ହୃଦଘାତରେ ବରିଷ୍ଠ ଭିଡିଓ ଜର୍ଣ୍ଣାଲିଷ୍ଟ ମନୋରଞ୍ଜନ ସାହୁଙ୍କ ନିଧନ, ଓଡ଼ିଆ ଗଣମାଧ୍ୟମରେ ଶୋକର ଛାୟା

ଆଉ ନାହାନ୍ତି ବରିଷ୍ଠ ଭିଡିଓ ଜର୍ଣାଳିଷ୍ଟ ମନୋରଞ୍ଜନ ସାହୁ। ମିଷ୍ଟଭାଷୀ, ମେଳାପି, ସହୃଦୟ ଓ ଲୋକପ୍ରିୟ ବ୍ୟକ୍ତି ଭାବରେ ପରିଚିତ ସ୍ୱର୍ଗତଃ ସାହୁ ମାତ୍ର ୪୯ବର୍ଷ ବୟସରେ ଇହଲୀଳା ସମ୍ବରଣ କରିଛନ୍ତି ।

ବିଗତ ଦୁଇ ଦିନ ହେବ ଶରୀର ଅସୁସ୍ଥ ଥିବା ହେତୁ କାର୍ଯ୍ୟରେ ଯୋଗ ଦେଇନଥିଲେ ସ୍ୱର୍ଗତଃ ସାହୁ। ଆଜି ହଠାତ୍ ତାଙ୍କର ସ୍ବାସ୍ଥ୍ୟ ଅବସ୍ଥା ଗୁରୁତର ହେବାରୁ ତାଙ୍କୁ ଭୁବନେଶ୍ବରର ଏକ ଘରୋଇ ହସ୍ପିଟାଲକୁ ଚିକିତ୍ସା ପାଇଁ ନିଆଯାଇଥିଲା। କିନ୍ତୁ ଚିକିତ୍ସାଧୀନ ଅବସ୍ଥାରେ ହୃଦଘାତ ଯୋଗୁଁ ଆଜି ପ୍ରାୟ ୨:୩୦ ମି. ସମୟରେ ତାଙ୍କର ଦେହାନ୍ତ ଘଟିଥିଲା । ୨୦୦୪ ରୁ , ପାଖାପାଖି ୨୦ ବର୍ଷରୁ ଅଧିକ ସମୟ ହେବ, ସେ ଜଣେ ଭିଡିଓ ଜର୍ଣାଲିଷ୍ଟ ଭାବରେ ଓଡ଼ିଶାର ପ୍ରମୁଖ ଗଣମାଧ୍ୟମରେ କାର୍ଯ୍ୟକରି ଆସୁଥିଲେ।

ସ୍ୱର୍ଗତଃ ସାହୁ ଜଣେ ମିଷ୍ଟଭାଷୀ, ମେଳାପି, ସହୃଦୟ ଓ ଲୋକପ୍ରିୟ ବ୍ୟକ୍ତି ଥିଲେ । ଏହାସହିତ, ଜଣେ ଭିଡିଓ ଜର୍ଣ୍ଣାଲିଷ୍ଟ ଭାବରେ ନିଜର କର୍ତବ୍ୟପରାୟଣତା ଓ ସମୟାନୁବର୍ତିତା ପାଇଁ ମଧ୍ୟ ସେ ବେଶ ଜଣାଶୁଣା ଥିଲେ ।

ତାଙ୍କର ଦେହାନ୍ତ ପରେ ରାଜ୍ୟ ବିଜେପି ସଭାପତି ମନମୋହନ ସାମଲ ଓ ବିରୋଧୀ ଦଳ ନେତା ଜୟନାରାୟଣ ମିଶ୍ର ଶୋକ ପ୍ରକାଶ କରିଛନ୍ତି। ତାଙ୍କର ଅମର ଆତ୍ମାର ସଦଗତି କାମନା କରିବା ସହିତ ଏଭଳି ଦୁଖଦଃ ସମୟରେ ଶୋକସନ୍ତପ ପରିବାରବର୍ଗ ଏବଂ ବନ୍ଧୁଜନଙ୍କୁ ଅସୀମ ସାହସ ଓ ଧୈର୍ଯ୍ୟ ପ୍ରଦାନ କରିବା ପାଇଁ ସୂଚନା ଟିଭି ପ୍ରଭୁ ଶ୍ରୀ ଜଗନ୍ନାଥଙ୍କ ନିକଟରେ ପ୍ରାର୍ଥନା କରୁଛି ।