କେନ୍ଦୁଝର ଜିଲ୍ଲା ପଣ୍ଡାପଡା ଥାନା ଅଧୀନ ବିନିଦା ଗ୍ରାମରେ ଘଟିଛି ନାରକୀୟକାଣ୍ଡ। ଜନୈକ ମହିଳା ପାଲା ଗାୟକଙ୍କୁ କେହି ଦୁର୍ବୃତ୍ତ ନୃଶଂସ ଭାବେ ହତ୍ୟା କରିବା ଘଟଣା ସ୍ଥାନୀୟ ଅଞ୍ଚଳରେ ଶୋକର ବାତାବରଣ ସୃଷ୍ଟି କରିଛି। ମୃତ ପାଲା ଗାୟିକା ହେଲେ ଗ୍ରାମର ସତ୍ୟଭାମା ସିଂ।
ବିନିଦା ଗ୍ରାମର ସତ୍ୟଭାମା ସ୍ଥାନୀୟ ଅଞ୍ଚଳରେ ଜଣେ ପାଲା ଗାୟିକା ଭାବେ ବେଶ ଖ୍ୟାତି ଅର୍ଜନ କରିଥିଲେ। ସେ ପାଲା ଗୟକି ସହ ବିନିଦା ପଞ୍ଚାୟତର ପୂର୍ବତନ ସମିତି ସଭ୍ୟା ଓ ବର୍ତ୍ତମାନର ବିଜେପି ମଣ୍ଡଳ ସଭାପତି ଦାୟିତ୍ୱରେ ଥିଲେ । ଗତକାଲି ବିଳମ୍ବିତ ରାତିରେ ସତ୍ୟଭାମାଙ୍କୁ କେହି ଦୁର୍ବୃତ୍ତ ପଥରରେ ଛେଚି ହତ୍ୟା କରିଥିବା ସନ୍ଦେହ କରାଯାଉଛି । ଖବର ପାଇ ସଦର ଏସଡିପିଓ, ପଣ୍ଡାପଡା ପୋଲିସ ଓ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ସୂଚନାଯୋଗ୍ୟ, ସତ୍ୟଭାମା ସିଂ ଅବିବାହିତ ଥିବା ବେଳେ ପାଲା ଗାୟିକା ଭାବେ ଜିଲ୍ଲାରେ ସୁନାମ ଅର୍ଜନ କରିଥିଲେ । ପରବର୍ତ୍ତୀ ସମୟରେ ସେ ବିଜେପି ମଣ୍ଡଳ ସଭାପତି ହୋଇଥିଲେ। ଗତକାଲି ରାତିରେ ତାଙ୍କର ସନ୍ଦେହଜନକ ହତ୍ୟା ପରେ ତାଙ୍କ ସହଯୋଗୀ ପାଲା ଗାୟକଙ୍କୁ ସନ୍ଦେହ କରାଯାଉଛି। କାରଣ ଉଭୟଙ୍କ ମଧ୍ୟରେ କୌଣସି କାରଣରୁ କଳହ ଲାଗି ରହିଥିଲା।
ତେବେ ସତ୍ୟଭାମା ବିଜେପି ମଣ୍ଡଳ ଦାଇତ୍ୱରେ ଥିବାରୁ ବିଜେପି ଘଟଣାର ନିରପେକ୍ଷ ତଦନ୍ତ ଦାବି କରିଛି । ଏଭଳି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।