ଆଗାମୀ ରଣନୀତିକୁ ସୂଚାଉଥିବା ବେଳେ, ନିକଟରେ ଆସିଥିବା ଏକ ରିପୋର୍ଟ ସମସ୍ତଙ୍କୁ ଚକିତ କରିଦେଇଛି। ଆମେରିକାର କଂଗ୍ରେସନାଲ୍ ରିସର୍ଚ୍ଚ ସର୍ଭିସ୍ ର ରିପୋର୍ଟ ଅନୁସାରେ, ଇରାନ ଯୁଦ୍ଧରେ ଆମେରିକା ତାର ୪୨ଟି ଅତ୍ୟାଧୁନିକ ବିମାନ ହରାଇଛି, ଯାହାକୁ ଟ୍ରମ୍ପ ପ୍ରଶାସନ ଦୀର୍ଘ ଦିନ ଧରି ଲୁଚାଇବାକୁ ଚେଷ୍ଟା କରୁଥିଲା।
ଫେବ୍ରୁଆରି ୨୮ ତାରିଖରେ ଆମେରିକା ଇରାନକୁ ଟାର୍ଗେଟ କରି ‘ଅପରେସନ ଏପିକ୍ ଫ୍ୟୁରି’ ଆରମ୍ଭ କରିଥିଲା। ଏହି ଅପରେସନ୍ରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଖେମିନିଙ୍କ ସମେତ ଅନେକ ପ୍ରମୁଖ ନେତା ଏବଂ ସାମରିକ ଅଧିକାରୀ ପ୍ରାଣ ହରାଇଥିଲେ। ଏହାର ପ୍ରତିଶୋଧ ସ୍ୱରୂପ ଇରାନ ଉପସାଗରରେ ଥିବା ଆମେରିକୀୟ ସାମରିକ ବାହିନୀ ଉପରେ ଜୋରଦାର ପାଲଟା ଆକ୍ରମଣ କରିଥିଲା, ଯେଉଁଥିରେ ଆମେରିକାକୁ ବଡ଼ କ୍ଷତି ସହିବାକୁ ପଡ଼ିଛି।
ଆମେରିକା ପ୍ରତିରକ୍ଷା ବିଭାଗ ଏବଂ ସେଣ୍ଟକମ୍ ର ତଥ୍ୟକୁ ଆଧାର କରି CRS ଯେଉଁ ସବୁ କ୍ଷତିଗ୍ରସ୍ତ ସାମରିକ ବିମାନର ବିବରଣୀ ଦେଇଛି, ତାହା ଏହିପରି:
| ବିମାନ / ଡ୍ରୋନ୍ର ପ୍ରକାର | ସଂଖ୍ୟା | ବିଶେଷତ୍ୱ |
| ଏମକ୍ୟୁ-୯ ରିପର ଡ୍ରୋନ୍ | ୨୪ | ସବୁଠାରୁ ଅଧିକ ନଷ୍ଟ ହୋଇଥିବା ଘାତକ ଡ୍ରୋନ୍ |
| କେସି-୧୩୫ ଷ୍ଟ୍ରାଟୋଟାଙ୍କର୍ | ୦୭ | ଆକାଶ ମାର୍ଗରେ ଇନ୍ଧନ ଭରିବା ବିମାନ |
| ଏଫ୍-୧୫ଇ ଷ୍ଟ୍ରାଇକ୍ ଇଗଲ୍ | ୦୪ | ଶକ୍ତିଶାଳୀ ଲଢୁଆ ବିମାନ |
| ଏମ୍ସି-୧୩୦ଜେ କମାଣ୍ଡୋ-୨ | ୦୨ | ସ୍ୱତନ୍ତ୍ର ଅପରେସନ୍ ବିମାନ |
| ଏଫ୍-୩୫ଏ ଲାଇଟନିଂ-୨ | ୦୧ | ଅତ୍ୟାଧୁନିକ ଷ୍ଟେଲ୍ଥ ଫାଇଟର ଜେଟ୍ |
| ଏ-୧୦ ଥଣ୍ଡରବୋଲ୍ଟ-୨ | ୦୧ | ଭୂମି ଆକ୍ରମଣକାରୀ ବିମାନ |
| ଇ-୩ ସେଣ୍ଟ୍ରି ଆୱାକ୍ସ | ୦୧ | ଆକାଶମାର୍ଗରୁ ନଜର ରଖିବା ଓ ଚେତାବନୀ ଦେବା ବିମାନ |
| ଏଚ୍ଏଚ୍-୬-ଡବ୍ଲୁ ଜଲି ଗ୍ରୀନ୍-୨ | ୦୧ | ସାମରିକ ହେଲିକପ୍ଟର |
| ଏମ୍କ୍ୟୁ-୪ସି ଟ୍ରାଇଟନ୍ ଡ୍ରୋନ୍ | ୦୧ | ସାମୁଦ୍ରିକ ସର୍ଭେଲାନ୍ସ ଡ୍ରୋନ୍ |
| ମୋଟ୍ ନଷ୍ଟ ହୋଇଥିବା ବିମାନ/ଡ୍ରୋନ୍ | ୪୨ | ଏହି ସଂଖ୍ୟା ଆଗକୁ ଆହୁରି ବଢ଼ିପାରେ |
ରିପୋର୍ଟ ଅନୁସାରେ, ଏହି ଯୁଦ୍ଧ ଯୋଗୁଁ କେବଳ ସାମରିକ ସରଞ୍ଜାମ ବାବଦରେ ଆମେରିକାକୁ ପ୍ରାୟ ୨୯ ବିଲିୟନ ଡଲାରର ବିରାଟ ଆର୍ଥିକ କ୍ଷତି ସହିବାକୁ ପଡ଼ିଛି।
ଏତେ ବଡ଼ ପରିମାଣର ଆଧୁନିକ ଯୁଦ୍ଧବିମାନ ଓ ଅର୍ଥ ହରାଇବା ଆମେରିକା ସେନା ପାଇଁ ଏକ ବଡ଼ ଶକ୍ତ ଧକ୍କା ବୋଲି ସାମରିକ ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।