ନାଳରେ ଭାସୁଛି ବିଡା ବିଡା ଟଙ୍କା

ବିହାରର ସାସାରାମ ମୁଫସ୍ସିଲ ଥାନା ଅଧୀନସ୍ଥ ମୁରାଦାବାଦ ନିକଟରେ ଥିବା ଏକ ନାଳରେ ପସିଛନ୍ତି ବହୁ ଲୋକ। କୂଳକୁ ଆସିବା ବେଳକୁ ସେମାନଙ୍କ ହାତରେ ବିଡା ବିଡା ଟଙ୍କା। ଯିଏ ଯେତେ ପାରୁଛି ନାଳରୁ ସଂଗ୍ରହ କରି ଚାଲିଛି ଟଙ୍କା। ଦୃଶ୍ୟଟି କୌଣସି ଫିଲ୍ମର ସିନ ପରି ମନେ ହେଉ ଥିଲେ ମଧ୍ୟ ସତ୍ୟ। ଏହି ଘଟଣାର ଭିଡିଓ ଭାଇରାଲ ହେବାରେ ଲାଗିଛି। ଏସମ୍ପର୍କରେ ଜଣା ପଡିବା ପରେ ପ୍ରଶାସନ ଘଟଣାର ଯାଞ୍ଚ ଆରମ୍ଭ କରି ଦେଇଛି। ଏତେ ଟଙ୍କା କେଉଁଠୁ ଆସିଲା, କିଏ ପକାଇଲା ଓ କାହିଁକି ସହ ଟଙ୍କା ଅସଲି ନା ନକଲି ତାକୁ ନେଇ ହେଉଛି ଯାଞ୍ଚ।

ଘଟଣାଟି ଶନିବାର ସକାଳୁ ମୁରାଦାବାଦ ନିକଟରେ ଥିବା ଏକ ନାଳରେ ବିପୁଳ ଟଙ୍କା ବିଡ଼ା ଭାସୁଥିବା ଖବର ବ୍ୟାପିବା ପରେ ନାଳ ପାଖକୁ ଶହଶହ ଲୋକଙ୍କ ସୁଅ ଛିଟିଥିଲା। ସମସ୍ତେ ଆଗପଛ ନ ଭାବି ନାଳକୁ ଡେଇଁ ପଡ଼ି ଟଙ୍କା ସଂଗ୍ରହରେ ଲାଗିଥିଲେ। ଯିଏ ଯେତେ ପାରିଲା ବ୍ୟାଗରେ ଭରି ଘରକୁ ଚାଲିଲା। ପାଣିରେ ଭାସୁଥିବା ଟଙ୍କା ବିଡାରେ ଥିଲା ୧୦,୧୦୦, ୫୦୦ ଓ ୨୦୦୦ର  ବିଡ଼ା ରହିଥିଲା ବୋଲି ଜଣାପଡ଼ିଛି। ନାଳରୁ ଟଙ୍କା ସଂଗ୍ରହ କରୁଥିବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି।

ନାଳକୁ ଓହ୍ଲାଇ ଟଙ୍କା ଗୋଟାଉଥିବା ଲୋକଙ୍କ ଭିଡିଓକୁ ଘଟଣାସ୍ଥଳରେ ଉପସ୍ଥିତ ଥିବା କେହି ଜଣେ ରେକର୍ଡ କରି ନେଇଥିଲେ।  ପରେ ଏହି ଭିଡିଓ ସୋସିଆଲ ମିଡିଆରେ ପୋଷ୍ଟ ହେବାପରେ ଭାଇରାଲ ହୋଇଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଉକ୍ତ ସ୍ଥାନକୁ ସିଜ କରିବା ସହ ଲୋକଙ୍କୁ ନାଳରୁ ଉଠି  ଯିବାକୁ କହିଥିଲା। ଯାଞ୍ଚ ପରେ ହିଁ ଏହି ଘଟଣା ପଛର କାରଣ କ’ଣ ତାହା ଜଣାପଡ଼ିବ।