ବନ୍ଦର ନିଶିଦ୍ଧାଞ୍ଚଳ CQ-1 ବର୍ଥରେ ଘଟିଥିବା ଏକ ଭୟାବହ ଅଘଟଣ ସମଗ୍ର ଶ୍ରମିକ ଏବଂ ପରିବହନ ଶ୍ରେଣୀକୁ ଶୋକାକୁଳ କରିଛି। ଜାହାଜ ଲୋଡିଂ କାର୍ଯ୍ୟ ସମୟରେ କ୍ରେନ ବକେଟ୍ରୁ ବହୁ ପରିମାଣର ଲୁହାପଥର ହଠାତ୍ ଖସି ପଡ଼ି ଜଣେ ହାଇଓ୍ବା ଡ୍ରାଇଭରଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଛି।
ସୂଚନା ଅନୁସାରେ, ବନ୍ଦର CQ-1 ବର୍ଥରେ ଫିଲିପାଇନସ ଧ୍ୱଜବାହୀ ‘ଜିନ୍ ହାଇ ହେ’ ନାମକ ଜାହାଜରେ ଲୁହାପଥର ଲୋଡିଂ କାର୍ଯ୍ୟ ଚାଲିଥିଲା। ବର୍ଷା ପରିସ୍ଥିତି ଯୋଗୁଁ ଲୁହାପଥର ଭିଜି କାଦୁଅ ଆକାର ନେଇଥିବାରୁ ଲୋଡିଂ ପ୍ରକ୍ରିୟା କିଛିଟା ଜଟିଳ ହୋଇପଡ଼ିଥିଲା। ଏହି ସମୟରେ କ୍ରେନ ବକେଟ୍ ମାଧ୍ୟମରେ ଉଠାଯାଉଥିବା ଲୁହାପଥରର ଭାରସାମ୍ୟ ହଠାତ୍ ବିଗଡ଼ିଯାଇଥିଲା। ଅପରାହ୍ନ ରୁ ସନ୍ଧ୍ୟା ସମୟରେ ଲୋଡିଂ ଚାଲିଥିବା ବେଳେ କ୍ରେନ ବକେଟ୍ରେ ଧରା ରହିଥିବା ଭାରୀ ପରିମାଣର ଲୁହାପଥର ଅସନ୍ତୁଳିତ ହୋଇ ହଠାତ୍ ତଳକୁ ଖସି ପଡ଼ିଥିଲା। ଏହା ସିଧାସଳଖ ଭାବେ ସେଠାରେ ଥିବା ଏକ ହାଇଓ୍ବା ଗାଡ଼ିର କେବିନ୍ ଉପରେ ପଡ଼ିଯାଇଥିଲା। ଦୁର୍ଭାଗ୍ୟବଶତଃ ଡ୍ରାଇଭର ସରୋଜ ଖିଲାର ସେହି ସମୟରେ କେବିନ୍ ଭିତରେ ଥିଲେ।
ଘଟଣା ଏତେ ଅଚାନକ ଭାବରେ ଘଟିଥିଲା ଯେ ତାଙ୍କୁ ପଳାଇବା କିମ୍ବା ସୁରକ୍ଷିତ ହେବା ପାଇଁ କୌଣସି ସୁଯୋଗ ମିଳିନଥିଲା। ଭାରୀ ଲୁହାପଥରର ଚାପରେ କେବିନ୍ ପୁରା ଚୁର୍ମାର୍ ହୋଇଯାଇଥିଲା ଏବଂ ସରୋଜ ଖିଲାରଙ୍କ ଘଟଣାସ୍ଥଳରେ ହିଁ ପ୍ରାଣ ହାରାଇଥିଲେ।ଘଟଣା ପରେ ବନ୍ଦର ଅଞ୍ଚଳରେ ତୁରନ୍ତ ଆତଙ୍କ ଓ ଅସ୍ଥିରତା ସୃଷ୍ଟି ହୋଇଥିଲା। ଅନ୍ୟ ଶ୍ରମିକ ଓ ଡ୍ରାଇଭରମାନେ ଭୟଭୀତ ହୋଇ ତତ୍କ୍ଷଣାତ୍ ସୁରକ୍ଷିତ ସ୍ଥାନକୁ ସରିଯାଇଥିଲେ। କାର୍ଯ୍ୟସ୍ଥଳରେ ଅସ୍ଥାୟୀ ଭାବେ ଲୋଡିଂ କାର୍ଯ୍ୟ ବନ୍ଦ କରାଯାଇଥିଲା।
ଏହି ଅଘଟଣର ଖବର ପାଇବା ସହିତ ବନ୍ଦର ଅଧିକାରୀ, ସିଆଇଏସଏଫ ଜବାନ ଏବଂ ମେରାଇନ ପୋଲିସ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ପ୍ରଥମେ ସ୍ଥିତିକୁ ନିୟନ୍ତ୍ରଣ କରିବା ସହିତ ଅଞ୍ଚଳକୁ ସୁରକ୍ଷିତ କରିଥିଲେ।ପରେ ମୃତଦେହକୁ ଭାରୀ ଯନ୍ତ୍ରପାତି ସହାୟତାରେ ଉଦ୍ଧାର କରାଯାଇ ବ୍ୟବଛେଦ ପାଇଁ ପଠାଯାଇଛି। ପୋଲିସ ଏହି ଘଟଣାର ସମ୍ପୂର୍ଣ୍ଣ ତଦନ୍ତ ଆରମ୍ଭ କରିଛି। କ୍ରେନ ଅପରେସନ୍ ସମୟରେ ସୁରକ୍ଷା ନିୟମ ପାଳନ ହୋଇଥିଲା କି ନାହିଁ, ଏବଂ ଏହି ଦୁର୍ଘଟଣା ପାଇଁ କିଏ ଦାୟୀ ସେଥିରେ ତଦନ୍ତ ଜୋରଦାର ହେଉଛି।ଏହି ଅଘଟଣ ପରେ ବନ୍ଦର ଶ୍ରମିକ ଓ ଡ୍ରାଇଭର ମହଳରେ ଗଭୀର ଶୋକର ଛାୟା ଖେଳିଯାଇଛି। ସ୍ଥାନୀୟ ଅଞ୍ଚଳରେ ମଧ୍ୟ ଏହି ଦୁର୍ଘଟଣାକୁ ନେଇ ଦୁଃଖ ଓ ଚିନ୍ତା ପ୍ରକାଶ ପାଇଛି।