Category: ରାଜ୍ୟ ଖବର

ସତ୍ୟବାଦୀରେ ଗୋଳିଆ ପାଣିପାଗ। ଅଡ଼ୁଆରେ ବିଜେଡି । ବିଜେଡି କରୁଛି ବିଜେଡି ସହ ଲଢେଇ। ଚରମ ସୀମାରେ ଉମା – ସଂଜୟ କଳି। କାରଣ ଉଭୟ ହେଉଛନ୍ତି ଟିକେଟ ଆଶାୟୀ, ସେ ପୁଣି ସତ୍ୟବାଦୀରୁ। ଭିତରେ ଭିତରେ କୁହୁଳୁଥିବା ନିଆଁ ନିର୍ବାଚନ ପାଖେଇବା ସହ ଉପରକୁ ଉଠିଲାଣି। କେହି କାହାରିକୁ ଛାଡ଼ିବାକୁ ନାରାଜ । ସତ୍ୟବାଦୀରୁ ଲଢ଼ିବା ନେଇ ସଂଜୟ ମୈଦାନ ପ୍ରସ୍ତୁତିରେ ଲାଗିବା ପରେ ଉଭୟ ନେତା ମୁହାଁମୁହିଁ। ଯାହା ଦଳକୁ ପକାଇଲାଣି ଅକଳରେ।

ତେଣୁ ଉଭୟଙ୍କୁ ଶଙ୍ଖ ଭବନ ଡାକି ବୁଝାଇବାକୁ ଚେଷ୍ଟା କରିଛନ୍ତି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାଶ ଓ ମିଡିଆ ଉପଦେଷ୍ଟା ମାନସ ମଙ୍ଗରାଜ। । ଯାହାର ସତ୍ୟାସତ୍ୟ ଗତକାଲି ସତ୍ୟବାଦୀର ବିଜେଡ଼ି ସମର୍ଥକଙ୍କୁ ନେଇ ଧଉଳିରେ ସଂଜୟ ଦାସ ବର୍ମାଙ୍କ ଗୋପନୀୟ ବୈଠକ ପରେ ସାମ୍ନାକୁ ଆସିଛି। ଏହି ବୈଠକର ଏକ ଭିଡିଓ ଭାଇରାଲ ହେବା ସହ ଏଥିରେ ଉମାଙ୍କୁ ସଞ୍ଜୟ ସିଧାସଳଖ ଟାର୍ଗେଟ୍ କରିଥିବା ଦେଖିବାକୁ ମିଳିଥିଲା।

ବୈଠକରେ ସଞ୍ଜୟ କହିଥିଲେ, ଅଳ୍ପ ଦିନ ଭିତରେ ଶଙ୍ଖ ଭବନରେ ତାଙ୍କ ସହ ପ୍ରଣବ ପ୍ରକାଶ ଦାସ ଓ ଉମା ସାମନ୍ତରାୟ ଏକ ବୈଠକ ହେବ। ସେଠି ଉମାଙ୍କୁ କୁହାଯିବ ବ୍ରହ୍ମଗିରି ଯିବାକୁ। ରାଜି ନହେଲେ ଦଳରୁ ବିଦା ହେବେ ଉମା। ଯାହାକୁ ନେଇ ଗଣମାଧ୍ୟମରେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ସତ୍ୟବାଦୀ ବିଧାୟକ ଉମା ସାମନ୍ତରାୟ। କହିଲେ, ସତ୍ୟବାଦୀରେ ବିଜେଡିର ମୂଳଦୁଆ ଦେଇଛି। ସତ୍ୟାବାଦୀ କହିଲେ ଉମାକୁ ବୁଝାଏ। ତଥାପି ସୁପ୍ରିମୋ ଯାହାକୁ ଚାହିଁବେ ସେ ନିର୍ବାଚନ ଲଢ଼ିବ। କିଏ ନିଜେ ଟିକେଟ ଘୋଷଣା କଲା ମୋର ସେଥିରେ କିଛି ଯାଏ ଆସେ ନାହିଁ।

ଶୁଣିବାକୁ ମିଳୁଛି, ସତ୍ୟବାଦୀରେ ଉମାଙ୍କର ଦବଦବା ବେଶ ଭଲ ରହିଛି। ଆଉ ଚଳିତ ଥର ଏହି ଆସନ ମହିଳାଙ୍କୁ ମିଳିବ। ସେଥିପାଇଁ ଉମା ସେଠାରୁ ନିଜ ବୋହୂ ବା ପତ୍ନୀଙ୍କୁ ଠିଆ କରିବାକୁ ଲବି କରାଉଛନ୍ତି। ଏମିତି କି, ଉଭୟଙ୍କୁ ନେଇ ନବୀନ ନିବାସ ମଧ୍ୟ ଆସିଛନ୍ତି। ଏସବୁ ଚର୍ଚ୍ଚା ଭିତରେ ବୁଧବାର ଦିନ ଶଙ୍ଖ ଭବନରେ ପହଞ୍ଚିଥିଲେ ସତ୍ୟବାଦୀ ବିଧାୟକ ଉମା ସାମନ୍ତରାୟ ଓ ବରିଷ୍ଠ ବିଜେଡି ନେତା ସଞ୍ଜୟ ଦାସବର୍ମା। ଉଭୟ ନେତା ବିଜେଡି ସଂଗଠନ ସଂପାଦକ ପ୍ରଣବ ପ୍ରକାଶ ଦାସଙ୍କ ସହ ଆଲୋଚନା କରିଥିବା ଜଣାପଡ଼ିଛି। ତେବେ ଆଲୋଚନାରେ କୌଣସି ନିଷ୍କର୍ସ ବାହାରି ନ ଥିବା ଚର୍ଚ୍ଚା ହେଉଥିବା ବେଳେ ଖାଲି ଏହି ଦୁଇ ନେତା ନୁହଁନ୍ତି, ଏମିତି ୬-୭ ଆଶାୟୀ ଦଳର ମୁଣ୍ଡବିନ୍ଧାର କାରଣ ହୋଇଛନ୍ତି।

୨୦୨୪ ସଧାରଣ ନିର୍ବାଚନକୁ ରହିଲା ଆଉ ଅଳ୍ପ ଦିନ । ଟିକେଟ୍ କସରତରେ ମାତିଲେଣି ତିନି ଦଳର ଆଶାୟୀ। ତେବେ ବିଜେଡି ଶାସନରେ ଥିବାରୁ ଦଳରେ ଟିକେଟ ଆଶାୟୀଙ୍କ ସଂଖ୍ୟା ସର୍ବାଧିକ ରହିଛି। ତେଣୁ ନବୀନ ନିବାସ ଆଗରେ ସବୁ ଦିନ ଆଶାୟୀଙ୍କ ଲମ୍ବା ଲାଇନ ଦେଖିବାକୁ ମିଳୁଛି। ସାଂଗଠନିକ ସମ୍ପାଦକ ୧୦ ହଜାର ଆବେଦନ କଥା କହୁଥିବା ବେଳେ କିନ୍ତୁ ପ୍ରତିଦିନ ବଢ଼ି ଚାଲିଛି ଆବେଦନକାରୀଙ୍କ ସଂଖ୍ୟା । କିଏ ବାୟୋଡାଟା ସହ ଆସୁଛି ତ କିଏ ସାଙ୍ଗରେ ବିଭିନ୍ନ ସଙ୍ଗଠନକୁ ଆଣି ଦମ୍ ଦେଖାଇବା ଚେଷ୍ଟାରେ। ନବୀନ ଓ ପାଣ୍ଡିଆନଙ୍କୁ ଧନ୍ୟବାଦ ଆଳରେ ଟିକେଟ ହାତେଇବାକୁ ଚଳାଇଛନ୍ତି କସରତ। ତେବେ ଏହି ଟିକେଟ ଦୌଡରେ ଅଧିକାଂଶ ମହିଳା ଥିବା ଦେଖିବାକୁ ମିଳୁଛି। ନିଜ ଦକ୍ଷତା ଓ ବିଗତ ଦିନର କାର୍ଯ୍ୟଧାରା ଆଧାରରେ ଆଶାୟୀ ଟିକେଟ ପାଇବେ ବୋଲି ଆଶାବାଦୀ। ତେବେ ଆଜି ନବୀନ ନିବାସକୁ ଆସିଥିଲେ ବଲାଙ୍ଗିର ଡ ଜ୍ୟୋତି ପାଣିଗ୍ରାହୀ ଓ ଏରସମାର ଶୈଳବାଳା ରାଉତ । ଉଭୟ ଟିକେଟ ପାଇବେ ବୋଲି ଆଶାବ୍ୟକ୍ତ କରିଥିଲେ।

ଆଗୁଆ ଟିକେଟ୍ ପାଇଁ ସବୁ ଦଳ କସରତ କରିଥିଲେ ମଧ୍ୟ କୁହାଯାଉଛି ନିର୍ବାଚନ ବେଳେ ଦଳବଦଳ ଶାସକଦଳକୁ ଅଧିକ ଅଡୁଆରେ ପକାଇବ। କାହିଁକି ନା, ଗୋଟିଏ ଟିକେଟ୍ ପାଇଁ ଏକାଧିକ ଆଶାୟୀ। ଆଗୁଆ ଘୋଷଣା ବିଦ୍ରୋହ ପାଇଁ ସମୟ ଦେବ। ଏମିତି ବି ଏବେଠୁ ଅନେକ ବିଜେଡି ନେତା ଦଳ ଛାଡ଼ି ଅନ୍ୟ ଦଳରେ ମିଶିଲେଣି। ତଥାପି ସୁପ୍ରିମୋ ଯାହା ନିଷ୍ପତ୍ତି ନେବେ ତାହା ଶେଷ ନିଷ୍ପତ୍ତି ବୋଲି କହୁଛନ୍ତି ସମସ୍ତେ।

ବିଧାନସଭା ପବ୍ଲିକ ଆକାଉଣ୍ଟସ୍ କମିଟିର ଦୁଇ ଦିନିଆ କେନ୍ଦୁଝର ଗସ୍ତ । ସୋମବାର ସନ୍ଧ୍ୟାରେ କାନୁପୁର ବୃହତ୍ ଜକ ସେଚନ ପ୍ରକଳ୍ପ ଅଞ୍ଚଳ ପରିଦର୍ଶନ କରିବା ସହ ନିର୍ମାଣ କାର୍ଯ୍ୟର ଅଗ୍ରଗତି ନେଇ ତଦାରଖ କରିଛନ୍ତି ଲୋକ ଲେଖା କମିଟି । ବିରୋଧି ଦଳ ମୁଖ୍ୟ ସଚେତକ ମୋହନ ମାଝୀଙ୍କ ନେତୃତ୍ୱରେ ରେଙ୍ଗାଲି ବିଧାୟକ ନାଉରୀ ନାଏକ ଓ ନୀଳଗିରି ବିଧାୟକ ସୁକାନ୍ତ ନାଏକ ବାସୁଦେବପୁର ସ୍ଥିତ କାନୁପୁର ଡ୍ୟାମ୍ ପ୍ରକଳ୍ପ ଅଞ୍ଚଳ ପରିଦର୍ଶନ କରିଥିଲେ । ସ୍କିଲ ୱେ, କେନାଲ, ଡ୍ୟାମ୍ ଗେଟ୍, ଆଦିର ନିର୍ମାଣ ସମ୍ପର୍କରେ ଯନ୍ତ୍ରୀଙ୍କୁ ପଚାରି ବୁଝିବା ସହିତ ନିର୍ମାଣ କାର୍ଯ୍ୟରେ ବିଳମ୍ବ ନେଇ କ୍ଷୋଭ ପ୍ରକାଶ କରିଥିଲେ । ସେହିପରି ଡ୍ୟାମ୍ ନିର୍ମାଣ କାର୍ଯ୍ୟ ନିମ୍ନ ମାନର ହେଉଥିବା ସନ୍ଦେହ ବ୍ୟକ୍ତ କରିଛନ୍ତି ବିରୋଧି ଦଳ ମୁଖ୍ୟ ସଚେତକ ମୋହନ ମାଝୀ । ଏନେଇ ଜଳ ସମ୍ପଦ ବିଭାଗ ସହିତ ସମୀକ୍ଷା କରିବା ପରେ ସରକାରଙ୍କୁ ରିପୋର୍ଟ ଦିଆଯିବ ବୋଲି ସେ କହିଛନ୍ତି ।

୨ୟ ଦିନ ମଙ୍ଗଳବାର, ପିଏସି, ବଡ଼ବିଲ ସ୍ଥିତ ପିଟିସିଏଲ୍ ଇନଫ୍ରାଷ୍ଟ୍ରକଚର କମ୍ପାନୀର ବେନିଫିସିଏସନ୍ ପ୍ଲାଣ୍ଟ ପରିଦର୍ଶନ କରିବା ସହ କମ୍ପାନୀ ବିରୁଦ୍ଧରେ ରହିଥିବା ବିଭିନ୍ନ ଅନିୟମିତତାକୁ ନେଇ ଅନୁଧ୍ୟାନ କରିଥିଲେ । ଜଳ ପରିଚାଳନା ଓ ସବୁଜ ବଳୟ ସୃଷ୍ଟି ଆଦିକୁ ନେଇ ଅସନ୍ତୋଷ ପ୍ରକାଶ କରିଥିଲେ କମିଟି । ପିଟିସିଏଲ୍, କାରୋ ନଦୀରୁ ଜଳ ନେଇ ବ୍ୟବହାର ପାଇଁ ଅନୁମତି ପାଇଥିଲେ ସୁଦ୍ଧା ବିଗତ ୨ ବର୍ଷ ଧରି କେବଳ ଡିପ୍ ବୋରିଂ ମାଧ୍ୟମରେ ଭୂ-ତଳ ଜଳ ବ୍ୟବହାର କରିଆସୁଛି । ଯାହାଫଳରେ ଆଖପାଖ ଅଞ୍ଚଳରେ ଭୂ-ତଳ ଜଳସ୍ତର ହ୍ରାସ ପାଇବାରେ ଲାଗିଛି । ଅନ୍ୟପଟେ ପ୍ରଦୂଷିତ ଜଳକୁ ବିଶୋଧନ ନକରି ସିଧାସଳଖ ବାହାରକୁ ଛାଡ଼ି ଦେଉଥିବା ଫଳରେ ଚାଷୀକୂଳ ପ୍ରଭାବିତ ହେଉଥିବା କହିଛନ୍ତି ପବ୍ଲିକ ଆକାଉଣ୍ଟସ୍ କମିଟି ସଦସ୍ୟ ତଥା ବିଧାୟକ ସୁକାନ୍ତ ନାୟକ । ବୃକ୍ଷ ରୋପଣ କରିବା ଦିଗରେ କମ୍ପାନୀ ଆବଶ୍ୟକ ପଦକ୍ଷେପ ଗ୍ରହଣ କରୁ ନଥିବାରୁ କ୍ଷୋଭ ପ୍ରକାଶ କରିଥିଲେ କମିଟି । ସରକାରଙ୍କ ସମସ୍ତ ନୀତି ନିୟମକୁ ଏଠାରେ ଉଲଂଘନ କରାଯାଇଛି ବୋଲି କମିଟିର ଅଧ୍ୟକ୍ଷ ମୋହନ ମାଝୀ କହିଛନ୍ତି ।

ଏହାପରେ ରୁଗୁଡ଼ି ଠାରେ ଥିବା ନନ୍ଦିଘୋଷ ସ୍ପଞ୍ଜ ପ୍ଲାଣ୍ଟକୁ ଯାଇ ସେଠାରେ ପ୍ରଦୂଷଣ ନିୟନ୍ତ୍ରଣ ଦିଗରେ କମ୍ପାନୀ ଯେଉଁସବୁ ବ୍ୟବସ୍ଥା ଗ୍ରହଣ କରିଛି, ସେନେଇ ତଦାରଖ କରିବା ସହ ବିରକ୍ତି ଭାବ ପ୍ରକାଶ କରିଥିଲେ ପିଏସି । ବର୍ଷା ଜଳ ସଂରକ୍ଷଣ, ଜଳ ନିଷ୍କାସନ, ନିର୍ଗତ କଳା ଧୂଆଁ ପରିଚାଳନା ଆଦି ନେଇ ଆବଶ୍ୟକ ପଦକ୍ଷେପ ଗ୍ରହଣ କରୁନଥିବା ଦର୍ଶାଇ ପ୍ଲାଣ୍ଟ କର୍ତ୍ତୃପକ୍ଷଙ୍କୁ ତାଗିଦ୍ କରିଥିଲେ । ପ୍ଲାଣ୍ଟ ପରିଚାଳନାରେ କେବଳ ମାତ୍ର ଭୂ-ତଳ ଜଳ ବ୍ୟବହାର କରାଯାଉଥିବାରୁ ଉଦବେଗ ପ୍ରକାଶ କରିଥିଲେ ବିଧାନସଭା ପବ୍ଲିକ ଆକାଉଣ୍ଟସ୍ କମିଟି ।

ଏହାପରେ ଗୁଆଲି ଠାରେ ଥିବା ଜେଏସ ଡବ୍ଲୁ ଅଧିନ ନୁଆ ଗାଁ ଆଇରନ ଖଣିରେ ପହଞ୍ଚିଥିଲେ ପିଏସି । ଖଣି ପ୍ରଭାବିତ ଗ୍ରାମବାସୀଙ୍କ ବିଭିନ୍ନ ଅଭିଯୋଗକୁ ନେଇ ସଂପୃକ୍ତ ଖଣି କର୍ତ୍ତୃପକ୍ଷଙ୍କ ସହ ଆଲୋଚନା କରିବା ସହିତ ଏସବୁ ସମସ୍ୟାର କିଭଳି ସମାଧାନ ହୋଇପାରିବ ସେନେଇ କମ୍ପାନୀ ପଦକ୍ଷେପ ନେବା ପାଇଁ ପରାମର୍ଶ ଦେଇଥିଲେ । ଆଗାମୀ ଦିନରେ ଏ ସଂକ୍ରାନ୍ତରେ ସଂପୃକ୍ତ ବିଭାଗ ଗୁଡ଼ିକ ସହିତ ଆଲୋଚନା କରାଯା କାର୍ଯ୍ୟାନୁଷ୍ଠାନ ନିମନ୍ତେ ଆକ୍ସନ ଟେକେନ ରିପୋର୍ଟ ପ୍ରସ୍ତୁତ କରି ଦିଆଯିବ ବୋଲି ମୋହନ ମାଝୀ କହିଛନ୍ତି । ଏହି ଗସ୍ତ ସମୟରେ ଯୋଡ଼ା ଖଣି ଉପ ନିର୍ଦ୍ଦେଶକ, ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀଙ୍କ ସମେତ ସ୍ଥାନୀୟ ସରପଞ୍ଚ ମାନେ ଉପସ୍ଥିତ ରହିଥିଲେ ।

ପାରାଦ୍ଵୀପ- ୨୦୨୪ ରେ ନବୀନ ପଟ୍ଟନାୟକ ପୁଣି ଥରେ ମୁଖ୍ୟମନ୍ତ୍ରୀ ହେବେ। ତାଙ୍କୁ ପରାଜିତ କରିବା ପାଇଁ ଓଡିଶାରେ ଆଉ କେହି ସେଭଳି ନେତା ନାହାନ୍ତି। କୁଜଙ୍ଗ ବ୍ଲକ ପଡିଆରେ ଅନୁଷ୍ଠିତ “ପୁଣିଥରେ ନବୀନ” କାର୍ଯ୍ୟକ୍ରମରେ ଏଭଳି କିଛି ଦୃଢ ଉକ୍ତି ପ୍ରକାଶ କରିଛନ୍ତି ବରିଷ୍ଠ ରାଜନେତା ଦାମ ରାଉତ ।

ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ସମୟରେ ଓଡିଶାର ବିକାଶ ପାଇଁ ଯେଉଁ ନକ୍ସା ଆଙ୍କିଥିଲେ, ତାହାକୁ ପୁରଣ କରୁଛନ୍ତି ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ତାଙ୍କ ନେତୃତ୍ୱରେ ଓଡିଶାର ଦୃତ ବିକାଶ ହେଉଛି ଏବଂ ଆଗାମୀ ଦିନରେ ଏହାର ସୁଫଳ ଓଡିଶାବାସୀ ନିଶ୍ଚିତ ପାଇବେ। ୨୦୨୪ ନିର୍ବାଚନ ରେ ବିପୁଳ ବିଜୟ ହାସଲ କରିବେ ନବୀନ ପଟ୍ଟନାୟକ। ତାଙ୍କୁ ହରାଇବା ଭଳି କୌଣସି ନେତା ଓଡିଶାରେ ନାହାନ୍ତି ବୋଲି ପ୍ରକାଶ କରିଛନ୍ତି ।

ତେବେ ପାରାଦ୍ଵୀପ ବିଧାୟକ ସମ୍ବିତ ରାଉତରାୟଙ୍କ ନେତୃତ୍ୱରେ କୁଜଙ୍ଗ ବ୍ଲକ ପଡିଆ ରେ ଅନୁଷ୍ଠିତ ହୋଇଛି” ପୁଣିଥରେ ନବୀନ ” କାର୍ଯ୍ୟକ୍ରମ। ରାହାମା ଠାରୁ କୁଜଙ୍ଗ ପର୍ଯ୍ୟନ୍ତ ଏକ ବିଶାଳ ରାଲିର ଆୟୋଜନ କରାଯାଇଥିଲା। ହଜାର ହଜାର ଲୋକଙ୍କ ସମାବେଶ ଦେଖିବାକୁ ମିଳିଥିଲା କୁଜଙ୍ଗ ପଡିଆରେ। ଆୟୋଜିତ ସଭାରେ ବାଙ୍କି ବିଧାୟକ ପ୍ରଭାତ ତ୍ରିପାଠୀ , ପୂର୍ବତନ ସାଂସଦ ଡାକ୍ତର କୁଳମଣୀ ସାମଲ ଙ୍କ ସମେତ ବିଜେଡ଼ିର ବହୁ ଦଳୀୟ ନେତୃତ୍ବ ଯୋଗଦେଇଥିଲେ।

ଆଗାମୀ ଦିନରେ ପୁଣି ଥରେ ଷଷ୍ଠ ଥର ପାଇଁ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଙ୍କୁ ମୁଖ୍ୟମନ୍ତ୍ରୀ କରିବାପାଇଁ ଦଳୀୟ ନେତୃତ୍ବ ଆହ୍ବାନ ଦେଇଥିଲେ।