ପିଲାଙ୍କ ପାଇଁ ନୂଆ ନିୟମ : ପଞ୍ଚମ ଶ୍ରେଣୀ ଯାଏଁ ମାତୃଭାଷା , ୧୦ ଦିନ ବ୍ୟାଗ୍ମୁକ୍ତ ଶିକ୍ଷା
ନୂଆ ଶିକ୍ଷାନୀତି ନିୟମନୁଯାୟୀ ପଞ୍ଚମ ଶ୍ରେଣୀ ପର୍ଯ୍ୟନ୍ତ ମାତୃଭାଷାରେ ଶିକ୍ଷାଦାନକୁ ବାଧ୍ୟତାମୂଳକ କରାଯିବ | ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀମାଙ୍କ ପାଇଁ ୧୦ ଦିନିଆ ବ୍ୟାଗ୍ମୁକ୍ତ ଶିକ୍ଷାଦାନ ବ୍ୟବସ୍ଥା ମଧ୍ୟ ରହିବ। ବିଦ୍ୟାଳୟ ସ୍ତରୀୟ ଶିକ୍ଷା ପାଠ୍ୟକ୍ରମର ସଂସ୍କାର ଓ ପାଠ୍ୟପୁସ୍ତକ ବିକାଶ ନେଇ ଆୟୋଜିତ ସମୀକ୍ଷା ବୈଠକରେ ଏହି ସୂଚନା ଦେଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ |
କେନ୍ଦ୍ରମନ୍ତ୍ରୀ କହିଛନ୍ତି, ୨୦୨୬-୨୭ ଶିକ୍ଷାବର୍ଷରୁ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ନୂତନ ପାଠ୍ୟପୁସ୍ତକ ଆରମ୍ଭ କରାଯିବ। ଏହି ପାଠ୍ୟପୁସ୍ତକଗୁଡ଼ିକରେ ‘ଓଡ଼ିଶା ରାଜ୍ୟ ପାଠ୍ୟକ୍ରମ ଢାଞ୍ଚା’ ଉପରେ ଶିକ୍ଷା ରହିବ । ଏଥିପାଇଁ ରାଜ୍ୟର ପ୍ରାୟ ୧.୬୭ ଲକ୍ଷ ଶିକ୍ଷକଙ୍କୁ ନୂତନ ପାଠ୍ୟକ୍ରମରେ ଦକ୍ଷ କରିବା ପାଇଁ ବିଶେଷ ପ୍ରଶିକ୍ଷଣ ମଧ୍ୟ ପ୍ରଦାନ କରାଯିବ |
ପଞ୍ଚମ ଶ୍ରେଣୀ ପର୍ଯ୍ୟନ୍ତ ମାତୃଭାଷାରେ ଶିକ୍ଷାଦାନକୁ ସୁଦୃଢ଼ କରାଯିବା କାରଣ ପିଲାମାନଙ୍କର ମୌଳିକ ଶିକ୍ଷାର ମୂଳଦୁଆ ଠିକ ରହିବ ବୋଲି କେନ୍ଦ୍ରମନ୍ତ୍ରୀ କହିଛନ୍ତି |
ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି ଯେ , ଜାତୀୟ ଶିକ୍ଷା ନୀତି–୨୦୨୦ ଅଧୀନରେ ୫୫ଟି ନୂତନ ଏନ୍ସିଇଆରଟି ପାଠ୍ୟପୁସ୍ତକକୁ ଓଡ଼ିଆରେ ଅନୁବାଦ କରାଯାଇଛି | ଏଥିସହ ଛାତ୍ରଛାତ୍ରୀଙ୍କ ସାମଗ୍ରିକ ବିକାଶ ପାଇଁ ଓଡ଼ିଶାରେ ୩ଟି ନୂତନ ବିଷୟ ଯୋଡ଼ା ଯାଇଛି | ଯାହାକି କଳା ଶିକ୍ଷା, ଶାରୀରିକ ଶିକ୍ଷା ଓ ସୁସ୍ଥତା, ତାହା ସହ ଧନ୍ଦାମୂଳକ ଶିକ୍ଷା | ସେହିପରି ଜନ୍ମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଶିଶୁମାନଙ୍କ ପୋଷଣ ଓ ସ୍ୱାସ୍ଥ୍ୟ ପ୍ରତି ଅଧିକ ଧ୍ୟାନ ଦେବାକୁ ଏହି ଶିକ୍ଷାନୀତିରେ ଗୁରୁତ୍ୱ ଦିଆଯାଇଛି।
ଏହି ସମୀକ୍ଷା ବୈଠକରେ ରାଜ୍ୟର ୩୦ଟି ଜିଲ୍ଲାର ଜିଲ୍ଲା ଶିକ୍ଷା ଅଧିକାରୀ, ସମସ୍ତ ଜିଲ୍ଲା ଡାଏଟ୍, କେନ୍ଦ୍ରୀୟ ବିଦ୍ୟାଳୟ, ଜବାହର ନବୋଦୟ ବିଦ୍ୟାଳୟ, ଓଡ଼ିଶା ଆଦର୍ଶ ବିଦ୍ୟାଳୟ ଏବଂ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟର ଅଧ୍ୟକ୍ଷମାନେ ଆଭାସୀ ମାଧ୍ୟମରେ ସାମିଲ ହୋଇଥିଲେ |
…..
ମରଣ ମୁହଁରୁ ସ୍ବଦେଶ ଫେରିଲେ ଭାରତୀୟ, ବଖାଣିଲେ ଲୋମଟାଙ୍କୁରା ଅନୁଭୂତି
ଇରାନରେ ଦିନକୁ ଦିନ ବିଗଡ଼ୁଥିବା ସୁରକ୍ଷା ପରିସ୍ଥିତି ଓ ହିଂସାତ୍ମକ ଜନଆନ୍ଦୋଳନ ମଧ୍ୟରେ ସେଠାରେ ଫସି ରହିଥିବା ଭାରତୀୟ ନାଗରିକମାନଙ୍କ ସୁରକ୍ଷିତ ଭାବେ ସ୍ବଦେଶ ଫେରିବାକୁ ପ୍ରୟାସ ଆରମ୍ଭ କରାଯାଇଛି | ଶୁକ୍ରବାର ଅଧା ରାତିରେ ଏୟାରର ବିମାନ W-5071 ଯୋଗେ ପ୍ରଥମ ଦଳ ଭାରତୀୟ ନାଗରିକ ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ସୁରକ୍ଷିତ ଭାବେ ପହଞ୍ଚିଛନ୍ତି |
ବିମାନବନ୍ଦରରେ ପରିବାରସଦସ୍ୟମାନେ ନିଜ ନିଜ ପରିବାରମାନଙ୍କୁ ଭାବପ୍ରବଣ ହୋଇ ଆଲିଙ୍ଗନ କରି ସ୍ୱାଗତ କରିଥିଲେ| ଘରକୁ ଫେରିଥିବା ଭାରତୀୟମାନେ ଇରାନର ବର୍ତ୍ତମାନର ଭୟାବହ ଓ ଲୋମଟାଙ୍କୁରା ପରିସ୍ଥିତିକୁ ବିଷୟରେ କହିଛନ୍ତି | ଗତ ଦୁଇ ସପ୍ତାହ ଧରି ଇରାନରେ ସମ୍ପୂର୍ଣ୍ଣ ଇଣ୍ଟରନେଟ୍ ବନ୍ଦ କରାଯାଇଥିଲା ଯାହା ଫଳରେ ପରିବାର ସହିତ କିମ୍ବା ଭାରତୀୟ ଦୂତାବାସ ସହ ଯୋଗାଯୋଗ ସମ୍ପୂର୍ଣ୍ଣ ବିଛିନ୍ନ ହୋଇଯାଇଥିଲା|
ଜମ୍ମୁ–କାଶ୍ମୀରର ଜଣେ ଛାତ୍ର କହିଛନ୍ତି, ପ୍ରତିବାଦ ଏତେ ହିଂସାତ୍ମକ ଥିଲା ଯେ ଘରୁ ବାହାରିବା ମାନେ ଜୀବନକୁ ବିପଦ ରେ ପକାଇବା ସହ ସମାନ ଥିଲା| ପ୍ରତିବାଦକାରୀମାନେ ଭଙ୍ଗାରୁଜା, ପୋଡ଼ାଜଳା କରୁଥିଲେ | ଇରାନରେ ଚାଲିଥିବା ଏହି ଅଶାନ୍ତି ମୂଳ କାରଣ ଦେଶର ଭୁଶୁଡ଼ିପଡୁଥିବା ଅର୍ଥନୀତିର ପରିଣାମ | ଇରାନୀ ମୁଦ୍ରାର ମୂଲ୍ୟ ରେକର୍ଡସ୍ତରକୁ ଖସିବା ପରେ ମୁଦ୍ରାସ୍ଫୀତି ବିରୋଧରେ ଆରମ୍ଭ ହୋଇଥିବା ପ୍ରତିବାଦ ଏବେ ଦେଶର ସମସ୍ତ ୩୧ଟି ପ୍ରଦେଶକୁ ବ୍ୟାପିଛି | ପ୍ରତିବାଦକାରୀମାନେ ଅର୍ଥନୈତିକ ସଂସ୍କାର ସହିତ ରାଜନୈତିକ ପରିବର୍ତ୍ତନ ମଧ୍ୟ ଦାବି କରୁଛନ୍ତି |
ମାନବାଧିକାର ସଂଗଠନମାନଙ୍କ ଅନୁଯାୟୀ, ସୁରକ୍ଷା ବାହିନୀର କାର୍ଯ୍ୟାନୁଷ୍ଠାନରେ ହଜାର ହଜାର ଲୋକ ପ୍ରାଣ ହରାଇଛନ୍ତି | କିନ୍ତୁ ଇଣ୍ଟରନେଟ୍ ବନ୍ଦ ଥିବାରୁ ଠିକ ତଥ୍ୟ ମିଳି ପାରୁ ନାହିଁ | ପରିସ୍ଥିତିକୁ ଦୃଷ୍ଟିରେ ରଖି ଭାରତ ସରକାର ନିଜ ନାଗରିକମାନଙ୍କର ସୁରକ୍ଷା ପାଇଁ ତ୍ରିସ୍ତରୀୟ ରଣନୀତି ଆପଣେଇ ଥିଲେ | ବୈଦେଶିକ ମନ୍ତ୍ରଣାଳୟ ବର୍ତ୍ତମାନ ଇରାନରେ ରହୁଥିବା ପ୍ରାୟ ୯ ହଜାରରୁ ୧୦ ହଜାର ଭାରତୀୟଙ୍କ ଡାଟାବେସ୍ ଅପଡେଟ୍ କରୁଛି | ଫସି ରହିଥିବା ଭାରତୀୟଙ୍କ ମଧ୍ୟରେ ବହୁ ସଂଖ୍ୟକ ଛାତ୍ରଛାତ୍ରୀ ଓ ତୀର୍ଥଯାତ୍ରୀ ମଧ୍ୟ ସାମିଲ ଅଛନ୍ତି |
ପରିସ୍ଥିତି ଉପରେ ନଜର ରଖିବାକୁ ୨୪ ଘଣ୍ଟିଆ ନିୟନ୍ତ୍ରଣ କକ୍ଷ ସକ୍ରିୟ କରାଯାଇଛି। ତେହେରାନସ୍ଥ ଭାରତୀୟ ଦୂତାବାସ ପକ୍ଷରୁ ଜରୁରୀକାଳୀନ ହେଲ୍ପଲାଇନ୍ ନମ୍ବର ୯୮୯୧୨୮୧୦୯୧୧୫ \ ୯୮୯୧୨୮୧୦୯୧୦୯ ଜାରି କରାଯାଇଛି। ଭାରତ ସରକାର ଆବଶ୍ୟକ ପଡିଲେ ‘ଅପରେସନ୍ ଗଙ୍ଗା’ ପରି ବଡ଼ ଉଦ୍ଧାର ମିଶନ ଆରମ୍ଭ କରିବାକୁ ମଧ୍ୟ ପ୍ରସ୍ତୁତ ରହିଛନ୍ତି। ଏହାଅନ୍ତର୍ଗତ ବାୟୁସେନାର ସି–୧୭ ଗ୍ଲୋବମାଷ୍ଟର ପରି ସାମରିକ ବିମାନ ବ୍ୟବହାର କରି ଫସିଥିବା ଭାରତୀୟମାନଙ୍କୁ ସୁରକ୍ଷିତ ଭାବରେ ସ୍ବଦେଶ ଫେରାଇ ଆଣାଯିବ।