ଆମର ଦୈନନ୍ଦିନ ଜୀବନରେ ଆମେ ସବୁଜିନିଷ ବ୍ୟବହାର କରୁ। ତା ଭିତରୁ ପ୍ଲାଷ୍ଟିକ ହେଉଛି ଅନ୍ୟତମ। ଏହାକୁ ବହୁଳ ମାତ୍ରାରେ ସମସ୍ତେ ବ୍ୟବହାର କରନ୍ତି । ଘରୁ ଆରମ୍ଭ କରି ଅଫିସ୍ , ଯାତ୍ରା ସମୟରେ ପାଣି ବୋତଲରେ ସଭିଏ ପାଣି ପିଅନ୍ତି । ଏମିତିକି ବସ୍ , ଟ୍ରେନରେ ଗଲା ବେଳେ ବ୍ୟାଗରେ ପ୍ଲାଷ୍ଟିକର ପାଣି ବୋତଲଟିଏ ପକାଇବାକୁ ଭୁଲୁନାହିଁ । ଏବଂ ଘରକୁ ମଧ୍ୟ ଅତିଥି ଆସିଥିଲେ ତାଙ୍କୁ ପରଷିଥିବା ପ୍ଲାଷ୍ଟିକର କୋଲ୍ଡଡ୍ରିଙ୍କ୍ସ ବୋତଲକୁ ଆମେ ଫୋପାଡି ନଥାଉ । ବର୍ଷ ବର୍ଷ ଧରି ସେହି ବୋତଲରୁ ହିଁ ପାଣି ପିଉ ।
କିନ୍ତୁ ଏହି ପ୍ଲାଷ୍ଟିକ୍ ଦେହ ପାଇଁ କେତେ କ୍ଷତିକାରକ ତାହା ଆମେ ଜାଣି ସୁଦ୍ଧା ସ୍ବାସ୍ଥ୍ୟକୁ ଅବହେଳା କରି ସେହି ବୋତଲରେ ହିଁ ପାଣି ପିଇଥାଉ । ଖୁବ୍ କମ୍ ପରିବାର ଥିବେ ଯେଉଁମାନେ ଏହି ସ୍ଲୋ ପଏଜନ୍ ବୋତଲରେ ପାଣି ପିଇବାକୁ ପସନ୍ଦ କରନ୍ତି ନାହିଁ । କିନ୍ତୁ ଅଧାରୁ ଅଧିକ ଘରେ ପ୍ଲାଷ୍ଟିକ ବୋତଲରେ ଏବେ ଯାଏଁ ପାଣି ପିଉଛନ୍ତି । ତେବେ ଆପଣ ବି ଯଦି ଏହି ଭୁଲ୍ କରୁଛନ୍ତି ତାହେଲେ ଏହାର ପରିଣାମ କେତେ ଭୟାବହ ହୋଇପାରେ ଜାଣିନିଅନ୍ତୁ ।
ପ୍ରୋସିଡିଙ୍ଗ୍ ଅଫ୍ ଦ ନ୍ୟାସନାଲ୍ ଏକାଡେମୀ ଅଫ୍ ସାଇନ୍ସେଜ୍ ନାମକ ଏକ ସଂସ୍ଥା ଚମକାଇଦେଲା ଭଳି ଏକ ରିପୋର୍ଟ ବାହାର କରିଥିଲା । ଯେଉଁଥିରେ କୁହାଯାଇଥିଲା ଯେ ଗୋଟିଏ ଲିଟର ବୋତଲବନ୍ଦ ପାଣିରେ ପାଖାପାଖି ୨.୪୦ ଲକ୍ଷ ପ୍ଲାଷ୍ଟିକର ଛୋଟ ଛୋଟ ଟୁକୁଡା ଗଚ୍ଛିତ ହୋଇରହିଥାଏ । ଯାହାଦ୍ବାରା ଶରୀର ଉପରେ ଏହାର କୁପ୍ରଭାବ ପଡ଼ିଥାଏ । ସୁବିଧାଜନକ ଲାଗୁଥିବା ଏହି ବୋତଲ ଶରୀର ପାଇଁ ଆଦୌ ସୁରକ୍ଷିତ ନୁହଁ ।
ପ୍ରତିଦିନ ପ୍ଲାଷ୍ଟିକ ବୋତଲରେ ପାଣି ପିଇବା ଯାହା ରୋଗକୁ ନିମନ୍ତ୍ରଣ କରି ଡ଼ାକିବା ତାହା । ହାୱାର୍ଡ ସ୍କୁଲ୍ ଅଫ୍ ପବ୍ଲିକ୍ ହେଲଥର ଏକ ରିସର୍ଚ୍ଚ ଅନୁସାରେ , ପଲି କାର୍ବୋନେଟ୍ ର ବୋତଲ ହୃଦୟ ରୋଗ ଏବଂ ଡାଏବେଟିସର ବିପଦକୁ ଦୁଇଗୁଣା ଅଧିକ ବଢାଇଦିଏ । ଏଥିରେ କ୍ୟାମିକାଲ୍ ବିସ୍ଫେନାଲ୍ ଥିବାରୁ ଏହା ଶରୀର ପାଇଁ ସ୍ଲୋ ପଏଜନ୍ ଭଳି କାମ କରେ ।
ଏକ୍ସପର୍ଟଙ୍କ କହିବାନୁସାରେ , ପ୍ଲାଷ୍ଟିକ ବୋତଲରେ ନିୟମିତ ରୂପେ ପାଣି ପିଇଲେ ପ୍ରଜନନ କ୍ଷମତା ଉପରେ ଏହାର ପ୍ରଭାବ ପଡ଼ିଥାଏ । ଏହି ବୋତଲର ପାଣି ହର୍ମୋନ୍ ଇନବାଲାନ୍ସ କରିବା ସହ ମାଇକ୍ରୋ ପ୍ଲାଷ୍ଟିକରୁ ବାହାରୁଥିବା ଦୂଷିତ ପାଣି କୋଷିକାରେ ପୀଡ଼ା ସୃଷ୍ଟି କରିଥାଏ । ପ୍ଲାଷ୍ଟିକ ବୋତଲର ପାଣିକୁ ନିୟମିତ ପିଇବା ଦ୍ବାରା କ୍ୟାନ୍ସର ଭଳି ମାରାତ୍ମକ ରୋଗ ହେବାର ମଧ୍ୟ ଅନେକ ସମ୍ଭାବନା ଥାଏ ।
ପ୍ଲାଷ୍ଟିକ ବୋତଲ ଗରମ ପଦାର୍ଥର ସଂସ୍ପର୍ଶରେ ଆସିଲା କ୍ଷଣି ଏଥିରେ କ୍ଷତିକାରକ ରାସାୟନ ଉତ୍ପନ୍ନ ହୁଏ ଆଉ ଏହି ପାଣି ପିଇବା ଦ୍ବାରା କର୍କଟ ଭଳି ଦୁଃସାଧ୍ୟ ରୋଗ ଶରୀରକୁ ଜାବୁଡ଼ି ଧରେ । ନିକଟରେ ହୋଇଥିବା ଏକ ରିସର୍ଚ୍ଚରେ ୧ ଲିଟର ପ୍ଲାଷ୍ଟିକ୍ ବୋତଲରୁ ପାଖାପାଖି ୧ ଲକ୍ଷରୁ ଅଧିକ ନେନୋପ୍ଲାଷ୍ଟିକ ମିଳିଛି । ଯାହା ଏତେ ଛୋଟ ଯେ ବ୍ଲଡ୍ ସର୍କୁଲେସନ୍ ଏବଂ କୋଷିକା ମାଧ୍ୟମରେ ମସ୍ତିଷ୍କକୁ ପାଣି ପହଁଞ୍ଚାଇଲା ଭଳି କାମ କରିଥାଏ । ଏହି ରିସର୍ଚ୍ଚକୁ ଶୁଣିଲାମାତ୍ରେ ହିଁ ଜଣାପଡୁଛି କାହିଁକି ସରକାର ପ୍ଲାଷ୍ଟିକକୁ ବ୍ୟାନ୍ କରିବା ପାଇଁ ଏତେ କସରତ କରୁଛନ୍ତି ।
ହାୱାର୍ଡ ସ୍କୁଲ୍ ଅଫ୍ ପବ୍ଲିକ୍ ହେଲଥର ରିସର୍ଚ୍ଚ ଅନୁସାରେ , ପଲି କାର୍ବୋନେଟର ବୋତଲରେ ବିସ୍ଫେନାଲ୍ – ଏ ଥିବାରୁ ଏହା ଶରୀରକୁ ପ୍ରବେଶ କଲେ ହୃଦୟ ରୋଗ ଏବଂ ଡାଏବେଟିଜର ବିପଦକୁ ଅଧିକ ବଢାଇଦିଅନ୍ତି । ଏଥିରେ ଥିବା ବିପିଏ ଏବଂ ଫେଥଲେଟସ୍ କ୍ୟାମିକାଲ ପ୍ରଜନନ କ୍ଷମତାକୁ କମାଇଥାଏ । ଏହାଦ୍ବାରା ହର୍ମୋନାଲ୍ ସନ୍ତୁଳନ ବିଗିଡ଼ି ବନ୍ଧ୍ୟାପଣ ଭଳି ସମସ୍ୟାର ସମ୍ମୁଖୀନ ହେବାକୁ ପଡ଼େ ।
ପ୍ଲାଷ୍ଟିକ ବୋତଲର ପାଣି ବ୍ରେଷ୍ଟ୍ କ୍ୟାନ୍ସର , ବ୍ରେନ୍ କ୍ୟାନ୍ସର ଭଳି ସମସ୍ୟା ସୃଷ୍ଟି କରାଉଥିବା ବେଳେ ପ୍ଲାଷ୍ଟିକ୍ ପଲିଥିନରେ ରଖିଥିବା ଖାଦ୍ୟ ନିୟମିତ ଖାଇବା ଦ୍ବାରା ଶରୀରରେ କ୍ୟାନ୍ସର ଜନ୍ମ ନେଇଥାଏ । ପ୍ଲାଷ୍ଟିକ୍ ପାଣି ପାଉଚ୍ କିମ୍ବା ବୋତଲରେ ପାଣି ପିଇଲେ ଲ୍ୟୁକେସିୟା ତଥା ଲିମ୍ଫୋମା ଭଳି ରୋଗର ସମ୍ମୁଖୀନ ହେବାକୁ ପଡ଼ିଥାଏ ।
ଆପଣ ବି ଯଦି ପ୍ଲାଷ୍ଟିକ ବୋତଲରୁ ପାଣି ପିଉଛନ୍ତି ତାହେଲେ ଆଜି ହିଁ ଏହି ଅଭ୍ୟାସକୁ ତ୍ୟାଗ କରନ୍ତୁ । ତମ୍ବା , ମାଟି , ଷ୍ଟିଲ୍ ଭଳି ବୋତଲରେ ପାଣି ପିଇବା ସ୍ବାସ୍ଥ୍ୟ ପ୍ରତି ବହୁତ ଭଲ ।