କୃତ୍ରିମ ବୁଦ୍ଧିମତ୍ତା କ୍ଷେତ୍ରରେ ନିଜର ଦବଦବା ବଜାୟ ରଖିବା ପାଇଁ ଗୁଗୁଲ୍ ଏକ ବିରାଟ ପଦକ୍ଷେପ ନେଇଛି। AI ଷ୍ଟାର୍ଟଅପ୍ ଆନ୍ଥ୍ରୋପିକ୍ ସହ ଗୁଗୁଲ୍ ଏକ ଦୀର୍ଘକାଳୀନ ସହଭାଗିତା କରିଥିବା ସୂଚନା ମିଳିଛି। ଗୁଗୁଲ୍ ମୋଟ ୪୦ ବିଲିୟନ ଡଲାର ପର୍ଯ୍ୟନ୍ତ ନିବେଶ କରିବାକୁ ଯୋଜନା ରଖିଛି, ଯାହା ଦୁଇଟି ପର୍ଯ୍ୟାୟରେ ହେବ: ଚୁକ୍ତି ଅନୁଯାୟୀ ପ୍ରଥମେ ୧୦ ବିଲିୟନ ଡଲାର ପ୍ରଦାନ କରାଯିବ।
ବାକି ୩୦ ବିଲିୟନ ଡଲାର ଆନ୍ଥ୍ରୋପିକ୍ର କାର୍ଯ୍ୟଦକ୍ଷତା ଓ ଲକ୍ଷ୍ୟ ପୂରଣ ଉପରେ ନିର୍ଭର କରିବ। ଏହି ବୁଝାମଣା କେବଳ ଆର୍ଥିକ ନୁହେଁ, ବରଂ ବୈଷୟିକ ସ୍ତରରେ ମଧ୍ୟ ବେଶ୍ ଗୁରୁତ୍ୱପୂର୍ଣ୍ଣ: ଆନ୍ଥ୍ରୋପିକ୍ ନିଜର AI ପ୍ରଯୁକ୍ତିକୁ ବିକଶିତ କରିବା ପାଇଁ ଗୁଗୁଲ୍ର କଷ୍ଟମ ଚିପ୍ସ ଏବଂ କ୍ଲାଉଡ୍ କମ୍ପ୍ୟୁଟିଂ ସେବାର ସହାୟତା ନେବ। ମାଇକ୍ରୋସଫ୍ଟ ଓ ଓପନ୍ ଏଆଇର ମେଣ୍ଟକୁ ଟକ୍କର ଦେବା ପାଇଁ ଗୁଗୁଲ୍ ଏହି ନିବେଶ କରିଛି। ଏହି ବିରାଟ ପୁଞ୍ଜି ନିବେଶ ଫଳରେ AI କ୍ଷେତ୍ରରେ ଗବେଷଣା ତ୍ୱରାନ୍ୱିତ ହେବ। ଆଗାମୀ ଦିନରେ ଚାଟ୍ବୋଟ୍, ଡାଟା ଆନାଲିସିସ୍ ଏବଂ କମ୍ପ୍ୟୁଟିଂ ସେବାଗୁଡ଼ିକ ଆହୁରି ଅଧିକ ସଠିକ୍ ଏବଂ ଶକ୍ତିଶାଳୀ ହେବାର ଆଶା କରାଯାଉଛି।