ଉତ୍ତର ପ୍ରଦେଶର ବହୁ ଚର୍ଚ୍ଚିତ ଆଡଭୋକେଟ ଉମେଶ ପାଲ ହତ୍ୟା ମାମଲାକୁ ୩ ମାସ ହେବାକୁ ବସିଲାଣି, କିନ୍ତୁ ଏ ଯାଏଁ ଶୁଟର ଗୁଡ୍ଡୁ ମୁସଲିମ ଓ ସବିରଙ୍କ କୌଣସି ଗନ୍ଧ ବାସ୍ନା ପାଉନି ୟୁପି ପୁଲିସ୍ । ଏପରିକି ଗ୍ୟାଙ୍ଗଷ୍ଟର ଅତିକ ଅହମଦର ସ୍ତ୍ରୀ ଶାହିସ୍ତା ପାଖରେ ବି ପହଞ୍ଚି ପାରିନାହିଁ। କେତେବେଳେ ଡ୍ରୋନ ସାହାଯ୍ୟରେ ଜଙ୍ଗଲରେ ପୁଣି କେତେବେଳେ ବଙ୍ଗଳାଦେଶରେ ଏମାନଙ୍କୁ ଖୋଜୁଛି ୟୁପି ପୋଲିସ । ମାଷ୍ଟର୍ ମାଇଣ୍ଡ ଶାହିସ୍ତା ଓ ସୁପାରି କିଲର ଗୁଡ୍ଡୁ ମୁସଲିମ ଓ ସବିର ପୁଲିସ୍କୁ ଚକମା ଦେଇ ଏବେବି ଫେରାର ଅଛନ୍ତି। ଏହାରି ଭିତରେ ପୁଲିସ ଜାଣିବାକୁ ପାଇଛି, ଏହି 3 ବିଦେଶ ଫେରାର ହେବାକୁ ଯୋଜନା କରୁଛନ୍ତି। ତେଣୁ ପୁଲିସ୍ ଜାରି କରିଛି ଲୁକ୍ ଆଉଟ୍ ନୋଟିସ୍ । ଏହି ୩ ଜଣଙ୍କ ନାଁରେ ଉତ୍ତରପ୍ରଦେଶର ପ୍ରୟାଗରାଜ ପୁଲିସ୍ ଜାରି କରିଛି ଲୁକ୍ଆଉଟ୍ ନୋଟିସ୍। ଫଳରେ ଏବେ ଏହି ୩ ଅଭିଯୁକ୍ତଙ୍କ ବିଦେଶ ଫେରାର ହେବା ଆଶଙ୍କା ଦେଖାଦେଇଛି ।
ପୁଲିସ୍ ହେପାଜତରେ ଥିବା ଅତିକ ଓ ତା ଭାଇ ଅଶରଫକୁ ଗତମାସରେ ୩ ଜଣ ଯୁବକ ପ୍ରୟାଗରାଜରେ ଗୁଳି କରି ହତ୍ୟା କରିଥିଲେ। ଅତିକର ମୃତ୍ୟୁ ପରେ ପୁଲିସ୍ ସହ ଲୁଚକାଳି ଖେଳୁଥିବା ତା’ର ପତ୍ନୀ ଶାହିସ୍ତା ସମେତ ଅତିକର ଖାସ୍ ସାର୍ପ ସୁଟର ଗୁଡ୍ଡୁ ମୁସଲିମ ଓ ସବିର ବିଦେଶ ଫେରାର ହୋଇଯିବ ବୋଲି ଆଶଙ୍କା କରାଯାଉଥିଲା।
ପୂର୍ବରୁ ଶାହିସ୍ତା ମୁଣ୍ଡରେ ୫୦ ହଜାର ଟଙ୍କାର ପୁରସ୍କାର ରାଶି ଥିବା ବେଳେ ଏବେ ତାହାକୁ ବଢ଼ାଯାଇ ଲକ୍ଷେ ଟଙ୍କା କରାଯାଇଛି। ତଥାପି ମିଳୁନି କିଛି ଫଳ। ସେପଟେ ଗୁଡ୍ଡୁ ମୁସଲିମ୍କୁ ପୁଲିସ୍ ଖୋଜିବାକୁ ନାକେଦମ ହେଉଥିବା ବେଳେ ସେ କେତେବେଳେ ଓଡ଼ିଶାରେ ତ କେତେବେଳେ କର୍ଣ୍ଣାଟକାରେ ଲୁଚିଥିବା ଶୁଣିବାକୁ ମିଳିଥିଲା। ଏପରିକି ସେ ରାଜ୍ୟରୁ ରାଜ୍ୟ ଡେଇଁ ଚାଲିଥିବା ବେଳେ ତାକୁ ଧରିବା ପୁଲିସ୍ ପାଇଁ କାଠିକର ପାଠ ହେଉଛି। ୟୁପି ପୁଲିସ୍ ଓ ଏସଟିଏଫ ଟିମ୍ ଗୁଡ୍ଡୁ ମୁସଲିମ ଓ ଶାହିସ୍ତାଙ୍କ ଲୋକେସନ ଚିହ୍ନଟ କରି ତାଙ୍କ ନିକଟରେ ପହଞ୍ଚିବାକୁ ଚେଷ୍ଟା ଜାରି ରଖିଥିଲେ ବି ସବୁବେଳେ ନିରାଶ ହେବାକୁ ପଡ଼ୁଛି ।
ସୂଚନାଯୋଗ୍ୟ, ଉମେଶ ପାଲ ଓ ତାଙ୍କ ଦୁଇ ସୁରକ୍ଷା କର୍ମୀଙ୍କୁ ପ୍ରୟାଗରାଜସ୍ଥିତ ତାଙ୍କ ବାସଭବନ ସାମ୍ନାରେ ଚଳିତ ବର୍ଷ ଫେବୃଆରୀ ମାସରେ ଗୁଳି କରି ହତ୍ୟା କରାଯାଇଥିଲା। ଉମେଶ ପାଲଙ୍କୁ ଗୁଳି କରି ହତ୍ୟା କରାଯାଇଥିବା ବେଳେ ଘଟଣାସ୍ଥଳରେ ଗୁଡ୍ଡୁ ମୁସଲିମ ବୋମା ପକାଇଥିଲା। ଏହି ଦୃଶ୍ୟ ସିସିଟିଭିରେ କଏଦ ହୋଇଛି। ଏହା ପରଠୁ ଗୁଡ୍ଡୁ ମୁସଲିମ ଫେରାର ଥିବା ବେଳେ ତା’ ମୁଣ୍ଡରେ ରହିଛି ୫ ଲକ୍ଷ ଟଙ୍କାର ପୁରସ୍କାର ରାଶି।
ଉମେଶ ପାଲ ହତ୍ୟାକାଣ୍ଡରେ ସମ୍ପୃକ୍ତ ଥିବା ୬ ଅଭିଯୁକ୍ତଙ୍କୁ ପୋଲିସ ଏନକାଉଣ୍ଟର କରିସାରିଲାଣି। ଆଉ ବଞ୍ଚିଛନ୍ତି ଗୁଡ୍ଡୁ ମୁସଲିମ ଓ ସବିର। ସବିର ମୁଣ୍ଡରେ ବି ୫ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରାଯାଇଥିବା ବେଳେ ତା’ର ବି ଟେର ପାଇପାରୁନି ପୁଲିସ୍।