ଭାରତର ସାମରିକ ଶକ୍ତି ହେବ ଆହୁରି ମଜବୁତ: ଆପାଚି ହେଲିକପ୍ଟର ଓ ହାଓ୍ବିଟଜର୍ସ ତୋପ ପାଇଁ ଆମେରିକାର ମେଗା ପ୍ରତିରକ୍ଷା ପ୍ୟାକେଜ୍

ଭାରତର ସୀମା ସୁରକ୍ଷା ଏବଂ ପ୍ରତିରକ୍ଷା ବ୍ୟବସ୍ଥାକୁ ଅଧିକ ଶକ୍ତିଶାଳୀ କରିବା ଦିଗରେ ଆମେରିକା ସରକାର ଏକ ବଡ଼ ପଦକ୍ଷେପ ନେଇଛନ୍ତି। ଆମେରିକାର ବୈଦେଶିକ ବିଭାଗ ଭାରତ ପାଇଁ ଦୁଇଟି ପ୍ରମୁଖ ପ୍ରତିରକ୍ଷା ସହାୟତା ପ୍ୟାକେଜ୍‌କୁ ସବୁଜ ସଙ୍କେତ ଦେଇଛି। ଏହି ଚୁକ୍ତି ଅଧୀନରେ ଭାରତୀୟ ସେନା ପାଖରେ ଥିବା ପ୍ରସିଦ୍ଧ ‘ଆପାଚି’ ଯୁଦ୍ଧ ହେଲିକପ୍ଟର ଏବଂ ‘M777-A2’ ଅଲ୍ଟ୍ରା-ଲାଇଟ୍ ହାଓ୍ବିଟଜର୍ସ ତୋପର ରକ୍ଷଣାବେକ୍ଷଣ ସହ ଜଡ଼ିତ ଅତ୍ୟାବଶ୍ୟକ ସେବା ଓ ଅତ୍ୟାଧୁନିକ ଉପକରଣ ଯୋଗାଇ ଦିଆଯିବ।

ସରକାରୀ ସୂତ୍ର ଅନୁଯାୟୀ, ପ୍ରତିରକ୍ଷା କ୍ଷେତ୍ରରେ ହୋଇଥିବା ଏହି ଦୁଇଟିଯାକ ଚୁକ୍ତିର ମୋଟ ଆନୁମାନିକ ମୂଲ୍ୟ ପ୍ରାୟ ୪୨୮.୨ ମିଲିୟନ୍ ଆମେରିକୀୟ ଡଲାର। ଭାରତୀୟ ସେନା ପକ୍ଷରୁ ନିଜର ଦ୍ରୁତ ଆକ୍ରମଣକାରୀ ଯୁଦ୍ଧାସ୍ତ୍ରଗୁଡ଼ିକର ଦୀର୍ଘକାଳୀନ କାର୍ଯ୍ୟଦକ୍ଷତା ଓ ସୁରକ୍ଷା ପାଇଁ ଆମେରିକାକୁ ଏହି ଅନୁରୋଧ କରାଯାଇଥିଲା।

ବିଶ୍ୱର ଅଗ୍ରଣୀ ବିମାନ ନିର୍ମାତା କମ୍ପାନୀ ‘ବୋଇଂ’ ଏବଂ ପ୍ରତିରକ୍ଷା ସଂସ୍ଥା ‘ଲକହିଡ୍ ମାର୍ଟିନ୍’ ମିଳିତ ଭାବେ ଆପାଚେ ହେଲିକପ୍ଟର ସହ ଜଡ଼ିତ ସମସ୍ତ ଗୁରୁତ୍ୱପୂର୍ଣ୍ଣ ବୈଷୟିକ ଏବଂ ଯାନ୍ତ୍ରିକ ସହାୟତା ପ୍ରଦାନ କରିବେ। କୁମ୍ବ୍ରିଆରେ ମୁଖ୍ୟାଳୟ ଥିବା ପ୍ରତିଷ୍ଠିତ ବ୍ରିଟିଶ କମ୍ପାନୀ ‘ବିଏଇ ସିଷ୍ଟମ୍ସ’ ଭାରତର ‘M777-A2’ ହାୱିଜର୍ସ ତୋପଗୁଡ଼ିକ ପାଇଁ ଆବଶ୍ୟକୀୟ ଲଜିଷ୍ଟିକ୍ସ ଓ ସମର୍ଥନ ସେବା ଯୋଗାଇଦେବ। ଭାରତୀୟ ସେନାରେ ପୂର୍ବରୁ ହିଁ ଆପାଚେ ହେଲିକପ୍ଟର ଏବଂ ‘M777’ ହାୱିଜର୍ସ ସାମିଲ ରହି ସୀମା ସୁରକ୍ଷାରେ ଏକ ପ୍ରମୁଖ ଭୂମିକା ଗ୍ରହଣ କରିଆସୁଛନ୍ତି। ମାତ୍ର ଏହି ଉନ୍ନତ ଯୁଦ୍ଧାସ୍ତ୍ରଗୁଡ଼ିକୁ ସର୍ବଦା ଯୁଦ୍ଧ ପାଇଁ ପ୍ରସ୍ତୁତ ରଖିବାକୁ ହେଲେ ନିୟମିତ ବୈଷୟିକ ସହାୟତା, ଇଞ୍ଜିନିୟରିଂ ଏବଂ ଲଜିଷ୍ଟିକ୍ସ ସପୋର୍ଟର ବେଶ୍ ଆବଶ୍ୟକତା ରହିଛି। ଆମେରିକାର ଏହି ମଞ୍ଜୁରୀ ଫଳରେ ଏବେ ଭାରତୀୟ ସେନାକୁ ସମସ୍ତ ପ୍ରକାରର ଉନ୍ନତ ସେବା, ସ୍ପେୟାର ପାର୍ଟସ, ସୈନ୍ୟ ତାଲିମ ଏବଂ ଯାନ୍ତ୍ରିକ ଡକ୍ୟୁମେଣ୍ଟେସନ୍ ସହଜରେ ଉପଲବ୍ଧ ହୋଇପାରିବ। ବର୍ତ୍ତମାନର ଭୂ-ରାଜନୈତିକ ସ୍ଥିତି ଏବଂ ସୀମାନ୍ତରେ ଚାଲିଥିବା ଉତ୍ତେଜନା ମଧ୍ୟରେ ଭାରତ ନିଜର ସୀମା ସୁରକ୍ଷା କ୍ଷମତାକୁ ସଦୃଢ଼ କରିବା ଉପରେ ସର୍ବାଧିକ ଧ୍ୟାନ ଦେଉଛି। ଏଭଳି ସମୟରେ ଆମେରିକାର ଏହି ସହାୟତା ପ୍ୟାକେଜ୍ ଭାରତର ପ୍ରତିରକ୍ଷା ଶକ୍ତିକୁ ବଢ଼ାଇବା ସହ ଦୁଇ ଗଣତାନ୍ତ୍ରିକ ଦେଶ ମଧ୍ୟରେ ବଢ଼ୁଥିବା ବିଶ୍ୱାସ ଓ ପ୍ରତିରକ୍ଷା ସହଯୋଗକୁ ପ୍ରମାଣିତ କରୁଛି।